Maganu Ayyaani Ayyaaninke Ledo Farciꞌranno

1-3. Phenxeqosxete barra baxxinoha ikkanno gede assitino ikkituwa hiikkuriiti? Tini ikkituwa Qullaawa Borro yitinori woꞌmanno gede assitinohu ma garinniiti? (Hanafote noo misile lai.)

BARRU soodo sase saate ballaati. Hakku barri Yerusaalamete heeꞌranno mannira baxxinoho. Qoleno, hakko barri ayyaana ikkinohura sambataho. Beetemeqidesete soodo soodo shiqqanno kakkalo hakkawote wonanni shiqqe kaꞌino. Hakkiinni kakkalaanote biili umi laalchinni gannoonniha irsho nooha lame tima doyissinanni kakkalo asse shiqishara qixxaawita hagiirru bae ikki. (Zel. 23:15-20) Hatti kakkalo shiqqannohu sinde mixxinanni yanna hanaffara albaanniiti. Kuni 33 M.D. ayirrinsoonniho Phenxeqosxete ayyaanaati.

² Beetemeqidesete qooxeessira kuni baalunkuri ikkanni noote hattee yannara, katamu giddo wole bayicho roorenka hasiisanno coyi ikkaraati. Mito 120 ikkanno Kiristaani sagannatete gamba yee “jawaantetenni huucciꞌranni no.” (Looso 1:13-15) Hakkawote ikkinori, kakkalaanote biili Phenxeqosxete ayyaani iilli kiiro assannori ledo lowo xaadooshshe afiꞌrinoho; qoleno, hatti masaalaanchu Iyyueeli mitu 800 diri albaanni coyiꞌrino masaalo woꞌmitanno gede assitino ikkitooti. (Iyu. 2:28-32; Looso 2:16-21) Hakko barra ikkinohu kuni majjaha ikkinokki coyi isi maati?

³ Hawaariyaatete Looso 2:2-4 nabbawi.^[1] Hakko barra sagannatete gamba yiino Kiristaanira Maganunnihu qullaawu ayyaani dirrino. (Looso 1:8) Hakkiinni kuni Kiristaani masaalo coyiꞌra woy lainonna macciishshinohu dhaggete coyi daafira farciꞌra hanafi. Hawaariya Pheexiroosi bayichonko gamba yiinohura lowo mannira hatti ikkito mayi tiro afidhinoro xawisino. Hakkiinni isi togo yiinonsa: “Maaro eꞌe, mittu mittunku cubbiꞌne gatona yaamamanno gede Yesuusi Kiristoosi suꞌminni cuuamme; mulla uyinannita qullaawu ayyaani elto adhitinannina.” Xaphoomunni hakko barra mito 3,000 ikkanno manni konne koyishsha adhe cuuamino; hattono uyinanniꞌne yiniha qullaawa ayyaana adhino.—Looso 2:37, 38, 41.

4. (a) Phenxeqosxete barra ikkino coyira illacha tungeemmohu mayiraati? (b) Lowo diri albaanni hakko barra woluri mayi ikkinoha ikkara dandaanno? (Jeefote hedo lai.)

⁴ Sajjiina sasu M.D. ayirrinsoonnihu Phenxeqosxete ayyaanira illacha tungeemmohu mayiraati? Yerusaalamete beetemeqidesera ikkino coyinni kainohunni diꞌꞌikkino. Hatteentenni, bayiru Kakkalaanote Biili Yesuusi Kiristoosi hakkawaro beetemeqidesete assinanni coyibba riqibbannori woꞌmanno gede assinohuraati.^[2] Hakko barra kakkalaanote biili lame tima Yihowara kakkalo asse shiqishino. Beetemeqidesete giddo shiqqannoti irsho noo timma, cubbaataammu mannu ooso mereerinni Maganu ooso ikkitara doorantinore buurantino rosaano riqibbannote. Konni garinni, mannu ooso mereerinni “umi laalcho” woy bayiruudde ikkinohu mitu manni iimira haꞌre Maganu Mangistera moohanno gede faro faꞌnantino; tini Mangiste hajajamanno manni baalunkura baete atoote abbitanno. (Yaq. 1:18; 1 Phe. 2:9) Konni daafira hexxonke iima Yesuusi ledo heeꞌra ikkiturono woy gannate ikkitanno uullara heeꞌrano ikkituro, Phenxeqosxete barra ikkitino coyibba heeshshonke ledo xaadooshshe afidhinote!

MITTU MANCHI BUURAMANNO WOTE IKKANNORE

5. Buuramaasine baalanti buurantinohu mittu garinni ikkinokkita mayinni anfeemmo?

⁵ Giirate arrawo lawannori umoho dirrinsa rosaano mereero heeꞌroottoha ikkoommero, hakko barra ikkinore horo dihawatto. Atino maalaletenni wole afoo coyiꞌrate elto adhoottoha ikkoommero isinni, ayyaanunni buuramoottota mittoreno dihuluullamatto. (Looso 2:6-12) Ikkina ayyaanunni buurantinori baalunku buurantu wote 120 rosaano buurantu yannara ikkitinoti maalaꞌlinanni coyibba ikkitinoni? Diꞌꞌikkitino. Hakko barra Yerusaalamete gamba yiinohu wolu manni buuraminohu cuuami woteeti. (Looso 2:38) Insara hakkawote umoho giirate arrawi didirrinonsa. Qoleno, buuramino Kiristaani baalunku buuraminohu cuuami wote diꞌꞌikkino. Samaariyu manni qullaawu ayyaaninni buuraminohu cuuamihunni mito geeshshi yanna saꞌu gedensaanniiti. (Looso 8:14-17) Qornelewoosinna minisi manni kayinni qullaawu ayyaaninni buuraminohu cuuamara nafa albaanniiti.—Looso 10:44-48.

6. Baalunku buuramino Kiristaani maa afiꞌranno? Tini mayi macciishshamannonsa gede assitanno?

⁶ Hakko daafira, baalunku Kiristaani buuramannohu mittu garinni diꞌꞌikkino. Mitu Kiristaani buuraminota huwatannohu bayichonkooti; wolootu kayinni buurantinota affannohu mito geeshsha keeshshiteeti. Ikkollana, hawaariya Phaawuloosi mittu mittunku buuramino Kiristaanchi afiꞌrannore xawise kulanni togo yiino: “Ammantini gedensaanni, uyinanniꞌne yinihu qullaawu ayyaaninni isi widoonni sumudantinoonni; kuni ayyaani, . . . raggenkera balanxe uyinoonninke tajeeti.” (Efe. 1:13, 14) Qullaawu ayyaani togo baxxino garinni loose, buurantinori albillitte afidhanno raggera taje (woy qawude) ikkanno yaate. Mittu buuramino Kiristaanchi tenne taje adhannohura albillitte afiꞌranno ragge daafira huluullo diheedhannosi.—2 Qorontoosi 1:21, 22 nabbawi;^[3] 2 Qor. 5:5.

7. Mittu mittunku buuramino Kiristaanchi iima baraarsha adhanno gede maa assa hasiissannosi?

⁷ Tenne taje adhino Kiristaanchi aye garinnino iimira haꞌrasi digattanno yaateni? Deeꞌni. Kuni Kiristaanchi iimira haꞌrara koyisaminota dihuluullamanno. Ikkollana, iimira haꞌre baraarsha adhannohu jeefote geeshsha ammanaminoha ikkirooti. Pheexiroosi tenne togo yee xawisino: “Konni daafira, roduuwa, woshshamaꞌnenna dooramaꞌne huluullissannokkita assiꞌrate albinni roore jawaatte; tenne coyibba assa agura hoogginiro, horonta diubbinannina. Isinni roore maassantinanni; Mootichinkenna Gatisaanchinke Yesuusi Kiristoosita hegere Mangisteno eꞌinanni.” (2 Phe. 1:10, 11) Konni daafira, mittu mittunku buuramino Kiristaanchi ammanaminoha ikke heeꞌrate sharrama hasiissannosi. Hatto ikka hoogiro, iimira woshshamasi woy koyisamasi calla assitannosiri dino.—Ibi. 3:1; Aju. 2:10.

MITTU MANCHI BUURAMINOTA AFANNOHU HIITTOONNIITI?

8, 9. (a) Mittu manchi buuramanno wote ikkannore afa rooru mannira qarra ikkitannohu mayiraati? (b) Mittu manchi iimira haꞌrara koyisaminota afannohu hiittoonniiti?

⁸ Mittu manchi buuramanno wote ikkannore afa yannankete roore Yihowa soqqamaasinera qarra ikkitansara dandiitanno; tini nooreentilla. Korkaatuno buurantinori insa diꞌꞌikkitino. Maganu umo hedinohu mannu ooso hegerera uullate aana heedharaati. (Kal. 1:28; Far. 37:29) Mannu mereerinni mitootu iimira hadhe nugussanna kakkalaano ikkitanno gede doora haaro coyeeti. Tini baxxitino qixxaawooti. Tini woshshatto, mittu manchi buuramanno wote hedanno gari, laosinna hexxosi gudisidhe soorrantanno gede assitanno.—Efesooni 1:18 nabbawi.^[4]

⁹ Ikkina mittu manchi iima heeꞌrara woshshaminota, woy tenne baxxitino taje adhinota mayinni afanno? Phaawuloosi “qullaawoota ikkara woshshaminohura” Roomaho noohura buuramino roduuwira coyiꞌrinori tenne xaꞌmora dawaro ikkanno. Isi togo yiinonsa: “Galagaltine waajjitinanni gede assannoꞌneha borojjimmate ayyaana diadhitinoonni; hatteentenni, Maganu ooso gede ikkitine kiirantinanni gede assannoꞌne ayyaana adhitinoonni; kuni ayyaani, ‘Abba, Anna!’ yine woshshineemmo gede assannonke. Ninke Maganu ooso ikkinoommota kuni ayyaani umisi ayyaaninke ledo farciꞌranno.” (Rom. 1:7; 8:15, 16) Haranchunni, Maganu qullaawu ayyaanisinni, hakku manchi albillitte iimi Mangistera moohara koyisaminoha ikkasi bade afanno gede assannosi.—1 Tes. 2:12.

10. Umi Yohaannisi 2:27 aana, buuramino Kiristaanira rosiisannonsahu dihasiisannonsa yaa mayyaate?

¹⁰ Maganuwiinni konne baxxino koyishsha adhitinorira wolu farciꞌrannohu dihasiisannonsa. Insa buurantinota buuxisannohu wolu manchi dihasiissannonsa. Yihowa surrensanna wodaninsa giddo hili huluullo nafa heedhannokki gede assanno. Hawaariya Yohaannisi buuramino Kiristaanira togo yiino: “Qullaawa ikkinohu isi ayyaanunni buurinoꞌne, qoleno kiꞌne baalunkura egenno nooꞌne.” Isi lede togo yiino: “Kiꞌnera kayinni, isiwiinni adhitinoonnihu buurantinoonni ayyaani giddoꞌne no; hakko daafira rosiisannoꞌnehu mittuno dihasiisannoꞌne; isiwiinni adhitinoonnihu buurantinoonni ayyaani baalankare rosiisannoꞌne; qoleno halaaleho ikkinnina kapho diꞌꞌikkino. Hakku ayyaani rosiisinoꞌne garinni, isi ledo mittimmatenni heedhe.” (1 Yoh. 2:20, 27) Buurantinorira wolu Kiristaaninte gede ayyaanaamittete rosi hasiisannonsa. Buurantinore ikkansa kayinni buuxisannohu dihasiisannonsa. Kalqete alame giddo taalle nookki wolqa buuramansa buuxxanno gede assitinonsa!

“GALAGALE ILAMA”

11, 12. Buuramino Kiristaani mayyee hedara dandaanno? Ikkirono, insa maa dihuluullamanno?

¹¹ Qullaawu ayyaani buuramino Kiristaanchi buuraminota afanno gede assanno wote, isi giddo lowori soorramanno. Yesuusi tenne giddiidi soorrama, “haaro ikke ilama” woy “iiminni ilama” yiino.^[5] (Yoh. 3:3, 5; lekk. qaag.) Isi lede togo yee xawisino: “Galagalte ilama hasiissannohe yoommohetera dhagge ikkoonkehe. Bubbe hasidhu raga higge bubbissanno; atino huurose macciishshatto; ikkirono hiikkiinni dagginoronna mamira hadhannoro diafatto. Ayyaanunni galagale ilamino manchi garino hattooti.” (Yoh. 3:7, 8) Ee, buuraminokki manchira buuramino manni ikkito togooti yine gudinse kula didandiinanni.

¹² Konne koyishsha adhitinori, ‘Yihowa wole manna agure ane doorinohu mayiraatikka?’ yite heddara dandiitanno. Insa, tenne qoosso afiꞌrate ikkado diꞌꞌikkoommo yite nafa heddara dandiitanno. Ikkirono, buurantinore ikkansa dihuluullantanno. Tenne qoosso afidhinohura wodaninsa baasa hagiidhanno. Insarano Pheexiroosi ayyaanunni togo yee borreessi yannara macciishshantinosi hedo macciishshantannonsa: “Mootichinke Yesuusi Kiristoosi Maganinna Anni galatamo; isi bayira maarosinni kainohunni, Yesuusi Kiristoosi reyotenni kayise baꞌannokki hexxora haaro asse ilinonke; qoleno, sholtannokki, battaabbannokkinna baꞌannokki raggera ilinonke. Tenne ragge iima worre agarre heeꞌnoonniꞌne.” (1 Phe. 1:3, 4) Buurantinori konne qaale nabbabbanno wote, iimi Anninsa insa gilletenni coyishiishanni noonsata mittoreno dihuluullantanno.

13. Mittu manchi qullaawu ayyaaninni buuramanno wote hedanno gari soorramannohu hiittoonniiti? Konni garinni soorramanno gede assannosiri maati?

¹³ Buurantinori Maganu iimira koyisansara albaanni, uullate aana heeꞌrate hexxo noonsareeti. Albaanni insa Yihowa uulla keereensanno yanna halchitanni keeshshitino, hattono hattee keeraaꞌmitino uullara heeꞌrate hasatto noonsareeti. Reyino manni reyotenni kaeenna xaaddanno yanna nafa heddinoha ikkara dandaanno. Mine miꞌnite heedhanno yannanna haqqe kaasidhe guma ittanno yanna quqquxante agadhitanni keeshshitino. (Isa. 65:21-23) Ikkina insa heddanno gari soorraminohu mayiraatiyya? Uullate aana heeꞌrate hexxo giwissinonsa daafira diꞌꞌikkino. Insa heddanno gari soorraminohu iillinonsa qarri caacceesseennansa diꞌꞌikkino. Uullate aana hegerera heeꞌra giwissannota woy ceeꞌmishshannota ikkitanno yite heddino daafirano diꞌꞌikkino; woy iimira hadhe haarore laꞌꞌate halcho heedheennansa diꞌꞌikkino. Hedonsa soorrantinohu Maganu ayyaani woshshinonsa woy koyisinonsa daafira calla ikkikkinni hedonsanna hexxonsa soorrantanno gede assinohuraati.

14. Buurantinori uullate aani heeshshonsa ma garinni laꞌanno?

¹⁴ Ikkina kuni buuramino Kiristaani reya halchanno yaateni? Phaawuloosi ayyaanunni togo yee qolino: “Isinni, konni dunkaani giddo heeꞌnoommori ninke duhu ayirreennanke urranni heeꞌnoommo; korkaatuno konne dunkaana fushshine hooꞌla ikkikkinni heeshsho reyanno biso riqibbanno gede, wole dunkaana uddiꞌra hasiꞌneemmo.” (2 Qor. 5:4) Buurantinori xaa heeshsho ceeꞌmite rakke reya dihasidhanno. Hatteentenni, insa mitto mittonka barra jaallansanna fiixinsa ledo Yihowara soqqamate quqquxantanno. Ikkirono, albillitte woꞌmitannota ayirrado hexxonsa hawa horonta didandiitanno.—1 Qor. 15:53; 2 Phe. 1:4; 1 Yoh. 3:2, 3; Aju. 20:6.

ATI WOSHSHAMOOTTO?

15. Mittu manchi ayyaanunni buuraminota leellishshannokki coyibba hiikkuriiti?

¹⁵ Miteekkite, ‘Anino tenne kaajja qoosso afiꞌreemmo gede woshshamoommokka?’ yite heddanni noottoha ikkara dandaanno. Togoo hedo nooheha ikkiro, hanni aante noo xaꞌmuwa hedi. Sabbakate loosira baxxino garinni diinaggaawattohu gede ikke macciishshamannohe? “Maganunniha hawa gede huwantannikki coye” afate Yihowa Qaale unte xiinxallatto? (1 Qor. 2:10) Yihowa soqqanshokki baxxino garinni maassiꞌrinoheti leeltannohe? Yihowa fajjo assate noohe hasatto giirate gede iibbitinote? Manna ayyaanaamittetenni kaaꞌla lubbora baxisannohe? Yihowa heeshshokki giddora eꞌꞌe kaaꞌlinohe woti no? Tenne xaꞌmuwara mittoreno huluullamittokki ee yite qolattoha ikkiro, iimira haꞌrattora woshshamootto yaateni? Deeꞌni, hatto yaa diꞌꞌikkino. Mayira? Korkaatuno, kuni baalunkuri iimira hadhara woshshantinori heeshsho giddo calla ikkannore diꞌꞌikkino. Yihowa ayyaanisinni uullate aana hegerera heeꞌrate hexxo noonsarirano taalo wolqa aannonsa. Isinni, iimira haꞌrammora dooramoommokka yite hedattoha ikkiro, hatti umise iimira haꞌrate woshshamoottokkita leellishshanno. Yihowa iimira hadhara doorinori woshshantinore ikkansa dihuluullantanno! Korkaatuno insa tenne badde affino!

16. Maganu ayyaana adhino manni baalunku iimira haꞌrara koyisaminoha ikkinokkita mayinni anfeemmo?

¹⁶ Qullaawu Maxaafi, qullaawu ayyaani noonsare batinye ammanate manna kulanno; ikkirono, insa iimira haꞌrate hexxo noonsare diꞌꞌikkitino. Konni manni giddo mittu Cuuaancho Yohaannisiiti. Yesuusi isi geeshsha ikkanno manchi nookkita coyiꞌrinoha ikkirono, Yohaannisi iimira haꞌre nugusa ikkannokkita xawisino. (Mat. 11:10, 11) Daawitino qullaawu ayyaani noosi manchooti. (1 Sam. 16:13) Isi ayyaanaamittetenni jawaataho; wole agurina Qullaawu Maxaafi gafa nafa borreessino. (Marq. 12:36) Ikkirono, Phenxeqosxete barra Pheexiroosi Daawitire kulanni, “isi iimira dihaꞌrino” yiino. (Looso 2:34) Qullaawu ayyaani togoo mannira lowore assanno gede wolqa ikkinonsa; ikkollana, iimira hadhe heedhannota kule difarciꞌrinonsa. Hatto yaa kayinni insara xeinonsari no woy ikkadda diꞌꞌikkitino yaa diꞌꞌikkino. Yihowa insa gannate ikkitanno uullara heedhara reyotenni kayisannonsa yaate.—Yoh. 5:28, 29; Looso 24:15.

17, 18. (a) Xaa yannara roore Maganu soqqamaasine hiitti hexxo woꞌmitanno yanna quqquxante agadhite no? (b) Aananno birxichira hiittee xaꞌmuwara dawaro qollanni?

¹⁷ Yannankera noori roore Yihowa soqqamaasine iimira hadhara woshshantinore diꞌꞌikkitino. Insa Daawitite, Cuuaanchu Yohaannisitenna hundihu wolu ammanamino mannite gedee hexxo noonsareeti. Abirahaami gede insano Maganu Mangiste hunda heedhanno yanna quqquxante agadhitanno. (Ibi. 11:10) Iimi heeshsho afidhara doorantinori giddo xaa yannara uullate aana gattinori kiiro boodetella. (Aju. 12:17) Hatto yaa, dooraminohu 144,000 manni giddo rooriidi anga ammanante reyitino yaate.

¹⁸ Ikkina mittu manchi buuraminota coyiꞌriro, uullate aana heeꞌrate hexxo noonsari iso ma garinni laꞌꞌa hasiissannonsa? Songote giddo mittu rodii woy rodoo Mootichu Hurbaatira shiqanno timanna woyine qamasa hanaffuro, insa ma garinni laꞌꞌa hasiissannonke? Songuwate giddo iimira haꞌrate hexxo noonke yaanno manni kiiro lexxase, ninkera dhiwanno coye ikkino? Aane noo birxichira, tenne xaꞌmuwara dawaro qollanni.