Yihowa Cincitine Agadhitinanni?

1-2. Konni birxichira maa ronseemmo?

JAALIKKI mitto lowo geeshsha hasiisinohe uduunnicho abbeemmohe yeenna agadhite nootto yine hendo. Kayinni isi agadhootto saatera abbe iillisha hoogihero hiitto ikkatto? Caaccaawatto? Lawishsha 13:12, “Woꞌmitukkinni keeshshitanno hexxo wodana daafursitanno” yitanno. Aterano hatto macciishshamahera dandaanno. Kayinni jaalikki agadhootto saatera dayinokkihu mulla kae ikkinokkitalla afitto? Hattee afittoro, cincite agadha qarrisa hooggahera dandiitanno.

² Konni birxichira, cincine ‘agadhineemmo’ gede kaaꞌlannonkeha mito Qullaawu Maxaafiha xintu seera ronseemmo. (Mik. 7:7) Hakkiinni, cincine Yihowa agadha hasiissannonkeha lame coye laꞌneemmo. Jeefoteno, cincite Yihowa agadhitannori afidhanno atoote laꞌneemmo.

CINCINEEMMO GEDE KAAꞌLANNONKEHA QULLAAWU MAXAAFIHA XINTU SEERA

3. Lawishsha 13:11te noohu xintu seerinni maa ronseemmo?

³ Lawishsha 13:11 cinca hasiissannonkehu mayiraatiro kulannoha xintu seera amaddino. Togo yitanno: “Saamme gamba assinanni jiro mulenni baꞌanno; suutu suutunni gamba assinanniti kayinni lexxitanni hadhanno.” Konni qummeeshshira nooha xintu seera wodanchootto? Hayyichu manchi mitto looso cince suutunni loosanno; hakko daafira, dancha guma afiꞌranno.

4. Lawishsha 4:18te noohu xintu seerinni maa huwanteemmo?

⁴ Lawishsha 4:18, “Keeraanote doogo, soodo arrishsho gedeete; barri taalooti geeshsha lexxitanni hadhanno” yitanno. Kuni qummeeshshi, Yihowa mannisira hedosi kulannohu suutu suutunni ikkinota leellishanno. Ikkollana, kuni qummeeshshi mittu Kiristaanchi ayyaanaamittetenni lophannohu hiittoonniitiro huwatateno kaaꞌlannonke. Ayyaanaamittete lopho mudda didandiinanni. Ayyaanaamittetenni lophate yanna hasiissanno. Maganu Qaale seekkine xiinxallineemmohanna Yihowa Qaalisinna dirijjitesi widoonni aannonke amaale harunsineemmoha ikkiro, sunu sununni Kiristoosite gede akatta lossiꞌra dandiineemmo. Qoleno Magano albinni roore anfeemmo. Hanni Yesuusi tenne hedo lawishshunni rosiisino gara laꞌno.

5. Yesuusi ayyaanaamittete lophora yanna hasiissannota lawishshunni rosiisinohu hiittoonniiti?

⁵ Yesuusi dudumbeemmoti Maganu Mangiste sokka, suwashshu wodani noonsa manni giddo sunu sununni lophannohu shiimu wixi gede ikkitinota leellishanno lawishsha coyiꞌrino. Togo yiino: “[Manchu] wixino wixi hiitto ikkiro afikkinni muꞌre lophanno. Baatto umisenni sunu sununni guma laaltanno; umo muꞌra, tenne agashsho, hakkiinni agashshote aana iillino guma uyitanno.” (Maq. 4:27, 28, NW) Yesuusi rosiisara hasiꞌrinori maati? Isi hatto yiinohu, muꞌru sunu sununni lophannonte gede Maganu Mangiste sokka macciishshe adhino manchino ayyaanaamittetenni lophannohu sunu sununni ikkinota rosiisateeti. Lawishshaho, Qullaawa Maxaafa xiinxallinseemmo manchi Yihowawa shiqanni haꞌri kiiro, heeshshosi giddo lowore biddi assiꞌrinota laꞌneemmo. (Efe. 4:22-24) Ikkirono hakku shiimu wixi lophanno gede assannohu Yihowa ikkinota dea dihasiissannonke.—1 Qor. 3:7.

6-7. Yihowa baatto kalaqino doogonni maa ronseemmo?

⁶ Yihowa aye loosono loosanno woyite, loososi gudate hasiissanno yanna ikkitu geeshshitano ikkituro dimuddamanno. Isi hatto assannohu suꞌmisi ayirranno gedeetinna wolootano kaaꞌlateeti. Lawishshaho, hanni Yihowa baatto mannu oosora dirimu dirimunni qixxeessino gara laꞌno.

⁷ Qullaawu Maxaafi Yihowa baatto kalaqino gara kulanni, “ise aana bikkinanni siiwo” ganinota, ‘safo tuuqinota’ hattono “dhaawate kincho” kaasinota kulanno. (Iyo. 38:5, 6) Isinni Yihowa kalaqinore haja asse laino. (Kal. 1:10, 12) Sokkaasine Yihowa haaro coye kalaqanna laꞌu kiiro hiitto ikkitinoha lawannohe? Insa lowo geeshsha dhagge assidhinoti dihuluullissannote! Mitte higge isinni insa hagiidhite “ilillissino.” (Iyo. 38:7) Tennenni maa ronseemmo? Yihowa baatto, beeddahenna heeshshote kalaqama baala kalaqe gudinohu lowo kumi diri giddooti; ikkirono, Yihowa kalaqinoha mitto mittonka coye hixamanye lai woyite, “lowo geeshsha dancha” ikkinota coyiꞌrino.—Kal. 1:31.

8. Aanchine maa ronseemmo?

⁸ Kageeshsha laꞌnummo lawishshuwa leellishshannonte gede, Qullaawu Maxaafi giddo cinca hasiissannonketa kulannoha batinye xintu seera afiꞌra dandiineemmo. Xa kayinni cincine Yihowa agadha hasiissannonkeha lame coye laꞌneemmo.

CINCINE YIHOWA AGADHA HASIISSANNONKEHU HIITTOO WOYITEETI?

9. Yihowa cincine agadha hasiissannonkehu mittu coyi maati?

⁹ Yihowa huuccattonkera dawaro qola geeshsha cincine agadha hasiissannonke. Qarranke dandee saꞌꞌate woy laanfenke qeeꞌlate jawaante aankera Yihowa huucciꞌnummohu gedensaanni, Yihowa huuccattonkera dawaro qola keeshshinoha lawankera dandaanno. Ikkina Yihowa huuccattonke baalantera bayichonko dawaro qolannokkihu mayiraati?

10. Yihowa huuccattonkera dawaro qola geeshsha cinca hasiissannonkehu mayiraati?

¹⁰ Yihowa huuccattonke macca wore macciishshanno. (Far. 65:2) Isi giddonkenni huucciꞌneemmo huuccatto, ammana noonketa leellishshanno taje gede asse laꞌꞌanno. (Ibi. 11:6) Qoleno Yihowa huuccattonke ledo sumuu yaannore assatenna fajjosi wonshate mageeshshi hasatto noonkero laꞌꞌa hasiꞌranno. (1 Yoh. 3:22) Konni daafira, busha gade woy laanfenke qeeꞌlate kaaꞌlannonke gede Yihowa huucciꞌneemmo woyite, cincineemmore ikkanna huuccattonke ledo sumuu yaannore assa hasiissannonke. Yesuusi mite huuccattora dawaro bayichonko afiꞌra hoongammora dandiineemmota qummi assino. Isi togo yiino: “Agurtinikki huuccidhe, uyinanniꞌnena; agurtinikki hasidhe, afidhinannina; agurtinikki waalcho ganganne, fannanniꞌnena; huucciꞌrannohura baalaho uyinanni; hasiꞌrannohu baalu afiꞌranno; waalcho ganganannohura baalaho fannannisi.” (Mat. 7:7, 8, NW) Tenne amaale harunsine ‘jaante huucciꞌneemmoha’ ikkiro, iimi Anninke huuccattonke macciishshe dawaro qolannonketa addaxxa dandiineemmo.—Qol. 4:2.

11. Yihowa huuccattonkera dawaro qola keeshshinoha lawinkero, Ibiraawoota 4:16 kaaꞌlitannonkehu hiittoonniiti?

¹¹ Yihowa huuccattonkera dawaro qolikki keeshshinoha lawinkero nafa, isi “hasiissanno yannara” dawaro qolankera qaale eino. (Ibiraawoota 4:16 nabbawi.) Hakko daafira, mittu coyi ninke hendoommo yannara ikka hoogiro, horonta Yihowa busha assa dihasiissannonke. Lawishshaho, batinyu manni Maganu Mangiste tenne busha alame huntanno gede lowo diro huucciꞌranni keeshshino. Yesuusino hatto yine huucciꞌneemmo gede rosiisino. (Mat. 6:10) Kayinni mittu manchi goofimarchu mannu hedino yannara daa hoogino daafira hexxo mudhe ammanasi shoshshoggitara wodhiro, hatti lowo gowwimmaati! (Imb. 2:3; Mat. 24:44) Yihowa cincine agadhanna ammanatenni iso huucciꞌra hayyote. Yihowa goofimarchu daanno ‘barranna saate’ mure kaino daafira, goofimarchu yannasira daanno. Hatti Yihowa murino yanna baalunkura dancha ikkitanno.—Mat. 24:36; 2 Phe. 3:15.

12. Cinca roore qarra ikkitannonkehu hiittoo woyite ikkara dandaanno?

¹² Mannu miicannonke woyite taashsho afiꞌnammo geeshsha cincine agadha hasiissannonke. Tenne alamera duucha woyite manna sirchinsanni, labbaaha woy meyata ikkansanni, gaꞌrensanni, woy budinsanni kainohunni miincanninsa. Woloota kayinni bisu xeꞌne noonsahura woy surrete fayyimma hoogginohura beebba assiꞌnanninsa. Batinye Yihowa Farciꞌraasine Qullaawu Maxaafi aana xintantino ammanansanni kainohunni miincanninsa. Mannu miicannonke woy qohannonke woyite, Yesuusi coyiꞌrinore qaaga hasiissannonke. Isi togo yiino: “Goofimarchu geeshsha cince kaajjannohu kayinni gatanno.” (Mat. 24:13) Kayinni mittu songote giddo noo manchi jawa cubbo loosinotalla afitto? Songote cimeeyye tenne affuhu gedensaanni, insa tenne hajo Yihowa biddishshi garinni tirtanno yite addaxxite cincatto? Insa togoo coye tirate maa assitanno?

13. Songote giddo mittu manchi jawa cubbo loosiro, Yihowa cimeeyye maa assitara hasiꞌranno?

¹³ Cimeeyye songote giddo jawa cubbo loonsoonnita affuro, hakkonne coye Yihowa ma garinni laꞌꞌannoro huwata dandiitanno gede, “gordu egenno” afiꞌrate huuccatto assidhanno. (Yai. 3:17) Mixonsa dandaamannoha ikkiro cubbo loosino manchi “soꞌrote doogonni” higanno gede kaaꞌlate. (Yai. 5:19, 20) Qoleno songo agaratenna loonsoonni cubbinni xissiisidhinore sheshifachishate dandiiture baala assa hasidhanno. (2 Qor. 1:3, 4) Cimeeyye mittu manchi jawa cubbo looseenna coye laꞌanno woyite, balaxxe coye seekkite buuxa hasiissannonsa; tennera hige yanna hasiissanno. Hakkiinni insa huuccatto assidhe, cubbo loosinoha Maganu Qaalinni amaaltanno, hattono “halaalunni” woy bikkunni seejjitanno. (Erm. 30:11) Cimeeyye quwa saꞌe keeshshitannokkiha ikkirono, yoo yaate kayinni dimuddantanno. Insa coye Yihowa biddishshi garinni amaddannoha ikkiro, songo woꞌma horo afidhanno. Ikkollana, cimeeyye coye garunni amadduro nafa, loonsoonni cubbi gawajjisi manchi xissiisiꞌrara dandaanno. Atino konni garinni xissiisiꞌroottoha ikkiro, shesho afiꞌrate maa assa dandaatto?

14. Ammanate rodiikki lowo geeshsha miicinoheha ikkiro, cincatto gede kaaꞌlahera dandaannohu Qullaawu Maxaafi lawishshi hiikkonneeti?

¹⁴ Mittu manchi woy ammanate rodiikki lowo geeshsha miice egenninohe? Yihowa coye taashsha geeshsha cincite agadhatto gede kaaꞌlannoheha dancha lawishsha Maganu Qaali giddo afiꞌra dandaatto. Lawishshaho, Yooseefi roduuwisi baasa gawajjitinosiha ikkirono, insa cubbi iso hanqaaleessa mancho ikkanno gede diassinosi. Hatteentenni isi Yihowara soqqamate dandiire baala assino; Yihowano iso cince kaajjino daafira lowo geeshsha maassiꞌrinosi. (Kal. 39:21) Gedensoonni Yooseefi roduuwisira gatona yee saꞌꞌa dandiino; Yihowa maassiꞌrinositano laino. (Kal. 45:5) Yooseefi gede ninkeno, Yihowawa shinqeemmoha ikkironna coyenke isi taashshara agurreemmoha ikkiro, shesho afiꞌneemmo.—Far. 7:17; 73:28.

15. Mitte rodoo miincise woyite cincite saꞌanno gedenna keere afidhanno gede kaaꞌlinoseri maati?

¹⁵ Hige mannu ninke Yooseefi roduuwisi miiccu geeshsha miica hoogankera dandaanno; ikkirono, gara ikkinokkire assininkero xissiisiꞌranke digattanno. Miicinonke manchi Yihowa magansiꞌrannoha ikkirono ikka hoogirono, Qullaawu Maxaafiha xintu seera harunsanke kaaꞌlitannonke. (Fil. 2:3, 4) Hanni mitto woꞌnaalsha laꞌno. Mitte rodoo, ledose loossanno mancho ise daafira badheenni bushare coyidhinota macciishshite lowo geeshsha xissiisidhino. Tini rodoo muddante hanqa agurte, yanna gaaꞌmite Yesuusi lawishsha hiincitino. Yesuusi xonnisi woyite qole dixonino. (1 Phe. 2:21, 23) Rodoo tenne hedduti, coye facci assite agurtu. Gedensoonni tini rodoo, hatti ledose loossanno mancho buutote dhibbi amadeennase qarrante keeshshitinota huwattu. Hakko daafira rodoonke, tini mancho hatto yitinohu ane xissiisate yite diꞌꞌikkino yite heddu. Konnira tini rodoo gara ikkinokkire assinannase cincite saꞌino daafira hagiidhitino; hattono giddiidi keere afidhino.

16. Mannu miicannahe cincite noottoha ikkiro, sheshifachishahera dandaannori maati? (1 Pheexiroosi 3:12)

¹⁶ Mannu miicannahe cincite noottoha woy wolu coyinni xissiisidhanni noottoha ikkiro, Yihowa “dadillunni hiiqqantinorira” mule noota deꞌooti. (Far. 34:18) Cincakkiranna duhakki isi aana tuqqatto daafira, Yihowa baxannohe. (Far. 55:22) Isi uulla woꞌmate Daanyaati. Isira goꞌlinori mitturino dino. (1 Pheexiroosi 3:12 nabbawi.) Tira dandaattokki qarri giddo noottoha ikkiro, cincite Yihowa agadhatto?

CINCITE YIHOWA AGADHITANNORI AFIDHANNOHA GAWALO NOOKKI ATOOTE

17. Isayaasi 30:18 kultanno garinni, Yihowa maa aankera qaale eino?

¹⁷ Muli yannara iimi Anninke Mangistesi widoonni falahino atoote duushshannonke. Isayaasi 30:18 togo yitanno: “Kaaliiqi maaraꞌnera qixxaawe no. Kaaliiqi taashshanno Magano ikkino daafira, mararinoꞌne; kunnira Kaaliiqa hexxitannori baꞌraadhinoreeti.” Yihowa cincite agadhitannori xaano ikko dagganno alamera afidhanno atooti baete.

18. Albillitte hiittoo atoote afiꞌneemmo?

¹⁸ Maganu manni haaro alame eanno woyite, xa yaachishanni noonsa qarrinna shetto baala higgeno diheedhanno. Miiconna xisso baꞌanno. (Aju. 21:4) Hasiisannonkeri baaluri woꞌmannonke daafira, mittu coyirano diyaandeemmo. (Far. 72:16; Isa. 54:13) Addanko kuni lowo atooteeti!

19. Yihowa xaa yannara sunu sununni maaho qixxeessanni noonke?

¹⁹ Hakka geeshsha kayinni, Yihowa busha gadenke qeeꞌlineemmo gedenna iso hagiirsiissanno akatta lossiꞌneemmo gede kaaꞌle, gashshootisi giddo heeꞌnammora qixxeessanni noonke. Konni daafira, horonta hexxo mudhitinoonte. Dancha yanna mulenni dagganno! Kaajja hexxo albankeenni noo daafira, Yihowa loososi jeefo gana geeshsha iso cincine agadha agurroonke!