Yaaddinoonte

QULLAAWU MAXAAFI BIDDISHSHA: “Heeshshoꞌne daafira yaada agurre.”—Maatewoosi 6:25.

Togo yaa mayyaate? Yesuusi togo yee coyiꞌrinohu Ilaalu Sibikatesi yannaraati. Qullaawu Maxaafi tiro amadinohu mittu maxaafi “yaada” yaannohu Girikete qaali “anga ajjannonke yannara, hudiꞌneemmo wotenna heeshshonke giddo wolu qarri tuncu yaannonke yannara macciishshantannonke hedo” ikkitinota xawisino. Roore wote yaachishannonkehu albillitte ikkanno yine hendeemmo coyeeti. Hige maalaamittete hasiisannonkeri daafiranna banxeemmo manni keeraanchimma daafira yaadanke nooreeti. (Filiphisiyusi 2:20) Yesuusi rosaanosira “horonta yaaddinoonte” yii yannara insa quwa saꞌe yaada agurtanno gede amaalanni no; gaꞌara quwa saꞌne yaadanke techo afiꞌneemmo hagiirre huntara dandiitanno.—Maatewoosi 6:31, 34.

Tini amaale yannankera kaaꞌlitanno? Yesuusi uyino amaale harunsanke hayyote. Mayira? Mite xiinxallo mannu lowo geeshsha yaadanno yannara simpatatiki yinanni nerve agurtukkinni loossannotanna tini qolte “keeraanchimmate qarra lawishshaho, mada, wodanu xibbanna asimete xibba” kalaqqannota huwachishshino.

Yesuusi yaada hasiissannonkekki korkaata xawise kulino: Yaande abbineemmori dino. Yesuusi “Kiꞌne giddo yaaddotenni dirisi aana mitte cigile lexxa dandaannohu nooni?” yee xaꞌmino. (Maatewoosi 6:27) Yaada heeshshonke seedissannota agurina dirinke aana mitto sokonda nafa leddara didandiitanno. Qoleno mittu coyi duuchanka wote ninke yaandoommo gede diꞌꞌikkanno. Mittu fullahaanchi tenne hajo lainohunni togo yiino: “Albillittete daafira yaada beebba daafurate; qoleno albillittete daafira yaandeemmo coyi duucha wote ninke yaandoommo geeshsha bushinoha ikka hoogara dandaanno.”

Ikkina yaada agura dandiineemmohu hiittoonniiti? Umihunni, Magano addaxxineeti. Maganu ceate sagale aanninna awawa biifise uddisiisanni heeꞌre, heeshshonsa giddo ayyaanaamittete coye balaxisiisanno mannira hasiisannonsare diaannonsa? (Maatewoosi 6:25, 26, 28-30) Layinkihunni, albillittete daafira yaada agurreeti. Yesuusi togo yiino: “Gaꞌa daafira horonta yaaddinoonte; korkaatuno gaꞌara umisihu yaachishanno coyi noosi.” “Mittu mittunku barrira umisihu gari qarri noosi” yiniro sumuu diyaatto?—Maatewoosi 6:34.

Yesuusi amaale harunsine keeraanchimmanke agadha dandiineemmo. Hakkiinnino sae, tenne assinummoro Qullaawu Maxaafi “Maganu salaame” yee woshshannota giddiidi harshammo afiꞌneemmo.—Filiphisiyusi 4:6, 7.