Ayirrisa Hasiissannoha Ayirrisse
“Galatu, ayirrinyu, gaamaarrenna wolqa, hegerenni hegere geeshsha, ayirradu barcimira ofolle noohuranna, Geꞌrechoho iillito.”—AJU. 5:13.
1. Mito manna ayirrinsanni gede assannori maati? Aanchine mayinnire ronseemmo?
MITTO mancho ayirrisate yaa hakko mancho baxxino garinni laꞌꞌate woy naadate. Ayirrinsannisi gede assannore assinoha woy silxaane noosi mancho ayirrinsanniti egennantinote. Hakko daafira ninkeneeto togo yine xaꞌma hasiissannote: ‘Ayirrisa hasiissannonkehu ayeti? Ayirrinseemmohu mayiraati?’
2, 3. (a) Yihowara baxxino ayirrinyi hasiisannosihu mayiraati? (Hanafote noo misile lai.) (b) Yohaannisi Ajuuja 5:13 giddo kulli Geꞌrechi ayeti? Iso ayirrisa hasiissannohu mayiraati?
2 Yohaannisi Ajuuja 5:13 giddo kulloonninte gede, “ayirradu barcimira ofolle noohuranna Geꞌrechoho” ayirrinyu hasiissannonsati egennantinote. Yohaannisi Ajuuja fooliishsho 4 giddono, Yihowa ayirrinsanni gede assannoha mitto korkaata kulloonni. Iima heedhannoti ayyaanaame kalaqo, “hegerenni hegere geeshsha” heeꞌrannoha Yihowa guwisidhanno. Togo yitanno: “Mootichankenna Maganonke! Baalanka kalaqoottona, kalaqamanno gede assoottona, heeshsho oottohu ateetina, atera ayirrinyu, guweenyunna wolqa ikkitohe!”—Aju. 4:9-11.
3 Geꞌrecho yinihu, ‘alamete cubbo haaꞌre hoolannoho Maganu’ Geꞌrecho ikkinoho Yesuusa Kiristoosaati. (Yoh. 1:29) Qullaawu Maxaafi Yesuusi konni albaanni moote ikkino mannano xa moote ikke noo mannano roore ikkinota kulanno. Togo yaanno: “[Isi] mootoollate moote, mootoollete Mootichaati. . . . Reyannokkihu iso callaati; ayino gamba yaa dandaannokki xawaabbi giddo heeꞌranno. Iso ayino illetenni dilaino; laꞌꞌano didandaanno.” (1 Xim. 6:14-16) Yesuusa agurranna ninke cubbunni wodankera reyinonke moote nooni? Iima heedhannoti kiirre gundannikkiti ayyaanaame kalaqo togo yite faarsitanno: ‘Gorramino Geꞌrechi, wolqa, jiro, hayyo, jawaante, ayirrinye, guweenyanna galata adha maltinosiho.’ Atino hatto assa hasiissannoheha dilawannohe?—Aju. 5:12.
4. Yihowanna Yesuusa ayirrisa banxiro calla assinannire diꞌꞌikkino yineemmohu mayiraati?
4 Yihowanna Yesuusa ayirrisa banxiro calla assinannire diꞌꞌikkino. Hegere heeshsho afiꞌneemmohu insa ayirrinseemmoha ikkiro callaati. Yesuusi Yohaannisi 5:22, 23 giddo coyiꞌrinori hatto assa hasiissannonketa huwanteemmo gede kaaꞌlannonke; isi togo yiino: “Annu aye aanano yoo diyaanno; ikkollana yoote roorre gudise Beettoho uyino. Hatto assinohu mannu baalu Anna ayirrisannonte gede, Beettono ayirrisanno gedeeti. Beetto ayirrisannokkihu Beetto soyinoha Annano diayirrisanno.”—Faarso 2:7, 11 nabbawi.
5. Manna baala jilbunni ayirrisa hasiissannohu mayiraati?
5 Mannu ooso “Maganu daninni” kalaqantino. (Kal. 1:27) Konni daafira, woꞌmunni woma ikka hoogirono, insa giddo rooriidi mite Maganunnite gedee akatta leellishshanno. Mannu ooso mimmitonsa baxa, hattono mimmitinsara shaqqaddanna shooshaqoota ikka dandiitanno. Maganu mannu oosora tiia oye kalaqinonsa; hakko daafira tiiꞌꞌinsa mito wote soꞌrannoha ikkirono bushanna dancha, ayirradonna shollado coye, hattono gara ikkinorenna gara ikkinokkire bade afate dandoo noonsa. (Rom. 2:14, 15) Lowo manni xurinokkirenna biifadore baxanno. Qoleno, xaphoomunni laꞌniro wolu manni ledo salaametenni heeꞌra hasiꞌranno. Insa afirono afa hoogirono, mito geeshsha Yihowa ayirrinye leellishanno; konni daafira insa jilbunni ayirrisa hasiissanno.—Far. 8:5.
MANNA JILBUNNI AYIRRISA
6, 7. Yihowa Farciꞌraasine manna ayirrisate daafira noonsa lao lowo mannira noonsa laonni baxxitannohu hiittoonniiti?
6 Manna ayirrinseemmo wote garunni ayirrisa, hattono quwa saꞌꞌa hooga hasiissannonke. Lowo manni guuntete xeꞌne noonsaha ikkino daafira, manna ayirrisannohu tenne Sheexaanu moohino alame giddo rosamino garinniiti. Mannu maccaha ikkino manna garunni ayirrisa agure, kashiꞌi yee magansiꞌrate geeshsha iillannohu iseraati. Insa ammaꞌnote woy poletiku sooreeyye, hattono ispoortete, boohaarshaho woy wolu coyinni maccaha ikkino manna jajanno. Hakko daafira, aju akkali hattoo manni coyiꞌrannonna uddiꞌranno gara harunsate, hattono insa gede ikkate woꞌnaalanno.
7 Addu Kiristaani manna hakko garinni ayirrisannokki gede qorophanno. Guutu garinni lawishsha assine harunsineemmohu, mancho ikke heeꞌrinoho Kiristoosa callaati. (1 Phe. 2:21) Manna jilba saꞌne ayirrinseemmoha ikkiro, Maganu dihagiidhanno. Togo yaannoha Qullaawu Maxaafi halaale qaaga hasiissannonke: “Mannu baalu cubbo loosino; Maganu uyino ayirrinyeno hoogino.” (Rom. 3:23) Hakko daafira, manna Maganu gede assine ayirrisate geeshsha massannori dino.
8, 9. (a) Yihowa Farciꞌraasine gashshaanote noonsa lao hiittoote? (b) Gashshaanote hajajama gara ikkitannokkihu mamooteeti?
8 Mitu manni ayirrinsanninsa gede assitanno silxaane afiꞌrino. Mangistete sooreeyye mannu higge ayirrisannonna seeru heeꞌranno gede assitanno; hattono qansootinsara hasiisannore shiqishshanno. Tini baalanka kaaꞌlitanno. Konni daafira, soqqamaasinchu Phaawuloosi Kiristaanu “aleenni noo gashshaanora” yaano silxaane afiꞌrino mannira maahoyye yee galanno gede amaalino. Isi insa togo yee hajajino: “Baalunkura aate hasiisannore uuyye. Giwiru hasiisannohura giwire, . . . uuyye. Ayirrisa hasiissannoꞌneha ayirrisse.”—Rom. 13:1, 7.
9 Yihowa Farciꞌraasine ikkinoommo daafira silxaane afiꞌrino manna ayirrinseemmota leellinsheemmo. Babbaxxitino gobbara babbaxxino budi heeꞌranno daafira, silxaane noonsare ayirrisate assinanniri gobba gobbate garinni babbaxxanno. Ikkirono, gashshaanote hajajammeemmo. Ikkollana, insa ayirrinseemmohunna insara hajajammeemmohu Qullaawa Borro giddo worroonni danna saꞌnummokkinniiti. Insa ayirrisate yine Maganoho hajajammeemmokki gede assannore diassineemmo woy poletiku hajora anga diwodhineemmo.—1 Pheexiroosi 2:13-17 nabbawi.
10. Hundi yannati Maganoho soqqantino soqqamaano, silxaane noonsa manna ayirrissannota leellishshinohu hiittoonniiti?
10 Hundi yannara heeꞌrinohu Yihowara soqqamino manni, silxaane noonsare ayirrisate dancha lawishsha ikkannonke. Roomu Gashshooti, gashshino gobbuwa giddo heeꞌranno manna kiirate hajajo fushshi yannara Maariyaaminna Yooseefi hajajamino. Hatte yannara Maariyaami bayira beettose ila rakke nooha ikkirono, insa Beeteliheme haꞌrino. (Luq. 2:1-5) Gedensaanni, Phaawuloosi yekkeerrisi yannara umosi gargadhinohu silxaane noonsa manna ayirrisannota leellishanno garinniiti; isi, Moote Heeroodisi Agiriphanna Roomu gashshooti hunda noota Yihudu gobba gashshaancho Fisxoosi ayirrisannota leellishino.—Soq. 25:1-12; 26:1-3.
11, 12. (a) Ammaꞌnote sooreeyye baxxino garinni ayirrinseemmokkihu mayiraati? (b) Awustiraaliyaho ilaminohu mittu rodii poletiku looso loosannoha mitto mancho ayirrisasi dancha guma abbitinohu hiittoonniiti?
11 Ikkollana, Yihowa Farciꞌraasine ammaꞌnote sooreeyye quwa saꞌe diayirrissanno; tini sooreeyye ayirrinsansara hasidhuro nafa insa hatto diassitanno. Kaphu ammaꞌno Maganu suꞌma huntanno; qoleno, Qaalesi shokkishshanno. Ammaꞌnote sooreeyye wole manna ayirrinseemmo deerrinni ayirrinseemmoha ikkirono, insa baxxino garinni diayirrinseemmo. Yesuusi yannasira heeꞌrinoha hattoo manna, ‘lawisiisaanonna illiweelo massagaano’ yee rufinota anfoommo. (Mat. 23:23, 24) Gashshaano baxxino garinni ayirrisa kayinni soꞌro diafidhino; tini ninkera kaaꞌlitanno.
12 Awustiraaliyu gobbara ilaminoha Leepoolti Engilayitineeri yinanniha diinaggaawe soqqamanno rodoo, Naatsi yinanni mangiste amadde Bukeniwoolti yinannita usuranyu heeꞌranno kaampe baaburunni sokkino. Higgete egennaami Dokiteri Heniriki Gilaasineerino hakko baaburi giddo no. Isi Awustiraaliyaho poletiku looso loosannoho. Ikkollana, iso Naatsi yinanni mangiste amaddino. Usuranyu heeꞌranno kaampe hadhanna Roduu Leepoolti Engilayitineeri, Heniriiki Gilaasineerira ammanasi daafira ayirrinyunni kulisi; kuni manchi macca wore macciishshinosi. Layinkihu alamete oli gedensaanni, Heniriiki Gilaasineeri Awustiraaliyaho heedhanno roduuwa duucha hige kaaꞌlino. Atino, Yihowa Farciꞌraasine Qullaawu Maxaafi Kiristaana hajajanno garinni silxaane afiꞌrino manna ayirrissannohura afidhinoha dancha guma kultannota wole xagge qaagattoha ikkara dandaanno.
AYIRRISA HASIISSANNONKEHA WOLE MANNA
13. Ayeoo ayirrisa hasiissannonke? Mayira?
13 Ammanate roduuwanke ayirrisa hasiissannonketi egennantinote. Roorenkanni, songote giddo albisa ikkitino cimeeyye ayirrisa hasiissannonke. (1 Ximootewoosi 5:17 nabbawi.) Kore roduuwa gobbansa, rosu deerransanna qiniitensa laꞌnummokki ayirrinseemmo. Qullaawu maxaafi insa Maganu “elto” asse uyinore ikkitinota kulanno; kuri roduuwi Maganu manna towaatate lowore assitanno. (Efe. 4:8) Hanni songote cimeeyyere, woradu aliidi laꞌꞌaanore, Sinu Biiro Komitenna Aliidi Bisi miillare hedde. Umi xibbi diro heedhino roduuwinke, mereeronsa albisa ikkite shoomantinore ayirrissino; ninkeno hatto assineemmo. Songote giddo egennantinore togoo roduuwa quwa saꞌne diayirrinseemmo woy insa ledonke heedhuro, ledonke sokkaasine uurrite noohu gede assine dihendeemmo. Ikkollana, insa diinaggaabbe soqqantannohuranna umonsa heeshshi assitannore ikkitinohura ayirrinseemmonsa.—2 Qorontoosi 1:24; Yohaannisi Ajuuja 19:10 nabbawi.
14, 15. Addu Kiristaani giddo noo allaalaasinenna wole ammaꞌno sooreeyye mereero noo badooshshe kuli.
14 Kuri cimeeyye umonsa heeshshi assite laꞌanno allaalaasineeti. Insa umonsa heeshshi assitannore ikkitino daafira, macca manni gede assine laꞌnansara dihasidhanno. Insa yannankera nootenna Yesuusi yannara heedhinote ammaꞌnote sooreeyye gedeere ikkitinokkireeti; Yesuusi yannasira noota ammaꞌnote sooreeyye daafira togo yiino: “Jilu mine ayirrinyu darga, xaadu mine umi barcimira ofolla baxxanno. Gudumaaleho mannu baalu keere haaꞌransara . . . hasidhanno.”—Mat. 23:6, 7.
15 Addu Kiristaani songo giddo soqqantanno allaalaasine kayinni Yesuusi amaalino amaale harunsitanno; isi togo yiino: “Rosiisaanchiꞌne mitto calla ikkinohuranna kiꞌneno roduuwa ikkitinoonni daafira, ‘Rosiisaancho’ yine woshshinoonkeꞌne. Gordoho mittu Anni callu nooꞌne daafira baattote aana mittono, ‘Annanke’ yitine woshshitinoonte. Rosiisaanchiꞌne [‘Massagaanchiꞌne’, NW] Kiristoosa calla ikkino daafira, ‘Rosiisaancho’ [‘Massagaancho,’ NW] yine woshshinoonkeꞌne. Kiꞌne giddo rooriidiha ikka hasiꞌrannohu, soqqamaanchoꞌne ikko. Umosi gotti assannohu shollanno; umosi heeshshi assannohu kayinni ayirranno.” (Mat. 23:8-12) Alamete qooxeessira heedhanno cimeeyye umonsa heeshshi assitannore ikkituronna Yesuusi uyino amaale harunsitannoha ikkiro, ayyaanaamittete roduuwinsa insa baxanno hattono ayirrisanno.
Cimeeyye umonsa heeshshi assite soqqamansa banxanninsanna ayirrinsanninsa gede assitanno (Gufo 13-15 lai)
16. Qullaawu Maxaafi manna ayirrisate daafira aanno amaale huwatatenna harunsate sharrama hasiissannohehu mayiraati?
16 Noore coyiꞌniro, manna ayirrinseemmo garanna aye ayirrisa hasiissannonkero afate sharrama hasiissannonke. Hundi Kiristaanino hatto assa hasiissinonsa. (Soq. 10:22-26; 3 Yoh. 9, 10) Qullaawu Maxaafi manna ayirrisate daafira aanno amaale harunsa kayinni tennera baasa kaaꞌlitannonke. Manna quwa saꞌnikkinni ayirrisa lowo horo afidhino.
MANNA JILBUNNI AYIRRISA AFIDHINO HORO
17. Silxaane noonsare ayirrinsummoro mayi horo afiꞌneemmo?
17 Silxaane noonsare ayirrisanke, ataawe ikkannonkeri nookkiha dancha duduwo duduwate qoosso afiꞌneemmo gede assitara dandiitanno. Qoleno, insa sabbakate loosonke danchu garinni laꞌanno gede assitanno. Mitto waro Birgiti yinanniti Jarmanete gobbara heedhanno suwisaancho, beettose maassantanna rosu minira hadhino. Rosiisaano Birgitira rosu mine Yihowa Farciꞌraasine ooso nootera hagiidhitinota kultinose. Insa rosu mine Yihowa Farciꞌraasine ooso heeꞌransa rosu mini dancha ikkanno gede assitinota coyidhino. Birgiti togo yitinonsa: “Oosonke Maganu fushshinota amanyootu higge ayirrissanno gara rossanno; togo assitanno doogga giddo mitte rosiisaanonsa ayirrisate.” Tennera mitte rosiisaancho, “Baalanti ooso kiꞌne ooso gedeere ikkitoommero, rosiisa lowo geeshsha baxissanno” yitino. Boode lamala gedensaanni hakkuri rosiisaano giddonni mitte Leeppiziigi katamira assinoonniha jawa gambooshshe daggino.
18, 19. Cimeeyye ayirrinseemmo wote dea hasiissannonkekki coyi maati?
18 Qullaawu Maxaafi giddo noo biddishshi songote cimeeyye magarinni ayirrisa hasiissannonkero huwanteemmo gede kaaꞌlannonke. (Ibiraawoota 13:7, 17 nabbawi.) Insa jawaatte loossanno daafira galanteemmonsa; hattono uyitannonke amaale harunsineemmo. Togo assanke insa hagiirrunni soqqantanno gede kaaꞌlitansara dandiitanno. Togo yaa kayinni, mittu gikki yiino cimeessi uddiꞌrannonna seesanno gara, hattono isi lallawo shiqishanno woy hasaawanno gara harunsa hasiissannonke yaa diꞌꞌikkino. Hatto assa mannu gara ikkinokkire hedanno gede assitara dandiitanno. Hakku cimeessino guuntete xeꞌne noosiha ikkinota dea dihasiissannonke. Ninke harunsa hasiissannonkehu Kiristoosaati.
19 Cimeeyye macca manni gede assine laꞌꞌa hoogankenna quwa saꞌnummokki ayirrisanke kaaꞌlitannonsa. Hatto assanke, insa wolu mannira aliidire ikkitinohunna assitannori ayewoteno gara ikkinohu gede assite hedde naaxxitannokki gede kaaꞌlitannonsa.
20. Woloota ayirrisa kaaꞌlitannonkehu hiittoonniiti?
20 Manna quwa saꞌnummokki ayirrisa uminkera calla hendeemmore ikkineemmokki gede kaaꞌlitannonke. Hatto assanke wolu manni ayirrisannonke wote saꞌne baꞌneemmokki gede kaaꞌlitannonke. Qoleno, Yihowa farciꞌraasincho ikkinohano ikkinokkihano deerra saꞌe ayirrissannokkite Yihowa dirijjite giddo heeꞌneemmo gede kaaꞌlitannonke. Hakkiinni saeno, togo assanke hayyote; korkaatuno quwa saꞌne ayirrinseemmokki manchi dadillineemmo gede assannore assiro digufiꞌneemmo.
21. Manna quwa saꞌnummokki ayirrisa abbitannoti baalanta roortino horo maati?
21 Manna quwa saꞌnummokkinni ayirrisa Maganu hagiidhanno gede assitanno; tini afiꞌneemmo horo baalantenni roortinote. Isi assinammora hasiꞌrannore assa hasiissannonke; hatto assanke isira ammanamme heeꞌneemmo gede assitannonke. Tini, Maganu xonannosihura dawaro qolanno gede assitanno. (Law. 27:11) Alamete aana heeꞌrannohu lowo mannira manna ayirrisate daafira noonsa lao digaraho. Manna Yihowa hasiꞌranno garinni ayirrisa dandiineemmo gara afanke lowo geeshsha hagiirsiissannote.