“Mannu Baalunku Ledo Salaametenni Heedhe”
1. Hasaawinsoommo manchi hanqanno wote hiittee Qullaawu Maxaafi amaale harunsa hasiissannonke?
1 Yihowa daga salaame baxxanno, qoleno soqqanshonke salaamennire kultannote. (Isa. 52:7) Ikkollana mito wote mannu qaensa marroommo daafira hanqara dandaanno. Togoori tuncu yaannonke wote salaame baꞌannokki gede assate mayi kaaꞌlannonke?—Rom. 12:18.
2. Wodancha hasiissannonkehu mayiraati?
2 Wodancha Heedhoꞌne: Mitu manni hanqannohu halaale taqaawwamanno daafira ikkirono, mitu hanqannohu kayinni kulleemmo sokkanni ikka hoogara dandaanno. Miteekkite marroommo yanna injiitannosikkita ikkitara dandiitanno. Woyi hasaawinsoommo mancho umisi mitiimma caacceessite noosiha ikkara dandaanno. Hanqinohu dancha duduwo kulloommosi daafira ikkiro nafa, togoo tumo qolinohu dogamino daafira ikkara dandaannota qaaga hasiissannonke. (2 Qor. 4:4) Wodancha heedhunkero shaqqillunni coyishiinsheemmosi hattono hanqinohu ninkera ikkinokkihu gede assine adhineemmo.—Law. 19:11.
3. Hasaawinseemmo mancho ayirrinseemmota leellinsheemmohu hiittoonniiti?
3 Manna Ayirrisse: Killilete giddo batinyu manni ammaꞌna hundinni adhe dayinotenna giddonsa rumuxxitinote. (2 Qor. 10:4) Kulleemmo sokka hasidhuro macciishshate woyi giwate qoosso noonsa. Ammaꞌnansa ajinshe coyiꞌra woyi egennotenni insa roorroommohu gede ikkine coyiꞌra horonta dihasiissannonke. Qoleno agurre haꞌneemmo gede kullinkero maahoyye yine haꞌra hasiissannonke.
4. Manna shaqqillunni coyishiishate yaa mayyaate?
4 Shaqqillunni Coyiꞌra: Coyishiinshoommo manchi busha qaale coyiꞌrinkero nafa shaqqillunninna joongillunni coyiꞌra hasiissannonke. (Qol. 4:6; 1 Phe. 2:23) Karaakkaramantenni roore lamunku sumuu yinoommo coye kayinse hasaawate woꞌnaala woyyate. Qoleno taqaawwamanno gede assinosiri maatiro shaqqillunni xaꞌminammora dandiineemmo. Mito wote kayinni coyiꞌra agura hooganke roore hanqanno gede assitara dandiitanno daafira, jammarroommo hasaawa agura woyyitanno.—Law. 9:7; 17:14.
5. Soqqanshonke yannara manna salaame baꞌannokki garinni coyishiishanke maaho kaaꞌlitanno?
5 Salaame baꞌannokki gede sharrammeemmoha ikkiro, hasaawinsoommo manchi coyishiinshoommosi gara dihawanno, tini qolte wolu rodii hasaawisannosi wote macciishshanno gede assitasira dandiitanno. (Rom. 12:20, 21) Halaale taqaawwamate murciꞌre kainoha lawiro nafa, miteekke barrunni mitto barra rodoonke ikkara dandaanno. (Gal. 1:13, 14) Halaale maahoyye yee adhirono adha hoogirono, ninkeneeto qeeꞌlineemmohanna salaame baꞌannokki garinni coyishiinsheemmosiha ikkiro Yihowa ayirranno gede assineemmo, hattono rosonke gaamaarsineemmo.—2 Qor. 6:3.