“Konne Assa Agurtinoonte”

Qaaggooshshu Ayyaana Dotteessa 5⁠nni Ayirrinsanni

1. Qaaggooshshu ayyaana ayirrisa hasiissannohu mayiraati?

¹ “Ane qaagate konne assa agurtinoonte.” (Luq. 22:19) Yesuusi tenne coyiꞌre rosaanosi isi mannu oosora wodo ikke reyino reyo qaagganno gede hajajino. Wodote kakkalo abbitino atoote hendanni wote Kiristaanaho Qaaggooshshu barri gede lowo geeshsha hasiisannohu wolu barri dino. Tayixeha Qaaggooshshu ayyaana ayirrinsannihu Dotteessa 5 shiqe daanno wote Yihowa assinonkerira galata qola dandiineemmohu hiittoonniiti?—Qol. 3:15.

2. Qaaggooshshu ayyaana kaffi assine laꞌneemmota leellishate mayinnire xiinxallanna hiinca dandiineemmo?

² Qixxaabbe: Heeshshonke giddo kaffi assine laꞌneemmo coyira qixxaawa nooreeti. Maatete deerrinni Yesuusi reyi taaera ikkitino ikkitore xiinxallinenna hiincine Qaaggooshshu ayyaanira wodananke qixxeessiꞌra dandiineemmo. (Izi. 7:10) Yesuusi reyi taaera ikkitino ikkitore kultannoti gama xiqisubba kalaanderetenna Qullaawu Maxaafire Barru Barrunku Hasaawa yinanni buukileete aana fultino; qoleno tenne ikkitore kultannoti baalanti xiqisubbanna tenne xiqisubba xawishsha amaddinoti Mannaho Aliidi Manchi yaanno maxaafi fooliishshubba Ammajje 1, 2011 Agarooshshu Shaera qoola 23 nna 24 aana fultino.

3. Qaaggooshshu ayyaana kaffi assine laꞌneemmota albinni roortino saate soqqamme leellishate maa assa dandiineemmo?

³ Diinaggaabbine Soqqamme: Qoleno albinni roore diinaggaambe soqqamme Yihowara galata qola dandiineemmo. (Luq. 6:45) Badheessa 17⁠nni Qidaamete barrinni jammarre alamete deerrinni Qaaggooshshu ayyaanira manna koyisa jammarreemmo. Hakkawote albinni roortino saate soqqamate woyi kaaꞌlaancho suwisaancho ikkate pirogiraamekki biddi assiꞌra dandaatto? Aantannote Maatete Magansiꞌraꞌne yannara tenne hajore mayira dihasaabbinanni?

4. Qaaggooshshu ayyaana ayirrisa mayi atoote abbitannonke?

⁴ Diru dirunku Qaaggooshshu ayyaana ayirrisanke abbitannonke atooti baete! Yihowa shaqqillunni mitto Beettosi wodo asse uyinota hiincineemmo wote hagiirrinkenna Yihowara noonke baxilli lexxanno. (Yoh. 3:16; 1 Yo. 4:9, 10) Kuni shaqqilli ninkeneetira heeꞌneemmokki gede kakkayisannonke. (2 Qor. 5:14, 15) Qoleno faajjete Yihowa galanteemmo gede assannonke. (Far. 102:19-21) Yihowa soqqamaano Dotteessa 5⁠nni Qaaggooshshu ayyaana ayirrinsanni wote ‘Mootichu reyo duduwate’ diinaggaabbe faro hasidhannoti dihuluullissannote.—1 Qor. 11:26.