Agarooshshu Shaeta INTERNEETETE LAYIBIRERE
Agarooshshu Shae
INTERNEETETE LAYIBIRERE
Sidaamu Afoo
  • QULLAAWA MAXAAFA
  • ADDI ADDI BORRO
  • GAMBOOSHSHE
  • w16 Sadaasa qool. 19-23
  • Yaachishannoꞌne Coye Baala Yihowa Aana Tuqqe

Doodhootto borrora viidiyo dino.

Hasi'rootto viidiyo fa'nama didandiitino.

  • Yaachishannoꞌne Coye Baala Yihowa Aana Tuqqe
  • Yihowa Mangiste Egensiissannota Agarooshshu Shae (Xiinxallote Ittime)—2016
  • Cinaancho Birxichuwa
  • Fiixxanno Birxichuwa
  • DUHA IKKINOHERE YIHOWA AANA TUQQI
  • MAGANU QAALI AANNOTA GIDDOYIDI SALAAME
  • QULLAAWU AYYAANINNI AFIꞌNANNI AKATTA
  • HORO “YAADDINOONTE”
  • ADDAXXATTO MANCHIRA HASAAPHI
  • MAGANU LEDO JAALOOꞌMA ROORE KAAꞌLITANNOHE
  • Labballo Amaddanno Yaaddo—Qullaawu Maxaafi Kulanno Mali Maati?
    Wole Birxichuwa
  • Qullaawu Maxaafi Mayyaanno?
    Yihowa Mangiste Egensiissannota Agarooshshu Shae (Ellannita)—2017
  • Yaaddo Qeelle Saꞌꞌa Dandiineemmo Gara
    Yihowa Mangiste Egensiissannota Agarooshshu Shae (Xiinxallote Ittime)—2022
  • Dano Iillitanno Yine Yaada
    Yihowa Mangiste Egensiissannota Agarooshshu Shae—2015
Ledde Nabbawi
Yihowa Mangiste Egensiissannota Agarooshshu Shae (Xiinxallote Ittime)—2016
w16 Sadaasa qool. 19-23
Mittu rodii qarra ikkinosi coye hedanni yaadanni no

Yaachishannoꞌne Coye Baala Yihowa Aana Tuqqe

“Kiꞌnera malannohu [Yihowaatina] qarrisannoꞌnere baala isi aana tuqqe.”—1 PHE. 5:7.

FAARSO: 38, 7

MAYITE QOLATTO?

  • Maganu Qaali yaaddotenni fooliishshiꞌneemmo gede kaaꞌlannonkehu hiittoonniiti?

  • ‘Maganu keere’ woy salaame afiꞌra dandaattohu hiittoonniiti?

  • Songo yaaddo qeelate kaaꞌlitannohehu hiittoonniiti?

1, 2. (a) Mito wote yaachishannori iillinkero dhagge assiꞌra hasiissannonkekkihu mayiraati? (Hanafote noo misile lai.) (b) Konni birxichira ronseemmori maati?

HEEꞌNOOMMOHU yaaddo batidhino yannaraati. Sheexaanu Daawuloosi lowo geeshsha hanqino daafira, “egemmannoha hasiꞌranni ittananno doobbiichi gede” doyanno. (1 Phe. 5:8; Aju. 12:17) Konni daafira, Maganu soqqamaasine ikkinummorono mito wote yaandeemmo gede assannori iillinkero dhagge assiꞌra dihasiissannonke. Hundita Yihowa waajjitanno soqqamaasine yaaddo amaddinonsa woti no; lawishshaho Moote Daawiti “qarru” woy yaachishanno coyi iillinosita coyiꞌrino. (Far. 13:2) Soqqamaasinchu Phaawuloosino “beetekiristaannate [‘songuwate’, NW] daafira” yaadinota qaagi. (2 Qor. 11:28) Ikkollana, yaachishanno coyi wolqankera aleenni ikkanno wote maa assa dandiineemmo?

2 Baxillaanchu iimi Anninke hundi soqqamaanosi kaaꞌlino; xaa yannarano isi yaandeemmo gede assannonke coyiwiinni fooliishsho afiꞌneemmo gede assa dandaanno. Qullaawu Maxaafi togo yee amaalannonke: “Kiꞌnera malannohu isootina, qarrisannoꞌnere baala isi aana tuqqe.” (1 Phe. 5:7) Ikkina, ati tenne assa dandaattohu hiittoonniiti? Hanni tenne assa dandaattota shoole doogga laꞌno; insano giddonkenni huucciꞌra, Maganu Qaale nabbawanna hiinca, Yihowa ayyaanasi aannohe gede huucciꞌranna addaxxatto manchira giddokkita hasaaphate. Tenne shoolenta dooggare hasaambeemmo wote, woyyeessiꞌra hasiissannohe coye huwatate woꞌnaali.

DUHA IKKINOHERE YIHOWA AANA TUQQI

3. Duha ikkinohe coye huuccattotenni Yihowa aana tuqqa dandaattohu hiittoonniiti?

3 Yaachishinonke woy duha ikkinonke coye Yihowa aana tuqqineemmo doogga giddo umiti giddonkenni huucciꞌrate. Masisanno, waajjishanno woy yaachishanno coyi iillihero, wodanikki giddo noore baala baxillaanchu iimi Annikkira hasaaphi. Faarsaasinchu Daawiti Yihowa togo yee huucciꞌrino: “Maganoꞌya ballo, huuccattoꞌya macciishshi.” Isi hatte faarsoranni lede togo yiino: “Isi irkisannohena, Yaaddokki Maganu aana tugi.” (Far. 55:1, 22) Qarra tirate assa dandaattore assittohu gedensaanni giddokkinni kaꞌe assiꞌratto huuccatto, yaadde assite affannokkire assitanno. Ikkina, yaachishanni waadannohe coyi wolqakkira aleenni ikkanno yannara huuccatto kaaꞌlitannohehu hiittoonniiti?—Far. 94:18, 19.

4. Yaachishanno coyi iillannonke yannara huuccatto lowo geeshsha kaaꞌlitannohu hiittoonniiti?

4 Filiphisiyusi Sokka 4:6, 7 nabbawi. Yihowa giddonkenni, laalaante hattono agurrummokkinni huucciꞌneemmo huuccattora dawaro qolanno. Hiittoonni? Surrenkenna wodananke fooliishsho hoolino coyinni gante giddoyidi salaame afiꞌneemmo gede assannonke. Batinyu roduuwinke tenne uminsa heeshshonni laino. Maganu, insa yaachishannonsa coyinni fooliishshidhe mannu huwata dandaannokki salaame afidhanno gede asse yaano giddonsa harshammi yitanno gede asse kaaꞌlinonsa. Atino togoo salaame afiꞌra dandaatto. Konni daafira “Maganu keeri” woy salaame iillannoheha aye qarrano dandiite saꞌꞌatto gede kaaꞌlitannohe. Yihowa eino qaale woꞌmunni woꞌma addaxxa dandaatto; isi togo yiino: “Ani Maganokkiitina hexxo mudhitooti [‘yaaddooti’, NW]. Ani jawaachisheemmohe; kaaꞌleemmohe.”—Isa. 41:10.

MAGANU QAALI AANNOTA GIDDOYIDI SALAAME

5. Maganu Qaali giddoyidi salaame afiꞌrate kaaꞌlannonkehu hiittoonniiti?

5 Giddoyidi salaame afiꞌrate kaaꞌlitannoheti layinki doogo Qullaawu Maxaafi qumeeshshuwa nabbawatenna hiincate. Togo assa hasiissannohu mayiraati? Qullaawu Maxaafi giddo yaaddo hooꞌlate, ajishate woy dandee heeꞌrate kaaꞌlitanno amaale no. Maganu Qaali yaaddo qeelate kaaꞌlannota deꞌooti; korkaatuno giddosi Kalaqaanchinke coyiꞌrino hayyo no. Maganu hedo ganyite hiincattohanna Qullaawu Maxaafi amaale harunsa dandaatto gara hedattoha ikkiro, tini jawaante afiꞌratto gede assitannohe. Yihowa Qaalesi nabbawa, ‘jawaante’ afiꞌratenna ‘waajja hoogate’ kaaꞌlitannota xawise coyiꞌrino.—Iya. 1:7-9.

6. Yesuusi coyiꞌrinori kaaꞌlannohehu hiittoonniiti?

6 Maganu Qaali giddo, gabbi assannohu Yesuusi coyiꞌrino qaali no. Isi coyiꞌrino qaalinna rosiisino rosi macciishshino manni fooliishsho afiꞌranno gede assino. Lowo manni isiwa shiqa baxanno; korkaatuno isi shetto amaddinonsare fooliishshiishino, wolqiweeltinore jawaachishino hattono yaaddinore sheshifachishino. (Maatewoosi 11:28-30 nabbawi.) Yesuusi mannu hedo huwatino; hattono ayyaanaamittetenna maalaamittete hasattonsa wonshino. (Maq. 6:30-32) Yesuusi harunsaanosira eino qaali ninkera einohu gedeeti. Isi ledosi soqqantino soqqamaasinesi kaaꞌlinte gede ninkeno kaaꞌlannonke. Yesuusi kaaꞌlo afiꞌrate isi ledo heeꞌra hasiissannohe yaa diꞌꞌikkino. Iima Moote ikke noohu Yesuusi xaano manna baxannota leellisha diagurino. Konni daafira yaachishanno coyi iillannohe wote, isi dode iillannohe; hattono ‘hasiissanno yannara’ kaaꞌlannohe. Ee, Yesuusi yaachishannohe coye dandiite heeꞌratto gede assannohe; hattono hexxonna jawaante aannohe.—Ibi. 2:17, 18; 4:16.

QULLAAWU AYYAANINNI AFIꞌNANNI AKATTA

7. Maganu qullaawa ayyaanasi aannohe gede huucciꞌratto huuccattora qolanno dawaro kaaꞌlitannohehu hiittoonniiti?

7 Yesuusi, iimi Anninke Maganu huuccidhannorira qullaawa ayyaana aannonsata coyiꞌrino. (Luq. 11:10-13) Yaaddo qeelate kaaꞌlitannoheti sayikki doogo qullaawu ayyaani laalo woy gumi akata afiꞌrate. Qullaawu ayyaaniti tini akatta, duuchankare dandaanno Magani akatta leellishshannote. (Galatiyu Sokka 5:22, 23 nabbawi; Qol. 3:10) Tini akatta heedhanno gede assidhanni haꞌritto kiiro, wolu manni ledo noohe aanteno woyyaabbanni hadhanno. Konni daafira, yaadatto gede assannohu lowo coyi diheeꞌranno. Hanni qullaawu ayyaani gumi akatta heedhannohe gede assiꞌra kaaꞌlitannohe gara laꞌno.

8-12. Qullaawu ayyaani gumi akatta yaachishannohe coye qeelate kaaꞌlitannohehu hiittoonniiti?

8 Baxille, hagiirrenna keere. Manna ayirrisattoha ikkiro, yaadatto gede assanno coye ajisha dandaatto. Hiittoonni? Roduuwakki godowinta baxattohanna ayirrisattoha ikkiro, yaadatto gede assanno coyi kalaqamannokki gede assa dandaatto.—Rom. 12:10.

9 Cinca, shooshanqenna danchumma. Aante noo amaale harunsattoha ikkiro, salaame heedhanno gede assatto: “Mimmitiꞌnera shaqqaddanna shooshaqoota ikke; . . . mimmitiꞌne sao agurre.” (Efe. 4:32) Tenne amaale harunsakki, coyi yaachishanno deerra iillannokki gede assate kaaꞌlitannohe. Qoleno, guuntete xeꞌnenni kainohunni kalaqamanno qarra dandee heeꞌrate kaaꞌlitannohe.

10 Ammana. Yannankera yaachishannonkehu lowo coyi, woxu woy maalaamittete coyi ledo xaado afiꞌrinoho. (Law. 18:11) Konni daafira, Yihowa baxillunni kae hasiissannohere aannoheta ammanakki, togooha yaadatto gede assanno coye dandee heeꞌrate woy hooꞌlate kaaꞌlitannohe. Hiittoonni? Soqqamaasinchu Phaawuloosi qullaawu ayyaaninni borreessinota “nooꞌnehu ikkoꞌne” yitanno amaale harunsite hattoo yaaddo hooꞌla dandaatto. Phaawuloosi lede togo yiino: “Maganu, ‘Horo diagureemmohe; dicallachisheemmohe!’ yiino. Kunnira hawaqiꞌne, ‘Kaaliiqi kaaꞌlaanchoꞌyaatina diwaajjeemmo. Mannu ma assannoe?’ yineemmo.”—Ibi. 13:5, 6.

11 ‘Joongillenna meessaneeto qeeꞌla’. Kuri akatta leellisha dandaatto garanna togo assakki afidhino horo hanni hedi. Togo assakki, yaadatto gede assannohere coyiꞌrattokki woy assattokki gede kaaꞌlitannohe; qoleno manna giwate, ‘aaramate, hanqate, gibbotenna hemetewiinni’ xeertiꞌra lowo geeshsha kaaꞌlitannohe.—Efe. 4:31.

12 Qoleno, ‘qarrakki’ woy yaachishannohere baala ‘Maganu aana tugate’ ‘wolqaataame Maganu anga woroonni umokki heeshshi assa’ hasiissannoheti egennantinote. (1 Phe. 5:6, 7) Ikkollana, umokki heeshshi assakki, Magano hagiirsiissannonna isi kaaꞌlo afiꞌratto gede assitannohe doogo aana haꞌrate kaaꞌlitannohe. (Mik. 6:8) Wolqakkinna hedate dandookki shiima ikkitinota badde afittoro Yihowa addaxxatto daafira, tini yaadatto gede assannohe coye ajishate kaaꞌlitannohe.

HORO “YAADDINOONTE”

13. Yesuusi “Yaaddinoonte” yiinohu mayyaateeti?

13 Maatewoosi 6:34 giddo Yesuusi togo yee amaalino: “Yaaddinoonte.” (Qummeeshsha nabbawi.) Ikkollana, tini amaale harunsate qarrissannoha labbara dandiitanno. Yesuusi “Yaaddinoonte” yiinohu mayyaateeti? Isi hatto yiinohu Maganu soqqamaanora yaachishanno coyi horo diꞌꞌiillannonsa yaate diꞌꞌikkino; aleenni hasaambummonte gede Daawitiranna Phaawuloosira yaachishanno coyi tuncu yiinonsa. Yesuusi hatto yiinohu rosaanosi quwa sae yaada qarra tirate kaaꞌlitannori nookkita huwattanno gede assateeti. Mittu mittunku barri yaachishanno coye afiꞌrino; konni daafira Kiristaanu xa yaachishe noonsa coyi aana sainore woy albillitte ikkara dandaannore hedanni yaada dihasiisannonsa. Yesuusi amaale harunsanna baasa yaachishinohe coye fooliishshira dandaattohu hiittoonniiti?

14. Konni albaanni assoottori yaachishannoheha ikkiro, maa assa dandaatto?

14 Mitto mancho yaadanno gede assannosi coyi albaanni assinoreeti woy loosino soꞌrooti. Kuni manchi, lowo diri albaanni loosino soꞌro nafa qaagantanni qarrissannosiha ikkara dandaanno. Moote Daawiti loosino soꞌro, ‘lowo duhi gede ayirritinosita’ yaano qaagantanni qarrissannosita coyiꞌrino. Isi togo yiino: “Dhibbunni [‘yaaddote’, NW] kainohunni hakankaroommo.” (Far. 38:3, 4, 8, 18) Daawiti hatte yannara maa assa woyyitannosi? Isi maa assiyya? Isi Yihowa mararannositanna maarannosita dihuluullamino. Isi hilireno huluullamikki togo yee coyiꞌrino: “Saosi agurroonnisihu . . . baꞌraaꞌrinoho.”—Faarso 32:1-3, 5 nabbawi.

15. (a) Xa iillanni noohe coyiꞌra yaada hasiissannohekkihu mayiraati? (b) Yaachishannohe coye ajishate maa assa dandaatto? (“Yaaddo Ajisha Dandaatto Doogga” yitanno saaxine lai.)

15 Mito wote kayinni, xa iillanni noonsa coyi yaachishannonsaha ikkara dandaanno. Lawishshaho, Daawiti Faarso 55 borreessi yannara, heeshshosira yaade no. (Far. 55:2-5) Ikkirono isi yaaddo Yihowa addaxxannokki gede assitasira diwodhino. Daawiti yaaddosi Yihowara kule huucciꞌrinoha ikkirono, iillinosi qarra dandee saꞌꞌate isi umisi mitore assano hasiissannosita huwatino. (2 Sam. 15:30-34) Daawiti lawishshinni roso afiꞌra dandaatto. Yaaddo xaaxxe amaddannohe gede assiꞌrantenni, ati assa dandaattore assittohu gedensaanni Yihowa kaaꞌlannoheta addaxxite gattuta isi angara worte agure.

Yaaddo Ajisha Dandaatto Doogga

  • Borreessinoonni coye

    Hasiissanno coyibba balaxisiisi.

    FILIPHISIYUSI SOKKA 1:10, 11

  • Wolqasira aleenni ikkinore duqqe rakkatino mancho

    Assa dandaattokkire heddooti.

    ROSIISAANCHO 7:16

  • Mobayile horoonsiˈra didandiinanni

    Barru barrunkunni fooliishshiꞌratto yanna gaaꞌmi.

    MAATEWOOSI 14:23

  • Awawa

    Hagiirsiisannoha Yihowa kalaqama lai.

    FAARSO 104:24, 25

  • Muushshi yaa

    Haariimi.

    LAWISHSHA 17:22

  • Manchu dodanni no

    Ganyite ispoorte loosi.

    1 XIMOOTEWOOSI 4:8

  • Manchu goxe no

    Dancha gede goxi.

    ROSIISAANCHO 4:6

16. Maganu suꞌmi afiꞌrino tiro ammanakki jawaachisha dandiitannohu hiittoonniiti?

16 Mitu Kiristaani yaadannohu albillittete iillansara dandaanno qarra hedanniiti. Ikkollana, ati albillittete ikkannoronna ikkannokkiro afoottokki coye heddanni yaada dihasiissannohe. Mayira? Roore wote coyi ninke bushanno yine waajjinummo gede diꞌꞌikkanno. Hakkiinni saeno, yaachishannohe coye baala tuqqa dandaatto Magani wolqara aleenni ikkino coyi dino. Suꞌmisi tiro nafa “Ikkanno Gede Assanno” yitannote. (Ful. 3:14) Tini Maganu suꞌmi afiꞌrino tiro, Isi soqqamaanosira hedinore baala wonshate dandoo noosita buunxeemmo gede assitannonke. Maganu ammante soqqantannosire kiisannota, hattono biꞌre iillinonsaha, xa iillanni noonsahanna albillittete iillansara dandaannore heddanni yaaddanno wote kaaꞌlannonsata addaxxa dandaatto.

ADDAXXATTO MANCHIRA HASAAPHI

17, 18. Giddokkita addaxxatto manchira hasaapha yaachishannohe coye dandiite heeꞌrate kaaꞌlitannohehu hiittoonniiti?

17 Yaachishannohe coye dandiite heeꞌrate kaaꞌlitannoheti shoolki doogo giddokkita addaxxatto manchira hasaaphate. Galtekki, muli jaalikki, woy mittu songote cimeessi qarrisinohe coyi yaachishanno geeshsha ikkinoronna teꞌee huwatatto gede kaaꞌlahera dandaanno. “Wodanu yaaddo dadille abbitanno; danchu hasaawi kayinni hagiirsiisanno.” (Law. 12:25) Giddokkita maaxittokki hasaawa yaadatto gede assinohe coye badde afattonna dandiite heeꞌratto gede kaaꞌlitannohe. Qullaawu Maxaafi togo yaanno: “Malu hoogiro hendoonniri ikkikkinni gatanno; malu seyiro kayinni halchinoonniri woꞌmanno.”—Law. 15:22.

18 Yihowa lamalate kiiro assiꞌnannihu songote gambooshshuwa widoonnino Kiristaanu yaachishannonsare dandee heeꞌranno gede kaaꞌlanno. Songote gambooshshiwa atera hedannonna mimmito jawaachisha hasiꞌrannohu ammanate roduuwikki ledo xaadatto. (Ibi. 10:24, 25) Ammanate roduuwikki coyiꞌrannohu ‘jawaachishanno’ qaali, ayyaanaamittetenni jawaatatto gede assannohe daafira yaaddo qeela shota ikkitannohe.—Rom. 1:12.

MAGANU LEDO JAALOOꞌMA ROORE KAAꞌLITANNOHE

19. Yihowa ledo noohe jaaloomi jawaante afiꞌratto gede assannoheta huluullamattokkihu mayiraati?

19 Kanaadaho heeꞌrannohu mittu songote cimeessi yaachishannosire Yihowa aana tuqqa kaaꞌlitannota huwatino gara hanni hedi. Isi rosiisaancho ikke lowo geeshsha daafursanno looso loosanno; qoleno, yaachishanno dhibbi waadannosi. Kuni rodii tuncu yiinosire dandee heeꞌrinohu hiittoonniiti? Isi togo yiino: “Baalunkurinni roore, Yihowa ledo nooe jaalooma jawaachishiꞌrate sharrama dhibbaꞌya dandee heeꞌrate lowo geeshsha kaaꞌlitannoe. Addu jaallanna ammanate roduuwi yaaddo amaddanno yannara irko ikkitanno. Minaamaꞌyara hedoꞌya maaxummokkinni fane kuleemmo. Ane ledo cimeeyye ikkite soqqantanno roduuwinna woradu aliidi laꞌꞌaanchinke yaadeemmo gede assannoe coye huwateemmo gede baasa kaaꞌlitinoe. Qoleno xagisiꞌroommo; hattono yannaꞌya horoonsiꞌreemmo gara biddi assiꞌrummo; fooliishshiꞌreemmonna ispoorte looseemmo yannano gaaꞌmummo. Gale hosanni yaaddo qeelummo. Wolqaꞌyara aleenni higino coyi tuncu yaannoe yannara, hakko coye Yihowa anga wore agureemmo.”

20. (a) Yaaddonke Maganu aana tuqqa dandiineemmohu hiittoonniiti? (b) Aananno birxichira mayinnire ronseemmo?

20 Xaa geeshsha, giddonkenni huucciꞌne hattono Qaalesi nabbambenna hiincine yaachishannonkere Yihowa aana tuqqa dandiineemmota ronsoommo. Qoleno, qullaawu ayyaani gumi akatta heedhannonke gede assiꞌra, giddonketa addaxxineemmo manchira hasaaphanna Kiristaanu gambooshshiwa afiꞌneemmo jawaante kaaꞌlitannonketa ronsoommo. Aananno birxichira, Yihowa soqqamaanosi baꞌraasannota kultanno hexxo jawaachishshannonkehu hiittoonniitiro ronseemmo.—Ibi. 11:6.

    Sidaamu Afii Borro (1995-2025)
    Fuli
    Ei
    • Sidaamu Afoo
    • Woleho Soyi
    • Addi Addi Doorsha
    • Copyright © 2025 Watch Tower Bible and Tract Society of Pennsylvania
    • Sheemaate
    • Foju Biddishsha
    • Privacy Settings
    • JW.ORG
    • Ei
    Woleho Soyi