Qaagooshshu Ayyaanira Hagiirraamu Wodaninni Qixxaabbe

1. Qaagooshshu Ayyaani wogga maa assinannite baxxitino yannaati?

¹ Badheessa 26⁠nni Maakisanyote barra ayirrinsannihu Qaagooshshu Ayyaani, Maganu gatote qixxeessino qixxaawo kaffi assine laꞌneemmota leellishate dancha faro fanannonke. (Isa. 61:10) Konne ayyaana ayirrinsanni barri daara albaanni nafa wodananke hagiirraamo assiꞌranke, dancha gede qixxaawate kaaꞌlitannonke. Hiitto?

2. Qaagooshshu Ayyaanira qixxaambeemmo gede assannonkeri maati?

² Ayyaana Ayirrisate Qixxaawa: Mootichu Hurbaati ayyaani lowo geeshsha kaffi assine laꞌnanniha ikkirono ayirrinsannihu kayinni boodere qixxeessineeti. Ikkollana, konne ayyaana ayirrisate hasiisannore baala lashshi assinikkinni balanxe qixxaawa hasiissanno. (Law. 21:5) Ayirrinsanni yannanna injiitanno base doora hasiissanno. Ayyaanaho horoonsiꞌnanni timanna woyine garunni qixxeessa hasiissanno. Gambooshshu base fiine qixxeessa hasiissanno. Nigiggire shiqishara maddawamino rodii seekke qixxaawa hasiissannosi; hattono soqqamaanote biddishsha xawinse kula hasiissanno. Kawoote kuri giddo roore coyibba kageeshsha qixxaabbine guddinikkinni digattinoonni. Wodote kakkalora galatu noonketa leellisha hasiꞌneemmo daafira, tenne qullaawa qixxaawora balanxe seekkine qixxaambeemmo.—1 Phe. 1:8, 9.

3. Mootichu Hurbaatira wodananke qixxeessiꞌra dandiineemmohu hiittoonniiti?

³ Wodananke Qixxeessiꞌra: Qaagooshshu Ayyaani alaama seekkine afate wodananke qixxeessiꞌrano lowo geeshsha hasiissanno. (Izi. 7:10) Tenne assate, Qaagooshshu Ayyaani woggara nabbambannita Qullaawu Maxaafi niwaawe nabbawate, hattono Yesuusi uulla heeshshosi gudi taaera ikkinore hiincate yanna gaaꞌma hasiissanno. Yesuusi umisi xiqime agure leellishino lawishsha heeshshi gotti assine hedanke, iso lambeemmo gede kaaꞌlitannonke.—Gal. 2:20.

4. Wodote kakkalonni afiꞌnanni atooti giddo ate roore hagiirsiisannohehu hiikkonneeti?

⁴ Kiristoosi reyo Yihowa aliidimma buunxanni gede assitanno. Hattono, cubbunna reyotenni wolaphineemmo gede kaaꞌlitannonke. (1 Yoh. 2:2) Qolteno Maganu ledo dancha fiixooma kalaqiꞌneemmonna hegeri heeshsho afiꞌneemmo faro fantannonke. (Qol. 1:21, 22) Hakkiinni saeno, ninkeneeto Yihowara sayinse uyinummo wote eꞌnoommo qaale agadhatenna Kiristoosi rosaano ikkinoommonte gedeenni heeꞌrate kaaꞌlitannonke. (Mat. 16:24) Qaagooshshu Ayyaanira dancha gede qixxaabbinanninna konne ayyaana ayirrissinanni wote hagiirriꞌne lexxara halchineemmo!