Zakkaariyaasi Laino Ajuujanni Maa Ronseemmo?

1-3. (a) Zakkaariyaasi masaala hanafi yannara, Yihowa manni hiitto ikke no? (b) Yihowa mannisi ‘isiwa higanno’ gede xaꞌminohu mayiraati?

MASAALAANCHU Zakkaariyaasi ajuujatenni xaaxo buubbanna, gimboolu giddo ofolte noo manchonna bajja yinanni ceichiha lawanno qoola afiꞌrinori lame meenti buuwanna laino. (Zak. 5:1, 7-9) Yihowa Zakkaariyaasira tenne dhagge ikkitanno ajuuja leellishinohu mayiraati? Hatte yannara Israeelete daga hiikkite no? Zakkaariyaasi laino ajuujanni maa ronseemmo?

² Yihowa daga 70 diro Baabiloonete qafadante keeshshitu gedensaanni, 537 K.A. keere fultino. Hatte yannara insa lowo geeshsha hagiidhitino. Insa umi qara Yerusaalamete halaalu magansiꞌra wirro xintate quqquxantino daafira looso hanaffino. Hakkiinni insa 536 K.A., qullaawa mine minate safo saffino. Hatte yannara mannu ‘luuli xeertote heeꞌneenna macciishshamanno.’ (Izi. 3:10-13) Ikkirono, shiima yanna gedensaanni mitu manni insa qullaawa mine mintannota hoolino. Tennera Israeelete manni hexxo mudhe qullaawa mine mina agure, uminsa mine miꞌnatenna gate loosiꞌrate higino. Yihowahu qullaawu mini 16 diri geeshsha noowa uurrino. Israeele Yihowawa higganno gedenna uminsa hasatto wonshiꞌrate kabbi facci yaa agurte Isi looso loossanno gede qaagiishshu hasiisinonsa. Yihowa, insa waajjitukkinni albinsa gede woꞌmu wodaninsanni iso magansidhara hasiꞌrino.

³ Maganu dagasi Baabiloonete borojjimmanni fushshinonsahu mayiraatiro qaagganno gede assate, 520 K.A. masaalaanchosi Zakkaariyaasi insawa soyino. Zakkaariyaasi yaanno suꞌmi “Yihowa Qaagino” yitanno tiro afiꞌrinoha ikkasi dhagge ikkitannote. Israeele Yihowa assinonsare habbinoha ikkirono, isi kayinni dihawinonsa. (Zakkaariyaasi 1:3, 4 nabbawi.) Isi halaalu magansiꞌra wirro xintitanno gede kaaꞌlannonsata kulinonsa; ikkirono lamu wodaninni magansiꞌnanni magansiꞌra hagiirsiissannosikkita kule qorowisiisinonsa. Konninni aanchine, Yihowa Zakkaariyaasira leellishinote leekkinna lamalki ajuuja widoonni mannasi loosoho kakkayisinohu hiittoonniitiro ronseemmo. Hattono, tenne ajuujanni yannankera maa ronseemmoro laꞌneemmo.

MAGANU MOORAANO QORICHISHANNO

4. Zakkaariyaasi leekki ajuujara maa laino? Xaaxo lamenka widoonni borreessinoonnita ikkase maa leellishshanno? (Hanafote noota umi misile lai.)

⁴ Zakkaariyaasi Fooliishsho 5, mitte dhagge ikkitanno ajuujare kultanno. (Zakkaariyaasi 5:1, 2 nabbawi.) Zakkaariyaasi tenne ajuujara, hojja 20 cigile, godowa 10 cigile ikkitanno xaaxo buubbanna laino! Tenne xaaxo aana lamenka widoonni yoote sokka borreessinoonni. (Zak. 5:3) Duucha wote xaaxote aana mitto widoonni calla borreessinanni; tini xaaxo kayinni lamenka widoonni borreessinoonnita ikkase, aanase noo sokka shota ikkitinokkita leellishshanno.

5, 6. Yihowa moorrannita baxannoni? Xawisi.

⁵ Zakkaariyaasi 5:3, 4 nabbawi. Mannu ooso baala assitanno coyiꞌra Yihowa albaanni xaꞌmantanno; suꞌmisinni woshshantanno daga isinni hakkiinni roore xaꞌmantanno. Konni daafira insa, ajono batironona manniricho moora ‘Maganu suꞌma xonsiissannota huwattanno.’ (Law. 30:8, 9) Mitu manni, mittoricho moorate gari korkaati heeꞌriro moorriro qarru dino yee hedanno; kayinni mittu manchi mooranno gede assannosiri baxihano ikkiro, tini isi yortosi Maganunni roorsiꞌrannohanna maalaamittete coye baxannoha ikkinota leellishshanno. Mooranno manchi Maganu seera ajishe laꞌꞌannota leellishanno, hattono togoo manchi Yihowa suꞌma diayirrisannoho.

⁶ Zakkaariyaasi 5:3, 4, “Rumo mittu mittunku mooraanchi minira eꞌanno; . . . hakkiicho keeshshite minensa coꞌo assite diigganno” yitannota huwatootto? Yihowa qoricha huxxa huxxiꞌne woy mine waawaansiꞌne gata didandiinanni. Yihowa dagasi mereero cubbo loose maaxinoha xawo fushshasi digattanno. Mittu manchi moorinota polisete, loosiissannosirira, songote cimeeyyera, annisiranna amasira maaxara dandaanno; Maganuwiinni kayinni maaxa didandaanno; Maganu mooraano baala xawo fushsheemmo yee qaale eino. (Ibi. 4:13) “Woꞌmante yannara” Maganoho ammanamanno manni mereero heeꞌranke lowo geeshsha hagiirsiissannote!—Ibi. 13:18.

7. Buubbanno xaaxo aana borreessinoonni rumonni gatate maa assa hasiissannonke?

⁷ Yihowa moorrannita effire giwanno. Yihowa biddishshi ledo sumuu yaanno garinni heeꞌra ninkera ayirrinyeho; konni daafira Yihowa suꞌma mishiishannore assa horo dihasiꞌneemmo. Hatto ikkiro, Maganu affanni heedhenni seerasi diiggannore qorichishanno qorichinni gata dandiineemmo.

“BARRU BARRUNKUNNI” EꞌNOONNI QAALE AGADHE HEEꞌRA

8-10. (a) Xaaro Maati? (b) Moote Sedeqiyaasi mayyee xaarino xaaro diigino?

⁸ Zakkaariyaasi ajuujatenni lainote buubbanno xaaxo aana borreessinoonniti aante noo sokka Yihowa suꞌminni ‘kaphunni xaartannore’ qorowisiissannote. (Zak. 5:4) Xaaro mittu manchi coyiꞌrinori adda ikkinota buuxisate coyiꞌrannoreeti, woy mitto coye assate woy assa hoogate eanno qaaleeti.

⁹ Yihowa suꞌminni xaara, mulluri gede assine laꞌnanni coye diꞌꞌikkitino. Yerusaalamete heeꞌre gashshinohu Moote Sedeqiyaasira iillinosiri tenne leellishanno. Sedeqiyaasi Baabiloonete mootera hajajameemmo yee Yihowa suꞌminni xaarino. Ikkirono, isi eino qaale diigino. Konninni kainohunni Yihowa Sedeqiyaasira togo yee yoo yiino: “Heeshshote Magano ikkaꞌyanni xaareemmona, [Sedeqiyaasi] ayirradu barcimira ofoshshiishinosihu Baabiloonete Moote lede eino gondooro diigasinni mare Baabilooni reyanno.”—Hiz. 17:16.

¹⁰ Moote Sedeqiyaasi woleteemmero, Yihowa suꞌminni xaarino xaaro agadha hasiissannosi. (2 Dud. 36:13) Isi kayinni Baabiloonete borojjicho ikka giwe Gibitse kaaꞌleꞌꞌe yiino; ikkirono Gibitse iso kaaꞌla didandiitino.—Hiz. 17:11-15, 17, 18.

11, 12. (a) Heeshshonke giddo eꞌneemmo qaale baala roorannohu hiikkonneeti? (b) Barru baala Yihowara eꞌnoommo qaale agadhineemmota leellisha dandiineemmohu hiittoonniiti?

¹¹ Qaale eꞌneemmo wote, Yihowano macciishshanno. Isi eꞌnoommo qaale wonshinammora hasiꞌranno; konni daafira, iso hagiirsiisate eꞌnoommo qaale wonsha hasiissannonke. (Far. 76:11) Heeshshonke giddo eꞌneemmo qaale baala roorannohu, ninkeneeto Yihowara sayinse uyinummo wote eꞌnoommo qaaleeti. Ninkeneeto sayise aate yaa, baxi coyi iillinkerono Yihowara soqqammeemmo yine qaale eate.

¹² Yihowara eꞌnoommo qaale agadha dandiineemmohu hiittoonniiti? Lowohuno ikko shiimu fonqoli iillannonke wote assineemmori, “barru barrunkunni” Yihowa ayirrinseemmo yine eꞌnoommo qaale agadhineemmota leellishannoha ikka hasiissannosi. (Far. 61:8) Lawishshaho, mittu manchi rosu mine woy loosu bayicho gara ikkinokki baxille leellishannonke wote, tenne assa gimbe Yihowa ‘doogo haꞌra’ hasiꞌneemmota leellinsheemmo? (Law. 23:26) Maatenke giddo Yihowa Farciꞌraasincho ikkinohu nookkiha ikkiro, Yihowa Isira ammanamme heeꞌneemmo gede kaaꞌlankera huucciꞌneemmo? Baxillaanchu Anninke Yihowa dagasi mereerira woshshinonke daafira iso galatate, barru baala huuccattotenni isiwa shinqeemmo? Qullaawa Maxaafa barru baala nabbawate yanna gaaꞌminoommo? Qoleno, ninkeneeto Yihowara sayinse uyinummo wote kuri coyibba assate qaale eꞌnoommo yaa dandiinanni. Ninkeneeto Yihowara sayinse uyinummo wote eꞌnoommo qaale agadhate, isira hajajama hasiissannonke. Woꞌma lubbonkenni Yihowa magansiꞌneemmoha ikkiro, tini iso banxeemmotanna addanka ninkeneeto isira sayinse uyinoommota leellishshanno. Yihowa magansiꞌneemmohu mulla wogate geeshshira calla ikkikkinni, tini heeshshonke kifile ikkitinohuraati. Eꞌnoommo qaale agadhanke ninkeneetira kaaꞌlitannonke; korkaatuno ammanamme heeꞌnummoro albillittete dancha hexxo heedhannonke.—Mar. 10:12, 13.

13. Zakkaariyaasi lainote leekki ajuujanni maa ronseemmo?

¹³ Zakkaariyaasi lainoti leekki ajuuja, Yihowa baxanno manni mittoreno mooranna kaphunni xaara hasiissannonsakkita huwanteemmo gede kaaꞌlitinonke. Qoleno, Israeele duucha higge cubbo loossinoha ikkirono, Yihowa tuge agurinonsakkita ronsoommo. Isi qooxeessinsara heedhanno diinna, gara ikkinokkire assitanno gede xiixxiibbannonsata wodanchino. Isi eino qaale wonshe ninkera dancha lawishsha ikkinonke, hattono ninke eꞌnoommo qaale wonshineemmo gede kaaꞌlannonke. Yihowa muli yanna giddo bunshe baalanta uullate aaninni huneemmo yee qaale eino; Isi einohu kuni qaali eꞌnoommo qaale agadhine heeꞌneemmo gede kaaꞌlannonke. Zakkaariyaasi lainoti lamalki ajuuja tini hexxo woꞌmitannota buuxissannote.

YIHOWA BUNSHE HUNANNO

14, 15. (a) Zakkaariyaasi lamalki ajuujara maa laino? (Hanafote noota layinki misile lai.) (b) Safarranni gimbooli giddo noo mancho maa riqibanno? Tenne mancho gimboolu giddonni fultannota hoꞌlinoonnihu mayiraati?

¹⁴ Zakkaariyaasi ajuujatenni buubbanno xaaxo lai gedensaanni, sokkaasinchu xaano wole ajuuja leellishinosi. Lamalki ajuuja maa kultannote? Zakkaariyaasi tenne ajuujara “safarranni” gimboola laino. (Zakkaariyaasi 5:5-8 nabbawi.) Gimboolu “siwiilunni seekkinoonni tuana afiꞌrinoho.” Tuanu faꞌnamita Zakkaariyaasi gimboolu giddo “mitte mancho ofolte” heedheenna laino. Sokkaasinchu mancho “bunshete lawishsha” ikkitinota xawisino. Zakkaariyaasi, mancho gimboolu giddonni fulate gaꞌnantanna lai wote mageeshshi geeshsha masinoro heda dandaatto! Hakkiinni sokkaasinchu bayichonko mancho giddo qole xiiwe tuana wirro tuino. Tini ajuuja mayi tiro afidhino?

¹⁵ Tini ajuuja, Yihowa dagasi mereero bushuri noota afiꞌro sammi yee laꞌꞌannokkita leellishshanno. Yihowa busha coye lairo, bayichonko hunanno. (1 Qor. 5:13) Sokkaasinchu gimboolu tuana wirro tuasi tenne buuxissannonke.

16. (a) Zakkaariyaasi saffarranni gimboola hiissinanna laino? (Hanafote noota sayikki misile lai.) (b) Qoolla afiꞌrino meenti safarranni gimboola hiikka haaꞌre massino?

¹⁶ Hakkiinni Zakkaariyaasi bajja yinanni ceichiha lawannoha kaajjado qoola afiꞌrinore lame meento laino. (Zakkaariyaasi 5:9-11 nabbawi.) Kuri meenti gimboolu giddo noo manchowiinni lowo geeshsha baxxinoreeti! Kuri lamenti meenti kaajjadda qoollansanni buuwanni gimboolu giddo noota “bunshete lawishsha” ikkitino mancho haaꞌre haꞌrino. Insa ise mamira haaꞌre haꞌranni no? Insa tenne ‘bunshete lawishsha ikkitino mancho Baabiloone’ haaꞌre massino. Insa ise Baabiloone haaꞌre massinohu mayiraati?

17, 18. (a) Baabiloone “bunshe” masse hunate malino bayichooti yineemmohu mayiraati? (b) Maa assate murciꞌra hasiissannonke?

¹⁷ Zakkaariyaasi diro noo Israeele, Baabiloone bunshe duunate malino bayicho ikkitinota huwattino. Zakkaariyaasinna wolu Yihudu manni Baabiloone bunshe woꞌmitinowa ikkinota affino. Baabiloonete katamira amanyootu maaeellenna kaphu maganna woꞌmitino; konni katamira lophinohu Ayihudete manni, Magano magansiꞌrannokkihu kuni manni daafannonsakki gede sharrama hasiissinonsa. Yihowa Zakkaariyaasira leellishino ajuuja widoonni halaalu magansiꞌra keeraancho ikkite heedhanno gede assannota buuxisino; Ayihudete manni tenne afansanni lowo geeshsha hagiidhinoti dihuluullissannote!

¹⁸ Zakkaariyaasi laino ajuuja, Ayihude halaalu magansiꞌra keeraancho ikkite heedhanno gede insa assa hasiissannonsari noota qaagganno gedeno assitinonsa. Maganu daga bunshe mereerinsara lulluqqite eꞌanno gede fajja didandiitanno; qoleno togo diassitanno. Yihowa keeraancho dirijjitesi hunda heeꞌne baxillesinna agarooshshesi afiꞌneemmo gede assinonke; ninke qole tini dirijjite keeraancho ikkite heedhanno gede assate qeechi noonke. Yihowa dirijjite keeraancho ikkite heedhanno gede assa hasiꞌneemmo. Hatto ikkiro, ayyaanaamittete gannatenke giddo mitte bunsheno diheedhanno.

YIHOWA AYIRRISSANNOTA KEERAANO DAGA

19. Zakkaariyaasi laino ajuujanni yannankera maa ronseemmo?

¹⁹ Zakkaariyaasi lainoti leekkinna lamalki ajuuja, ammanama xeꞌinore assitannorira qorowishshu sokkaati; qoleno tini ajuuja Yihowa cubbo loossannore sammi yee laꞌꞌannokkita buuxissannote. Yihowati ammanantino soqqamaasine bunshe effidhe giwa hasiissannonsa. Zakkaariyaasi laino ajuuja, iima heeꞌrannohu baxillaanchu Anninke ninke iso hagiirsiisannore assinummoro, shitanno rumo iillishannonkekkita buuxissannote; hatteentenni Isi agarannonke, hattono maassiꞌrannonke. Bunshe woꞌmitino alamera xuru nookkire ikkine heeꞌrate sharramanke gaabbissannota diꞌꞌikkitino. Qoleno, Yihowa kaaꞌlannonketa dihuluullammeemmo! Ikkina, Magano waajjannokki manni woꞌminote tenne alamera halaalu magansiꞌra keeꞌraaꞌmite heedhannota mayinni anfeemmo? Yihowa bayiru qarri shiqanno wote, dirijjitesi agarannota buuxisannonkeri maati? Aananno birxichira kuri xaꞌmuwara dawaro afiꞌneemmo.