Yihowa Gede Taashshonna Maaro Baxxinannire Ikke

1, 2. (a) Yesuusi Maganu Higge ma garinni laꞌꞌanno? (b) Seeru rosiisaanonna Farisootu Maganu Higge garimale horoonsidhinohu hiittoonniiti?

YESUUSI Muse Higge lowo geeshsha baxanno. Isi tenne Higge baxannohu, Annisi Yihowa uyinota ikkitino daafiraati; isi qole Yihowa lowo geeshsha baxanno. Faarso 40:8​te aana, Yesuusi Maganu higge baxannota masaalloonni; qummeeshshu togo yaanno: “Maganoꞌya hedokki wonshammora baxoommo; seerikkino wodaniꞌyara no.” Yesuusi coyiꞌrinorinninna assinorinni, Maganu Higge guuta, kaaꞌlitannotanna woꞌmitukki gattannokkita ikkitinota leellishino.—Mat. 5:17-19.

² Yesuusi, Seeru rosiisaanonna Farisootu Annisi Higge garimale horoonsidhanna lai yannara lowo geeshsha dadillinoti dihuluullissannote! Yesuusi “Afuduudunniha, sunkurtunnihanna qimamenniha tonnunni mitto uyitinanni” yaasi insa Higgete giddo nooha shiimmaadda coye wonshitannota leellishshanno. Ikkina, insa soꞌro maati? Yesuusi lede togo yiino: “Seeru giddo nooha qara qara coye kayinni facci assitine agurtinanni. Hattino taashshate, maarotenna ammanamate.” (Mat. 23:23) Farisootunna seeru rosiisaano umonsa bokkeessitannoreeti; Yesuusi kayinni Maganu Higge uyinohu mayiraatironna tini higge Maganu akatta leellishshannohu hiittoonniitiro huwatino.

3. Konni birxichira maa ronseemmo?

³ Ninke Kiristaana ikkinoommo daafira, heeꞌnoommohu Higgete hunda diꞌꞌikkino. (Rom. 7:6) Ikkirono, Yihowa tenne Higge Qaalisi Qullaawu Maxaafi giddo borreessinanni gede assino. Isi Higgenniha shiimmaadda coye calla harunsinammora ikkikkinni, “qara qara coye” yaano higgenniha xintu seera huwante hajajammammora hasiꞌranno. Lawishshaho, eeggote katamma daafira kultanno higgenni hiikkonne xintu seera huwata dandiineemmo? Sai birxichira hedeweelcho mannu lubbo shee eeggote katama xooqanno manchi assannorinni maa ronseemmoro laꞌnoommo. Eeggote katamma, Yihowa daafira anfeemmo gedenna ninke isi lawishsha harunsa dandiineemmo gara huwatateno kaaꞌlitannonke. Konni birxichira aante noo xaꞌmuwara dawaro afiꞌneemmo: ‘Eeggote katamma Yihowa maaranno Magano ikkinota leellishshannohu hiittoonniiti? Tini katamma Yihowara heeshshote noosi lao afate kaaꞌlitannonkehu hiittoonniiti? Tini katamma guuta ikkitinota Yihowa taashsho leellishshannohu ma garinniiti?’ Kuri hajo daafira rosatto wote, Yihowa lawishsha harunsa dandaatto doogga huwatate woꞌnaali.—Efesooni Sokka 5:1 nabbawi.

INJAANNO BAYICHO NOOTI “EEGGOTE KATAMMA” YIHOWA MAARO LEELLISHSHANNO

4, 5. (a) Eeggote katamma injiitanno gede assinoonnihu hiittoonniiti? Mayira? (b) Tini Yihowa daafira maa rosiissannonke?

⁴ Leenta eeggote katamma injaanno bayicho qixxeessinoonni. Yihowa Israeele Yordaanoosi lagira kawaanni sase kaꞌaanni sase katamma qixxeessitanno gede hajajinonsa. Mayira? Hedeweelcho mannu lubbo shee xooqanno manchi eeggote katama injiino bayicho rahe afiꞌranno gedeeti. (Kir. 35:11-14) Eeggote katammawa massitannoti dancha doogga no. (Mar. 19:3) Ayihudete borro leellishshanno garinni, dooggate aana xooqanno manchira eeggote katamma mamaanni nooro leellishshanno malaatta worroonni. Israeelete giddo eeggote katamma noo daafira, hedeweelcho lubbo shiino manchi wole gobba xooqa dihasiissannosi; isi wole gobba haꞌriro kaphu maganna magansiꞌrara dandaanno.

⁵ Hanni hedi: Afanni heeꞌre lubbo shiino mancho shaa hasiissanno yee hajajinohu Yihowaati; ikkirono isi hedeweelcho mannu lubbo shiino manchi maarosinna agarooshshesi afiꞌranno gede eeggote katamma qixxeessino! Mittu Qullaawu Maxaafi fullahaanchi togo yiino: “[Xooqanno manchira] baalunku coyi xawe leellannonna gurchaawannokki gede assinoonni. Tini qolte Maganu eltooti.” Yihowa soqqamaasinesi muddame qorichisha hasiꞌrannoha kaajjado Magano diꞌꞌikkino. Hatteentenni isi ‘maarote dureessaati.’—Efe. 2:4.

6. Farisootu Maganu gede mannaho maartannoni? Xawisi.

⁶ Yihowa maaro baxanno Maganooti; Farisootu kayinni togoore diꞌꞌikkitino. Lawishshaho, Ayihudete borro leellishshanno garinni, mittu manchi mitte soꞌro hige hige loosiro insa sase higge calla gatona yitanno. Yesuusi kuni assootinsa busha ikkinota leellishate qaraxaasinchu mule uurre huuccatto assiꞌrannoha mitto Farisicha lawishsha asse kulino; kuni Farisichi togo yee huucciꞌrino: “Maganoꞌya, ani wolootu gede mulqiꞌreemmoha, jaddo looseemmohanna fooreemmoha ikka hoogaꞌyara galaxxeemmohe. Roorenka kunni qaraxaasinchi gedeeha ikka hoogoommohura galaxxeemmohe.” Qaraxaasinchu Maganu maaro afiꞌrate umosi heeshshi asse huucciꞌrino. Farisootu mannaho maara gibbannohu mayiraati? Qullaawu Maxaafi insa daafira kulanni “wole manna mishshanno” yaanno.—Luq. 18:9-14.

7, 8. (a) Mannu baddalannohe wote Yihowa lawishsha harunsa dandaattohu hiittoonniiti? (b) Wolootaho gatona yaanna shooshaqa ikka xaadooshshe afidhino?

⁷ Farisootu lawishsha ikkikkinni Yihowa lawishsha harunsi. Wolootaho shaqqillenna maaro leellishi. (Efesooni Sokka 4:32 nabbawi.) Tenne assa dandaatto doogga giddo mitte, wolootu maaro xaꞌmirate huxuxxi yitukki shiqqannoheha ikkate. (Luq. 17:3, 4) Ateneeto togo yite xaꞌmi: ‘Mannu duucha hige baddalierono rahe gatona yeemmo? Koffi assinoe woy baddalinoe manchi ledo araaramate quqquxameemmo?’

⁸ Wolootaho gatona yineemmoha ikkiro shooshaqoota ikkinoommota leellinsheemmo. Farisootu woloota woffi assite laꞌanno daafira gatona diyitanno. Ninke kayinni Kiristaana ikkinoommo daafira, shooshanqetenni ‘wolu manni ninke roorinohu gede assine hedanna’ wolootaho gatona yaa hasiissannonke. (Fil. 2:3) Yihowa lawishsha harunsite mannaho maaratto? Hatto assittoro shooshaqa ikkoottota leellishatto. “Doogo” seekki, yaano wolootu maaro xaꞌmirate huxuxxi yitukki shiqqannoha ikki. Mannaho rakke gatona yaattoha ikki, hattono hanqoho muddantooti.—Ros. 7:8, 9.

‘REYINO MANCHI BARSHI AMADANNOꞌNEKKI GEDE’ HEESHSHO QULLAAWA ASSITINE LAꞌE

9. Yihowa Israeele heeshsho qullaawa ikkitinota buuxxanno gede assinohu hiittoonniiti?

⁹ Eeggote katamma qixxeessinoonnihu, Israeele hedeweelcho mannu lubbo shiino mancho shite mundeete xaꞌmantannokki gedeeti. (Mar. 19:10) Yihowa albaanni heeshsho qullaawate; isi “keeraancho manna shitanno anga” tiyyire giwanno. (Law. 6:16, 17) Isi taashsho baxannohanna qullaawa Magano ikkino daafira, hedeweelcho mannu lubbo shiino mancho nafa sammi yee diaguranno. Hige isi hedikki mannu lubbo shiino mancho maarannosi. Ikkirono, hakku manchi tenne cimeeyyete mare kula hasiissannosi; isi lubbo shiinohu hedeweelcho ikkinota buunxiro, kakkalaanote biili reya geeshsha eeggote katamira keeshsha hasiissannosi. Isi hakkunni gedensaanni reya geeshsha hakko katamira heeꞌrannoha ikkara dandaanno. Tini qixxaawo, Israeele heeshsho qullaawa ikkitinota buuxxanno gede assitinonsa. Insa Heeshsho Uyinonsa Magano ayirrisate, mannu heeshsho gawajjara dandaannore baala hoola hasiissannonsa.

10. Yesuusi coyiꞌrino garinni, seeru rosiisaanonna Farisootu mannu heeshsho ayirrissannokkita leellishshinohu hiittoonniiti?

¹⁰ Seeru rosiisaanonna Farisootu mannu heeshsho mulluri gede assite laꞌanno. Tenne mayinni anfeemmo? Yesuusi togo yiinonsa: “Kiꞌne egennote waalcho fannanniricho adhitine hoꞌlitinoonni. Kiꞌneno dieꞌinoonni; eꞌannoreno hooltinoonni.” (Luq. 11:52) Insa woleteemmero mannaho Maganu Qaale xawisse kulanna wolootu hegere heeshsho afidhanno gede kaaꞌla hasiissannonsa. Insa kayinni, mannu “Gatisaancho” ikkinoha Yesuusa harunsanno gede assa agurte, hegere bao abbanno coye harunsanno gede assitino. (Soq. 5:31) Seeru rosiisaanonna Farisootu booꞌnaleeyyenna umonsa baxxannore ikkitino daafira, mannu heeshsho kande haꞌnanni bushshi gede assite nafa dilaꞌanno. Insa kakkachootahonna mannaho dimarartannoreeti!

11. (a) Soqqamaasinchu Phaawuloosi heeshsho Maganu laꞌꞌanno garinni laꞌꞌannota leellishinohu hiittoonniiti? (b) Ninkeno Phaawuloosi gede diinaggaambe sabbakate mayi kaaꞌlannonke?

¹¹ Seeru rosiisaanonna Farisootu lawishsha ikkikkinni Yihowa lawishsha harunsa dandiineemmohu hiittoonniiti? Heeshsho ayirrisanna naada hasiissannonke. Soqqamaasinchu Phaawuloosi heeshsho ayirrisannota leellishate diinaggaawe sabbakino. Isi “Kiꞌne giddonni mittuno bairo, ani [dixaꞌmameemmo]” yiinohu iseraati. (Soqqamaasinete Looso 20:26, 27 nabbawi.) Ikkollana, Phaawuloosi diinaggaawe sabbakinohu mannu mundeera xaꞌmameemmo yee waajje woy Yihowa hajajinosi daafira calla diꞌꞌikkino. Hatteentenni isi sabbakinohu manna baxannohuraatinna mannu heeshsho qullaawa asse laꞌꞌanno daafiraati. (1 Qor. 9:19-23) Ninkeno heeshsho Maganu laꞌꞌanno garinni laꞌꞌate sharrama hasiissannonke. Yihowa mannu “baalunku aagintaawe higara” hasiꞌranno. (2 Phe. 3:9) Atino mannu gati afiꞌrara hasiꞌratto? Maarreemmore ikkanke albinni roore diinaggaambe sabbankeemmo gede kaaꞌlitannonke; hatto assanke qolte lowo geeshsha hagiirsiissannonke.

12. Maganu daga dano iillitannokki gede qoropha hasiissannonsahu mayiraati?

¹² Heeshsho Yihowa laꞌꞌanno garinni laꞌꞌate, dandiinummo deerrinni gawajjanno coye hoola hasiissannonke. Makeena kandeemmonna looso loonseemmo wote qoropha hasiissannonke; wole agurina Magano magansiꞌneemmo mine minneemmonna gatamarreemmo wote woy hakkira haꞌneemmo wote nafa qoropha hasiissannonke. Lowore loosatenna woxe afiꞌrate woy yanna qoxxowate yite, mannu heeshshonna fayyimma gawajjara dandaannore assitooti. Taashsho baxanno Maganinke woꞌmanka wote gara ikkinore assanno. Ninkeno isi lawishsha harunsa hasiissannonke. Hakko iso songote cimeeyye uminsaranna wolu mannira dano iillitannokki gede qoropha hasiissannonsa. (Law. 22:3) Mittu cimeessi dano iillitannohekki gede qoropha dandaatto gara kulihero adha gibbooti. (Gal. 6:1) Heeshsho Yihowa laꞌꞌanno garinni lai; hatto assittoro mundeete dixaꞌmamatto.

“MANNU . . . KUNNINNI AANE NOO GARINNI TAASHSHONA”

13, 14. Israeelete cimeeyye Yihowa gede maartannore ikkitinota leellisha dandiitannohu hiittoonniiti?

¹³ Yihowa Israeelete cimeeyye isi gede taashshitannore ikkitara hajajino. Umihunni, cimeeyye halaale ikkinore afa hasiissannonsa. Insa maaro hasiissannosironna teꞌee murate, lubbo shiino manchi giddota, reyi manchira noosi laonna isi alba assinore afate woꞌnaala hasiissannonsa. Yihowa gede taashshitannore ikkate, isi hakkonne mancho shiinohu “afanni heeꞌrenni giwinosi daafira” ikkinoronna teꞌee buuxa hasiissannonsa. (Kiiro 35:20-24 nabbawi.) Naqaashshe hasiissannoha ikkiro qole, hedeweelcho lubbo shiino manchira yoo yinara albaanni ajayi ajeenna lamu manchi farcidhanno.—Kir. 35:30.

¹⁴ Konni daafira cimeeyye hakku manchi assinore calla ikkikkinni isi daafirano heda hasiissannonsa. Insa isi loosino soꞌro calla laꞌꞌa agurte hattenne soꞌro loosinohu mayiraatiro wodanchate woꞌnaala hasiissannonsa. Baalunkunni roore, insa Yihowa gede hayyoota, maartannorenna taashshitannore ikkitanno gede qullaawu ayyaani hasiisannonsa.—Ful. 34:6, 7.

15. Yesuusinna Farisootu cubbaataamma laꞌanno gari babbaxxinoha ikkinohu hiittoonniiti?

¹⁵ Farisootu cubbo loosino manchi ayimma aana illachisha agurte, isi loosino soꞌro aana calla illachishshanno. Mitte hige Farisootu Yesuusi Maatewoosi mine hurbaate itanna laꞌe rosaanosi “Rosiisaanchiꞌne qaraxaanotenna cubbaataammu ledo mayira itanno?” yite xaꞌmitino. Hakkiinni Yesuusi togo yiinonsa: “Dhiwantinorira ikkinnina fayyaaleeyyete xagisaanchu dihasiisannonsa. Hadhine, ‘Ani kakkalotenni roore maaro hasiꞌreemmo’ yine borreessinoonnihu mayyaatero seekkitine buuxxe! Ani cubbaataamma ikkinnina, keeraano woshshammora didayommo.” (Mat. 9:9-13) Togo yaa Yesuusi shota ikkinokki cubbo ajishe laꞌꞌanno yaateni? Hatto yaa diꞌꞌikkino. Isinni Yesuusi cubbo loosino manni maaro eanno gede koyisino. (Mat. 4:17) Ikkirono, Yesuusi kuri ‘qaraxaanonna cubbaataammu’ giddo mitu heeshshonsa soorrite biddi assiꞌra hasidhannota wodanchino. Insa Maatewoosi minira martinohu sagale itate calla diꞌꞌikkino. Insa hadhinohu Yesuusi ‘hoodeeti.’ (Maq. 2:15) Batinyu Farisooti kayinni Yesuusi wodanchino coye wodancha didandiitino. Farisootu taashsho baxannonna maaranno Magani gedeere ikkitukki, manna kuni cubbaataammaho yitanni yoo yitanno, hattono woyyaawa dandaannokkihu gede assite laꞌanno.

16. Yoote komite giddo loossanno cimeeyye maa buuxate woꞌnaala hasiissannonsa?

¹⁶ Yannankerano songote cimeeyye “taashsho baxanno” Magani lawishsha harunsa hasiissannonsa. (Far. 37:28) Umihunni, insa mittu manchi cubbo loosinoronna teꞌee ‘hasiisanno garinni buuxa’ hasiissannonsa. Hakku manchi addanka cubbo loosinoha ikkiro, coye Qullaawu Maxaafi biddishshi garinni laꞌꞌa hasiissannonsa. (Mar. 13:12-14) Insa Yoote komite giddo loossanno wote, cubbo loosino Kiristaanchi addanka maaro einoronna teꞌe seekkite buuxa hasiissannonsa. Mittu manchi addanka maaro einoronna teꞌee afa shota diꞌꞌikkitino. Hakku manchi loosino cubbira noosi laonna wodanisi gari isi maaro einoronna teꞌee leellishanno. (Aju. 3:3) Cubbo loosino manchi Maganu gatona yaasira hasiꞌriro maaro ea hasiissannosi.a

17, 18. Cimeeyye cubbo loosino Kiristaanchi wodanisinni maaro einoronna teꞌee afa dandiitannohu hiittoonniiti? (Hanafote noo misile lai.)

¹⁷ Yihowanna Yesuusi mannu wodanira noore afa dandiitanno; cimeeyye kayinni didandiitanno. Cimeessa ikkoottoha ikkiro, cubbo loosino Kiristaanchi wodanisinni maaro einoronna teꞌee afa dandaattohu hiittoonniiti? Umihunni, hayyonna wodancha aannohe gede Magano huucciꞌri. (1 Mot. 3:9) Layinkihunni, Maganu Qaalenna ammanaminohunna wodanaamu borojjichi qixxeessino borro xiinxalli; togo assakki “Maganu hedo garinni dadillinanni” dadilli yaano addanka maaro eatena “tenne gobba [woy, alame] dadilli” yaano wodaninni ikkitinokki maaro mereero noo badooshshe afate kaaꞌlitannohe. (2 Qor. 7:10, 11) Qullaawa Borro wodaninni maaro eino manninna togoo maaro einokki manni daafira mayitannoro huwatate woꞌnaali. Qullaawu Maxaafi insa hedonna assooti daafira mayyaannoro wodanchi.

¹⁸ Sayikkihunni, manchu loosino cubbo calla ikkikkinni isi ayimma huwatate woꞌnaali. Cubbo loosino manchi lophino gara, isi hakkonne cubbo loosinohu mayiraatironna mayi qarri noosiro wodanchi. Qullaawu Maxaafi giddo songote umo ikkinohu Yesuusi daafira togo yine masaalloonni: “Illesinni lai garinni calla yoo diyaanno; maccasinni macciishshi garinni calla dicoyiꞌranno. Buxanete taashshe coyiꞌranno; qarraataammaho halaale fushshanno.” (Isa. 11:3, 4) Cimeeyye, kiꞌne Yesuusi geꞌreewosi towaattinanni gede shoominoꞌne; qoleno isi gede taashshote yoo yitinanninna maartinanni gede kaaꞌlannoꞌne. (Mat. 18:18-20) Togoo cimeeyye uyinonke daafira Maganu galatamo! Insa songote giddo maaratenna taashshate sharrantanno daafira galanteemmonsa!

19. Eeggote katamma daafira rosoottori giddo ati loosu aana hosiisate hedoottuhu hiikkonneeti?

¹⁹ Muse Higge Yihowa ‘egennonna halaale’ amaddino, hattono Maganunna biddishshisi daafira rosate kaaꞌlitannonke. (Rom. 2:20) Lawishshaho eeggote katamma cimeeyye ‘taalo’ yoo yaa dandiitanno gara afate kaaꞌlitannonsa; hattono ninke baalunku ‘mimmitinkera shooshaqoota’ ikka dandiineemmo gara afate kaaꞌlitannonke. (Zak. 7:9) Ninke Kiristaanu Higgete hunda diheeꞌnoommo. Ikkirono, Yihowa disoorramino; isi xaano taashshonna maaro lowo geeshsha baxanno. Danisinni kalaqammoommo Magano magansiꞌrate, lawishshasi harunsatenna iso golonke assiꞌrate qoosso afiꞌrankenni tashshi yaannonke!