Keere Haaꞌra Afidhino Wolqa

“KEEREHO? Xummaho? Baꞌraaꞌraho?”

Mannu ledo xaandeemmo woyite konni garinni keere haaꞌneemmoti egennantinote. Isinni manna anga amande keere haaꞌneemmoha woy hanqanfe daae yineemmoha ikkara dandaanno. Keere haaꞌnanni gari budu budunni babbaxxinoha ikkirono, baalunku manni keere haaꞌra hasiissannota afino. Isinni keere haaꞌra hooga woy keere haꞌnanni woyite cuqqo giwa ayirrinye ikkitinokkihunna bushu amanyooti gede assine kiirrara dandiinanni.

Ikkollana keere haaꞌra baxannohu baala manna diꞌꞌikkino. Mitootu manna ille qasse laꞌꞌa dandiitannokkire ikkitinohura woy insaneeto mannu woriidire assite laꞌanno daafira keere haaꞌra waajjitanno. Wolootu qolte insawiinni baxxino sircho, budenna akata afiꞌrino manna keere haaꞌra qarra ikkitannonsa. Ikkollana, haransine keere haaꞌra nafa lowo horo afidhino.

Ateneeto togo yite xaꞌmi: ‘Keere haaꞌra mayi horo afidhino? Maganu Qaali keere haaꞌrate daafira maa rosiisannoe?’

“MANNA BAALA” KEERE HAADHE

Soqqamaasinchu Pheexiroosi Yihudu wido ikkinokkihu Qornelewoosi yinanni manchi Kiristaancho ikki woyite “Maganu manna mallaadannokkita” coyiꞌrino. (Soq. 10:34) Yannate gedensaanni Pheexiroosi Maganu “baalunku aagintaawe higara” hasiꞌrannota borreessino. (2 Phe. 3:9) Konne qummeeshsha nabbambeemmo woyite umo hendeemmohu Qullaawu Maxaafi halaale rosanni noo manna ikkara dandaanno. Ikkollana Pheexiroosi Kiristaana, “Manna baala ayirrisse; roduuwa baxxe” yee amaalino. (1 Phe. 2:17) Ikkina, sirchinsa, budinsa, woy akatinsa baxiha ikkirono, baalanka manna keere haaꞌra dihasiissannonke? Hatto assanke, ayirrinseemmonsatanna banxeemmonsata leellishshanno.

Soqqamaasinchu Phaawuloosi songote miilla, “Kiristoosi kiꞌne . . . haaꞌriꞌnente gede, kiꞌneno mimmitoꞌne haadhe” yee amaalino. (Rom. 15:7) Phaawuloosi ‘jawaachishshinosi’ roduuwa qummi asse coyiꞌrino. Heeꞌnoommo yanna Sheexaanu Maganu manna gawajjate qodhe kainota ikkitino daafira, roduuwanke albinni roore jawaachisha hasiissannonke.—Qol. 4:11; Aju. 12:12, 17.

Qullaawu Maxaafi giddo kulloonni lawishshuwa, keere haaꞌra mannu hagiidhanno gede assatenni saꞌino horo afidhinota leellishshanno.

SHESHO, JAWAANTENNA BAXILLE

Maganu Beetti uullara daye ilamanno yanna iillituta, tenne sokka Maariyaamira kulara Maganu sokkaasinchosi soyino. Sokkaasinchu Maganu soyino sokka Maariyaamira kulara albaanni “Ati elto woꞌmitinoheti, keeru ledokki heeꞌro! Maganu ate ledo no” yiinose. Maariyaami sokkaasinchu hasaawisanni noosehu mayiraatiro leellinosekki daafira ‘massino.’ Sokkaasinchu massinota afe “Maariyaami, Maganu albaanni ayirrinye afiꞌroottana waajjitooti!” yiinose. Hakkiinni sokkaasinchu Maganu Mesihicha iltara doorinoseta kulinose. Maariyaami masa agurte “Kuneeti! ani Mootichu borojjichootina, ati yootto gede ikkoe” yite hajajantannota ikkitinota leellishshino.—Luq. 1:26-38.

Sokkaasinchu Yihowa sokkaancho ikke soqqamate qoossosi naadannoti egennantinote; ikkollana guuta ikkitinokki mancho hasaawisa ayirrinyesi ajishshannohu gede asse dihedino. Isi Maganu soyinose sokka kulasera albaanni keere haaꞌrinose. Isi lawishshinni maa ronseemmo? Woloota keere haaꞌranna jawaachisha hasiissannonke. Shiimare calla coyiꞌne woloota jawaachishanna Maganu manni wido ikkitinota huwattanno gede kaaꞌla dandiineemmo.

Phaawuloosi Shiimiidi Iisiyiranna Awuroppaho noo songuwara heedhanno roduuwi giddo batinye egennino. Isi borreessino sokka giddo batinye roduuwa qummi asse keere haaꞌrino.

Roomu Sokka fooliishsho 16 tenne leellishshanno. Phaawuloosi batinyu ayyaanaamittete roduuwisira keere soyino. Lawishshaho isi Febeni yinanni rodoo suꞌma qummi asse ise daafira coyiꞌrino, hattono roduuwisi ‘Maganu manni garinni Mootichu suꞌminni wosinchimma haadhe hasiisannosere baala kaaꞌlitannose’ gede kulinonsa. Phaawuloosi Phirisqillaranna Aqiilara keere soyino; isi insa daafira coyiꞌranni “Ane calla ikkummokkinni Dagate giddonni higge ammaꞌnitino beetekiristaanna [woy, songuwa] baala galattannonsa.” Isi “baxeemmo manchira Aphenetusiranna” “Mootichu soqqanshora daafurtinorira Tirufaanaranna Tirufoosara keere iillishsheꞌꞌe” yiino; xa kuri roduuwi daafira garire anfoommokkiha ikkirono Phaawuloosi insara keere soyinonsa. Ee, Phaawuloosi ayyaanaamittete roduuwasi keere haaꞌra baxanno.—Rom. 16:1-16.

Keere sonkoonninsa roduuwi Phaawuloosi insa qaagannonsata afansanni lowo geeshsha hagiidhitinoti egennantinote. Qoleno Phaawuloosiranna mereeronsa noo baxilli kaajjinoti dihuluullissannote! Wolu Kiristaanino Phaawuloosi baxillunni kae soyinota keeru sokka macciishshansa jawaatannonna ammanansanni kaajje heeꞌranno gede kaaꞌlitinonsaha ikkara dandaanno. Ee, baxillunni kaꞌne keere haaꞌra jaaloomu kaajjannonna Maganu manni mereero noo mittimma kaajjitanno gede assitanno.

Phaawuloosi Putiyoluusi yinanniwa baaru qacce iille Rooma haꞌrate qixxaawanni heeꞌreenna qooxeessaho heeꞌranno Kiristaani isinni xaadate dayino. Phaawuloosi insa xeertote heeꞌre laiti, ‘Magano galatino’ hattono ‘wodanisi hagiidhino.’ (Soq. 28:13-15) Mito woyite keere haaꞌra dandiineemmohu muushshi yine woy xeertote heeꞌne anga kayinse calla ikkara dandaanno. Ikkollana hatto assanke yaadino woy dadillino mancho sheshifachishshara dandiitanno.

KEERE HAAꞌNANNI GARA

Rosaanchu Yaiqoobi ayyaanaamittete roduuwisira kaajjado amaale uyino yanna no. Mitu Kiristaani alamete ledo jaalooꞌme Maganu ledo noonsa jaalooma huꞌnino. (Yai. 4:4) Ikkollana Yaiqoobi sokkate hanafora mayyiinoro wodanchi:

“Gobba baalate billaallite noorira tonaa lamente Israeelete gaꞌrera, Maganunna Mootichu Yesuusi Kiristoosi soqqamaancho ikkoommohu ani Yaiqoobi soommo sokka. Keeru kiꞌne ledo heeꞌro.” (Yai. 1:1) Yaiqoobi sokkasi hanafino gari, sokka borreessinonsa manni Maganu baalanka mitte illenni laꞌꞌannota huwattanno gede assinsakki digatino; tini qolte Yaiqoobi amaalinonsa amaale adha shota ikkitannonsa gede assitanno. Ee, baxillunni keere haaꞌra, shota ikkitinokki hajo nafa kayinse hasaawate kaaꞌlitanno.

Woloota keere haaꞌneemmohu haransine ikkiro nafa, baxillunninna suwashshu wodaninni kaꞌne keere haaꞌra hasiissannonke. Mannu keere haaꞌnoommonsata afa hoogiro nafa togo assa hasiissannonke. (Mat. 22:39) Mitte Ayerilaandete heedhanno rodoo songote gambooshshe hananfara kaꞌne heeꞌneenna iillitino. Ise muddantanni eꞌanni heedheenna mittu rodii faasiiqe “Hawalle keere dayitta” yiinose. Hatti rodoo mittoreno yitukki ofoltino.

Boode lamala gedensaanni ise hakko rodiiwa marte mini giddo kalaqamino qarri yaachishinoseta kultinosi. Ise togo yitino: “Hakko barra lowo geeshsha dadille noomma. Gambooshshe haꞌroommahuno hinko gaꞌmireeti. Ati keere haaꞌrittoeta agurranna gambooshshunniwa shiqino roso diqaageemma. Hatto assakki lowo geeshsha jawaachishshinoe. Konnira galaxxeemmahe.”

Hakku rodii keere haaꞌrasi kageeshshi wolqa afidhino yee dihedino. Isi togo yiino: “Keere haaꞌraꞌya jawachishshinoseta kultue yannara, hatto assaꞌyanni tashshi yiinoe. Tini ane umoꞌya hagiirsiissinoe.”

Selemooni togo yee borreessino: “Sagalekki wayi aana tugi; lowo barri gedensaanni, galagalchite afiꞌrattona.” (Ros. 11:1) Roorenkanni ayyaanaamittete roduuwanke keere haaꞌranke ninkeno ikko insa hagiirsiissanno. Konnira keere haaꞌra afidhino wolqa ajinshe laꞌnoonke.