Qullaawu Maxaafi Xaano Heeshshokki Soorranni No?

1-3. (a) Cuuammummo gedensaannino biddi assiꞌrate qarra ikkitankera dandiitanno coyibba hiikkuriiti? (b) Mito coye biddi assiꞌra, hendoommohunni aleenni kabbaade ikkitannonke yannara ninkeneeto hiikkuri xaꞌmuwa xaꞌma dandiineemmo? (Hanafote noo misilla lai.)

KEVENI^[1] halaale macciishshi gedensaanni Yihowa ledo noosiha muli jaalooma baalunku coyinni roorse laꞌꞌanno. Ikkollana isi, alba lowo diro qumaare gaꞌnanni, sijaara aganni, ago batisiꞌre aganninna jingilli assitanno xagga horoonsiꞌranni keeshshino. Keveni Magano hagiirsiisate konne Qullaawa Borro ledo sumuu yaannokki assoote agura hasiissinosi. Isi Yihowa addaxxenna manna soorre biddi assate wolqa noosiha Maganu Qaale nabbawe tenne assino.—Ibi. 4:12.

² Keveni cuuami gedensaanni heeshshosi biddi assiꞌra agurinoni? Diagurino; korkaatuno isi cuuamihu gedensaannino Magano hagiirsiissanno akatta lossiꞌranna woyyeessiꞌra hasiisinosi. (Efe. 4:31, 32) Lawishshaho, isira rahe hanqate akata qeeꞌla qarrissinosi; tini qolte hibbo ikkitinosi. Keveni togo yiino: “Tenne hedoꞌya qeeꞌleemmo gara afa alba asseemmohu gara ikkinokki coyinni roore kabbaade ikkitinoe!” Keveni huuccatto assiꞌrenna Qullaawa Maxaafa seekke xiinxalle konne coye biddi assiꞌrino.

³ Keveni gede ninkeno cuuammammora albaanni heeshshonke Qullaawu Maxaafi seerubba ledo sumuu yitanno gede mito coye biddi assiꞌra hasiissinonke. Cuuammummo gedensaannino Maganunna Kiristoosi faale haꞌrate shiimmaadda coye biddi assiꞌra hasiissannonketa huwantoommo. (Efe. 5:1, 2; 1 Phe. 2:21) Lawishshaho, gungumate, waajjatenna, mannu suꞌma hunate akati noonketa anfoommoha ikkara dandaanno. Tenne lainohunni mito coye biddi assiꞌra hendoommohunni aleenni kabbaade ikkitinonke? Hatto ikkiro togo yite hedattoha ikkara dandaanno: ‘Kawiinni saino coye biddi assiꞌrummona shiimmaadda coye biddi assiꞌra shota ikkitinoekkihu mayiraati? Qullaawu Maxaafi heeshshoꞌya albinni roore soorranno gede assiꞌra dandeemmohu hiittoonniiti?’

QUWA SAꞌINOKKI HEDO HEEDHOHE

4. Yihowa hagiirsiisa dandiineemmokki woti heeꞌrara dandaannohu mayiraati?

⁴ Yihowa daafira ronsoommohuranna iso banxeemmohura woꞌmu wodaninkenni iso hagiirsiisannore assa hasiꞌneemmo. Yihowa hagiirsiisate lowo geeshsha hasiꞌneemmoha ikkirono guuntete xeꞌne duucha wote tenne assineemmota hooltannonke. Ninkerano hawaariya Phaawuloosite gedee hedo macciishshantankera dandiitanno; isi togo yee borreessino: “Dancha assate halcho nooe; dancha assate kayinni wolqa diafiꞌroommo.”—Rom. 7:18; Yai. 3:2.

5. Cuuammammora albaanni hiikkuri coyibba biddi assiꞌnoommo? Cuuammummo gedensaannino hiitti laanfe qarra ikkitankera dandiitanno?

⁵ Kiristaanu songo miilla ikkineemmokki gede assannonkeha Yihowa giwanno assoote hooꞌlinoommo. (1 Qor. 6:9, 10) Ikkirono, xaano guuntete xeꞌne noonke. (Qol. 3:9, 10) Hakko daafira, cuuammummo gedensaanni woy halaalu mine lowo diro keeshshinummo gedensaanni nafa soꞌro diloonseemmo, guficho ikkannonkeri diheeꞌranno, gara ikkitinokki hedo woy yorto diheedhannonke yine heda didandiineemmo. Mite laanfe hooꞌlate lowo yanna hasiissannoha ikkara dandaanno.

6, 7. (a) Guuntete xeꞌne noonkeha ikkirono, Yihowa ledo jaalooꞌma dandiineemmo gede assannori maati? (b) Yihowa maaro xaꞌmiꞌrate hobbi ruxxi yaa hasiissannonkekkihu mayiraati?

⁶ Ragiꞌnoommoti guuntete xeꞌne noonkeha ikkirono, Yihowa jaala ikkanna isira agurrummokkinni soqqama dandiineemmo. Hanni tenne hedi: Yihowa isi ledo jaalooꞌminammora koyisinke wote soꞌro loonseemmo yanna heedhannota afino. (Yoh. 6:44) Maganu akattankenna wodaninke giddo noore afinohura, roore qarra ikkitinonke laanfe hiittenneetiro wodanchinoti dihuluullissannote. Qoleno isi, sao loonseemmo yanna heedhannota afino. Ikkollana, tini isi ninke ledo jaalooꞌmannokki gede diassitinosi.

⁷ Maganu baxillunni kae muxxe ikkitino elto yaano baxanno Beettosi wodote kakkalo asse uyinonke. (Yoh. 3:16) Sao loonseemmo yannara muxxe ikkitinote tenne qixxaawo widoonni Yihowa gatona yaankera xaꞌmiꞌnummoro isi ledo noonke jaaloomi dibaꞌꞌanno. (Rom. 7:24, 25; 1 Yoh. 2:1, 2) Battaamboommo woy Yihowa giwannore assinoommo yine wodote kakkalonni horo afiꞌrate hobbi ruxxi yaa hasiissannonkeni? Dihasiissannonke! Tenne assa anganke xurte heedheenna wayinni hayishshiꞌra giwate gedeeti. Isinni wodote kakkalo qixxaabbinohu cubbinsara maaro xaꞌmidhannoriraati. Wodote kakkalo qixxeessi Magani galatamona guuntete xeꞌne noonkeha ikkirono Yihowa ledo jaalooꞌma dandiineemmo.—1 Ximootewoosi 1:15 nabbawi.

8. Laanfenke lashshi assine agura hasiissannonkekkihu mayiraati?

⁸ Togo yaa kayinni laanfenke lashshi assine saꞌneemmo yaa diꞌꞌikkino. Yihowa ledo noonke jaalooma lossiꞌrate, Maganunna Kiristoosi faale haꞌranna insa hasidhanno gedee manna ikkate sharrama hasiissanno. (Far. 15:1-5) Qoleno laanfenke qeeꞌlate woꞌnaalanna dandaamannoha ikkiro horonta hooꞌla hasiissanno. Mule cuuammoommoha woy halaalu mine lowo diro keeshshinoommoha ikkirono, agurrummokkinni ‘heeshshonke biddi assiꞌra’ hasiissannonke.—2 Qor. 13:11.

9. Haaro mannimma agurrikkinni uddiꞌra dandiinannita mayinni anfeemmo?

⁹ ‘Heeshshonke biddi assiꞌratenna’ “haaro mannimma” uddiꞌrate agurrummokki sharrama hasiissanno. Phaawuloosi ammanate roduuwisira togo yee qaagiissino: “Xagarrote yortonni doofaartinota albita akkala mannimma kiꞌnewiinni fushshitine hooltinanni gede rosiinsoonniꞌne. Wodaniꞌnenna hedoꞌne haarooꞌmito [“haarooꞌmitanni hadho,” NW]. Magano lawate kalaqantinota, halaalaancho qullaawanna keeraanchimmannita haaro mannimma uddidhe.” (Efe. 4:22-24) “Haarooꞌmitanni hadho” yaanno xawishshi haaro mannimma uddiꞌra mitte hinge assine agurrannire ikkinokkita leellishanno. Tenne afanke jawaachishshannonke; korkaatuno Yihowara soqqammanni sayinsoommo yanna ikkitu geeshshitano ikkituro, haaro mannimma uddiꞌrate kaaꞌlitannota Kiristaanu akatta ayewoteno lossiꞌranna woyyeessiꞌra hasiissannota buuxissannonke. Ee, Qullaawu Maxaafi ayewoteno heeshshonke soorrara dandaanno.

SOORRAMA SHOTA IKKITINOKKIHU MAYIRAATI?

10. Qullaawu Maxaafi kaaꞌlonni ayewoteno heeshshonke biddi yitanno gede maa assa hasiisannonke? Mayine xaꞌminanniha ikkara dandaanno?

¹⁰ Maganu Qaali ayewoteno heeshshonke soorrara hasiꞌnummoro sharrama hasiissannonke. Ikkina konni garinni sharrama hasiissannonkehu mayiraati? Yihowa sharrammeemmo sharro maassiꞌrannoha ikkiro, ayyaanaamittetenni lopha shota ikka dihasiissannose? Yihowa sharrammanni waadammummokkinni iso hagiirsiissanno akatta heedhannonke gede giddonke noota busha hedo hoola didandaanno?

11-13. Yihowa laanfenke qeeꞌlate sharrammammora hasiꞌrannohu mayiraati?

¹¹ Kalqete alamera noori illete leellannori daafira hendeemmo yannara, Yihowara bayira wolqa noosita huwanteemmo. Lawishshaho, arrishsho mittu sokondi giddo onte miliyoone toone ikkannore aanisenni wolqanniwa qolte soorritanno. Tenne wolqa giddonni uulla gaangeessitino ayyare tayisse saꞌannoti shiima ikkiturono pilaanetenke aana noorira heeshsho noonsarira ikkanno iibbillenna caabbicho uyitanno. (Far. 74:16; Isa. 40:26) Yihowa uullate aana noo soqqamaanosira wolqa hasiissannonsa yannara wolqa aa baxanno. (Isa. 40:29) Ee, Maganu hasiꞌriro wole agurina sharramanna soꞌronkenni rosa hasiissunkekkinni laanfenke qeeꞌla dandiineemmo gede wolqa aankera dandaanno. Ikkina isi tenne assannokkihu mayiraati?

¹² Yihowa taalle nookkita doodhate dandoo uyinonke. Uminkenni kaꞌne Maganu fajjo assankenna tenne assate sharramanke Yihowa banxeemmohunna iso hagiirsiisa hasiꞌneemmohu mageeshshi geeshshaatiro leellishshanno. Qoleno tenne assineemmoha ikkiro aliidimmasi irkinseemmota leellinsheemmo. Sheexaanu, Yihowa aliidimma hettisino; konnira uminke fajjonni Yihowa aliidimma irkisate sharrammeemmoha ikkiro, shaqqadunna naadannohu iimi Anninke tenne lowo geeshsha naadannoti egennantinote. (Iyo. 2:3-5; Law. 27:11) Qoleno, Yihowa iso hagiirsiisate yine sharrammeemmo yannara laanfenke woꞌmunni woꞌma hoolannonkeha ikkiro, ammanamme aliidimmasi irkinsanni heeꞌnoommo yine coyiꞌra didandiineemmo.

¹³ Konni daafira Yihowa, iso hagiirsiissanno akatta lossiꞌrate ‘jawaata’ ikkineemmo gede kulinonke. (2 Pheexiroosi 1:5-7 nabbawi; Qol. 3:12.) Isi hedonkenna yortonke qeeꞌlate sharrammammora hasiꞌranno. (Rom. 8:5; 12:9) Tenne assineemmo yannara Qullaawu Maxaafi xaano heeshshonke soorranni noota huwanteemmohura lowo geeshsha hagiidhineemmo.

MAGANU QAALI AYEWOTENO HEESHSHOKKI SOORRANNO GEDE ASSIꞌRI

14, 15. Maganu baxanno akatta lossiꞌrate maa assa dandiineemmo? (“Qullaawu Maxaafinna Huuccatto Heeshshonsa Soorritino” yitanno saaxine lai.)

¹⁴ Magano hagiirsiissanno akatta lossiꞌratenna Yihowa hagiirsiisate maa assa dandiineemmo? Biddi assiꞌra hasiꞌneemmo coye calla bande biddi assiꞌra dihasiissannonke. Agurrummokkinni sharramanna Maganu biddishsha harunsa hasiissannonke; korkaatuno Roomu Sokka 12:2 togo yitanno: “Maganu hedo dancha, hagiirsiissannotanna guuta ikkitinota affinanni gede, wodaniꞌne haarooꞌmo ikkinninna tenne gobba mannita busha doogo hadhinoonte.” Yihowa Qaalisinna qullaawu ayyaanisi widoonni fajjosi wodanchineemmonna wonshineemmo gede, hattono dandiinummo deerrinni isi hasiꞌrannore assate heeshshonke biddi assiꞌneemmo gede kaaꞌlannonke. Qullaawa Maxaafa barru baala nabbawa, Qullaawa Borro hiincanna qullaawa ayyaana afiꞌrate huuccatto assiꞌra hasiissannonke. (Luq. 11:13; Gal. 5:22, 23) Maganunnihu qullaawu ayyaani massagannonke gedenna hedonke Qullaawu Maxaafi giddo noote Yihowa hedo ledo sumuu yitanno gede assiꞌnummoro hendeemmori, coyiꞌneemmorinna assineemmori Magano hagiirsiisannoha ikkanno. Ikkollana tenne assinanni heeꞌne nafa mite laanfenke qeeltannonkekki gede qoropha hasiissannonke.—Law. 4:23.

¹⁵ Qullaawa Maxaafa barru baala nabbawano agurranna Maganu Qaale Kiristaanu borronke horoonsiꞌne xiinxalla hasiissannonke; tenne assanke Yihowata dhaggete akatta lossiꞌrate kaaꞌlitannonke. Mitootu Kiristaanu akatta lossiꞌratenna mite laanfe qeeꞌlate mite qummeeshshuwanna Agarooshshu Shae woy Baqqi Yiiyye! yinanni metseetta giddo noo birxichuwa gamba assine saꞌne saꞌne wirro nabbawa kaaꞌlitannota huwattino.

16. Mite coyibba ranke woyyeessiꞌnoommokkiha ikkiro hexxo mudha hasiissannonkekkihu mayiraati?

¹⁶ Ayyaanaamittetenni rakke lophoottokkiha lawihero togoo lophora yanna hasiissannota dea dihasiissannohe. Kiristaanu akatta lossiꞌra mitte hinge assine agurrannire diꞌꞌikkino. Qullaawu Maxaafi heeshshonke soorranno gede assiꞌrate sharrammeemmo yannara cincineemmore ikka hasiissannonke. Umi qara Qullaawa Borro asse yitanno coye assate umonke qeeꞌlate sharrama hasiissannonkeha ikkara dandaanno. Hendeemmorinna assineemmori Maganu Yihowa hedo ledo sumuu yaanni haꞌranno wote kayinni, hedonkenna assootinke Magano hagiirsiisanno gede assiꞌra shota ikkitannonke.—Far. 37:31; Law. 23:12; Gal. 5:16, 17.

ALBILLITTE AFIꞌNEEMMOHA DHAGGETE ATOOTE HEDI

17. Yihowara ammanammoommore ikkinummoro albillitte hiittenne tashshi assitanno qoosso afiꞌneemmo?

¹⁷ Ammanantinoti Yihowa soqqamaasine albillitte guuta ikkite isira soqqamate qoosso afidhanno. Hatte yannara, Magano hagiirsiissanno akatta lossiꞌra waaddannota diꞌꞌikkitanno; hatteentenni ayewoteno tashshi assitannota ikkitanno. Wodote kakkalo qixxeessi Magani galatamona, xa nafa baxillaancho Maganonke Yihowa magansiꞌra dandiinoommo. Xaa yannara guuntete xeꞌne noonkeha ikkirono, Maganu Qaali wolqa heeshshonke biddi assitanno gede assiꞌnummoro iso magansiꞌnanni heeꞌra dandiineemmo.

18, 19. Qullaawu Maxaafi heeshshonke soorrara dandaannota mayinni anfeemmo?

¹⁸ Konni birxichi hanafora kullihu Keveni rahe hanqannota qeeꞌlate sharramino. Isi Qullaawu Maxaafita xintu seerubba hiincino hattono loosunni leellishino; qoleno ammanate roduuwi uyitinosi kaaꞌlonna amaale adhino. Shiimu diri giddo Keveni lowo coye biddi assiꞌrino. Yannate gedensaanni, isi songote soqqamaancho ikke shoomamino; isi cimeessa ikke soqqama hanafinku 20 diro ikkino. Ikkirono, Keveni ayyaanaamittetenni badhera hingannikki gede qoropha hasiissannota huwatino.

¹⁹ Keveni woꞌnaalshi Qullaawu Maxaafi Maganu manni heeshshonsa biddi assiꞌranno gede kaaꞌlannota leellishanno. Konni daafira, hexxo mudhine Maganu Qaali ayewoteno heeshshonke soorrannonna Yihowa ledo lubbora jaalooꞌmineemmo gede kaaꞌlannonke gede assiꞌra agurroonke. (Far. 25:14) Tenne assinummoro, Qullaawu Maxaafi kaaꞌlonni ayewoteno heeshshonke biddi assiꞌra dandiineemmota huwanteemmo.—Far. 34:8.