AANIIDI QOOLIHA COYI UMO | AMMANAMA HASIISSANNOHU MAYIRAATI?
Ammanama Yanna Saꞌino Coyeeti?
Hitooshi alba Jaappaanete mitte dirijjite giddo woxe shallanganni kifilera loosanno. Mitto barra loosiisaanchisi ledo woxe shallaganni heeꞌreenna, loosiisaanchisi kaphu rippoorte qixxeessanno gede kulisi. Hitooshi kayinni tiiꞌꞌisi togo asse haqaqqaalara fajjannosikkita xawise kuli. Hakko daafira, iso silxaanetenni rooranno manchi loosunni fushshe huneemmohe yee waajjishiishisi; gedensaanni qole loosunni fushshine hunnoonnisi.
Shiimu agani gedensaanni, Hitooshi looso hoogino daafira lowo geeshsha dadilli. Mitte hige loosoho eessinasira qaalu xaꞌmo xaꞌminanni heeꞌneennasi, hanaaqu loosira anga wodhannokkita kulino. Hakkiinni xaꞌmo xaꞌmanni noosi manchi, “Heddanni noottohu rosaminokki coyeeti!” yiisi. Hitooshi minisi manninna jaallasi ammanamasi agurannokki gede jawaachishshinosi; ikkirono, isi huluullama hanafi. Isi togo yiino: “Ammanaꞌyara yee kapha giwaꞌya gara ikkase huluullama hanafummo.”
Hitooshira tuncu yiinosihu dadillisanno coyi, ammanama danchate yee hedannohu baalanka manna ikkinokkita leellishanno. Mitu manni isinni, hakko iso daddalaano ammanama lophote guficho ikkitanno yite heddanno. Wodiidi Afirikira qaxarante loossannoti mitte mancho togo yitino: “Looseemma basera noohu batinyu manni ammanaminoha diꞌꞌikkino; qoleno mito wote insa assannore asseemma gede uurra ofolla hoꞌlannoe.”
Xaa yannara, mittu ammanama hunanno coyi kaphoho; kaphu yannankera baasa halaꞌlino. Shiimu diri albaanni, Masaachustiisi Emiheristi Yuniversitera mannu surre daafira xiinxallannohu Rooberti Feldimani xibbunni 60 anga ikkannohu jajjabbu manni, hasaawanno wote tonnu daqiiqi giddo ajayi ajeenna mitte hige kaphannota coyiꞌrino. Isi togo yiino: “Kuni lowo geeshsha dhagge ikkannoreeti. Kaphu heeshshonke giddo togo rosamino coye ikkinota dihendoommo.” Rooru manni wolu manni dogansara hasiꞌrannokkiha ikke heeꞌreenna kaphu togo rosamino coye ikkasi dhaggete!
Ikkina xaa yannara ammanama hooga lawishshaho kaphunna mooru togo batiꞌrinohu mayiraati? Ammanama hooga dagooma baala gawajjitannohu ma garinniiti? Roorenkanni kayinni, hanaaqu giddora eessannonke coye qoropha dandiineemmohu hiittoonniiti?