Didandiineemmo Yitine Agurtinoonte—Loosu Batiꞌriꞌnerono Sharramme
1. Mitootaho Qullaawu Maxaafi xiinxallo marraꞌannokki gede guficho ikkannonsari maati?
1 Mitootu loosu batiꞌrannonsa daafira, Qullaawu Maxaafi xiinxallo marraꞌꞌa didandiineemmo yitanno. Qullaawa Maxaafa xiinxallisa yanna adhitannoti anfoonnite. Lawishshaho xiinxallisate qixxaawa, hakkiinnino xiinxallo marraꞌꞌa, hattono rosaano gillete deerrinni iillannonsa fatana qeela dandiitanno gede kaaꞌla yanna adhitanno. Hawaariya Phaawuloosi Teselonqe manni Yihoware rosanno gede kaaꞌlate, lubbosi nafa aate qixxaawinota coyiꞌrino. (1 Tes. 2:7, 8) Ikkina loosu batiꞌrinkerono, Qullaawu Maxaafi xiinxallo marraꞌꞌa dandiineemmohu hiittoonniiti?
2. Yihowara noonke baxilli yannanke ma garinni horoonsiꞌneemmo gede kakkayisannonke?
2 Yihowara Soqqamate Yanna Gaaꞌma Hasiissanno: Magano magansiꞌra yanna adhitanno. Lawishshaho ganyine gambooshshe haꞌra, soqqansho fula, Qullaawa Maxaafa nabbawanna huuccatto assiꞌra yanna adhitanno. Minaanninna minaama, loosu batiꞌrinsarono mitteenni sayisanno yanna hagiirrunni gaaꞌmanno. Ikkina Yihowara noonke baxilli iso magansiꞌrate roorenka hagiirrunni yanna ‘hidhineemmo’ gede diassannonke? (Efe. 5:15-17; 1 Yo. 5:3) Yesuusi yiinte gede, Magano magansiꞌneemmo doogo giddo mitte manna rosaano assate. (Maat. 28:19, 20) Tenne heeshshi gotti assine hedanke, Qullaawu Maxaafi xiinxallo marraꞌꞌate halaafinate adhate kaaꞌlitannonke.
3. Mitiinsannonkehu addi addi coyi heeꞌriro nafa Qullaawu Maxaafi xiinxallo marraꞌꞌa dandiineemmohu hiittoonniiti?
3 Loosu, ordu keere hooga, woyi wolu ayyaanaamittete loosi tennera gaaꞌminoommo yanna garunni horoonsiꞌneemmokki gede assannonkeha ikkiro, ma assa dandiineemmo? Mite mite halashshaano mito wote silke woyi interneete horoonsidhe Qullaawu Maxaafi xiinxallonsa marraꞌanno. Ordu keeri noonsakki halashshaano kayinni, Qullaawa Maxaafa xiinxallitannori mininsara dagganno gede assitanno. Wolootu qolte, mitiiꞌmitanno wote wole halashshaano marraꞌanno gede assitanno.
4. Qullaawu Maxaafi xiinxallo marraꞌꞌa mayi atoote abbitanno?
4 Phaawuloosi yannasinna wolqasi mannaho halaale rosiisate horoonsiꞌre lowo hagiirre afiꞌrino. (Soq. Los. 20:35) Isi Teselonqe mannira daafurino daafuri laalino guma qaaganno wote Yihowa galatannota coyiꞌrino. (1 Tes. 1:2) Loosu batiꞌrinonke yaa agurre Qullaawu Maxaafi xiinxallo marraꞌꞌate halaafinate adhineemmoha ikkiro, soqqanshonkenni albinni roore hagiirraamma ikka dandiineemmo.