Magansidhinanni Bayicho Beetekiristaanete Yitinannikkihu Mayiraati?

Qullaawu Maxaafi giddo, mitootu “beetekiristaane” yite tirtannohu Giriikete Afii qaali magansiꞌrate gamba yinanni mine ikkikkinni magansiꞌrate gamba yaanno manna kulannoho.

Hanni mitto lawishsha laꞌno: Soqqamaasinchu Phaawuloosi Roomaho heeꞌranno Kiristaanira sokka borreessi yannara, Aqiilanna Phirisqilla yinanni minaannanna minaamara keere soyi gedensaanni lede togo yiino: “Minensa xaaddanno beetekiristaanera keere iillishsheꞌꞌe.” (Roomu Sokka 16:5) Phaawuloosi keeresi mineho iillinshara hasiꞌrinokkiti egennantinote. Hatteentenni, isi keere soyinohu gamba yiino mannira yaano hakko mine gamba yitanno songoraati.a

Konni daafira, Magano magansiꞌrate gamba yineemmo minna beetekiristaanete yaantenni “Gambooshshu Addaraashe” yineemmo.

“Yihowa Farciꞌraasineta Gambooshshu Addaraashe” yinannihu mayiraati?

Kuni suꞌmi malinoho yineemmo gede assannonkehu duuchu korkaati no:

• Gamba yineemmo bayichi addaraashete, woy gambooshshu baseeti.

• Gamba yineemmohu Qullaawu Maxaafi kulanno Magano Yihowa magansiꞌrate, hattono isira naqaashe ikkate woy isi daafira farciꞌrateeti.—Faarso 83:18; Isayaasi 43:12.

• Qoleno gamba yineemmohu Maganu Mangiste daafira rosateeti; Yesuusi tenne Mangiste daafira duucha hige rosiisino.—Maatewoosi 6:9, 10; 24:14; Luqaasi 4:43.

Qooxeessikkira Gambooshshu Addaraashenke noowa marte Yihowa Farciꞌraasine gambooshshi hiittoohoro laꞌꞌattora koyinsoommohe.