Yihowa Farciꞌraasineta Loosunni Leeltino Ammana, Gafa 2: Xawaabbu Xawo
Roduu Raazerifoordinna miillasi 1919nni usuru mininni fultu gedensaanni, Qullaawu Maxaafi Rosaano lowo looso jammartu. Yihowa Farciꞌraasineta Loosunni Leeltino Ammana, Gafa 2: Xawaabbu Xawo yinanni viidiyo leellishshannonte gede, Qullaawu Maxaafi Rosaano taqawwamannohu batinyu manni kaino, insa qolte Qullaawa Borro albinni roore huwattanni hadhino, hattono ammanansa collaabbino. (Law. 4:18; Mil. 3:1-3; Yoh. 15:20) Tenne viidiyo laꞌine, aante noo xaꞌmuwara dawaro qolate woꞌnaalle.
(1) Qullaawu Maxaafi Rosaano dancha duduwo gobba gosa iillishate maa maa assitino? (2) Tonaa-honsu sajjiina-mittunninna 1935nni baxxinohu awuraajju gambooshshira mayi egensiishsha kulloonni? (3) Bocaasa 1, 1939nniti Agarooshshu Shae, hiittee lowonta hasiissanno assaawe xawissino? (4) Roduu Raazerifoordi Madisen Iskuweri Gardeni yinanni basera, “Gashshootenna Salaame” yitanno nigiggire shiqishanni heeꞌreenna mayi ikkinoro xawisi. (5) “Salaame Geeddara Dandiitanno?” yitannoti Roduu Noori shiqishino nigiggire lowonta dhaggeeffantannita ikkitinohu mayiraati? (6) Yihowa Farciꞌraasine sabbakate loosonsa halashshate 1942nni mayi iqqide fushshidhino? (7) Yihowa gosa Yunayitidi Isteetisete, Kanaadahonna Giriikete yekkeerantinota higgete yekkeero xawisi. (8) Giiliyaadi rosi mini sabbakate loosi halaꞌlanno gede mageeshsha kaaꞌlino? (9) Tonaa-honsu shoyilliina-lewunni hiikkoye hasiisanno looso jammarroonni? Mayira? (10) Yihowa Farciꞌraasine amanyootinsa Qullaawu Maxaafi seeri ledo sumuu yaanno gede assiꞌrate maa maa assitino? (11) Yihowa dirijjite Qullaawu Maxaafi giddo noo wodho ledo roore sumuu yitanno gede assate, 1970 qooxeessira maa maa biddi assinoonni? (12) Tenne viidiyo laꞌꞌakki, tenne dirijjite woꞌmunni woꞌma Yihowa marraꞌꞌanni nootanna dirijjiteno isita ikkitinota albinni roore huwatatto gede kaaꞌlitinohehu hiittoonniiti? (13) Tini viidiyo guficho ikkannori heeꞌreennanni diinaggaabbe sabbakate albinni roore qodhite kaꞌꞌatto gede assitinohehu hiittoonniiti? (14) Tenne viidiyo horoonsiꞌne fiixanke, Qullaawa Maxaafa xiinxallinseemmorenna woloota kaaꞌla dandiineemmohu hiittoonniiti?
Badheege saꞌꞌannohu mittu mittunku barri Yihowa Farciꞌraasine taarikera wole haaro gafa fananno. Ninkena, konni kaꞌa taarikete kullannita dancha soqqansho soqqammanni heeꞌnoommo? Hunda noo roduuwinke assitinonte gede, ninkeno diinaggaambe “xawaabbu xawanno gede assino”!—2 Qor. 4:6.