“Ledoꞌne Haꞌneemmo”

1, 2. (a) Yihowa yannankera mayi ikkannota balaxe coyiꞌrino? (b) Konni birxichira hiittee xaꞌmuwara dawaro qollanni? (Hanafote noo misile lai.)

YIHOWA tenne heeꞌnoommo yannare balaxe coyiꞌranni togo yiino: “Hatte yannara, addi addi daga wido ikkinohu duuchunku afii giddonni fulinohu tonnu manchi mittu Yihudichi uddano seekke cuꞌmiꞌre, ‘Maganu kiꞌne ledo noota macciishshinoommo daafira, ledoꞌne haꞌneemmo’ yaanno.” (Zek. 8:23) Lawishshu yaattonni tonne manna yiniri uullate aana heeꞌrate hexxo noonsa manni, “mittu Yihudichi uddano seekke [cuꞌmirino].” Insa, Yihowa buurantinore maassiꞌranni noota affino daafira, ayyaanunni buurantinote “Maganu Isiraeele” ledo iso magansiꞌra lowo ayirrinyi gede assite laꞌanno.—Gal. 6:16.

² Yesuusino masaalaanchu Zekkaariyaasi gede, Maganu manni mereero noota hagiirsiissanno mittimma xawise kulino. Isi harunsaanosi lame gaamo ikkitinota yaano ‘shiima hoshshanna’ “wole geꞌreewo” yaamantannota coyiꞌrino; ikkirono, lamenti gaamo ‘mittu allaalaanchi’ noota “mitte hoshsha” ikkitanno yiino. (Luq. 12:32; Yoh. 10:16) Ikkollana, lame gaamo noota hendiro mite xaꞌmo kalaqantankera dandiitanno: (1) Wolu geꞌreewi wido ikkitinori yannankera buuramino Kiristaani baalunku suꞌma afa hasiissannonsa? (2) Buurantinori insaneeto ma garinni laꞌꞌa hasiissannonsa? (3) Songonke giddo mittu rodii woy rodoo Qaagooshshu Ayyaanira shiqino timanna woyine qamasa hanaffuro insa ma garinni laꞌꞌa hasiissannonke? (4) Qaagooshshu Ayyaanira shiqanno timanna woyine qamasanno manni kiiro lexxase ninke mitiinsannore ikkinoni? Hanni tenne mitte mittente xaꞌmo dawaro laꞌno.

YANNANKERA NOO BUURAMAASINE BAALANTE SUꞌMA AFA HASIISSANNONKE?

3. Albillitte 144,000 manni wido ikkitannore bande afa dandiineemmokkihu mayiraati?

³ Wolu geꞌreewi wido ikkitinori yannankera noo buuramaasine baalante suꞌma afa hasiissannonsa? Dihasiissannonsa. Mayira? Korkaatuno, iimi heeshshora woshshamino manchi iima heeꞌrara koyisaminolla ikkinnina jeefote baraarsha diadhino. Sheexaanu “dandiiro doorantinore nafa soꞌrisiisate . . . kaphaano masaalaano” fultanno gede assannohu iseraati. (Mat. 24:24) Mittu buuramino Kiristaanchi iimi baraarshasi adhanno gede Yihowa yoo yaa geeshsha kuni Kiristaanchi hakkonne baraarsha adhannoronna hoogannoro afa dandaannohu dino. Yihowa kuni Kiristaanchi ammaname reyara shiima yanna albaanni woy “bayiru qarri” hanafara boode yanna gatte heedheenna tenne yoo yaanno, hattono gumulote sumuda sumudannosi. (Aju. 2:10; 7:3, 14) Hakko daafira, xa uullate aana noo manni giddo, Maganu soqqamaano mereero albillitte 144,000 wido ikkitannori ewelaooti yee gude coyiꞌra dandaannohu dino.^[1]

4. Yannankera noo buuramaasine baalante suꞌma afa dandiinannikkiha ikkina, insa ledo ‘haꞌra’ dandiineemmohu ma garinniiti?

⁴ Xaa yannara uullate aana nooteha ayyaanaamitte Isiraeele baalante suꞌma afa dandiinannikkiha ikkina, wolu geꞌreewi wido ikkitinori insa ‘ledo haꞌra’ dandiitannohu ma garinniiti? Masaalaanchu Zekkaariyaasi lawishshu tiro afiꞌrinohu tonnu mannire kulanni yiinore wodanchi. Kuni manni “mittu Yihudichi uddano seekke cuꞌmiꞌre, ‘Maganu kiꞌne ledo noota macciishshinoommo daafira, ledoꞌne haꞌneemmo’ yaanno.” Kowiicho kulloonnihu mitto Yihudicha calla ikkirono, qummeeshshu mittu manchire calla kulanni nookkiti egennantinote. Hakko daafira, kuni ayyaanaamittete Yihudichi duucha manna riqiwannoho ikkinnina mitto mancho calla diꞌꞌikkino. Konni daafira, mitto mittonka ayyaanaamittete Yihudicha bade afanna isi woy ise ledo haꞌra dihasiissannonke. Hatteentenni, tenne gaamo bande anfe hatte gaamo ledo mitteenni Yihowara soqqama hasiissannonke. Qullaawa Borro mancho harunsa hasiissannonkekkita xawisse kultanno. Harunsineemmohu Yesuusaati.—Mat. 23:10.

BUURANTINORI INSANEETO MA GARINNI LAꞌꞌA HASIISSANNONSA?

5. Buurantinori hiikkonne qorowishsha seekkite heda hasiissannonsa? Mayira?

⁵ Qaagooshshu Ayyaanira shiqanno timanna woyine qamassannori 1 Qorontoosi 11:27-29 noo qorowishsha seekkite heda hasiissannonsa. (Qummeeshsha nabbawi.^[2]) Hawaariya Phaawuloosi koye huwachishara hasiꞌrino coyi maati? Mittu buuramino Kiristaanchi timanna woyine hasiisisikki qamasino yinannihu Yihowa ledo noosiha dancha fiixooma huꞌne heeꞌre qamasirooti. (Ibi. 6:4-6; 10:26-29) Kuni qorowishshi buuramino Kiristaani baraarshansa xaara adhinokkita qaaganno gede assannonsa. Insa “Maganu Kiristoosi Yesuusi widoonni aannoha iimi heeshsho baraarsha adhate [mixonsa] woꞌmitanno gede” sharrama hasiissannonsa.—Fil. 3:13-16.

6. Buurantinori insaneeto ma garinni laꞌꞌa hasiissannonsa?

⁶ Buuramino Kiristaani ‘woshshamino woshshatto ledo sumuu yaanno garinni heeꞌranno gede’ Phaawuloosi ayyaanunni amaalinonsa. Insa hakko garinni heeꞌra dandiitannohu hiittoonniiti? Phaawuloosi lede togo yiinonsa: “Guuta shooshanqenni, joongillunni, cincatenni, hattono mimmito baxillunni dandiitine heedhe; gamba asse xaadisannohu salaamete usuraasinchinni ayyaanu mittimma agarate lowo geeshsha sharramme.” (Efe. 4:1-3) Yihowa ayyaani soqqamaanosi naaxxaleeyye ikkitukkinni shooshaqoota ikkitanno gede assanno. (Qol. 3:12) Buurantinori shooshaqoota ikkitino daafira, uullate aana heeꞌrate hexxo noonsarira uyinanni ayyaana roorino ayyaani noonke yite diheddanno. Insa baxxitino egenno woy ajuuja noonkereeti diyitanno; woy mite doogonni woloota roortannota leellishate diwoꞌnaaltanno. Qoleno, kurino buurantinoreetina timanna woyine qamasa hasiissannonsa diyitanno; hatteentenni, manna buurannohu Yihowa ikkinota shooshanqetenni ammantanno.

7, 8. Buuramino Kiristaani maa agadha dihasiissannonsa? Mayira?

⁷ Iimi heeshshora woshshama kaajja qoosso ikkiturono, buuramino Kiristaani mannu baxxino garinni ayirrinye aansara diagadhanno. (Efe. 1:18, 19; Filiphisiyusi 2:2, 3 nabbawi.^[3]) Yihowa ayyaani farciꞌrinohu insaraatilla ikkinnina insa buurantino yine kulloonni egensiishshi dino. Konni daafira, insa addinta ayyaanunni buurantinore ikkansa mannu rahe ammana hoogiro dhagge diassidhanno woy dixeꞌaabbanno. Isinni, buurantinori Maganu baxxitino qoosso uyinoe yaanno manna bayichonko ammana gara ikkitinokkita Qullaawa Borro kultannota dideꞌanno. (Aju. 2:2) Hakko daafira, buurantinori tenne qoossonsa insaneeto mannaho egensiisate kaaꞌlitanno “kaarde” gede assite dihoroonsidhanno. Isinni, mannu insa aana illacha tugannokki gede assa hasidhanno daafira buurantinore ikkansa roore anga dicoyidhanno; qoleno albillitte afidhanno heeshsho kulte dinaaxxitanno.—1 Qor. 1:28, 29; 1 Qorontoosi 4:6, 7 nabbawi;^[4] 1 Qor. 4:8.

⁸ Hakkiinni saeno, buuramino Kiristaani insaneeto ejjeettote gaamo wido ikkinohu gede asse dilaꞌꞌanno. Insa baxxino fiixooma woy addita Qullaawu Maxaafi xiinxallo gaamo kalaqiꞌrate yite wole buuramino Kiristaana hasidhanni dihadhanno. (Gal. 1:15-17) Togoo coye assate woꞌnaala, songote giddo babbadooshshe kalaqqanno; hattono salaamenna mittimma heedhanno gede assannohu qullaawu ayyaani ledo sumuu diyitannote.—Roomu Sokka 16:17 nabbawi;^[5] Rom. 16:18.

BUURANTINORE MA GARINNI LAꞌꞌA HASIISSANNONKE?

9. Qaagooshshu Ayyaanira shiqanno timanna woyine qamassannore amandeemmo gara qoropha hasiissannonkehu mayiraati? (“Baxillu ‘Gariweelo Coye Diassanno’” yitanno saaxine lai.)

⁹ Mittu manchi Qaagooshshu Ayyaanira shiqino timanna woyine qamasiro iso ma garinni laꞌꞌa hasiissannonke? Yesuusi rosaanosi, “Kiꞌne baalunku roduuwaho” yiinonsa. Isi lede togo yiino: “Isonooto gotti gotti assannohu baalunku heeshshi yaanno; isonooto heeshshi assannohu baalunku kayinni gotti gotti yaanno.” (Mat. 23:8-12) Konni daafira, mittu manchi buuraminoha Kiristoosi rodoo ikkiro nafa, gotti gotti assa gara diꞌꞌikkitino. Qullaawu Maxaafi songote cimeeyye daafira kulanni, ammanatenni insa lambeemmo gede jawaachishannonke; ikkirono, aye manchono massagaanchinke gede assine quwa saꞌne ayirrinseemmo gede diamaalannonke. (Ibi. 13:7) Hige mitootaho “erote ayirrinye aa hasiissannota” Qullaawa Borro kultannonke. Ikkollana, insara ayirrinyu hasiisinonsahu buurantino daafira ikkikkinni “danchu garinni gashshitanno” daafiranna “coyiꞌratenna rosiisate diinaggaabbe loossanno” daafiraati. (1 Xim. 5:17) Konnira, iimi heeshshora woshshantinore hasiisannokki garinni guwinsiro woy insa aana illacha tungiro insa saalfattanno. Roore busha kayinni, buuramino Kiristaani baxxino ayirrinye uyinanninsaha ikkiro, shooshaqoota ikka qarrissansara dandiitanno. (Rom. 12:3) Kiristoosi roduuwi giddo mittohono guficho ikka hasiꞌneemmokkiti egennantinote!—Luq. 17:2.

10. Buuramino Kiristaana ayirrisattota leellisha dandaattohu hiittoonniiti?

¹⁰ Yihowa buurinore gara ikkitino doogonni ayirrinseemmota leellisha dandiineemmohu hiittoonniiti? Buurantino gara qorranni diqarrinseemmo. Konni garinni eessannonkekki coyi giddora ea qorophineemmo. (1 Tes. 4:11; 2 Tes. 3:11) Buuramino Kiristaanchi annanna ama, galtesi woy wole fiixasino buuraminohu gede assine dihendeemmo. Fiixoomu woy adhanna adhama buuramate ledo xaado diafidhino. (1 Tes. 2:12) Hakkiinni saeno, buuramino Kiristaanchi galte albillitte uullate aana Gannatete isiweelo heedhannota heddanno wote mayi macciishshamannosero xaꞌma dihasiissannonke. Togoota xissiissanno xaꞌmo xaꞌmantenni, ninke baalunku Yihowa angasi fane ‘heeshshote kalaqami baalunku hasatto wonshannota’ addaxxa dandiineemmo.—Far. 145:16.

11. Manna doogimale ‘jaja’ hooganke gawajjotenni agartannonkehu hiittoonniiti?

¹¹ Buuramino Kiristaana gara ikkitino doogonni ayirrissannori gawajjotenni gattanno. Qullaawa Borro, “suꞌmu roduuwi” songote giddora eꞌara dandiitannota kultanno. (Gal. 2:4, 5; 1 Yoh. 2:19) Kuri dogaasine buurammoommoreeti nafa yitara dandiitanno. Qoleno, mitu buuramino Kiristaani ammanama hoogara dandaanno. (Mat. 25:10-12; 2 Phe. 2:20, 21) Manna doogimale ‘janjeemmokkire’ ikkinummoro, insanni kainohunni halaalu giddonni difulleemmo; woy mittu egennamino woy Yihowara lowo diro soqqamino Kiristaanchi songote giddonni fuliro, tennenni gufiꞌneenna ammananke dibaꞌanno.—Yih. 16.

TIMANNA WOYINE QAMASANNO MANNI KIIRO LEXXASENA?

12, 13. Qaagooshshu Ayyaaniwa timanna woyine qamasanno manni kiiro lexxitino daafira mitiiꞌma hasiissannonkekkihu mayiraati?

¹² Muli dirra kawa, Kiristoosi reyo Qaagooshshiwa timanna woyine qamasanno manni kiiro lexxitino. Albaanni kayinni tini kiiro ajjanni hadhino. Xa kiironsa lexxase ninke mitiinsannore ikkinoni? Diꞌꞌikkino. Hanni dea hasiissannonkekkita mite coyibba laꞌno.

¹³ “Yihowa isire ikkitinore egennino.” (2 Xim. 2:19) Qaagooshshu Ayyaani yannara timanna woyine qamassannore kiirtanno roduuwi addanka buuraminohu hiikkonneetiro afa didandiitanno. Qamassinore kiirranni wote buurantinoha laweennansa beebba qamassannoreno kiirranni. Alba qamasanno manni giddo mitootu gedensoonni agurtino. Mitu kayinni Kiristoosi ledo iima moonkeemmo yite heddanno gede assinonsahu surrete qarra ikkara dandaanno. Konni daafira, timanna woyine qamasino manni kiiro, uullate aana gattino buuramaasine kiiro kultannote yaa diꞌꞌikkino.

14. Qullaawu Maxaafi, bayiru qarri hanafanno wote uullate aana heedhanno buuramaasine kiiro daafira mayyaanno?

¹⁴ Yesuusi buurantinore iima gamba assara daanno wote insa uullate aana duuchawa heedhanno. Qullaawu Maxaafi, Yesuusi hatte yannara assannore kulanni togo yaanno: “Isi sokkaanosi bayira xurumbu huuronni soyanno; hakkiinni insa isire ikkitinore doorantinore shoolente bubbe widinni, iimite mitte qaccenni kayisse wole qacce geeshsha gamba assitanno.” (Mat. 24:31) Goofimarchu barruwara uullate aana gattino buuramaasine heedhannota Qullaawa Borro kultanno. (Aju. 12:17) Ikkollana, Qullaawu Maxaafi bayiru qarri hanafanno wote uullate aana gattanno buuramaasine mageeshsha ikkitannoro dikulanno.

15, 16. Yihowa doorinohu 144,000 manni daafira maa huwata hasiissannonke?

¹⁵ Hundinni hanafe buurantinore dooranno yanna murannohu Yihowa umosiiti. (Rom. 8:28-30) Yihowa buurantinore doora hanafinohu Yesuusi reye kaihu gedensaanniiti; qoleno umi xibbi diro Kiristaanu songo giddo noori baalunku buurantinoreeti yaa dandiinanni. Umi xibbi dirinni kayise goofimarchu barruwa hanafo geeshsha, Kiristoosi harunsineemmo yaannohu rooru manni kaphu Kiristaanaati; Yesuusi insa “boddoonoho” yiino. Ikkirono, Yihowa tenne baalante dirra giddo mito ammanamino manna buuranni keeshshino; insano Yesuusi yii “sinde” gede ikkansa leellishshino. (Mat. 13:24-30) Yihowa goofimarchu barruwarano 144,000 wido ikkitannore doora diagurino.^[6] Isi mito manna goofimarchu barruwa giddo gedensiise doora hasiꞌrannoha ikkiro, isi assinori gara ikkasi huluullamate geeshsha ninke mayi massinke? (Isa. 45:9; Dan. 4:35; Roomu Sokka 9:11, 16 nabbawi.^[7])^[8] Mootichinsa 11 saatenni qaxarino mannira assinore laꞌe gunguntu loosaasine gede ikkineemmokki gede qoropha hasiissannonke.—Mat. 20:8-12; Maatewoosi 20:13-15 nabbawi.^[9]

¹⁶ Iimira haꞌrate hexxo noonsari baalu “ammanaminohunna wodanaamu borojjichi” wido diꞌꞌikkitino. (Mat. 24:45-47) Yihowanna Yesuusi umi xibbi diro assitinonte gede, yannankerano boode manna horoonsidhe batinye manna itissanni no. Umi xibbi diro, Girikete Afiita Qullaawa Borro borreessinohu boode buuramino Kiristaana callaho. Hatteente gede xaa yannarano, “hasiissanno yannara” ayyaanaamittete “sagale” shiqishanno gede shoomaminohu boode buuramino Kiristaana callaati.

17. Konni birxichira maa rosootto?

¹⁷ Kageeshsha ronsoommo coyi maati? Yihowa ayyaanaamittete Yihudootira iimi heeshsho, lawishshunni kullihu tonnu mannira kayinni uullate aana hegere heeshsho baraarsha asse aannonsa. Ikkirono, isi iima heedhara woshshantinorino uullate aana heeꞌrate hexxo noonsarino ammanantinore ikkitara hasiꞌranno. Lamenti gaamo shooshaqoota ikka hasiissannonsa. Lamenti gaamo mittimmatenni heeꞌra hasiissannonsa. Lamenti gaamo songote giddo salaame heedhanno gede assa hasiissannonsa. Goofimarchu gambise dayinote tenne yannara, ninke baalunku Kiristoosi harunsine mitte hoshsha ikkine soqqamate murciꞌne kaꞌno.