Yihowa Miicantinore Sheshifachishannohu Hiittoonniiti? (Shoolu Gafi Giddo Kuni Jeefonniho)

1-2. (a) Mannu ooso shesho hasidhannotanna woloota sheshifachishate dandoo noonsata leellishanno lawishsha kuli. (b) Mitu qaaqquulli gawajjamannohu hiittoonniiti?

MANNU ooso shesho hasidhanno; hattono woloota sheshifachishate dandoo noonsa. Lawishshaho mittu qaaqqi godoꞌlanni heeꞌre uwe gulucho gaꞌne madiriro, raaranni amanniwa woy annunniwa maranno. Annunna ama mada hursa dandiitannokkiha ikkirono, qaaqqo dogisiissara dandiitanno. Insa qaaqqo ma ikkinoro xaꞌmitara, hindiiddo fiitasira, rimmi assite hanqaffe dogisiissasira hattono madate xagicho gantaranna hoccunni usurtasira dandiitanno. Qaaqqu mulenni wiꞌla agure godoꞌlete higara dandaanno. Galte hossanni madano hurtanno.

² Mito woyite kayinni qaaqquullu hakkiinni roore gawajjamanno. Mito qaaqquulle bushiinshanninsa. Mittu qaaqqi mitte hinge woy duucha hinge bushiinshoonniha ikkara dandaanno. Ikkihano ikkiro, bushiinshoonniri lowo yanna xissiisidhanni heedhanno. Mito woyite bushiishino mancho amande qorichinshanni. Mite yannara kayinni bushiishino manchi qorichishamikki gatinoha lawara dandaanno. Bushiishino mancho bayichonko anfe qorichinshiro nafa, bushiinshoonni qaaqquulli lophe jajjabba ikkihu gedensaannino xissonsa hura hooggara dandiitanno.

3. Layinki Qorontoosi 1:3, 4 yitanno garinni Yihowa maa hasiꞌranno? Hiikkuri xaꞌmuwa xiinxallineemmo?

³ Anje heeꞌreenna bushiinshoonni Kiristaanchi lophihu gedensaannino xisso agura hooggusiro mayi kaaꞌlasira dandaanno? (2 Qorontoosi 1:3, 4 nabbawi.) Yihowa oososi baxillenna shesho afidhara hasiꞌrannoti egennantinote. Konni daafira hanni sase xaꞌmuwa xiinxallino: (1) Anje heedheenna bushiinshoonninsarira shesho hasiissannonsahu mayiraati? (2) Togoo manna sheshifachisha dandiitannori ayeooti? (3) Insa danchu garinni sheshifachisha dandiineemmohu hiittoonniiti?

SHESHO HASIISSANNONSAHU MAYIRAATI?

4-5. (a) Qaaqquullunna jajjabbu mitto ikkitinokkita qaaga hasiissannohu mayiraati? (b) Qaaqquulle bushiisha insa woloota ammaꞌnitannokki gede assitannohu hiittoonniiti?

⁴ Anje heedheenna bushiinshoonniri lophite jajjabba ikkituhu gedensaanni nafa shesho hasiissannonsaha ikkara dandaanno. Mayira? Tenne huwatate qaaqquullunna jajjabbu lowo geeshsha babbaxxitinore ikkitinota qaaga hasiissannonke. Qaaqquullu miicantanno garinna jajjabbu miicantanno gari babbaxxinoho. Hanni mito lawishsha laꞌno.

⁵ Qaaqquullu lossannonsanna towaatannonsa manni ledo jaalooꞌmanno hattono insa addaxxanno. Qaaqquullu togoo jaalooma kalaqiꞌransa masannokkinna baxannonsa manna addaxxanno gede assitannonsa. (Far. 22:9) Duucha woyite qaaqquulle bushiishshannori mini giddo maatensa miillaati woy maatensawa aananno mannaati. Ammaꞌnitino manchi bushiishinonsa qaaqquulli lophite jajjabba ikkituhu gedensaannino manna ammaꞌna qarra ikkitansara dandiitanno.

6. Qaaqquulle bushiisha insa baasa gawajjitanno yineemmohu mayiraati?

⁶ Qaaqquullu umonsa gargadhite diaffanno. Hakko daafira bushiishannonsa manchi baasa gawajjannonsa. Adhamino manni assannohu siimu xaadooshshira iillate lowo diri gatinonsare beebbaataamma qaaqquulle bushiisha insa lowo geeshsha gawajjitannonsa. Qoleno siimu xaadooshshira gara ikkitinokki lao heedhannonsa gede assitanno; hattono qaaqquullu insaneeto tidhitinokkiri gede assite laꞌanno gedenna woloota ammaꞌnitannokki gede assitanno.

7. (a) Qaaqquulle bushiishshannori insa doggara dandiitannohu mayiraati? Insa hatto assitannohu ma garinniiti? (b) Togoo kaphi qaaqquulle gawajjara dandaannohu hiittoonniiti?

⁷ Qaaqquullu gawajjannonsa coye badde affe hakko coyiwiinni xeertiꞌrate dandoo diafidhino. (1 Qor. 13:11) Konni daafira qaaqquulle bushiishannohu xagaraamu manchira insa doga diqarrissannosi. Togoo manni qaaqquulleho kapho kulara dandaanno; lawishshaho, bushuullu insa ikkitinota kulansara, assinummori woleho dikullannireeti yaansara, kulturo nafa ammanannonsahu nookkita kulara, hattono qaaqqunna jawu siimu xaadooshshe assannohu mimmito baxanno daafiraati yee dogansara dandaanno. Kuri qaaqquulli kuni baalu kapho ikkinota affannohu lowo diri gedensaanni ikkara dandaanno. Togoo qaaqquulli, battaabbinore, mannu woriidirenna baxillunna shesho hasiissannonsakkire ikkitinohu gede assite heddanni lophitanno.

8. Yihowa miicantinore sheshifachisha dandaannota addaxxineemmohu mayiraati?

⁸ Konni daafira, anje bushiinshoonni manni lowo diro xissiisiꞌransa dhagge diꞌꞌikkitanno. Tini shagaggiꞌnanni jaddooti! Alame woꞌmate halaꞌlinohu kuni assooti, heeꞌnoommohu goofimarchu yannara ikkinota leellishanno; goofimarchu yannara mannu “baxillu nookkiha” ikkannota, hattono ‘bushunna awaawuranno manni bunshete aana bunshe ledannota’ masaalloonni. (2 Xim. 3:1-5, 13) Sheexaanu horoonsiꞌranno hayyo bunshe woꞌmitinote; qoleno mannu Sheexaane hagiirsiisannore assansa dadillissannote. Ikkollana Yihowa wolqa, Sheexaanunnitano ikko isi hasatto wonshitannori wolqa roortanno. Yihowa Sheexaanu xagarro seekke afino. Konni daafira, Yihowara xissonke leeltannositanna sheshifachishankera dandaannota addaxxineemmo. “Jawaante baalate Magani” Yihowa soqqamaano ikkankenni maassammoommoreeti; isi “qarrinke baalu giddo jawaachishannonke daafira, ninkeno Maganuwiinni afiꞌnoommo jawaantenni, qarru baalu giddo noore jawaachisha dandiineemmo.” (2 Qor. 1:3, 4) Ikkina Yihowa jawaachishannonkehu ayeoo widoonniiti?

SHESHIFACHISHA DANDIITANNORI AYEOOTI?

9. Moote Daawiti Faarso 27:10te coyiꞌrino garinni, Yihowa maatensa tugge agurtinonsare ma assanno?

⁹ Hakko iso anninsanna amansa tuge agurinonsarira woy ammaꞌnino manni bushiishinonsa qaaqquullira shesho hasiissannonsa. Faarsaasinchu Daawiti baalunkunni roore sheshifachishankera dandaannohu Yihowa ikkinota huwatino. (Faarso 27:10 nabbawi.) Daawiti maatensa tugge agurtinonsare Yihowa towaatannonsata addaxxino. Yihowa konne assannohu hiittoonniiti? Isi uullate aana noori ammanantino soqqamaasinesi widoonni sheshifachishannonke. Ledonke Yihowara soqqantanno roduuwinke, ayyaanaamittete maatenkeeti. Lawishshaho Yesuusi, ledosi Yihowa magansidhannore roduuwaꞌya hattono amaꞌya yiino.—Mat. 12:48-50.

10. Soqqamaasinchu Phaawuloosi cimeessa ikke loosanno loosi daafira mayino?

¹⁰ Hanni Kiristaanu songo maatete gede ikkitinota leellishanno lawishsha laꞌno. Soqqamaasinchu Phaawuloosi chaachaarahonna ammanamino cimeessaati. Isi wolootaho dancha lawishsha ikkino; isinni, isi Kiristoosi lawishsha harunsinonte gede wolootuno isi lawishsha harunsitanno gede qullaawu ayyaaninni amaalino. (1 Qor. 11:1) Phaawuloosi cimeessa ikke loosanno loosi daafira togo yiino: “Oosose seekkite towaaxxitanno ama gede, giddoꞌne kawajjotenni heeꞌnoommo.” (1 Tes. 2:7) Yannankera nooti ammanantino cimeeyyeno Qullaawa Borro horoonsidhe awu afiinni coyidhe shesho hasiissannonsare jawaachishshanno.

11. Woloota sheshifachishshannori cimeeyye calla diꞌꞌikkitino yineemmohu mayiraati?

¹¹ Bushiinshoonnire sheshifachisha dandiitannori cimeeyye callateni? Deeꞌni. Ninke baalunku ‘mimmito jawaachisha’ hasiissannonke. (1 Tes. 4:18) Roorenkanni ayyaanaamittetenni gikki yiinohu meya roduuwi, shesho hasiissannonsare meya roduuwa sheshifachisha dandaanno. Yihowa isonooto qaaqqose dogisiissanno ama ledo taashshasi garankolla. (Isa. 66:13) Qullaawu Maxaafi dadillitinore sheshifachishino meentire kulanno. (Iyo. 42:11) Xaa yannarano Yihowa xissiisiꞌrinoha meya roduuwansa sheshifachishate woꞌnaalanno meento laꞌꞌanno woyite lowo geeshsha hagiidhanno! Mito woyite songote cimeeyye ayyaanaamittetenni gikki yitino rodoo, wole xissiisidhinota meya rodoo sheshifachishshanno gede hayyotenni xaꞌmitara dandiitanno.b

SHESHIFACHISHA DANDIINEEMMOHU HIITTOONNIITI?

12. Maa assineemmokki gede qoropha hasiissannonke?

¹² Ammanate rodiinke mannu afara hasiꞌrannokkire kulankera qora dihasiissannonke. (1 Tes. 4:11) Ikkina shesho hasiissannonsare kaaꞌla dandiineemmohu hiittoonniiti? Hanni insa sheshifachisha dandiineemmota onte doogga Qullaawu Maxaafinni laꞌno.

13. Umi Mootoolla 19:5-8 kultanno garinni, Yihowa sokkaasinchi Eeliyaasira maa assino? Ninke isi lawishsha harunsa dandiineemmohu hiittoonniiti?

¹³ Kaaꞌlannonsare asse. Masaalaanchu Eeliyaasi lubbosi adhe xooqanni noo yannara, hexxo mudhino daafira reyo halchino. Yihowa konne yaadino soqqamaanchosi jawaachishate mitto wolqaataamo sokkaasincho soyino. Sokkaasinchu Eeliyaasira hakka woyite hasiise noore asse kaaꞌlino. Isi raꞌino sagale oyesi shaqqillunni iti yiinosi. (1 Mootoolla 19:5-8 nabbawi.) Tenne xaggenni kaajja roso ronseemmo: Wolootaho assineemmohu shiimu danchu coyi nafa lowore kaaꞌlansara dandaanno. Lawishshaho, sagale koyisa, mitore aa woy jawaachishannore coyiꞌra hexxo mudhitino roduuwinke banxeemmonsatanna insa daafira hendeemmota huwattanno gede assitara dandiitanno. Roduuwinkera iillinonsare kayinse hasaawa waajjinummoro nafa, togoore assine kaaꞌlinammonsara dandiineemmo.

14. Eeliyaasi xaggenni maa ronseemmo?

¹⁴ Yaaddinori waajjitannokkinna beꞌe yitannokki gede asse. Eeliyaasi xaggenni ronseemmohu wolu rosino no. Yihowa kuni masaalaanchi xeertowa nooha Korebi Ilaala iillanno gede maalaletenni kaaꞌlinosi. Yihowa lowo xibbi diri albaanni dagasi ledo qaalu gondooro einohu hattee baseraati; konnira Eeliyaasi hakkiira iillita wodanu hirikki yiinosiha ikkara dandaanno. Eeliyaasi, ‘Gawajjaera hasiꞌranno manni xaate horo diꞌꞌiillannoe’ yee harshammi yiinoha ikkara dandaanno. Konni lawishshinni maa ronseemmo? Bushiinshoonni manna sheshifachisha hasiꞌnummoro, balanxe wodanaaꞌmitanno gede assa hasiissannonkeha ikkara dandaanno. Lawishshaho, cimeeyye mitte gawajjantino rodoo tenne hajo daafira Gambooshshu Addaraashera hasaawantenni mine deseꞌe yitinowa hasaawinsasera hasidhannoha ikkara dandaannota qaaga hasiissannonsa. Wolootu kayinni Gambooshshu Addaraashe giddo hasaawinsansara hasidhannoha ikkara dandaanno.

15-16. Seekke macciishshate yaa maa maa assate?

¹⁵ Seekkitine macciishshe. Qullaawu Maxaafi, “Mannu baalu macciishshate rahinoha, coyiꞌratenna hanqoho muddamannokkiha ikko” yee amaalannonke. (Yai. 1:19) Wolootu hasaaphitanno woyite seekkitine macciishshitinanni? Seekke macciishshate yaa, cuqqi yinikki coyiꞌranno mancho laꞌnanni macciishsha calla labbankera dandiitanno. Ikkollana dancha gede macciishshate yaa hatto assa calla diꞌꞌikkitino. Lawishshaho, Eeliyaasi gedensoonni yaachishinosire baalankare hasaaphi woyite Yihowa seekke macciishshinosi. Yihowa, Eeliyaasi waajjinota, callatinotanna loosisi waaga afiꞌrinokkihu gede asse hedinota wodanchino. Hakko daafira Yihowa, Eeliyaasi yaachishinosire baala qeelanno gede baxillunni kaaꞌlinosi. Tini, Eeliyaasi hasaaphanna seekke macciishshinota leellishshanno.—1 Mot. 19:9-11, 15-18.

¹⁶ Wolootu hasaaphitanna macciishshineemmo woyite, baxillenna mararro leellisha dandiineemmohu hiittoonniiti? Mito woyite godowinta mararreemmonsata leellishannoha boode coye hayyotenni coyiꞌra, hedonke xawissara dandiitanno. Lawishshaho, togo yaa dandiitinanni: “Iillinohe coyi lowo geeshsha dadillisannoho! Qaaqquulle togo assa horo gara diꞌꞌikkitino!” Qoleno hasaawissinanni heedhinoonni rodii yiinore garunni huwattinoonnita buuxate mitte lame xaꞌmo xaꞌmitinara dandiitinanni. Konni garinni shaqqillunni coyiꞌraꞌne, seekkitine macciishshitinanni heedhinoonnitanna marartinannisita huwatanno gede assitara dandiitanno.—1 Qor. 13:4, 7.

17. Cincineemmorenna ‘coyiꞌrate muddammeemmokkire’ ikka hasiissannonkehu mayiraati?

¹⁷ Ikkollana ‘coyiꞌrate muddammeemmokki’ gede qoropha hasiissannonke. Gawajjamino manchi hasaaphanno woyite, iso amaalate woy hedosi taashshate yitine mereero eꞌinoonte. Qoleno cincitinannire ikke! Eeliyaasi giddosita Yihowara hasaaphi woyite, hexxo mudhino daafira hururame coyiꞌrino. Yihowa Eeliyaasira ammanasi kaajjitanno gede kaaꞌlisi gedensaannino, Eeliyaasi xaano alba coyiꞌri garinni coyiꞌrino. (1 Mot. 19:9, 10, 13, 14) Tenne xaggenni maa ronseemmo? Mito woyite dadillino manni giddonsata xaa xaa kuꞌla hasiꞌrannoha ikkara dandaanno. Tenne yannara, ninkeno Yihowa gede cincine macciishsha hasiissannonke. Qarrinsara mala kulate woꞌnaalantenni mararronna shaqqille leellisha hasiissannonke.—1 Phe. 3:8.

18. Huuccattonke hexxo mudhitinore sheshifachishshara dandiitanno yineemmohu mayiraati?

¹⁸ Xissiisiꞌrino manchi ledo Yihowara giddoꞌneta kultine huuccidhe. Hexxo mudhino manchi huuccatto assiꞌra hoogara dandaanno. Kuni manchi Yihowa coyishiishate diꞌꞌikkoommoho yee hedara dandaanno. Suꞌmasi ganne ledosi huuccatto assiꞌra, konne mancho sheshifachishshara dandiitanno. Huuccatto assineemmo woyite, hexxo mudhinoha ammanate rodoonke ninkeno songono baxxannosita Yihowara kula dandiineemmo. Qoleno Yihowa konne muxxe soqqamaanchosi sheshifachishannosinna sissannosi gede huucca dandiineemmo. Togoo huuccatto, hexxo mudhitinore lowo geeshsha sheshifachishshara dandiitanno.—Yai. 5:16.

19. Woloota sheshifachishshanno qaalla doodhate mayi kaaꞌlannonke?

¹⁹ Hursitannotanna sheshifachishshanno qaalla doortine coyidhe. Heddine coyidhe. Kaꞌni gede coyiꞌnanni qaali madiissara dandaanno. Awu afiinni coyiꞌra kayinni hursitanno. (Law. 12:18) Hakko daafira, jawaachishannonna sheshifachishannore coyidhinanni gede kaaꞌlaꞌnera Yihowa huuccidhe. Yihowa coyiꞌrino qaali geeshsha manna sheshifachishara dandaannori nookkita qaango; konnira woloota jawaachishate Qullaawa Maxaafa seekkine horoonsiꞌno.—Ibi. 4:12.

20. Mitootu roduuwinke iillitinonsa miiconni kainohunni mayite heddara dandiitanno? Ninke insa maa qaagganno gede kaaꞌla hasiissannonke?

²⁰ Mitu bushiinshoonni roduuwinke battaabbinore, waagu noonsakkire, baxannohu nookkirenna ayino baxansara dandaannokkire ikkitinohu gede assite heddara dandiitanno. Kayi coyi dihattooti! Konni daafira Qullaawa Borro horoonsidhine Yihowa lowo geeshsha baxannonsata huwattanno gede kaaꞌlensa. (“Qullaawu Maxaafinni Afiꞌnanni Shesho” yitanno saaxine lai.) Masaalaanchu Daanieeli hexxo mudhi yannara, sokkaasinchu shaqqillunni jawaachishinosi gara qaagge. Yihowa Daanieeli Isi albaanni muxxe ikkinota huwatara hasiꞌrino. (Dan. 10:2, 11, 19) Xissiisiꞌranni noo roduuwinkeno Yihowa albaanni muxxete!

21. Bushare assite maaro eꞌannokkiri baalu ma ikkitanno? Hakka geeshsha kayinni ninke baalunku maa assate murciꞌra hasiissannonke?

²¹ Woloota sheshifachinsheemmo woyite, Yihowa baxannonsata qaagganno gede kaaꞌlineemmonsa. Qoleno isi taashsho baxanno Magano ikkinota dea dihasiissannonke. Isiwiinni goꞌlinohu mittuno bushu assooti dino. Yihowa baalanka coye laꞌꞌanno; qoleno cubbo loosse maaro eꞌannokkire qorichishikkinni diaguranno. (Kir. 14:18) Hakka geeshsha kayinni bushiishshannori gawajjitino roduuwinkera baxille leellishate dandiinummore baala assino. Yihowa, Sheexaanunna alamesi madiissitinore hegerera hursannonsta afanke sheshifachishshannonke! Muli yannara, xissiisannonke coye baala woꞌmunni woꞌma hambeemmo yanna dagganno!—Isa. 65:17.