KIRISTAANU HEESHSHORA
Addi Addi Afoo Coyiꞌnanni Qooxeessira Mitteenni Sabbaka
Mannu roore woyite Maganu Mangiste sokka macciishsha baxannohu dadhino afiinni hasaawinsirooti. Phenxeqosxete barra 33 M.D. gobba baalatenni dayinohu Magano waajjannohu Yihudu manni duuchu manni coyiꞌrannoha yaano Ibiraawootu woy Giriikete Afoo coyiꞌra dandaannoha ikkirono, Yihowa kuni manni dancha duduwo dadhino afiinni macciishshanno gede assinohu isera ikkara dandaanno. (Soq 2:5, 8) Xaa yannara addi addi afoo coyiꞌnanni qooxeessira mittu qachi giddo heedhanno roduuwi gambooshshe assidhannohu addi addi afiinni ikkara dandaanno. Togoo qooxeessira soqqantanno halashshaano minunni mine hadhe soqqantanno woyite, hoode hoodete marreenna qaete anni caaccaawannokki gede sumuu yite soqqama dandiitannohu hiittoonniiti?
Amaalama (La 15:22): Soqqanshote aliidi laꞌꞌaano amaalantenna hasaabbe dancha duduwo injaanno garinni farciꞌnanni gede assa hasiissannonsa. Wole afoo coyidhanno songo soqqanshote qoqqowinsa shiima ikkiro insa afiinni coyiꞌranno manni mine agurtine saꞌinara hasidhannoha ikkara dandaanno. Ikkollana, insa afoo coyiꞌranno manni qooxeessaho lowohanna sae sae xeertiꞌre noo daafira soqqanshote qoqqowonsa loosse guda hoogguro, insa afoo coyiꞌranno manna hasaawissinaranna hasatto noosi mancho kayinni insara kultinansara hasidhara dandiitanno. (od-AM 93 guf. 37) Woy songoꞌne insa afoo coyiꞌranno manna kultanno gedenna hakku manni insahu soqqanshote qoqqowi wido ikkanno gede assitinara hasidhannoha ikkara dandaanno. (km 7/12 5, saaxine) Mito woyite mitto mine nafa addi addi afoo coyiꞌranno manni heeꞌrara dandaannota deꞌinoonte. Soqqanshote qoqqowo loonse gudate assinanni qixxaawo, gobbate gashshooti manna gawajjannorinni agarate fushshino seeri ledo sumuu yitannota ikka hasiissannose.
Mitteenni loosa (Ef 4:16): Soqqanshote aliidi laꞌꞌaanchi kulanno biddishsha seekkitine haꞌrunse. Xiinxallissinanni heedhinoonni manchi roore coyiꞌra dandaannohu kiꞌne songo horoonsidhannokki afooti? Togoo rosaanchi ayyaanaamittetenni rahe lophannohu isi roore dandaanno afoo coyidhanno songo woy gaamo wido ikkirooti.
Qixxaawa (La 15:28; 16:1): Farciꞌrate martinanni mine noohu qaete anni wole afoo coyiꞌrannoha ikkiro dancha duduwo kulate dandiitinire baala asse. Qooxeessiꞌnera heeꞌrara dandaanno afii hiikkonneetiro balaxxine heddine mobayileꞌne aana hakko afiita Qullaawu Maxaafi tironna viidiyubba dirrisidhine qixxaabbe. Qoleno JW Laanguweeji yinanni appilikeeshiine horoonsidhine mitu afiinni keere haaꞌnanni gara rosa dandiitinanni.