Cincatenni Quqquxantine Agadhitinanni?

1, 2. (a) “Mamooti geeshsha?” yine xaꞌmineemmo gede assannonkeri maa ikkara dandaanno? (b) Hunda Yihowara ammaname soqqamino manni lawishshi jawaachishannonke yineemmohu mayiraati?

‘MAMOOTI geeshsha?’ Togo yite xaꞌmitinori ammanantino masaalaano Isayaasinna Imbaaqoomiiti. (Isa. 6:11; Imb. 1:2) Moote Daawitino Faarso 13 borreessi yannara, “mamooti geeshsha?” yitanno xaꞌmo shoole hige xaꞌmino. (Far. 13:1, 2, NW) Mootichinke Yesuusi Kiristoosino ammana nookki manni qarrisisi yannara tenne xaꞌmo xaꞌmino. (Mat. 17:17) Hakko daafira, ninkeno hatto yine xaꞌmineemmo yanna heedhara dandiitanno.

² Ninke “Mamooti geeshsha?” yine xaꞌmineemmo gede assankera dandaannori maati? Taashsho xeꞌino coyi iillankera dandaanno. Qoleno, geedhimma woy fayyimmate hoonge qarrissankera dandiitanno; woy ‘goofimarchu barrite qarrissanno yanna’ giddo heeꞌra qarra ikkitinonkeha ikkara dandaanno. (2 Xim. 3:1) Woy qooxeessinkera heeꞌranno manni gara ikkitinokki lao noonsare ikkansa, hexxo mudhineemmo gede assitankera dandiitanno. Ninkera qarra ikkinonke coyi ikkiha ikkirono, hundi yannara Yihowara ammaname soqqamino mannino ninke xaꞌmineemmo gedee xaꞌmo xaꞌminotanna tennera Yihowa boroorinonsakkita afa jawaachishshannote.

3. Fonqolu iillannonke wote mayi kaaꞌlankera dandaanno?

³ Fonqolu iillannonke wote kaaꞌlannonkeri maati? Rosaanchu Yaiqoobi qullaawu ayyaaninni togo yee borreessino: “Roduuwaꞌya! . . . Mootichu daa [“bayicho amada,” NW] geeshsha cincatenni agadhe!” (Yai. 5:7) Ee, ninke baalunku cinca hasiissannonke. Ikkina, cincate yaa mayyaate? Cinca dandiineemmohu hiittoonniiti?

CINCATE YAA MAYYAATE?

4, 5. (a) Cincate yaa mayyaate? Cinca dandiineemmohu hiittoonniiti? (b) Rosaanchu Yaiqoobi cinca hasiissannonketa mitte doogo lawishshunni xawisinohu hiittoonniiti? (Hanafote noo misile lai.)

⁴ Qullaawu Maxaafi cinca qullaawu ayyaaninni afiꞌnanni akata ikkinota kulanno; guuntete xeꞌne noonsa manni Maganu kaaꞌlo nookkiha woꞌmunni woꞌma cinca didandaanno. Cinca Maganu aanno eltooti; iso banxeemmota leellinsheemmote qara qara doogga giddo mitte cincate. Cinca manna banxeemmota leellishateno kaaꞌlitannonke. Cinca hooga kuni baxilli baꞌꞌanno gede assitanno; cinca kayinni jawaachishshanno. (1 Qor. 13:4; Gal. 5:22) Cinca wole Maganu baxanno akatta ledono xaado afidhino. Lawishshaho, cinca qarru yannara danchare hendanni gede assannohu kaajje heeꞌrate akatiwiinni bande laꞌnannire diafidhino. (Qol. 1:11; Yai. 1:3, 4) Qoleno, cinca gawajjannori iillannonke yannara bado qola agurre dandiine heeꞌratenna baxi qarri iillinkerono ammanamme heeꞌrate ledo xaado afidhino. Qullaawu Maxaafi mitto coye agadha hasiissannonketa ammanne adha hasiissannonketa xawisanno. Yaiqoobi 5:7, 8 giddo konni garinni cinca hasiissannota xawinsooni. (Qummeeshsha nabbawi.)

⁵ Yihowa qaale einore wonshanno yanna cincine agadha hasiissannonketa ammana hasiissannonke. Mayira? Yaiqoobi ninke gara gibirinnu looso loosiꞌranno manchi ledo heewisiisino. Gibirinnu looso loosiꞌranno manchi daafure loosiꞌrannoha ikkirono, arrishsho fultanno gede woy xeena gananno gede assa didandaanno, hattono wixiꞌrinori rahe lophanno gede asse diafanno. Woy wixiꞌrinore mixxanno yanna rakke dagganno gede assa didandaanno. Kuni manchi baatto laashshitannoha “dancha guma” afiꞌrate cince agadha hasiissannosita ammane adha hasiissannosi. Hatteente gede, ninkeno Yihowa eino qaale wonshanno yanna agadhineemmo wote assine anfeemmokkihu haammatu coyi no. (Maq. 13:32, 33; Soq. 1:7) Gibirinnu looso loosiꞌranno manchi gede ninkeno cinca hasiissannonke.

6. Masaalaanchu Mikiyaasi lawishshinni maa ronseemmo?

⁶ Ninkerano masaalaanchu Mikiyaasi yannara noo gedee coyi iillannonke. Isi heeꞌrinohu bushu Moote Akaazi moohe noo yannaraati; hattee yannara addi addi bunshe batidhino. Isinni, hatte yannara noo manni “bushino coye assate addintanni busuloota” ikkinota kulloonni. (Mikiyaasi 7:1-3 nabbawi.) Mikiyaasi konne coye umisinni soorra dandaannokkita afino. Isi assa dandaannori maati? Isi togo yiino: “Ani kayinni Kaaliiqa agadheemmo. Gatisaanchoꞌya Magano hexxeemmo. Isino macciishshannoe.” (Mik. 7:7) Ninkeno Mikiyaasi gede ‘Magano hexxa’ woy iso agadha hasiissannonke.

7. Yihowa eino qaale agadha hasiissannonkehu hiittoonniiti?

⁷ Mikiyaasite gedee ammana heedhunkero cincine agadhineemmo. Yihowa eino qaale wonshanno yanna quqquxamme agadhineemmo. Ninke gari, shinannisi barra agadhe noo usuranyi gedeeha diꞌꞌikkino. Kuni usuranyi konne barra agadhannohu baxe diꞌꞌikkino; qoleno reyosi quqquxame diagadhanno. Ninke gari kayinni horo baxxinoho! Ninke Yihowa eino qaale wonshanno yanna quqquxamme agadhineemmohu, isi hegere heeshsho aankera eino qaale murino yannara wonshannota anfoommo daafiraati. Konni daafira, “cincatenni baalanka coye dandaate hagiirrunni” qixxaambeemmo. (Qol. 1:11, 12) Yihowa coye rahe biddi diassino yine gungummanni agarreemmoha ikkiro kayinni, isi dihagiidhanno.—Qol. 3:12.

CINCATE LAWISHSHA IKKITANNONKERE

8. Ammaname heeꞌrinohu hundi labballinna meenti lawishsha hiincineemmo wote maa heda hasiissannonke?

⁸ Yihowa eino qale wonshanno yanna cince agadhinohu hundi labballinna meenti lawishsha qaaganke quqquxamme agadhate kaaꞌlitannonke. (Rom. 15:4) Insa lawishsha hiincanke, insa mageeshshi yanna cinca hasiissinonsaronna cince agadhinohu mayiraatiro, hattono tini mayi atoote afiꞌranno gede assitinonsaro qaagate kaaꞌlitannonke.

9, 10. Abirihaaminna Saara Yihowa eino qaale wonsha geeshsha mageeshshi yanna agarino?

⁹ Hanni Abirihaaminna Saara lawishsha laꞌno. Insa, ‘ammanatenninna cincatenni kaajje Maganu hedinonsa coye ragiꞌranno’ manni wodooti. Qullaawa Borro “Abirihaamino cince agadhihu gedensaanni,” Yihowa iso maassiꞌratenna sirchosi batisate qaale einosita kultanno. (Ibi. 6:12, 15) Abirihaami cinca hasiissinosihu mayiraati? Isi cinca hasiissinosihu, Yihowa einosi qaali woꞌmate yanna hasiissanno daafiraati. Yihowa Abirihaami ledo eino gondoori woꞌma hanafinohu, Niisaani 14, 1943 K.A. Hatte yannara Abirihaaminna Saara, mininsa manni ledo Efiraaxisi Laga tayise sae Hexxote Gobba eino. Abirihaami hakkuyi gedensaanni, 1918 K.A. Yisihaaqi ilama geeshsha 25 diro agara hasiissinosi; hakkiinnino 1858 K.A. beettisi ooso Eesawunna Yaiqoobi ilanta geeshsha 60 diro agara hasiissinosi.—Ibi. 11:9.

¹⁰ Abirihaami Hexxote Gobbara mageeshshi baatto ragiꞌrino? Qullaawu Maxaafi togo yaanno: “[Yihowa Abirihaamira] kaxxe uurranno darga nafa diuyinosi. Ikkollana hattenne gobba isiranna sirchisira iqqa asse aara xaarino. Xaarinohu Abirihaami ooso ilikkinniiti.” (Soq. 7:5) Yihowa Abirihaamira eino qaali, Abirihaami Efiraaxisi Laga tayise saihunni kayise sirchisi daga ikke hexxote gobba ragiꞌra geeshsha, yaano 430 diri saꞌꞌa geeshsha diwoꞌmino.—Ful. 12:40-42; Gal. 3:17.

11. Abirihaami Yihowa qaale eino coye quqquxame agadhinohu mayiraati? Isi cince agadhasi albillitte mayi atoote afiꞌranno gede assitannosi?

¹¹ Abirihaami cince agadhinohu Yihowa yiinore wonshannota ammananno daafiraati. (Ibiraawoota 11:8-12 nabbawi.) Abirihaami Yihowa einosi qaali gudisame woꞌmanna lainokkiha ikkirono, hagiirrunni agadhino. Isi gannate ikkitino uullara reyotenni kaꞌꞌanno wote mageeshshi geeshsha hagiidhannoro hanni hedde. Abirihaami Qullaawu Maxaafi giddo isinna sirchisire kultannota lowo xagge borreessinoonnita afanno wote lowo geeshsha dhagge assiꞌrannoti dihuluullissannote.a Qoleno, Abirihaami Yihowa Mesihichu ilamanno gede assinohu isi sirchi widoonni ikkinota mite yee macciishshanno wote mageeshshi geeshsha hagiidhannoro hanni hedde! Isi lowo yanna cince agadhasinni horo digaabbanno.

12, 13. Yooseefi cinca hasiissinohu mayiraati? Isira hiitti dancha lao noosi?

¹² Abirihaami awura ikkannohu Yooseefino cince agadhino. Isira addi addihu taashsho xeꞌinori iillinosi. Isira 17 diro ikkisi balla roduuwisi borojjimate hirtinosi. Gedensaanni mootichisi galte seyate hooginoe yite beebba wortinosi daafira usuru minira eessinoonnisi. (Kal. 39:11-20; Far. 105:17, 18) Kuni coyi, isi danchare assinotera atoote afiꞌranno bayicho qarru iillinosiha lawara dandaanno. Ikkollana 13 diri gedensaanni coyi baalu soorrami. Isi usuru mininni fule Gibitsete gobbara silxaanetenni layinkiha ikki.—Kal. 41:14, 37-43; Soq. 7:9, 10.

¹³ Yooseefi taashsho xeꞌino coyi iillinosihura caaccaawinoni? Woy Maganu Yihowara noosi ammana baꞌanno gede assiꞌrinoni? Diasiꞌrino. Yooseefi cincatenni agadhanno gede kaaꞌlinosiri maati? Tennera kaaꞌlitinositi Yihowara noosi ammanaati. Isi Yihowa coye biddi assannota afino. Yooseefi roduuwisira coyiꞌrinori tenne leellishanno: “Waajjitinoonte! Bado qolammora ani Magano diꞌꞌikkoommo! Kiꞌne busha coye heddinierono, Maganu kayinni techo laꞌnanninte gede lowo manna gatisate danchummate qolino.” (Kal. 50:19, 20) Yooseefi afiꞌranno atooti Yihowa coye biddi assanno yanna agadhatenni roorannota afino.

14, 15. (a) Daawiti cincasi dhagge ikkitannohu mayiraati? (b) Daawiti cincanno gede kaaꞌlinosiri maati?

¹⁴ Moote Daawitirano batinyu taashsho xeꞌino coyi iillinosi. Yihowa Daawiti Israeelete moote ikkanno gede anje heeꞌreenna buurinosiha ikkirono, isi gaꞌresira moote ikke moohate mitu 15 diri geeshsha agara hasiissinosi. (2 Sam. 2:3, 4) Tenne yannara ammanamikki gatinohu Moote Saaooli Daawiti shaara shorra hanafino.b Konnira, Daawiti mito wote wole gobbara, mito wote kayinni goddate maaxamanni heeꞌrino. Isi Saaooli olunniwa reyihu gedensaanni nafa, Israeelete dagara moohanno gede mootimma uyinasi geeshsha, xaano mitu lamalu diri geeshsha agadha hasiissinosi.—2 Sam. 5:4, 5.

¹⁵ Daawiti cince agadhinohu mayiraati? Isi, “Mamooti geeshsha?” yee shoole hige xaꞌmi fooliishshonkura cince agadhinohu mayiraatiro kulanni togo yiino: “Ani kayinni bagamannokkiha baxillekki addaxxeemmo; wodaniꞌyano gatisaanchimmakkinni hagiidhanno. Assinoe danchummara, Kaaliiqira faarsiꞌreemmo.” (Far. 13:5, 6) Daawiti Yihowa baxannositanna duuchanka wote ammanaminoha ikkinota afino. Isi iillannosi qarra Yihowa hoolanno gara afate quqquxame agadhino; hattono alba Yihowa kaaꞌlinosi gara qaagino. Ee, Yihowa coye biddi assanno yanna agadhasi kiissannosita afino.

16, 17. Yihowanna Yesuusi cince agadhate dancha lawishsha ikkitannonkehu hiittoonniiti?

¹⁶ Yihowa umisi cincannokkiha ikkoommero ninke cince diyaannonke. Quqquxame agarate baalunkunni roore lawishsha ikkannonkehu isooti. (2 Pheexiroosi 3:9 nabbawi.) Lawishshaho, lowo diri albaanni Sheexaanu Yihowara gashshate qoosso dinosi yee yekkeeramino; Yihowa tenne yekkeerora dawaro huluullisannokki garinni qolate cince keeshshino. Isi suꞌmisi woꞌmunni woꞌma qullaawa ikkanno yanna cince agare no. Tini, Yihowa eino qaale wonshanno yanna cince agadhanno manni taalle nookki atoote afiꞌranno gede assitanno.—Isa. 30:18.

¹⁷ Yesuusino cince agadhannoho. Isi uullate aana fonqolo baala qeele iimira haꞌre 33 M.D. kakkalosi waaga Maganu albira shiqishinoha ikkirono, gashsha hanafate 1914 geeshsha cince agara hasiissinosi. (Soq. 2:33-35; Ibi. 10:12, 13) Qoleno, diinnasi isihu Kumu Diri Gashshooti jeefora gudisante baꞌa geeshsha cinca hasiissannosi. (1 Qor. 15:25) Tini shiima yanna diꞌꞌikkitino; ikkirono cinca kiissanno.

CINCINE AGADHATE KAAꞌLANNONKERI MAATI?

18, 19. Cincine agadhineemmo gede kaaꞌlannonkeri maati?

¹⁸ Ninke baalunku cincine agadha hasiissannonke. Tennera kaaꞌlannonkeri maati? Maganu qullaawa ayyaanasi aannonke gede huuccatto assiꞌra hasiissannonke. Qullaawu ayyaani gumi akatta giddo mitte cinca ikkitinota deꞌinoonte. (Efe. 3:16; 6:18; 1 Tes. 5:17-19) Konnira Yihowa cincitine kaajjitine heeꞌrate kaaꞌlannoꞌne gede iso eeggifatte.

¹⁹ Qoleno, Maganu qaale eino coye cince agadhino manna, lawishshaho Abirihaami, Yooseefinna Daawiti kaaꞌlinonsare qaagge. Insa kaaꞌlitinonsati Yihowara noonsa ammanaatinna iso addaxxansaati. Insa uminsare woy afiꞌra hasidhanno coyi aana diꞌꞌillachishshino. Insa afidhino atoote hiincanke, ninkeno cincine agadhineemmo gede jawaachishshannonke.

20. Maa assate murciꞌrootto?

²⁰ Konni daafira, fonqolunna qarru iillinkero nafa, hexxotenni cincine agadhate murciꞌno. Hige mito wote, ‘Yihowa, mageeshshi geeshsha?’ yineemmo woti heeꞌrara dandaanno. (Isa. 6:11) Qullaawu ayyaani kaaꞌlonni, baalunku Ermiyaasi yii gede murciꞌne togo yineemmo: “Anera nooehu Kaaliiqa [“Yihowa,” NW] ikkinohura, iso calla hexxeemmo.”—Erq. 3:21, 24.