Rosiisate Dandoonke Woyyeessiꞌrate Kaaꞌlitannonketa Sase Doogo
1. Rosiisate dandoonke woyyeessiꞌrate sharrama hasiissannonkehu mayiraati?
1 Baalunku Yihowa Farciꞌraasine rosiisaanote. Umo manna hasaawinseemmo wote, hattono alba coyishiinshoommo manna galagalle hasaawinseemmo wotenna Qullaawa Maxaafa xiinxallinseemmo wote manna rosiinsanni heeꞌnoommo. Rosiinseemmohu qole, haafa coye diꞌꞌikkino. Mannaho “qullaawa borro” xawaabba xawinseemmo; kuni xawaabbi qole mannu “gatonniwa massitanno hayyo” afiꞌranno gede assanno. (2 Xim. 3:15) Tini kaajja mabteeti! Hanni rosiisate dandoonke woyyeessiꞌrate kaaꞌlitannonketa sase doogo laꞌno.
2. Qallaalunni rosiisa dandiineemmohu hiittoonniiti?
2 Qallaalunni Rosiisa: Mitto coye seekkine anfummoro hakku coyi woleho lowonta kabbaaddannota deꞌnammora dandiineemmo. Konni daafira Qullaawa Maxaafa xiinxallisatto wote hasiisannokkire ledde, rosiisattori raqaxame baꞌꞌanno gede assitooti. Hatteentenni qara qara assaawe xabbe leeltanno gede assi. Mittu manchi duuchare coyiꞌrinohura calla danchu garinni rosiisino yaa diꞌꞌikkino. (Law. 10:19) Roore wote qara qara xiqisubba calla nabbawa danchate. Xiqise nabbawitto gedensaanni hasaawiꞌne ledo xaado afidhino assaawe aana illachishi. Maatewoosi fooliishsho 5 kayise 7 geeshsha nooti Yesuusiti Ilaalu Sibikate taalle nookki halaale amaddino; ikkirono Yesuusi konne halaale boode qaalla doore qallaalunni rosiisino.
3. Lawishshu maaho kaaꞌlanno? Roore dancha ikkannohu hiittoo lawishsha horoonsiꞌnirooti?
3 Lawishsha Horoonsiꞌra: Lawishshu surrete qaꞌmanno, hattono simmeete kakkayisannonna qaagate kaaꞌlanno. Dancha lawishsha horoonsiꞌrate hayyo coyiꞌrate fullahoottoha ikka hasiissannohe yaa diꞌꞌikkino. Yesuusi roore wote haranchonna raqaxaminokki lawishsha horoonsiꞌrino. (Maat. 7:3-5; 18:2-4) Woraqatu aana qallaale misile kayise hatteenni rosiisano lowo geeshsha kaaꞌlitanno. Umo assite seekkite qixxaawattoha ikkiro dancha lawishsha afiꞌrattora dandaatto.
4. Xaꞌmo danchu garinni horoonsiꞌra dandiineemmohu hiittoonniiti?
4 Xaꞌmo Xaꞌma: Xaꞌmo xaꞌma xiinxallisatto mancho assaawanno gede assitanno. Konni daafira xaꞌmo xaꞌmitto gedensaanni shiima geeshsha taxxi yaa hasiissannohe. Xaꞌmitanni heedhenni atinni dawaro qolattoha ikkiro xiinxallisatto manchi huwatanna hoongesi afa didandaatto. Dawarosi soꞌro ikkituro nafa ati dawaro qola agurte ledde wole xaꞌmo xaꞌmite garu dawaro qolanno gede kaaꞌlisi. (Maat. 17:24-27) Ninke mereero guutu rosiisaanchi dino. Konni daafira Qullaawu Maxaafi, rosiisate dandoonke woyyeessiꞌrate ayewoteno sharrama hasiissannonketa amaalannonke. Hatto assineemmoha ikkiro, ninkeno macciishshitannonkerino hegere heeshsho afiꞌneemmo.—1 Xim. 4:16.