Yihowa Qarrinke Baalu Yannara Sheshifachishannonke

1, 2. Yihowa qarru iillannonke wote sheshifachishannonkehu hiittoonniiti? Qaalisi tenne buuxisannonkehu hiittoonniiti?

MITTU seenne adhinokki rodii, diro iso roorannoha galte noosiha songote cimeessa huluullinosi coye xaꞌmino. Kuni rodii 1 Qorontoosi 7:28 giddo, “adhantinore lowo qarri amadannonsa” yinoonnihu mayiraatiro hedanni keeshshino. Isi songote cimeessa togo yee xaꞌmi: “Kuni ‘lowo qarra’ yiniri maati? Seenne adhummoro konne qarra hiitto ikke dandeemmo?” Songote cimeessi dawaro qolara albaanni, wedellichu rodii soqqamaasinchu Phaawuloosi, “jawaante baalate Magani . . . qarrinke baalu giddo jawaachishannonke” yee borreessinotano hedanno gede kulisi.—2 Qor. 1:3, 4.

² Ee, Yihowa baxillaancho Annanke ikkino daafira qarru iillannonke wote sheshifachishannonke. Atino qarru iilleennahe Maganu Qaalisi widoonni kaaꞌle woy biddishsha oye sheshifachishinohe yanna qaagattoha ikkara dandaanno. Isi hundi soqqamaasinesira assinte gede ninkerano woyyanno coye assa hasiꞌrannota addaxxa dandiineemmo.—Ermiyaasi 29:11, 12 nabbawi.

3. Hiikkuri xaꞌmuwara dawaro afiꞌneemmo?

³ Qarru iillinonkehu mayiraatiro anfummoro hakkonne qarra dandee heeꞌra roore shota ikkitannonke. Adhamino mannira iillanno qarrire hendirono coyi hattooti. Ikkina, Phaawuloosi yiino garinni ‘adhantinorira qarru’ iillannonsa gede assannohu mitu coyi maati? Qullaawu Maxaafi giddo kulloonnihunna yannankera noo manni lawishshi shesho afiꞌrate kaaꞌlannonkehu hiittoonniiti? Kuri xaꞌmuwa dawaro afanke iillannonke qarra dandiineemmo gede kaaꞌlitannonke.

ADHANTINORIRA IILLANNONSA ‘QARRA’

4, 5. Adhantinorira ‘qarru’ iillannonsa gede assannohu mitu coyi maati?

⁴ Maganu manna kalaqi gedensaanni togo yiino: “Mannu annasinna amasi agure, galtesi ledo mitto ikkanno; lamunku mitto biso ikkitanno.” (Kal. 2:24) Yihowa togo yiinohu umi minaanninna minaama adhamanno gede assi woteeti. Ikkollana, guuntete xeꞌne noonsa daafira adhame mine kalaqiꞌranno mannira qarru iillannonsa. (Rom. 3:23) Minaama, alba annisenna amase biddishsha harunsitannoha ikkirono, assidhanno wote minaannise biddishsha harunsitanno. Maganu, minaanni minaamasi umo ikkanno gede silxaane uyinosi. (1 Qor. 11:3) Mitu haarote adhamino minaanniranna minaamara tini shota diꞌꞌikkitannonsa. Maganu Qaali yaanno garinni, minaama annisenna amase yaannorinni roore minaannise yaannose gede ikka hasiissannose. Haarote adhaminori balluwinsa ledo sumuumme hoogano qarra ikkitansara dandiitanno.

⁵ Qoleno, minaama godowu gatinoseta minaannisera kultanno wote yaaddo lexxitanno. Ooso ila hagiirsiissannonsaha ikkirono, ooso godowante keeshshitanno yannaranna ilantu gedensaanni fayyimmansa daafira hedanni yaadannoha ikkara dandaanno. Hattono, ooso ilansa fulanno woxi lexxanno gede assitannota afino. Godowaminorichi ilamanno wote roore coye biddi assiꞌra hasiissannonsa. Ama roore yanna qaaqqo towaatanni sayissannoha ikkara dandaanno. Batinyu minaannuwi, minaamuwinsa ooso lossiꞌranni insa caaqqo giwinonsahu gede asse hedino. Minaannirano loosu lexxanno yaate. Maatensa miilla kiiro lexxitino daafira isi insara hasiissannore shiqishate loosanno loosi lexxanno.

6-8. Ooso ila hasiꞌre heeꞌre ila hoogino mannira mayi macciishshamannonsa?

⁶ Mitu adhamino mannira qarra ikkannonsahu wolu coyino. Insa ila baasa hasiꞌrannoha ikkirono ila hooginoha ikkara dandaanno. Minaama godowa hoogguro, tini dadillitanno gede assitasera dandiitanno. Adhano ooso ilano yaaddo gatissannoha ikka hoogirono, ooso ilate hasatto woꞌmitukki gata umise ‘qarra’ ikkitara dandiitanno. (Law. 13:12) Hundi yannara, ila hooga saalfachishannorichi gede assine laꞌnanni. Yaiqoobi galte Raaheeli, rodoose ila afidheenna ise ila hoogginohura lowo geeshsha dadillitino. (Kal. 30:1, 2) Haammata ooso ila rosantino gobbara heeꞌranno manni hakko soqqantanno misiyoone ooso iltannokkihu mayiraatiro xaꞌmannonsa. Misiyoone iltannokkihu mayiraatiro hayyotenni kultannonsaha ikkirono mannu kayinni “Ballo, Maganu tiroꞌne!” yaanno.

⁷ Hanni mitto lawishsha laꞌno; mitte Ingilaandete heedhanno rodoo ilate laalaattinoha ikkirono hasattose diwoꞌmitino. Isera iltanno yanna saꞌu. Ise, tini alame noo geeshsha ila dandiitannokkita affino daafira baasa dadillitino. Hakkiinni isenna minaannise manni qaaqqo adhe lossiꞌrate hedi. Ikkirono ise togo yitino: “Manni ooso adhe lossiꞌra meessa ille lossiꞌrate geeshsha ikkitannokkita afoomma daafira, dadillu giddoꞌyanni gudisame difulino.”

⁸ Qullaawu Maxaafi Kiristaana ikkitino mancho “ooso ilatenni gattanno” yaanno. (1 Xim. 2:15) Hatto yaa kayinni ooso ila hegere heeshsho afiꞌnanni gede assitanno yaa diꞌꞌikkino. Hatteentenni qummeeshshu kulanni noohu mitte mancho qaaqqo ilturo roore yanna qaaqqo towaaxxitanni sayissanno daafira, hemetenninna manni coyi giddora eꞌꞌatenni gattanno. (1 Xim. 5:13) Ikkollana, isera adhaminohuranna maate noonsa mannira iillanno qarri iillannose.

9. Galte shiiꞌra lowo geeshsha xissiisiꞌnanni gede assanno fonqolooti yineemmohu mayiraati?

⁹ Adhamino mannira iillannohu roore wote hendannikkihu wolu qarrino no. Hakkuno galte shiiꞌrate. Ee, batinyu mannira baalunkunni roore xissiisiꞌranno gede assanno qarri galtensa shiiꞌrate. Shiiꞌri manchi tenne alamera togoori iillannoe yee hedinokkiha ikkara dandaanno. Kiristaanu Yesuusi coyiꞌrinota kaote hexxo seekke ammananno. (Yoh. 5:28, 29) Tini hexxo shiiꞌri mancho kaaꞌlitannohu hiittoonniiti? Kaote hexxo galte shiiꞌrinoha lowo geeshsha sheshifachishshanno. Baxillaanchu Anninke qarru iillannonke wote Qaalisi widoonni kaaꞌlannonkenna sheshifachishannonke doogga giddo wole tenneeti. Hanni mite Maganu soqqamaanora iillinonsa qarranna isi sheshifachishinonsa gara laꞌno.

QARRU IILLANNO WOTE AFIꞌNANNI SHESHO

10. Haanna dadillisinose coyinni fooliishshidhinohu hiittoonniiti? (Hanafote noo misile lai.)

¹⁰ Hilqaana galte Haannara qarru iillinose. Ginase Finaana ooso iltinoha ikkirono Haanna kayinni ila diafidhino. (1 Saamueeli 1:4-7 nabbawi.) Finaana “diru dirunku” Haanna mishshanni qarrissannose. Tini Haanna xissiisidhannonna dadillitanno gede assitinose. Ise fooliishsho afiꞌrate iillinose qarra Yihowara hasaaphitino. Haanna Qullaawu Miniwa “uurrissukkinni” huuccidhino. Ise huuccidhino huuccattora Yihowa dawaro qolannoe yite heddino? Hatto yite heddukki digattino. Ise hatto yite heddinoha ikkirono ikka hoogirono, “hakkunni gedensaanni albisera dadillu dileellino.” (1 Sam. 1:12, 17, 18) Haanna Yihowa qaaqqo oyese huuccidhino huuccattora dawaro qolannota woy wole doogonni sheshifachishannoseta addaxxitino.

11. Huuccatto shesho afiꞌneemmo gede kaaꞌlitannonkehu hiittoonniiti?

¹¹ Guuntete xeꞌnenna tini Sheexaanu moohino alame noo geeshsha qarranna fonqolo ikkanno coyi heeꞌranno. (1 Yoh. 5:19) Ikkirono, Yihowa “jawaante baalate” Magano ikkinota afa lowo geeshsha hagiirsiissannote! Qarru iillannonke yannara dandee heeꞌrate kaaꞌlo afiꞌneemmo doogo giddo mitte huuccattote. Haanna giddoseta Yihowara huuccattotenni kuꞌlitino. Ninkeno qarru iillannonke wote iillinonke qarra Yihowara mulla gede asse kulatenni sainore assa hasiissannonke. Qarrisinonke coye kulle iso eeggifata hasiissannonke.—Fil. 4:6, 7.

12. Haanna hagiirre afidhanno gede kaaꞌlinoseri maati?

¹² Ila hooge woy galte shiiꞌre dadillino manni nafa shesho afiꞌra dandaanno. Yesuusi uullate aana noo waro Haanna yinanni masaalaancho no; ise mine assidhe minaannise ledo lamala diro calla heedhuhu gedensaanni minaannase shiidhino. Qullaawu Maxaafi isera ooso nooseronna teꞌee kulannori dino. Haanna 84 diro ikkase geeshsha nafa maa assa diagurtino? Luqaasi 2:37 togo yitanno: “[Ise] Qullaawu Mininni baxxitukkinni ita aga agurte huuccidhanni, hashshanna barra Maganoho soqqantanni heedhino.” Ee, Haanna Yihowa magansidhe sheshonna hagiirre afidhino.

13. Muli fiixi aguranno yannara addu jaali hiitto asse sheshifachisha dandaannoro leellishanno lawishsha kuli.

¹³ Ammanate roduuwinkewa shinqeemmoha ikkiro, addu jaalla afiꞌneemmo. (Law. 18:24) Poola ontu diriti heedheenna amase halaalu mininni fultu yannara dadillitino gara qaagganno. Konne qarra dandee heeꞌra isera shota diꞌꞌikkitinose. Ikkollana, songonsara soqqantannoti Eni yinanni suwisaancho sheshifachishshinose; hattono Qullaawa Maxaafa xiinxallissinose. Yannate gedensaanni Poola togo yitino: “Eni fiixaꞌya ikka hooggurono, ise anera baxillunni assitinoeri lowo geeshsha kaaꞌlinoe. Hattono Yihowara soqqama agureemmakki gede baasa kaaꞌlinoe.” Poola Yihowara ammanante soqqamase diagurtino. Ise yannate gedensaanni amase wirro songo higginotera lowo geeshsha hagiidhitino. Enino Poolara ayyaanaamittete ama gede ikkitino daafira lowo geeshsha hagiidhitino.

14. Woloota sheshifachinshummoro mayi atoote afiꞌneemmo?

¹⁴ Mannaho danchare assineemmoha ikkiro, mito qarranke diqaangeemmo. Adhaminorino adhaminokki roduuwino dancha duduwo ammanate roduuwinsa ledo duduwanno; konni garinni Maganu ledo loosansa hagiidhanno gede assitannonsa. Insa hasatto Maganu fajjo assanni isi ayirranno gede assate. Mitu roduuwi isinni soqqansho dhibbinsara xagichu gede asse laꞌꞌanno. Ee, baalunku qooxeessinkera noo manniranna songote giddo noorira hendeemmota leellinsheemmoha ikkiro, roduuwinke ledo mittimma heedhannonke. (Fil. 2:4) Tennera soqqaamaasinchu Phaawuloosi dancha lawishsha ikkannonke. Isi Teselonqe songora “oosose seekkite towaaxxitanno ama” gede ikkino; hattono ayyaanaamitte anni gede ikkinonsa.—1 Teselonqe 2:7, 11, 12 nabbawi.

MAATE SHESHIFACHISHA

15. Maganu umihunni oosote halaale rosiisate looso uyinohu ayeooraati?

¹⁵ Songote giddo maate kaaꞌla dandiineemmohu hiittoonniiti? Halaalu minira muli yannara dayinohu mitu roduuwi oosonsa rosiisanno wote songonsa giddo noohu gikki yiino roduuwi kaaꞌlannonsa gede woy oosonsara Qullaawa Maxaafa xiinxallisannonsa gede xaꞌmiꞌranno. Qullaawa borro oosote halaale rosiisanna qajeelsa hasiissannonsari annanna ama ikkitinota kultanno. (Law. 23:22; Efe. 6:1-4) Ikkollana, togoo roduuwi ooso wolootu kaaꞌlitanno woti heeꞌranno. Hatto yaa kayinni annunna ama oosonsa wolootu rosiissara wore aguranno yaa diꞌꞌikkino. Annunna ama oosonsa ledo ganye hasaawa hasiisannonsa.

16. Wolu manni ooso xiinxallinseemmo wote dea hasiissannonkekki coyi maati?

¹⁶ Mitte maate oosonsa xiinxallissenke yitunkero, ninke oosonsara anna woy ama ikkinoommohu gede ikka dihasiissannonke. Mite xiinxallinseemmo ooso anninna ama, Yihowa Farciꞌraasine ikka hoogara dandaanno. Oosonsara halaale rosiinsummorono ninke insara anna woy ama ikkinoommokkita dea dihasiissannonke. Hattoo ooso xiinxallinseemmoha ikkiro, minensa anninsanna amansa heeꞌreenna woy roduuwu ledo woy mannu afannowa xiinxallisa hayyote. Togo assa mannu gara ikkinokkire hedannokki gede assitanno. Gale hose, annunna ama oosonsara halaale rosiisanno gede Maganu uyinonsa looso wonshannoha ikkara dandaanno.

17. Ooso maatensa sheshifachisha dandiitannohu hiittoonniiti?

¹⁷ Magano baxxannonna amaalesi harunsitanno ooso, mininsa manna sheshifachisha dandiitanno. Insa annansanna amansa ayirrisse hattono hasiisannonsare assite tenne assa dandiitanno. Ooso Maganoho ammante heeꞌransano, maate woꞌma jawaachishshara dandiitanno. Baote Wayi daara albaanni heeꞌrinohu Seeti sircho ikkinohu Laamehi Yihowa Magansiꞌrannoho. Isi beettisi Nohi daafira togo yiino: “Kuni beetti Maganu rumino baatto aana daafuru loosinkenni fooliishshiishannonke.” Tini masaalo woꞌmitinohu Yihowa baatto rumino rumo hooli yannaraati. (Kal. 5:29; 8:21) Yannankerano Yihowara ammanante heedhanno ooso maatensa xa qarru iillannonsa yannara sheshifachisha, hattono Baote Wayinni roore waajjishshannota goofimarchu yanna gatte saꞌanno gede kaaꞌla dandiitanno.

18. Baxi qarri iillinkerono kaajjine heeꞌneemmo gede kaaꞌlannonkeri maati?

¹⁸ Huuccatto, Qullaawu Maxaafi giddo kulloonni lawishsha hiincanna Yihowa magansiꞌranno manniwa aana, lowo miliyoone ikkanno manni iillannonsa qarrinni shesho afiꞌranno gede assitanni no. (Faarso 145:18, 19 nabbawi.) Yihowa aye woteno sheshifachishannonketa afanke, xaano albillitteteno baxi qarri iillinkerono dandiine heeꞌneemmo gede kaaꞌlitannonke.