Soqqammeemmohu “Maarote Dureessa” Ikkino Maganiraati

1. Maaranno mancho hendeemmo woyite maa qaangeemmoha ikkara dandaanno?

MAARANNO mancho hendeemmo woyite danchummasi, faasiiqa ikkasi, mararrosinna shaqqillesi qaangeemmoha ikkara dandaanno. Qoleno Yesuusi coyiꞌrinota danchu Samaarichire kultanno xagge qaangeemmohano ikkara dandaanno. Wole daga wido ikkinohu kuni manchi, mooraano gante mulqidhino Ayihudicha “lae mararinosi.” Kuni Samaarichu manchi Ayihudicha mararino daafira, baxillunni towaatinosi. (Luq. 10:29-37) Kuni lawishshi, Maganinkeha mitto baxisanno akata yaano maaro luphi asse leellishanno. Maganu maarannonkehu baxannonke daafiraati; qoleno isi barru barrunku addi addi doogganni maarosi leellishannonke.

2. Maaro leellinshanniti wole doogo hiitteeti?

² Maaro leellinshanniti wole doogono no. Maaranno manchi qorichu hasiisinosi manchira maaranno gede assanno korkaati heeꞌriro gatona yaanno. Yihowano konni garinni maarosi leellishinonke. Faarsaanchu yiino garinni, Yihowa “cubbinke deerrinni diqorichishannonke.” (Far. 103:10) Mito woyite kayinni Yihowa cubbo loosino mancho kaajjishe seejjara dandaanno.

3. Hiikkuri xaꞌmuwara dawaro afiꞌneemmo?

³ Konni birxichira, sase xaꞌmora dawaro afiꞌneemmo: Yihowa maaro leellishannohu mayiraati? Kaajjishe seejjatenna maarote mereero xaadooshshu no? Maaro leellinsheemmo gede kaaꞌlannonkeri maati? Hanni Maganu Qaali tenne xaꞌmuwara qolanno dawaro laꞌno.

YIHOWA MAARO LEELLISHANNOHU MAYIRAATI?

4. Yihowa maaro leellishannohu mayiraati?

⁴ Yihowa maaro leellishannohu baxillaancho Magano ikkino daafiraati. Soqqamaasinchu Phaawuloosi qullaawu ayyaaninni, Maganu “maarote dureessa” ikkinota borreessino. Phaawuloosi hatto yiinohu Maganu guuta ikkinokkihu buuramino Kiristaanira iimi hexxo oye leellishinonsa maaro kulateeti. (Efe. 2:4-7) Ikkollana Yihowa maaro leellishannohu buurantino soqqamaasinesira calla diꞌꞌikkino. Faarsaanchu Daawiti togo yee borreessino: “[Yihowa] mannu baalunkura shaqqadoho; kalaqama baala mararanno.” (Far. 145:9) Yihowa manna baxanno daafira, maaranno gede assannosi korkaati heeꞌri geeshsha maaranno.

5. Yesuusi Yihowa maaro daafira afinohu hiittoonniiti?

⁵ Yihowa maaro leellisha mageeshshi geeshsha baxannoro Yesuusi geeshsha afinohu dino. Yesuusi uullara daara albaanni, Yihowa ledo lowo kume ikkanno diro iima heeꞌrino. (Law. 8:30, 31) Yesuusi, Annisi cubbaataamma manna maaranna duucha hige laino. (Far. 78:37-42) Yesuusi rosiisi woyite, baxisannoha konne Annisi akata duucha hige mannaho xawise kulino.

6. Yesuusi Annisi maarannoha ikkinota huwanteemmo gede kaaꞌlate maa assino?

⁶ Sai birxichira laꞌnummonte gede, Yesuusi Yihowa maaro leellisha mageeshshi geeshsha baxannoro huwanteemmo gede kaaꞌlate, qaetenni fule baino beettire kultanno xagge coyiꞌrino. Kuni beetti qaetenni fule haꞌre, “marinowa afiꞌrino woxe baala haafurira fince gudino.” (Luq. 15:13) Gedensoonni kayinni, loosino cubbira aagintaawino, umosi shollishino, hattono qaera higino. Hakkiinni annu ma assiyya? Yesuusi togo yiino: “Annuno [beettu] fafowa heeꞌreenna afe mararisi; dodanni mare beettosi hanqafe sunqisi.” Annu beettosi disaalfachishino. Hatteentenni, bayichonko beettosi anga fane haaꞌrenna gatona yee hattono maatete ledo karsamanno gede asse maaro leellishinosi. Kuni beetti lowo cubbo loosino; ikkollana aagintaawe maaro eino daafira, annisi gatona yiinosi. Tenne xagge giddo kullihu shaqqadu anni Yihowaati. Yesuusi konne lawishsha horoonsiꞌre, Annisi addinta maaro eꞌannore gatona yaannota rosiisino.—Luq. 15:17-24.

7. Yihowa maaro leellishanno gari hayyicha ikkinota leellishannohu hiittoonniiti?

⁷ Yihowa maaro leellishannohu taalle nookki hayyo noosi daafiraati. Yihowa woꞌmanka woyite kalaqamisira woyyannore assanno. Qullaawu Maxaafi, “gordu hayyo” “maaronna danchu gumi woꞌminota” ikkitinota kulanno. (Yai. 3:17, NW) Shaqqadu anni gede, Yihowa maarosi soqqamaasinesira lowo geeshsha hasiissannonsata afino. (Far. 103:13; Isa. 49:15) Insa guuta ikka hooggurono, Maganu maaro konni kaꞌira hexxo heedhannonsa gede assitinonsa. Konnira Yihowa taalle nookki hayyo noosiha ikkino daafira, maaranno gede assannosi korkaati heeꞌriro woꞌmanka woyite maaranno. Ikkollana Yihowa maaro leellisha hasiissannokki woyiti nootano afino. Isi hayyicha ikkino daafira, maaro leellishate yee bunshe lashshi asse diaguranno.

8. Maa assa hasiissanno woyiti no? Mayira?

⁸ Hanni mittu Maganu soqqamaasinchi maaeela heeshsho heeꞌrate murciꞌrino yine hendo. Hatto ikkiro ma assa hasiissanno? Soqqamaasinchu Phaawuloosi qullaawu ayyaaninni, togoo manchi ledo “sumuu yitinoonte” yee borreessino. (1 Qor. 5:11) Cubbo loosse maaro eꞌannokkire songotenni bonkanni. Ammanante noo roduuwanke gawajjotenni agaratenna Yihowa seerinni galloommore ikkinoommota leellishate tenne assa hasiissanno. Mitootu kayinni, manna songotenni boha Maganu maaro leellishshannota diꞌꞌikkitino yite heddara dandiitanno. Kayi hatto yaa garaho? Hanni laꞌno.

KAAJJISHE SEEJJA MAARO LEELLISHA IKKITINO?

9-10. Ibiraawoota 12:5, 6 kultanno garinni, cubbo loosse maaro eꞌannokkire boha maaro leellishate yineemmohu mayiraati? Tenne huwatate kaaꞌlannonke lawishsha kuli.

⁹ Mittu anfoommohunna banxeemmo manchi “xaate Yihowa Farciꞌraasincho diꞌꞌikkino” yine songote egensiishsha kullanna macciishshineemmo woyite, lowo geeshsha dadillineemmo. ‘Konne banxeemmo mancho bonkoonniti isi garaho?’ yine hendeemmoha ikkara dandiineemmo. Mitto mancho boha addinta maaro leellisha ikkitino? Ee, maaro leellishate. Seejjo hasiissinosi mancho seejja hooga hayyo, maaro, woy baxille diꞌꞌikkitino. (Law. 13:24) Mittu manchi bohamasi maaro eanno gedenna heeshshosi biddi assiꞌranno gede kaaꞌlitara dandiitanno? Ee dandiitanno. Jawa cubbo loossinori batinyu roduuwi cubbinsa jawa ikkinota huwattanno gede, maaro eꞌe amanyootensa biddi assidhanno gedenna Yihowawa higganno gede kaaꞌlitinonsati bohama ikkitinota coyidhino.—Ibiraawoota 12:5, 6 nabbawi.

¹⁰ Hanni tenne huwatate kaaꞌlannonkeha mitto lawishsha laꞌno. Mittu allaalaanchi geꞌreewisi giddo mitte xiwantinota afi. Allaalaanchu geꞌrechosi amadinoha konne baxxino dhiwana xagisate ise hoshshatewiinni bada hasiissannosita afino. Ikkollana, geꞌreewu callimma baxannokki kalaqamaati. Hakko daafira, hoshshatewiinni bandanni woyite godoodara dandaanno. Ikkina allaalaanchu geꞌrecho xagisara yee hoshshatewiinni badasi mararannokkiha ikkinota leellishshanno? Dileellishshanno. Korkaatuno isi xiwantino geꞌrecho hoshshate ledo karsanturo dhiwanu wolu geꞌreewirano saꞌꞌannota afino. Konni daafira, dhiwantinota badasi hoshsha woꞌma dhiwana gattanno gede assitanno.—Leewaawoota 13:3, 4 ledo heewisiisi.

11. (a) Bohamino manchi dhiwantino geꞌrecho gedeeti yineemmohu mayiraati? (b) Bohantinori maa assa dandiitanno? Qoleno mayi kaaꞌlo afidhanno?

¹¹ Songotenni bohamino Kiristaanchi dhiwantino geꞌrecho gedeeti yaa dandiineemmo. Kuni Kiristaanchi ayyaanaamittetenni dhiwamino. (Yai. 5:14) Mitu dhiwaninte gede, ayyaanaamittete dhiwanino woleho saꞌꞌara dandaanno. Konni daafira, ayyaanaamittetenni dhiwamino mancho songotenni bada hasiissanno woyiti no. Tini seejjo Yihowa ammanantino hoshshasi baxannota leellishshanno; qoleno cubbo loosinohu cubbisi leelleennasi aagintaawe maaro eanno gede kakkayissasira dandiitanno. Bohamino manchi, ayyaanaamittete sagale afiꞌranno gedenna ammanasi wirro kaajjishiꞌranno gede songote gambooshshe haꞌra dandaanno. Qoleno umisira horoonsiꞌrate borro adhanna JW Biroodikaaste macciishsha dandaanno. Hakkiinni saeno, cimeeyye kuni manchi heeshshosi biddi assiꞌranni noota laꞌuro, Yihowa ledo noosi jaalooma wirro kaajjishiꞌre galagale Yihowa Farciꞌraasincho ikkanno gede saꞌe saꞌe amaaltannosi.b

12. Cimeeyye cubbo loose maaro eannokki manchira baxillenna maaro leellishshanno doogo hiitteeti?

¹² Songotenni bohamannohu cubbo loose maaro eannokki manna calla ikkinota qaaga hasiissanno. Cimeeyye mitto mancho boha mulluri gede assine laꞌnannire ikkinokki daafira balaxxe seekkite heddanno. Insa Yihowa “halaalunni” woy hasiisanno deerrinni seejjannota affino. (Erm. 30:11) Insa roduuwansa baalanka baxxanno; hakko daafira, ayyaanaamittetenni gawajjannonsare mittoreno assa dihasidhanno. Mito woyite kayinni, cubbo loosino manchira baxillenna maaro leellinshanni doogo iso songotenni bohate.

13. Qorontoosi songora heeꞌrino Kiristaanchi bohama hasiissinosihu mayiraati?

¹³ Hanni soqqamaasinchu Phaawuloosi umi xibbi diro cubbo loose maaro ea giwino mancho ma asse yiinoro laꞌno. Qorontoosi katamira annisi galte ledo fooranno Kiristaanchi no. Kuni hashakkiꞌnanni cubbooti! Hundi waro Yihowa Israeelete daga togo yee hajajino: “Mittu manchi annisi galte ledo siimu xaadooshshe assiro, annasi shollishinona lamenka shinona.” (Lew. 20:11) Hige Phaawuloosi hakkonne mancho shinanni gede hajaja didandaanno. Ikkirono isi Qorontoosi songo Kiristaani hakkonne mancho bohanno gede kulino. Hakkawoyite konni manchihu maaeelu amanyooti songote giddo noore woloota hunanni no; mitootaho isinni konni manchi cubbi lowoha ikkinoti dileeltinonsa!—1 Qor. 5:1, 2, 13.

14. Phaawuloosi Qorontoosi songonni bohamino manchira maaro leellishinohu hiittoonniiti? Mayira? (2 Qorontoosi 2:5-8, 11)

¹⁴ Yannate gedensaanni, Phaawuloosi kuni manchi heeshshosi giddo lowore biddi assiꞌrinota afi. Kuni cubbo loosino manchi addinta maaro eino! Kuni manchi songo mishantanno gede assinoha ikkirono, Phaawuloosi cimeeyyete “saosi batise kula” hasiꞌrannokkita coyiꞌrino. Isi cimeeyye, “Saosi kiira agurtine jawaachishshinisiro woyyate” yiinonsa. Phaawuloosi hatto yiinohu mayiraatiro kulanni, “Kuni manchi dadillunni kainohunni hexxo mudhannokki gede” yiino. Phaawuloosi maaro einoha konne mancho mararino. Isi kuni manchi loosino cubbira dadille hexxo mudhe, maaro hasiꞌra agurate deerra iillara dihasiꞌrino.—2 Qorontoosi 2:5-8, 11 nabbawi.

15. Cimeeyye kaajjishshe seejjitannoreno maartannoreno ikka dandiitannohu hiittoonniiti?

¹⁵ Yihowa gede cimeeyyeno maaro leellisha baxxanno. Insa seejjo hasiissanno woyite cubbo loosinoha kaajjishshe seejjitanno; maarranni gede assannori heeꞌranno woyite kayinni maartanno. Hakkuyi kaꞌa insa maartanni nooha ikkikkinni cubbo lashshi assite saꞌanni no. Ikkina maaro leellisha hasiissannonsari songote cimeeyye callate?

NINKE BAALUNKU MAARO LEELLINSHEEMMORE IKKINEEMMO GEDE KAAꞌLANNONKERI MAATI?

16. Lawishsha 21:13, maaro leellisha gibbannore Yihowa ma assanno yitanno?

¹⁶ Baalunku Kiristaani Yihowa gede maaro leellishate sharrama hasiissannonsa. Mayira? Tennera korkaata ikkannori giddo mittu: Yihowa maaro leellisha gibbannori huuccatto dimacciishshanno. Qullaawu Maxaafi togo yaanno: “Qarramino manchi raare macciishsha giwe maccasi cuꞌmiꞌrannohu, isi umisi raaranno; macciishshannosihuno diheeꞌranno.” (Lawishsha 21:13, NW) Ninke giddo Yihowa huuccattosi macciishsha giwara hasiꞌranno manchi dino; hakko daafira godowa kaajjadda ikkineemmokki gede qorophineemmo. Mittu ammanate rodiinke xissosi hasaaphanno woyite macca cuꞌmiꞌne giwantenni, ayewoteno “qarramino manchi raare” macciishshate qixxaamboommore ikka hasiissannonke. Qoleno, tenne qullaawu ayyaaninni amaalloonni amaaleno macciishsha hasiissannonke: “Maganu yoo, sao agurannokkihura saosi diagurtanno.” (Yai. 2:13) Umonke heeshshi assine maaro mageeshshi geeshsha hasiissannonkero qaangeemmoha ikkiro, albinni roore maaro leellinsheemmo. Roorenkanni, mittu manchi maaro eꞌꞌe songo higanno woyite maaro leellisha hasiissannonke.

17. Moote Daawiti addinta maarannoha ikkinota leellishinohu hiittoonniiti?

¹⁷ Qullaawu Maxaafi giddo kulloonnihu addi addi manni xagge, maaro leellinsheemmo gedenna godowa kaajjineemmokki gede kaaꞌlitannonke. Lawishshaho, Moote Daawiti xagge laꞌno. Isi duucha hige addinta maarannoha ikkinota leellishino. Saaooli iso shaara mixiꞌrinoha ikkirono, Daawiti kayinni Maganu buurinoha konne moote dirabbisiꞌrino woy digawajjinosi; hatteentenni maare sainosi.—1 Sam. 24:9-12, 18, 19.

18-19. Daawiti maaro leellishikki gatinoti lame yanna hiitteeti?

¹⁸ Ikkollana, Daawiti woꞌmanka woyite maaro leellishino yaa diꞌꞌikkino. Lawishshaho, Naabaali yinannihu kakkachu manchi, Daawitiranna mannisira sagale hoꞌli woyitenna xonisi woyite, Daawiti baasa hanqe Naabaalinna minesi noo labballo baala shaate kaino. Naabaali galte Abigiya kayinni shaqqadotenna cincate; ise bayichonko Daawitiranna mannisira sagale uyitino. Konni garinni Daawiti mundeete shedinni gatissino.—1 Sam. 25:9-22, 32-35.

¹⁹ Wole yannara, masaalaanchu Naataani mittu dureessu manchi mittu buxichu manchita baxanno geꞌrecho adhinota Daawitira kulisi. Hakkiinni Daawiti lowo geeshsha hanqe, “Heeshshote Magani halaaleeti, togo assino manchira reyo hasiissanno” yiino. (2 Sam. 12:1-6) Kayi Daawiti Muse Seera afino manchooti. Seeru yaanno garinni, mitte geꞌrecho moorino manchi shoole geꞌrecho qola hasiissannosi. (Ful. 22:1) Mooraancho reyona yaa kayinni lowo geeshsha kaajjado yooti. Hige Naataani hattee xagge masalse coyiꞌrinohu, Daawiti umisi hakkiinni lowo geeshsha rooranno cubbo loosinota huwatanno gede kaaꞌlateetilla. Daawiti lawishshu giddo kulli mooraanchira maaro leellishinokkiha ikkirono, Yihowa Daawiti lowo geeshsha maarinosi!—2 Sam. 12:7-13.

20. Daawiti assinorinni maa ronseemmo?

²⁰ Daawiti lowo geeshsha hanqe noo yannara, Naabaalinna minisi labballira baalaho reyote yoo yiino. Qoleno gedensoonni, Daawiti Naataani lawishshunni kuli manchira reyo hasiissannosi yiino. Tenne layinki xagge hendeemmo woyite, ‘Daawiti shaqqado manchootina togoota kaajjado yoo mayira yii?’ yine hendeemmoha ikkara dandaanno. Hanni hakkawoyite Daawiti hiitto ikke nooro hedi. Hakkawoyite Daawiti tiiꞌꞌisi bushiishanni noosi. Mittu manchi kaajjado yoo yiiro, hatti Yihowa ledo noosi jaaloomi dancha ikkinokkita leellishshanno. Yesuusi rosaanosi togo yee qorowisiisino: “Kiꞌnera yoo yinanniꞌnekki gede, kiꞌneno woleho yoo yitinoonte. Woleho yitinoonni yoo garinni Maganu kiꞌnerano yoo yaannoꞌne.” (Mat. 7:1, 2) Konni daafira, godowa kaajjadda ikka agurre, Maganinke gede ‘maarote dureeyye’ ikkate sharrammo.

21-22. Maaro leellisha dandiineemmoti mite doogga hiikkuriiti?

²¹ Maarote yaa mulla marara calla diꞌꞌikkitino. Isinni maarate yaa, “mararreemmota loosunni leellishate” yine tirroonni. Konni daafira ninke baalunku maatenke giddo, songonke giddonna heeꞌneemmo qooxeessira kaaꞌlo hasiissannonsari ayeootiro heda hasiissannonke. Hatto assinummoro, maaro leellisha dandiineemmota duucha faro afiꞌneemmo! Shesho hasiissinosi manchi heeꞌra ikka? Woy mitore assine, lawishshaho sagale uyine woy wolere danchare assine kaaꞌla dandiineemmohu nookka? Bohame higinohura mittu rodiira jawaachishannosi jaali hasiisannosikka? Sheshifachishannoha dancha duduwo wolootaho kula dandiineemmo? Xaandeemmo mannira baalaho maaro leellisha dandiineemmote kaajja doogga giddo mitte tenneeti.—Iyo. 29:12, 13; Rom. 10:14, 15; Yai. 1:27.

²² Togoo kaaꞌlo hasiissannonsari ayeootiro ille worre laꞌneemmoha ikkiro, maaro leellisha dandiineemmoti batinye doogga noota wodanchineemmo. Maaro leellinsheemmo woyite, “maarote dureessa” ikkino Maganonke Yihowa tashshi assineemmo!