Yihowa Qixxeessinota Baalanta Qixxaawo Horoonsidhe

1, 2. (a) Yihowa Farciꞌraasine Qullaawa Maxaafa ma garinni laꞌanno? (b) Ati roorsite nabbawa baxattohu Qullaawu Maxaafi gafi hiikkonneeti?

YIHOWA FARCIꞌRAASINE Qullaawa Maxaafa baasa baxxanno. Qullaawu Maxaafi addaxxinanni biddishsha, hattono sheshonna hexxo aannonke. (Rom. 15:4) Ninke Qullaawa Maxaafa mannu hedo gede ikkikkinni, ‘loosannohu Maganu qaali’ gede assine laꞌneemmo.—1 Tes. 2:13.

² Ninke baalunkura nabbawa baxisannonkehu Qullaawu Maxaafi gafi nooti egennantinote. Mitu manni, Beettisi aana xabbe leeltinota dhagge ikkitannota Yihowa akatta amaddino Wongeeluwa nabbawa roorse baxanno. (Yoh. 14:9) Wolootu qolte, masaalo amadinoha Qullaawu Maxaafi gafa lawishshaho “muli yanna giddo ikkanno coye” kultannota Yohaannis Ajuuja nabbawa baxxanno. (Aju. 1:1) Qoleno, ninke giddo Faarsote maxaafa nabbawe shesho afiꞌrinokkihu, woy Lawishshu maxaafa nabbawe dancha roso afiꞌrinokkihu ayi no? Addaho, Qullaawu Maxaafi baalunku mannira borreessamino maxaafaati.

3, 4. (a) Borruwanke ma garinni laꞌneemmo? (b) Mite borruwanke ma gari manna hende qixxeessinanni?

³ Qullaawa Maxaafa banxeemmohura Qullaawu Maxaafi aana xintantino borruwano banxeemmo. Lawishshaho, maxaaffate, birosherubbatenna wole borruwa widoonni shiqqannonketa ayyaanaamittete sagale baasa naandeemmo. Tini Yihowa qixxeessino qixxaawo, ayyaanaamittetenni baqqi yine heeꞌneemmo gede, seekkine sagaꞌlineemmonna “ammanatenni . . . fayyaaleeyye” ikkineemmo gede kaaꞌlitannonketa anfoommo.—Tit. 2:2.

⁴ Yihowa Farciꞌraasine woꞌmate qixxaabbanno borruwano agurranna babbaxxino gari manna hende qixxaassinanniti Qullaawu Maxaafi aana xintantino borruwa noonke. Mite borruwa qixxeessinannihu wedella kaaꞌlate hendeeti; wole kayinni annuwansanna amuuwansa kaaꞌlate hende qixxeessinanni. Batinye attammannita woy webisayitenke aana fultanno borro qixxeessinannihu Yihowa Farciꞌraasine ikkinokki mannano hendeeti. Tini falakkinoti ayyaanaamittete sagale, Yihowa ‘gosa baalate . . . xuma sagale qixxeessate’ eino qaale wonshanni noota qaangeemmo gede assitannonke.—Isa. 25:6.

5. Yihowa maa assineemmota naadanno?

⁵ Baalinke Qullaawa Maxaafanna Qullaawu Maxaafi aana xintantino borruwa nabbambeemmoti roore yanna heedhoommenkero tashshi yaannonketi egennantinote. Yihowa ‘afiꞌnoommo yanna baalate giddo’ Qullaawa Maxaafa ganyine nabbawatenna hojju xiinxallo xiinxallate sharrammeemmo sharro naadanno. (Efe. 5:15, 16) Noore coyiꞌniro qixxaabbannonketa ayyaanaamittete sagale baala taalo sagaꞌlineemmo yaa didandiinanni. Kayinni qoropha hasiissannonke coyi no. Hakku coyi maati?

6. Mite Yihowa qixxeessanno qixxaawonni afiꞌneemmo horo gatte baꞌannonke gede assitara dandiitanno hedo hiittenneeti?

⁶ Mite ayyaanaamittete qixxaawo ninkera kaaꞌlitannonkeri nookkihu gede assine hendeemmoha ikkiro gate baꞌꞌannonkeri heeꞌranno; tini qolte gawajjitankera dandiitanno. Lawishshaho, mittu Qullaawu Maxaafi gafi ninkera kaaꞌlannori nookkihalla lawinke? Woy mitte borro ninke hende qixxeessinoonniha ikkalla hoogi? Tenne borro iimi adda calla nabbambeemmo? Woy agurre saꞌneemmo? Hatto ikkiro, lowo geeshsha kaaꞌlannonkeri gate baꞌannonke gede assiꞌnanni heeꞌnoommo. Togoohu bushu rosichi heeꞌrannonkekki gede assiꞌra dandiineemmohu hiittoonniiti? Baalunkunni roorsine mitti mittinke ayyaanaamittete qixxaawo Qixxeessannohu Magano ikkinota qaaga hasiissannonke. Isi himanaanchu Isayyaasi widoonni togo yiino: “Woyyannoꞌnere baala rosiiseemmoꞌnehu . . . Maganiꞌne Kaaliiqi aneeti.” (Isa. 48:17) Baalunku Qullaawu Maxaafi gafinninna qixxaabbannonkete babbaxxitinote ayyaanaamittete sagalenni horo afiꞌrate sase coyibba laꞌꞌanke kaaꞌlitannonke.

QULLAAWU MAXAAFI NIWAAWENNI HORO AFIꞌNEEMMO GEDE KAAꞌLITANNO COYIBBA

7. Qullaawa Maxaafa nabbambeemmo yannara ninkera borreessinoonnihu gede assine heda hasiissannonkehu mayiraati?

⁷ Nabbawatto wote atera borreessinoonnihu gede assite hedi. Qullaawu Maxaafi ‘Qullaawa Borro baala Maganunnihu Qullaawu Ayyaani kulanna borreessinoonnitanna . . . kaaꞌlitannota’ ikkitinota xawise kulanno. (2 Xim. 3:16) Mite Qullaawu Maxaafi gafubba biꞌre borreessini waro mitto mancho woy gaamo hende qixxeessinoonnita ikkitinoti egennantinote. Qullaawa Borro nabbambeemmo wote ninkera borreessinoonnihu gede assine heda hasiissannonkehu iseraati. Mittu rodii togo yiino: “Qullaawa Maxaafa nabbaweemmo wote nabbawanni noommori giddo lowori roseemmori heeꞌrannota hedate woꞌnaaleemmo.” Isi lede togo yiino: “Tenne hedaꞌya dahaawinore huwatate woꞌnaaleemmo gede kakkayissannoe.” Maganu Qaale nabbambammora albaanni, ninkera borreessinoonnihu gede assine hedatenna Yihowa ronsammora hasiꞌranno roso huwatate kaaꞌlannonke gede iso huucciꞌra hasiissannonke.—Izi. 7:10; Yaiqoobi 1:5 nabbawi.

8, 9. (a) Qullaawa Maxaafa nabbambeemmo yannara ninkeneeto hiikkuri xaꞌmuwa xaꞌma dandiineemmo? (b) Songote cimeeyye ikkadda ikkate assa hasiissannonsari daafira kulloonniri Yihowa daafira maa rosiisannonke?

⁸ Xaꞌmo xaꞌmi. Qullaawa Maxaafa nabbawatto yannara taxxi yite ateneeto aante noo xaꞌmuwa xaꞌmi: “Kuni Yihowa daafira maa rosiisannoe? Nabbawoommore heeshshoꞌya giddo loosunni leellisha dandeemmohu hiittoonniiti? Wole manna kaaꞌlate horoonsiꞌra dandeemmohu ma garinniiti? Kuri xaꞌmuwa hiincanke Qullaawu Maxaafi niwaawenkenni roore horo afiꞌrate kaaꞌlitannonke. Lawishshaho, hanni Qullaawa Borro songote cimeeyye ikkadda ikkate wonsha hasiissannonsare kultannori daafira hedi. (1 Ximootewoosi 3:2-7 nabbawi.) Baalinke songote cimeeyye ikkine soqqama dandiineemmokkihura, kuni qummeeshshi heeshshonkera kaaꞌlannonkekkihu gede assine hendeemmoha ikkara dandaanno. Ikkollana, aante noota mite xaꞌmuwa hendeemmoha ikkiro, cimeeyye ikkadda ikkate assa hasiissannonsa yine kulloonniri ninkerano lowore kaaꞌlannonketa huwanteemmo.

⁹ Kuni Yihowa daafira maa rosiisannoe? Yihowa cimeeyye ikkadda ikkate kuri coyibba wonshitanno gede kulasi isi songo towaatate shoomamanno manni lowore assara hasiꞌrannota leellishshanno. Yihowa insa wolu mannira dancha lawishsha ikkitaranna “Beettisi mundeenni woxxino” songo dancha gede assite towaattara hasiꞌranno. (Soq. 20:28, NW) Yihowa songote cimeeyye hunda beꞌe yinummokki heeꞌnammora hasiꞌranno. (Isa. 32:1, 2) Konnira, Qullaawa Borro giddo songote cimeeyye ikkadda ikkate assa hasiissannonsari daafira nabbawanke Yihowa ninke daafira mageeshshi geeshsha hedannoro huwatate kaaꞌlitannonke.

10, 11. (a) Cimeeyye ikkadda ikkate wonsha hasiissannonsari daafira nabbambeemmo yannara tenne heeshshonke giddo loosunni leellisha dandiineemmohu hiittoonniiti? (b) Tenne wole manna kaaꞌlate horoonsiꞌra dandiineemmohu hiittoonniiti?

¹⁰ Nabbawoommore heeshshoꞌya giddo loosunni leellisha dandeemmohu hiittoonniiti? Cimeessa ikke shoomamino manchi yannate kiiro, konne ikkadda ikkate maa assa hasiissannoro kulannore horoonsiꞌre woyyeessiꞌra hasiissannosi coye afate isonooto layiꞌra hasiissannosi. Songote giddo “Albisa” woy aliidi laꞌꞌaancho ikke soqqamate sharramanno rodii konne ikkadda ikkate assa hasiissanno coye seekke heda hasiissannosi; korkaatuno dandaamisi deerrinni kuri coyibba wonshate sharrama hasiissannosi. (1 Xim. 3:1) Baalu Kiristaani aleenni qummi assini qumeeshshuwa giddo cimeessa ikkate assa hasiissannori daafira kulloonnirinni horo afiꞌra dandaanno; korkaatuno hakkiicho kulloonnihu rooru coyi Yihowa baalunku Kiristaani assara hasiꞌrannoreeti. Lawishshaho, mittu mittunku manchi dancha woy quwa saꞌꞌannokkihanna geino wodani noosiha ikka hasiissannosi. (Fil. 4:5; 1 Phe. 4:7) Qoleno cimeeyye “hoshshate dancha lawishsha” ikkituro, ninke insawiinni dancha roso ronsammoranna ‘ammaꞌnatenni insa lambammora’ dandiineemmo.—1 Phe. 5:3; Ibi. 13:7.

¹¹ Wole manna kaaꞌlate horoonsiꞌra dandeemmohu ma garinniiti? Songote cimeeyye assa hasiissannonsari daafira kulloonnire, halaale macciishsha hasiꞌranno mannira woy Qullaawu Maxaafi xiinxallonkera Yihowa Farciꞌraasine mereero noo cimeeyye suꞌmu Kiristinni giddo noo qeesootinni baxxitinore ikkitinota xawisate horoonsiꞌra dandiineemmo. Qoleno, tenne nabbambeemmo yannara, songonkera noo cimeeyye ninkera yite assitannoha lowo coye huwanteemmoha ikkara dandaanno. Insa assitannore afanke mereeronke ‘daafurtanni’ noorira noonke ayirrinyi lexxanno gede assitanno. (1 Tes. 5:12) Jawaatte loossanno cimeeyye ayirrinseemmoha ikkiro insa roore hagiidhitanno.—Ibi. 13:17.

12, 13. Qixxaawinonke uduunne horoonsiꞌne ma gari xiinxallo xiinxalla dandiineemmo? (b) Seekkine xiinxallanke dahaawino roso rosate kaaꞌlitannonketa leellishanno lawishsha kuli.

¹² Seekkite xiinxalli. Qullaawa Maxaafa xiinxallineemmo yannara qixxaawinonke uduunne horoonsiꞌne aante noo mashalaqqe afiꞌrate woꞌnaala dandiineemmo:

• Konne Qullaawa Borro gafa borreessinohu ayeti?

• Borreessinoonnihu mamaati woy mamarooti?

• Kuni maxaafi borreessami yannara hiikku hambannikki coyi ikkino?

Tenne mashalaqqe afiꞌranke dahaawe noo roso ronseemmo gede kaaꞌlitannonke.

¹³ Lawishshaho, hanni Hiziqeeli 14:13, 14 yitannore hedi; togo yitanno: “Mitte gobba manni cubbo loosironna amanamannokkiha ikkiro, angaꞌya diriirse sagale baala huneemmo. Hude soye mannunna saada mitteenni gooffanno gede asseemmo. Nohi, Daanieelinna Iyyoobi giddonsa heedhuro nafa, keeraanchimmansa insa umonsalla gatissannota ikkinnina wole digatisanno. Konne coye coyiꞌroommohu ani Mootichu Kaaliiqaati.” Seekkine xiinxallinummoro, kuni Hiziqeeli maxaafi gafi borreessaminohu 612 K.A. balla ikkinota huwanteemmo. Hatte yannara Nohinna Iyyoobi reyitunku lowo sani sainoha ikkirono Maganu insa ammanantinore ikkite heedhinota dihawino. Daanieeli kayinni hatte yannara lubbote no. Isinni Yihowa, Nohinna Iyyoobi gede Daanieeli keeraancho ikkinota coyiꞌri yannara Daanieelira 20 diri balla ikkannosi. Tini maa rosiissannonke? Yihowa wedelluno ikko wole soqqamaasinesi isira ammanante heedhinota dihawanno, hattono tenne baasa naadanno.—Far. 148:12-14.

BABBAXXITINO BORRUWANNI HORO AFIꞌRI

14. Wedellaho qixxaabbanno borruwa kaaꞌlitannonsahu hiittoonniiti? Kuri borruwa wole mannano kaaꞌlitara dandiitannohu hiittoonniiti? (Hanafote noo misile lai.)

¹⁴ Maganu Qaalihu baalunku gafi kaaꞌlannonkente gede qixxaabbannonketi baalanti ayyaanaamittete sagaleno kaaꞌlitannonke. Hanni mite lawishshuwa laꞌno. Wedellaho qixxaabbanno borruwa. Muli diri kawa wedella hende qixxeessinanniti lowo borruwa no.^[1] Kuri borruwa giddo mite qixxeessinannihu rosu mine tuncu yaannonsa fonqolonna wedellimmate yannara iillannonsa qarra dandiite heedhanno gede kaaꞌlate hendeeti. Kuri borruwa nabbawanke ninke baalanke kaaꞌlitankera dandiitannohu hiittoonniiti? Tenne assineemmoha ikkiro, ammanamino wedellira tuncu yaannonsa fonqolo huwanteemmo. Tini qolte, insa kaaꞌlineemmonna jawaachinsheemmo gede assitannonke.

15. Jajjabbu Kiristaani wedella hende qixxeessinanni rosi aanano illachisha hasiissannonsahu mayiraati?

¹⁵ Wedella hende qixxeessinanni borruwa giddo qummi assinoonni fonqoli tuncu yaannohu insara calla diꞌꞌikkino. Ninke baalinke ammananke daafira sharrama, hedonke qeeꞌla, darawonke gara ikkinokkire assineemmo gede xixxiibbannonke yannara dandee saꞌꞌanna gara ikkitinokki hoshshanna boohaarsha qoropha hasiissannonke. Aleenni kullita woy wole hattoo birxichuwa qixxeessinannihu wedella hendeeti. Ikkina, jajjabbu Kiristaani wedellaho qixxaabbino borruwa nabbawa woffi assannori gede assite heda hasiissannonsa? Dihasiissannonsa! Kuri borruwa qixxeessinoonnihu wedella hende ikkirono, rosu xintaminohu yanna saꞌannokkite Qullaawa Borro aanaati; konnira tini ayyaanaamittete qixxaawo baalanka kaaꞌlitankera dandiitanno.

16. Borruwanke wedellu wolere maa assanno gede kaaꞌlitannonsa?

¹⁶ Wedella hende qixxeessinanni borruwa insa tuncu yaannonsa fonqolo dandiite saꞌanno gede kaaꞌlitannonsatano agurranna, ayyaanaamittetenni lophitannonna Yihowawa shiqqanno gedeno kaaꞌlitannonsa. (Rosiisaancho 12:1, 13 nabbawi.) Tini borruwa jajjabba Kiristaanano kaaꞌlitanno. Lawishshaho, Dotteessa 2009 Baqqi Yiiyye! (Amaaru Afoo) yinanni metseete giddo “Wedellu Xaꞌmanno Xaꞌmo . . . Qullaawu Maxaafi Niwaawe Hagiirsiissannota Assiꞌra Dandeemmohu Ma Garinniiti?” yaanno birxichi fulino. Konni birxichi giddo tenne assate kaaꞌlannoha babbaxxino coye kulloonni, hattono murre fushshine Qullaawu Maxaafi giddo wodha dandiinanni saaxine no. Kuni birxichi jajjabba Kiristaana kaaꞌlino? Mitte 24 diriti oosote ama togo yite borreessitino: “Alba anera Qullaawu Maxaafi niwaawe duucha wote shota diꞌꞌikkitinoe. Konni birxichira noo coyibba seekke hedumma; hattono hakkiicho noo saaxine mure adhe horoonsiꞌra hanafumma. Xa ani Qullaawa Maxaafa nabbaweemma yanna quqquxxannoe. Qullaawu Maxaafi babbaxxino kuula gannoonni saattinni loonsoonni dado gede isi isiniiwa sumuu yaannonna xaado afiꞌrino gara huwatoomma. Alba Qullaawa Maxaafa nabbawe konni garinni horo hagiidhe diegennoomma.”

17, 18. Wolu mannira hende qixxeessinoonni borruwa nabbawanke kaaꞌlitannonkehu hiittoonniiti? Lawishsha kuli.

¹⁷ Wolu mannira qixxaabbanno borruwa. Lamu kuminna settunni kayinse xiinxallinannita Agarooshshu Shae qixxeessinannihu Yihowa Farciꞌraasine hendeeti. Wole manna hende qixxeessinanni metseettana? Tenne metseetta nabbawanke kaaꞌlitannonkeri no? Hanni mitto lawishsha laꞌno. Mitto barra baalunku mannira shiqqanno lallawo hanaffara albaanni koyisootto manchi Mangistete Addaraashe dayinohu gede assite hedi. Tenne yannara lowo geeshsha hagiidhattoti egennantinote. Lallawo shiqishanno rodii lallawo shiqisha hanafanno wote ati koyisseenna dayino manchi daafira hedakki digattanno. Ati lallawo macciishshattohu umokki hakkonni manchi bayicho worteeti. Konnira, tini lallawo hakkonni rosira noohe diniqo lexxitanno gede assitara dandiitanno.

¹⁸ Hattonni, wole manna hende qixxeessinoonni borruwa nabbambeemmo yannarano horo afiꞌneemmo. Lawishshaho, mannaho ellannita Agarooshshu Shae giddo nooha Qullaawa Borro aana xintamino roso qixxeessinannihu Yihowa Farciꞌraasine ikkinokki manni huwata dandaanno garinniiti. Batinye jw.org aana fultanno birxichuwa qixxeessinannihuno hakko garinniiti; kuri birxichuwa giddo mite “Qullaawu Maxaafi Xaꞌmonna Dawaro” nna “Duuchu Manni Xaꞌmanno Xaꞌmo” yitannote. Tenne mashalaqqe nabbawanke alba anfoommo halaalira noonke diniqo lexxitanno gede assitanno. Qoleno, soqqansho fulleemmo yannara ammananke daafira wolu mannira kula dandiineemmota haaro doogga ronseemmo. Baqqi Yiiyye! yinanni metseeteno Maganu noota roore ammanneemmo gedenna ammanneemmore woleho waajjinummokki kula dandiineemmo gara afate kaaꞌlitannonke.—1 Pheexiroosi 3:15 nabbawi.

19. Yihowa qixxeessinonke qixxaawora galata qola dandiineemmohu hiittoonniiti?

¹⁹ Ee, Yihowa ‘ayyaanaamittete coyi gooꞌronke’ fulate kaaꞌlitannota falakkinota ayyaanaamittete sagale uyinonke. (Mat. 5:3, NW) Qixxaabbannonketa baalanta ayyaanaamittete sagale sagaꞌlanke agurroonke. Tenne assineemmoha ikkiro woyyannonkere rosiisannonke Maganira galata qolleemmo.—Isa. 48:17.