Sabbakate Balanxe Hasa Hasiissanno

1. Addi addi afoo coyiꞌranno manni heeꞌranno qooxeessira songote killile, hakko noo manni coyiꞌranno afii garinni maddambannihu mayiraati?

¹ Yesuusi rosaano 33 M.D. Phenxeqosxete ayyaani barra ayyaanu dirrinsahu gedensaanni, xeerto gobbanni dayino mannira ‘addi addi afiinni coyidhino.’ (Soq. Los. 2:4) Tini qolte 3,000 manni cuuamanno gede assitino. Hakko ayyaana ayirrisara dayinohu rooru manni, lowo manni coyiꞌrannoha wole afoo dandaannoha ikkikki digatino; kuni afii Ibirayisxete woyi Giriikete afoo ikkara dandaanno. Yihowa kayinni Mangistesi sokka mannu dadhino afiinni sabbankara hasiꞌrino. Isi hatto assanno gede assinosihu mittu korkaati mannu dancha duduwo afoo dadhino afiinni kullinsaro roore macciishshanno daafiraati. Konni daafira yannankerano, addi addi afoo coyiꞌranno manni heeꞌranno qooxeessira noo songuwara killile maddambannihu, qooxeessaho heeꞌranno manni coyiꞌranno afii garinniiti. (Darajjaino Manna, qoola 107, gufo 2-3) Baara widi afiinni marraꞌnanni gaamora killile maddambanninsakkiha ikkirono, hatte gaamo kaaꞌlitanno songo woyi wole qooxeessaho noo songo killile giddo heeꞌrannohura baara widi afoo coyiꞌranno mannira sabbakkanno.

2. (a) Hansanniri maati? Hansannihu hiikkooti? (b) Addi addi afoo coyiꞌranno manni heeꞌranno killilera noo songuwa kaaꞌlante hasa dandiitannohu hiittoonniiti? (c) Wole afoo coyiꞌrannoha hasatto noonsa manna anfummoro, assa hasiissannonkeri maati?

² Baalunku manni mitto afoo coyiꞌrannowa heedhanno halashshaano mittu qarri nookkiha minunni mine saꞌanni sabbaka dandiitanno. Mannu addi addi afoo coyiꞌrannowa kayinni, hatto assa didandiinanni. Korkaatuno, addi addi afiinni marraꞌnanni songuwa sabbakkanno killile mitte ikkitara dandiitanno. Songoꞌne marraꞌnanni afoo coyiꞌranno manna affu songo, hakko mannire kultannoꞌneha ikkirono, hakko manna hasate halaafinati songoꞌneho woyi gaamoꞌneho. (“Mimmitoꞌne Kaaꞌle” yitanno saaxine lae.) Konni daafira, songoꞌne marraꞌnanni afoo coyiꞌranno manna afate xaꞌmisiisa hasiissannoꞌneha ikkara dandaanno. Hasa dandiineemmohu hiittoonniiti?

3. Mitte songo woyi gaamo hasatto noonsa manna hassanno basenna hasanni keeshshitanno yanna babbaxxitanno gede assannori maati?

³ Hansanni Gara Qineessa: Addi addi afoo coyiꞌranno manni heeꞌranno qooxeessira manna hansanni keeshshinanni yanna qooxeessu garinni babbaxxitanno. Lawishshaho, hakko qooxeessira heeꞌrannohu songoꞌne marraꞌnanni afoo coyiꞌranno manni mageeshshiho? Hakko heedhanno halashshaano kiiro mageeshsha ikkitanno? Songoꞌnera woyi gaamoꞌnera hansanni manniti mageeshshi teesso no? Songoꞌne hasatto noonsa manna hassanno wote mitto mittonka qacha taashshite hasa hasiissannonsakkiha ikkara dandaanno; hatte killile giddo woyi fafowa hadhukki rooru manni heeꞌrannowa hasate doodhitara dandiitanno. Baalante killilera taashshite hassannokkiha ikkirono, hasatto noonsa manna darajjaino garinni hasa, lowo manni Yihowa suꞌma gananno faro fantanno.—Ro. 10:13, 14.

4. (a) Hansanni gara hiittoonni darajjaisiisa hasiissanno? (b) Songoꞌne marraꞌnanni afoo coyiꞌrannoha hasatto noonsa manna hasa dandiinanni doogga giddo mite mite hiikkuriiti?

⁴ Mitte killile giddo aana aanaho marre hansannikki gede, cimeeyye, roorenkanni soqqanshote aliidi laꞌꞌaanchi hansanni gara biddi assanna qineessa hasiissannosi. (1 Qor. 9:26) Baara widi afiinni marraꞌnanni gaamohu ikkadu rodii, hattee gaamo kaaꞌlitanno songo cimeeyye doorteenna konne looso qineessa dandaanno; tennera doorranni rodii cimeessa woyi songote soqqamaancho ikkiro danchaho. Haammata songonna gaamo, hassara balaxxe silkete kiironna mannu suꞌmi noo woraqata woyi interneete horoonsidhe, songonke woyi gaamonke marraꞌnanni afii suꞌmuwa hassanno. Hakkiinnino, silke dowwoltanno woyi manna hasate mininsa geeshsha hadhanno; togo assansa killilete kaarti aana malaatisa hasiissanno minna hiitteetiro wossanate kaaꞌlitanno. Hasiisannoha ikkiro, gaamo kaaꞌlitanno songo cimeeyye, songonsa halashshaano baalunku saꞌe saꞌe hasa kaaꞌlitanno gede assa dandiitanno.—“Songoꞌne Woyi Gaamoꞌne Marraꞌnanni Afoo Coyiꞌranno Manna Hasa Dandiitinannihu Hiittoonniiti?” yitanno saaxine lai.

5. (a) Halashshaano manna hasate assa dandiitannori mitu mitu coyi maati? (b) Hanseemmo wote mannaho mayyaa dandiineemmo?

⁵ Mitti mittinke manna hasate haꞌneemmo wote alaamanke hawa dihasiissannonke. Manna hasa soqqanshonke kifile ikkitinohura mishiishannokki garinni uddiꞌra hasiissannonke. Batinyu roduuwi umo assite manna coyishiishshanno gara rosiisiꞌransa, hasatto noonsa manna faasiiqqe coyishiishatenna coyidhanno afoo roore egennate kaaꞌlitinonsa. Rippoorte assa hasiissannonkehu manna hansoommo saateeti ikkinnina, killilenna killilete mazigawa qineessinanni saate diꞌꞌikkitino. Songonke marraꞌnanni afoo coyiꞌranno manna anfummoro, dancha duduwo kulle, killilete kaarti aana malaatisa dandiinanni gede soqqanshote aliidi laꞌꞌaanchira woyi isi wokkalino rodiira mulenni kula hasiissanno. Coyishiinshoommo mannira hasatto heedhonsa hooggonsa, rippoorte assa hasiissannonke. Manna hasa hasiissannota ikkiturono, quwa saꞌꞌa hooganna soqqanshote horoonsiꞌneemmota baalanta doogga horoonsiꞌra hasiissannonke.—“Hansanni Wote Mayyaa Dandiinanni?” yitanno saaxine lai.

6. Danqoota hasa kabbaaddanno gede assannori maati?

⁶ Danqoota Hasa: Danqoota hasa qallaale ikkitinokki daafira, hexxo mudha hooganna cinca hasiissanno. Danqoota suꞌminsanni, uurrinshansanni woyi uddanonsanni bade afa didandiinanni. Qoleno, danqootu ayiddinna jaallansa, insa goddaꞌꞌantannota hoolate kula gibbannoha ikkara dandaanno. Danqoota hasate kaaꞌlitannoti konni woroonni noo assaawe, danqoota ikkitinokkire hansanni wotirano kaaꞌlitara dandiitanno.

7. (a) Gallanni minnara danqoota xaꞌmisiisa dandiinannihu hiittoonniiti? (b) Minu anni huluullamannokki gede assa dandiineemmohu ma garinniiti?

⁷ Danqootu afiinni marraꞌnanni songo woyi gaamo gallanni minnara xaꞌmisiisansa togoo manna afate kaaꞌlitinonsa. Minunni mine hadhinanni soqqantinanni wote, minu anni qachisira, loosannowa, woyi rosu mine afino danqooti heedhuro kulaꞌnera dandaanno. Qoleno mite mite gobbara danqootu noo qachira doogote malaate worranni daafira, coyishiishshinanni manchi hattoo malaatta lainoha ikkara dandaanno. Miteekke hakko manchira danqicha ikkino fiixi heeꞌrasiꞌra dandaanno. Togoo manna mayira hassinoonniro mannu huluullamara dandaannota deꞌinoonte. Ikkollana, faasiiqqine, maartinoonni haja haransitine, hattono, ayirrinyunni noore coyidhinanniha ikkiro, minu anni huluullamannokki gede assa dandiitinanni. Mitootu, minu anni afino danqooti nooronna teꞌee xaꞌmitanno wote, danqootaho qixxeessinoonnita Qullaawu Maxaafita woyi wole dii-vii-dii (DVD) minu annira leellishansa lowonta kaaꞌlitinonsa. Hakkiinnino, Qullaawu Maxaafi giddo kulloonni hexxo danqootu affara hasidhannota minu annira kultanno. Minu anni mashalaqqe kulate huluullamannoha ikkiro, teessoꞌne woyi gambooshsheho koyinsanni woraqata haare, danqoota ikkino fiixisira woyi jaallasira aate maahoyye yaara dandaanno.

8. Danqootu afiinni marraꞌnanni songora multanno songo hasa kaaꞌlitannohu hiittoonniiti?

⁸ Danqootu afiinni marraꞌnanni songo, addi addi afoo coyiꞌranno manni heeꞌranno killile giddo danqoota hasate dirunni mitte woyi lame higge insara multannonsata wolu afiinni marraꞌnanni songo kaaꞌlo xaꞌmira dandiitanno. Danqootu afiinni marraꞌnanni songo simirriitete gambooshshira, danqoota hasate kaaꞌlanno biddishshanna loonse leellinshanni ikkito shiqqanno gede assa dandiitanno. Mitte mittente kaameelunni hadhanno gaamo ledo, ajayi ajeenna danqootu afiinni marraꞌnanni songoha mitto halashshaancho maddawanna hansanni base bade kulannoha killilete kaarta aa hasiissanno.

9. Danqoota gamba yitannowa, boohaartannowa woyi mitore kaaꞌlinanninsawa hasa dandiineemmohu hiittoonniiti?

⁹ Qachu giddo danqootu gamba yitannowa, boohaartannowa woyi mitore kaaꞌlinanninsawa haꞌneno hasa dandiinanni. Halashshaano hansanni basera gabbaꞌꞌanno garinni uddiꞌra hasiissannonsa. Hattoo basera noo manna mitteenni hasaawisantenni, hayyotenni mittu woyi lamu ledo calla hasaawa woyyitanno. Hasaawinsoommo manchira hasatto noosiha ikkiro, teessosi xaꞌme adhanna ninke teessono aa dandiineemmo.

10. Daddalu qooxeessira manna hasa dandiinannihu hiittoonniiti?

¹⁰ Wole doogo kayinni, qooxeessaho noota daddalu base leellishanno kaarta qixxeessine, injiitanno yanna doorre hakkira haꞌne hasate. Nadaaje hirrannita haammata base mittu kaarti aana kayisa dandiinanni. Uduunne hayishshitanno maashine noo minna, sagalete minna, hotella, woyi daddalu suuqqa, wolu killilete kaarti aana kayisa dandiinanni. Mitte mittente killilera mittu daniti daddalu minna nooha ikkiro, halashshaano mittu garinni hasaawisse, togoo basera soqqamate kaaꞌlitannonsa temokkironna roso afiꞌra dandiitanno. Lawishshaho, hotella dambanyootinsa giddo mitu danqoota ikkitara dandiitanno daafira, hoteelete giddo waannu loosiisaanchira danqoota kaaꞌla hasiꞌneemmota haransine kulle, balanxe qixxeessinoommota mitte dii-vii-diinna gambooshsheho koyinsanni woraqata, hoteele dagganno danqootira aanno gede isiwa wora dandiineemmo. Mite mite loosu basera danqicha ikkino loosaasinchi woyi dambanyi nooronna teꞌee xaꞌma dandiineemmo. Qooxeessaho danqootu rosi mini nooro, gama dii-vii-dii maxaaffate mine wortannonke gede xaꞌma dandiineemmo.

11. Hasate loosi hasiisannoho soqqanshonke kifileeti yineemmohu mayiraati?

¹¹ Lowo Geeshsha Hasiisanno Loosooti: Ati coyiꞌratto afoo coyiꞌranno manna hasa daafursitannota ikkitara dandiitanno. Qoleno, mittu qachira heeꞌranno manni mule mule haꞌranni higannoha ikkiro, hansoonnikki killile badate qarrisanno. Ikkollana, hansanni killile halaꞌlitanni hadhino qooxeessira manna hasa soqqanshonke kifileeti. Konne looso loonsammora hajajinonke Magani Yihowa godowa dihosannoho. (Soq. Los. 10:34) Isi “fajjo baalunku gari manni gatanno gede, hattono halaalunnita gara ikkitino egenno afiꞌranno gedeeti.” (1 Xim. 2:3, 4) Konni daafira, Yihowanna roduuwinke ledo buusamme, ‘faayyanna dancha wodana’ afiꞌrino manna diinaggaambe hanso.—Luq. 8:15.

[Qoola 5 noo saaxine]

Mimmitoꞌne Kaaꞌle

Wolu afiinni marraꞌnanni songo woyi gaamo, hakko afoo coyiꞌranno manna hasate kaaꞌlo hasidhuro, soqqanshote aliidi laꞌꞌaanchi insara multannote wolu afiinni marraꞌnanni songo cimeeyye hasaawisa dandaanno. Togoo kaaꞌlo xaꞌmiꞌnannihu muli songo woyi songoꞌne marraꞌnanni afoo coyiꞌrannohu lowo manni noo songo ikkituro callaati. Kaaꞌlate maahoyye yitanno songo, halashshaanonsa hakko qaale coyiꞌranno manna affuro, teessonsa borreessite, soqqanshote aliidi laꞌꞌaanchira uyitanno gede kula dandiitanno; isi qole tenne teesso kaaꞌlo xaꞌmidhu songora woyi gaamora aanno. Lamente songori soqqanshote aliidi laꞌꞌaano, addi addi qaale coyiꞌranno manni heeꞌranno qooxeessira soqqamate kaaꞌlitannota mite mite doogga hassanno; hattono hasatto noonsare hakko manni afiinni marraꞌnanni songo woyi gaamo ledo xaadanno gede assitanno.

Halashshaano wole afoo coyiꞌrannoha hasatto noosi mancho (woyi danqicha) affuro mulenni, Ballo Faana Gantine Kaaꞌlesi (S-43) yinanni forme wonshite songote borreessaanchira uyitanno. Hatto assa hasatto noosi manchi mulenni ayyaanaame kaaꞌlo afiꞌranno gede assitanno.—km 5/11 Qoola 3 lai.

[Qoola 6 noo saaxine]

Songoꞌne Woyi Gaamoꞌne Marraꞌnanni Afoo Coyiꞌranno Manna Hasa Dandiitinannihu Hiittoonniiti?

• Qullaawa Maxaafa xiinxallissinannire, maatensa, ledoꞌne loosanno manna, woyi wole manna xaꞌme.

• Hakko afiira egennantino suꞌmubba afate, silkete kiiro amadino woraqata horoonsidhe. Interneetete aana woyi silkete mine, suꞌma teessonte ledo amadinohu silkete woraqati heeꞌrara dandaanno.

• Baalunku manni horoonsiꞌranno basera, lawishshaho, maxaaffate mine, masirabeetahonna kolleejete hayyotenni xaꞌmisiisa dandiinanni.

• Baara widi afoo coyiꞌranno manni, mannaho qixxeessino qixxaawo nooronna teꞌee afate gaazeexu aana buuxxe.

• Baara widi afoo coyiꞌranno mannira hasiisannore shiqishshanno suuqqanna daddalu dirijjitta shiqqine xaꞌme.

• Halaafoota faqqadisiisidhine, duucha wote hakko afoo coyiꞌranno manni heeꞌrannowa, yaano daddalu basera, yuniversitete, woyi kaameelu tara borro worranni base biddi asse.

• Gobbaꞌne higge faqqaddannoha ikkiro, dagoomu horoonsiꞌranno base afate kaaꞌlitannota kompiyuterete pirogiraame woyi silkete woraqata hidhe.

[Qoola 7 noo saaxine]

Hansanni Wote Mayyaa Dandiinanni?

Manna huluullamannokki gede assate, faasiinqe coyishiishanna hajonke xawinse kula hasiissannonke. Songoꞌne marraꞌnanni afiinni qixxeessinoonni borro umonni leellisha roore wote danchate.

Keere haadhinihu gedensaanni togo yaa dandiitinanni: “Qullaawu Maxaafi giddo noo hexxore kullammonsara ______ afiinni coyiꞌranno manna hansanni heeꞌnoommo. Ati afoottohu no?”

Danqoota hansanni wote kayinni, togo yaa dandiinanni: “Keereho. Konnericho leellinshohenni? [Kiꞌnewa rosaminoha ikkiro, viidiyo leellishanno uduunnicho horoonsidhine Qullaawa Borrota Haaro Alame Tiro dii-vii-dii giddonni mitte xiqise leellishshe.] Tini, Ameerikunnihu danqootu afiinni qixxeessinoonnite Qullaawu Maxaafi xiqiseeti. Qoleno, danqootu mittore kaffaltukkinni ayyaanaamo roso rossanno gede insa kaaꞌlate qixxeessinoommoti Qullaawu Maxaafi viidiyono agurranna wole haammata viidiyo noonke. Ati afoottohu danqichu woyi danqootu afiinni coyiꞌrannohu macca dunkino manni nooni hige?” Minu anni afinohu qulli yaannosi manni nookkiha ikkiro, miteekke danqoota afinowi, yaano rosu mine, loosu basera, woyi qachinsara afinoha ikkara dandaannota xawise xaꞌma danchate.