‘Akkala Mannimma Mulqite Tuga’ Dandaatto

1. Qullaawa Maxaafa xiinxalla hanafattora albaanni heeshshokki hiittoote?

YIHOWA FARCIꞌRAASINE ledo Qullaawa Maxaafa xiinxalla hanafattora albaanni heeshshokki hiittoote? Ninke giddo batinyu hakkawari heeshsho heda nafa hasiꞌneemmokkiha ikkara dandaanno. Hendeemmo coyinnino ikko akatinkenni, garanna gara ikkinokkiri daafira alame fushshitino biddishsha harunsineemmoreeti. Hatto ikkiro ‘hexxo nookki gobbara Magano afiꞌnummokkinni heeꞌnoommo.’ (Efe. 2:12) Kayinni Qullaawa Maxaafa xiinxalla hananfummo gedensaanni heeshshonke soorrantino!

2. Qullaawa Maxaafa xiinxallittoti maa huwatootto?

² Qullaawa Maxaafa xiinxallittoti lowo geeshsha baxannohehu iimi Anni nooheta huwatootto. Yihowa hagiirsiisanna iso magansidhanno maate wido ikka hasiꞌrittoro heeshshokki garanna hedokki biddi assiꞌra hasiissannoheta wodanchootto. Isi fushshino biddishshi garinni heeꞌra rosa hasiissinohe.—Efe. 5:3-5.

3. Qolasiyaasi Sokka 3:9, 10 kultanno garinni Yihowa maa assinammora hasiꞌranno? Konni birxichira maa ronseemmo?

³ Kalaqaanchinkenna iimi Anninke Yihowa maatesi wido ikkitinori ma garinni heeꞌra hasiissannonsaro doorate qoosso noosi. Qoleno isi cuuammammora albaanni ‘akkala mannimma loosise ledo mulqine tugate’ sharrammammora hasiꞌranno.b (Qolasiyaasi Sokka 3:9, 10 nabbawi.) Kuni birxichi cuuama hasidhannori aante noote sase xaꞌmora dawaro afidhanno gede kaaꞌlannonsa: (1) “Akkala mannimma” maati? (2) Yihowa “akkala mannimma” mulqine tungeemmo gede jawaachishinonkehu mayiraati? (3) Tenne assa dandiineemmohu hiittoonniiti? Kuni birxichi ninke cuuammoommorino, akkala mannimma akatta galagalte qarrissannonketa gargadhineemmo gede kaaꞌlannonke.

“AKKALA MANNIMMA” MAATI?

4. “Akkala mannimma” noosi manchi assannori maati?

⁴ “Akkala mannimma” noosi manchi hedannohunna assannohu maalu loosooti. Togoo manchi umosi calla baxannoha, hanqoho muddamannoha, galatannokkihanna naaxxannoha ikkara dandaanno. Qoleno teeda baꞌino misilla hattono amanyoote baꞌino woy finqille batidhino filme laꞌꞌa baxannoha ikkara dandaanno. Isira mite dancha akatta heedhannositi dihuluullissannote; qoleno coyiꞌrinohu woy assinohu bushu coyira gaabbannoha ikkara dandaanno. Kayinni isira hedosinna assootesi biddi assiꞌrate hasatto dinosi.—Gal. 5:19-21; 2 Xim. 3:2-5.

5. Akkala mannimma woꞌmunni woꞌma mulqine hooꞌla dandiineemmo? Xawisi. (Soq. 3:19)

⁵ Guuntete xeꞌne noonkere ikkinoommo daafira busha hedonna halcho baala wodaninkenna surrenke giddonni woꞌmunni woꞌma hooꞌla didandiineemmo. Mito woyite, gedensoonni gaabbisannonkere assinammora woy coyiꞌnammora dandiineemmo. (Erm. 17:9; Yai. 3:2) Kayinni akkala mannimma mulqine tungummoro maalu hasattonna assooti diwaadannonke. Hakkuyi gedensaanni ayimmanke soorrantanno.—Isa. 55:7; Soqqamaasinete Looso 3:19 nabbawi.

6. Yihowa akkala mannimmata gara ikkitinokki hedonna busha rosicho hooꞌlineemmo gede jawaachishinonkehu mayiraati?

⁶ Yihowa lowo geeshsha baxannonke daafiranna hagiirru noo heeshsho heeꞌnammora hasiꞌranno daafira, gara ikkitinokki hedonna busha rosicho hooꞌlineemmo gede jawaachishinonke. (Isa. 48:17, 18) Yihowa busha halchora qeelantannori insaneetonna woloota gawajjitannota afino. Isi ninkeneetonna woloota gawajjineemmota laꞌꞌanno woyite lowo geeshsha xissiisiꞌranno.

7. Roomu Sokka 12:1, 2 kultanno garinni hiikku doorshi noonke?

⁷ Mite jaallankenna maatenke akattanke biddi assiꞌrate sharrammeemmo woyite umi qara qacifattankera dandiitanno. (1 Phe. 4:3, 4) Insa hasiꞌnoommore assate qoosso noonketanna assineemmore wolu manni kulankera wodha hasiissannonkekkita kultannonkeha ikkara dandaanno. Ikkollana Yihowa biddishsha harunsitannokkiri mitto coye assitannohu uminsanni kaꞌe callaati yaa diꞌꞌikkino. Noore coyiꞌniro insa Sheexaanu gashshino alame massaggansara wodhitanni no. (Roomu Sokka 12:1, 2 nabbawi.) Ninke baalunku mitte doodha hasiissannonke: Akkala mannimma uddiꞌne cubbunna Sheexaanu alame giddo heeꞌra woy Yihowa soorre biddi assankera maahoyye yaa doodha hasiissannonke.—Isa. 64:8.

AKKALA MANNIMMA ‘MULQITE TUGA’ DANDAATTOHU HIITTOONNIITI?

8. Gara ikkitinokki hedonna busha rosicho hooꞌlate kaaꞌlannonkeri maati?

⁸ Yihowa gara ikkitinokki hedonna busha rosicho hooꞌlate yannanna sharro hasiissannota afino. (Far. 103:13, 14) Ikkirono Yihowa Qaalisi, ayyaanisinna dirijjitesi widoonni, soorramme biddi yineemmo gede hasiissannonke hayyonna jawaante oye kaaꞌlannonke. Isi konni albaanni kaaꞌlinoheti dihuluullissannote. Hanni xa, albinni roore akkala mannimma mulqite tugatenna cuuamate ikkado ikkatto gede kaaꞌlannoheha, assa hasiissannoheha mito coye laꞌno.

9. Maganu Qaali ma assatto gede kaaꞌlannohe?

⁹ Qullaawa Maxaafa horoonsidhe ateneeto seekkite layiꞌri. Maganu Qaali hincilaallote gedeeti; hedatto gara, coyiꞌrattorenna assootekki seekkite layiꞌratto gede kaaꞌlahera dandaanno. (Yai. 1:22-25) Qullaawa Maxaafa xiinxallisannohehunna ayyaanaamittetenni gikki yiinohu wolu Kiristaani dancha amaale amaalahera dandaanno. Lawishshaho insa Qullaawa Maxaafa horoonsidhe jawaantekkinna laanfekki badde afatto gede kaaꞌlitahera dandiitanno. Insa busha rosicho qeeꞌlate kaaꞌlitannoheta Qullaawu Maxaafi aana xintantino amaale afiꞌratto gara kultahera dandiitanno. Yihowano woꞌmanka woyite kaaꞌlannohe. Isi ate kaaꞌlanno gara seekke afino; hattono wodanikkira noore afanno. (Law. 14:10; 15:11) Hakko daafira iso huucciꞌratenna barru baala Qaalesi xiinxallate rosichi heeꞌrohe.

10. Iili woꞌnaalshinni maa rosootto?

¹⁰ Yihowa biddishshi kaaꞌlannoheta addaxxi. Yihowa asse yaannonkeri baalunkuri kaaꞌlannonkeho. Isi biddishsha harunsitannorira uminsara gara ikkitino lao heedhannonsa, dancha heeshsho heedhanno hattono addu hagiirre afidhanno. (Far. 19:7-11) Yihowa biddishsha harunsitannokkiri kayinni maalu looso loosa abbitanno qarri giddo ubbanno. Hanni Iili yinanni manchi Maganu biddishsha giwa abbitanno gawajjo daafira mayinoro laꞌno. Isi lophinohu Yihowa baxxanno maate giddooti. Kayinni Iili wedellichu noo yannara busha hoshsha hosa doodhino. Isi jingilli assitanno xagga adha, amanyoote bainore assanna moora hanafino. Iili gale hosanni hanqannohanna finqila ikkinota wodanchinota coyiꞌrino. Isi, “alba rosoommoha mittu Kiristaanchi assa hasiissannosikkiha baalanka coye assoommo” yee maaxikki coyiꞌrino. Ikkirono Iili anje heeꞌre rosinore dihawino. Gedensoonni isi Qullaawa Maxaafa wirro xiinxalla hanafino. Isi busha gadesi qeeꞌlate seekke sharramino hattono 2000nni cuuamino. Yihowa biddishshi garinni heeꞌrasi kaaꞌlitinosihu hiittoonniiti? Isi togo yiino: “Xa giddoyidi keere afiꞌroommo hattono keeraanchu tiiꞌꞌi nooe.”c Kuni woꞌnaalshi leellishannonte gede Yihowa biddishsha gibbannori umonsa gawajjitanno. Ikkirono Yihowa togoo manni nafa soorrame biddi yaanno gede kaaꞌla hasiꞌranno.

11. Yihowa giwannori maati?

¹¹ Yihowa giwannore giwa rosi. (Far. 97:10) Qullaawu Maxaafi, Yihowa ‘booꞌnaleette ille, kaphaancho arrawonna keeraancho manna shitanno anga’ giwannota kulanno. (Law. 6:16, 17) Qoleno isi ‘mararro nookkirenna xagaraamma hashakkiꞌre giwanno.’ (Far. 5:6) Yihowa togoo akattanna assoote lowo geeshsha giwanno daafira, Nohi waro uullate aana finqille batidhanno gede assino manna baala gudise hunino. (Kal. 6:13) Hanni wole lawishshano laꞌno. Yihowa masaalaanchu Milkiyaasi widoonni, adhamansa diigge xagarrotenni beebbaataame minaamansa fushshite haꞌrissannore giwannota coyiꞌrino. Yihowa togoo manni magansiꞌra diadhanno hattono assitinorira xaꞌmannonsa.—Mil. 2:13-16; Ibi. 13:4.

12. ‘Busha coye effiꞌne giwate’ yaa mayyaate?

¹² Yihowa ‘busha coye effiꞌne gimbammora’ hasiꞌranno. (Rom. 12:9, NW) Effiꞌre giwate yaa mitto coye horo giwate woy shagaggiꞌrate. Hanni bobbino sagale iti yinihero hiitto ikkattoro hedi. Hedittoro nafa meꞌrahera dandaanno. Hatteente gede Yihowa bushaho yiino coye assa agurina heda nafa shagaggiꞌne giwa hasiissannonke.

13. Hendeemmo coye qoropha hasiissannonkehu mayiraati?

¹³ Hedatto coye qorophi. Hendeemmori assootenke seekkara woy hunara dandaanno. Yesuusi jawa cubbo loonseemmo gede assitanno hedo qorophineemmo gede rosiisinonkehu iseraati. (Mat. 5:21, 22, 28, 29) Iimi Annanke hagiirsiisa hasiꞌneemmoti dihuluullissannote. Hakko daafira wodaninke giddora daggannota busha hedo baala bayichonkonni hooꞌla lowo geeshsha hasiissannote!

14. Coyiꞌneemmo coyi ninke daafira maa leellishanno? Ninkeneeto hiikkuri xaꞌmuwa xaꞌma hasiissannonke?

¹⁴ Coyiꞌrattore qorophi. Yesuusi “Afuunni fulannohu . . . wodanu giddonni fulanno” yiino. (Mat. 15:18) Addanko, coyiꞌneemmo coyi giddoyidi ayimmanke leellishanno. Hakko daafira ateneeto togo yite xaꞌmi: ‘Halaale coyiꞌraꞌya qarrameemmo gede assitannoeha ikkiro nafa kapha giweemmo? Minaamaꞌyara calla leellisha hasiissannoe baxille wole meyatera leellisheemmokki gede qoropheemmo? Amanyoote baino coye coyiꞌreemmokki gede qoropheemmo? Mittu manchi hanqisiero wodanaaꞌme coyiꞌreemmo?’ Kuri xaꞌmuwa hiinca kaaꞌlitannohe. Coyiꞌratto coyi uddanote ilki gedeeti yaa dandiinanni. Ilka fanittoro uddano fushshiꞌra diqarrissannohe. Hatteente gede xono, kaphonna amanyoote bainore coyiꞌrattokki gede dandiittore baala assittoro akkala mannimma mulqe tuga diqarrissannohe.

15. Akkala mannimmanke ‘sutate’ yaa mayyaate?

¹⁵ Assa hasiissannohere assate hobbi ruxxi yitooti. Soqqamaasinchu Phaawuloosi heeshshonke gara biddi assiꞌra lowo geeshsha hasiissannota ikkitinota rosiisate kaajja lawishsha horoonsiꞌrino. Isi ‘akkala mannimmanke suta’ hasiissannonketa coyiꞌrino. (Rom. 6:6) Wole yaattonni Kiristoosi lawishsha harunsa hasiissannonke yaate. Yihowa giwanno akattanna assoote shaa hasiissannonke. Keeraancho tiianna hegere heeshsho hexxo afiꞌra dandiineemmohu hatto assinummoro callaati. (Yoh. 17:3; 1 Phe. 3:21) Yihowa ninke hagiirsiisate yee biddishshasi soorrannokkita deꞌnoonke. Hatteentenni ninke soorramme biddi yine biddishshisira hajajama hasiissannonke.—Isa. 1:16-18; 55:9.

16. Maalu yorto qeeꞌlate sharrama agura hasiissannonkekkihu mayiraati?

¹⁶ Busha maalu yorto gargadha agurtooti. Cuuamittohu gedensaannino maalu yorto gargadha agura dihasiissannohe. Hanni Maarusiyo yinanni rodii woꞌnaalsha laꞌno. Isi wedellichu noo yannara labballu ledo foora hanafino. Gedensoonni isi Yihowa Farciꞌraasine ledo xaade Qullaawa Maxaafa xiinxalla hanafino. Isi heeshshosi gara biddi assiꞌrihu gedensaanni 2002nni cuuamino. Isi Yihowara lowo diro soqqaminoha ikkirono, “Xaano busha yorto gargadha hasiissannoe woyiti no” yiino. Isi tini hexxo mudhanno gede assitasira diwodhino. Hatteentenni isi togo yiino: “Togoo yortora qeelama hoogummoro Yihowa hagiirsiisa dandeemmota afaꞌya jawaachishshannoe.”d

17. Nabiha woꞌnaalshi jawaachishinohehu hiittoonniiti?

¹⁷ Yihowa kaaꞌlannohe gede huucciꞌri hattono umikki jawaante ikkikkinni qullaawa ayyaanasi addaxxi. (Gal. 5:22; Fil. 4:6) Akkala mannimma mulqine tugatenna galagalle uddiꞌneemmokki gede sharrama hasiissannonke. Hanni Nabiha yinanni mancho woꞌnaalsha laꞌno. Annise ise lewu diriti heedheenna hune haꞌrinose. Ise, “Tini lowo geeshsha xissiisiꞌreemma gede assitinoe” yitino. Nabiha lophitanni hadhuti hanqitannotanna amalaame ikkitino. Ise jingilli assitanno xagga daddala hanaffino daafira boode diro usurante keeshshitino. Usuru mine noorira sabbakate martinori Yihowa Farciꞌraasine isera Qullaawa Maxaafa xiinxallisa hanaffu. Nabiha heeshshose giddo lowo coye biddi assiꞌra hanaffino. Ise togo yitino: “Mito busha rosicho agura qarra diꞌꞌikkitinoe. Sijaara aga agura kayinni lowo geeshsha qarrissinoe.” Nabiha mitto diro saꞌanno yanna sharrantu gedensaanni jeefote sijaaru araado qeeꞌlitino. Ise tenne assa dandiitinohu hiittoonniiti? Ise, “Sijaara agureemma gede wolu baalunkunni roore kaaꞌlinoeri agurummakkinni Yihowa huucciꞌraꞌyaati” yitino. Ise xa wolootaho togo yite kultanno: “Ani Yihowa hagiirsiisate yee heeshshoꞌya biddi assiꞌra danduumma geeshsha, aye manchino tenne assa dandaannota dihuluullameemma!”e

CUUAMATE IKKADO IKKA DANDAATTO!

18. Umi Qorontoosi 6:9-11 kultanno garinni, batinye Maganu soqqamaasine maa assa dandiitino?

¹⁸ Yihowa Kiristoosi ledo gashshitanno gede doorinori umi xibbi diro heeꞌrino labballinna meenti giddo mitoho alba bushu rosichi noonsa. Lawishshaho insa foortannoreeti, labbaahu labbaahu ledo woy meyati meyate ledo adhantannoreeti hattono moortannoreeti. Ikkirono insa Maganunnihu qullaawu ayyaani kaaꞌlonni heeshshonsa biddi assiꞌra dandiitino. (1 Qorontoosi 6:9-11 nabbawi.) Hatteente gede xaa yannarano, Qullaawu Maxaafi lowo miliyoone ikkanno manni heeshshonsa biddi assiꞌranno gede kaaꞌlino.f Insa giddonsa rumuxxinoha busha rosicho qeeꞌla dandiitino. Insa lawishshi atino heeshshokki biddi assiꞌra dandaattotanna busha akatta qeeꞌlite cuuamate ikkado ikka dandaattota leellishanno.

19. Aananno birxichira maa ronseemmo?

¹⁹ Cuuama hasidhannori akkala mannimma mulqe tugano agurranna haaro mannimma uddiꞌrateno sharrama hasiissannonsa. Aananno birxichira hatto assa dandiineemmohu hiittoonniitironna wolootu kaaꞌlitannonkehu ma garinniitiro ronseemmo.