Wosina Faasiiqqine Haadhe!
1. Dancha gede farciꞌrate kaaꞌlitannonke faro hiitteeti? Mayira?
1 Dirunni mitte hinge ayirrinsannihu Qaagooshshu Ayyaani geeshsha farciꞌrate dancha faro fanannonkeri dino. Tayixe diro, Maganu mannu ooso baxannota wodote kakkalo widoonni leellishinota lame qara doogga rosate Qaagooshshu Ayyaanira daanno manni tonne miliyoone saꞌꞌanno yine hendeemmo. (Yoh. 3:16; 15:13) Kuni manni Yihowa elto widoonni afiꞌrara dandaannoha lowo atootire rosanno. (Isa. 65:21-23) Ikkollana, daanno mannira farciꞌrannohu nigiggire shiqishannoha calla diꞌꞌikkino. Baalanti halashshaano daanno manna faasiiqqe haadhe dancha gede farciꞌra dandiitanno.—Rom. 15:7.
2. Daanno wosina faasiinqe haara dandiineemmohu hiittoonniiti?
2 Pirogiraame jammarta geeshsha sammi yitine ofoltine agarantenni, muleꞌne ofoltinori ledo egennamme. Daanno manni waajje borsaranna maa assinanniro afa hoogara dandaanno. Keere haaꞌne faasiinqe hasaawinseemmonsaha ikkiro kayinni borsannokki gede assinammonsara dandiineemmo. Mittu wosinchi koyishshu woraqati iilleennasi dayinoronna teꞌee afate, gambooshshenke daanna tini umiteronna teꞌee woy songote giddo afino manni nooro xaꞌma dandiitinanni. Muleꞌne ofolle Qullaawa Maxaafanna faarsote maxaafaꞌne ledoꞌne horoonsiꞌranno gede assa dandiitinanni. Injaannoha ikkiro Mangistete Addaraashe haranchunni daaꞌꞌatanno gede assa dandiitinanni. Pirogiraame gooffuhu gedensaanni, mite xaꞌmo heedhusiro dawaro qoltinannisi gede mulisinni muddantine hadhinoonte. Mangistete Addaraashe wole songo horoonsidhanno gede ranke fula hasiissannoha ikkiro, “Gambooshshu hiittooti? Wole wote xaande hasaambummoro ma lawannohe?” yine xaꞌmine qaxaro amande wole barra xaada dandiineemmo. Cimeeyye Qaagooshshu Ayyaana dagginore ayyaanaamittetenni qiiddinore kaaꞌlate diinaggaawa hasiissannonsa.
3. Qaagooshshu Ayyaanira daanno manna wosinimma haarate qixxaawa hasiissannonkehu mayiraati?
3 Wosinimma daannohura lowo mannira ninke Yihowa Farciꞌraasine ayyaanaame gannate giddo heeꞌne afiꞌnoommo hagiirri, salaamenna mittimma insara haarote. (Far. 29:11; Isa. 11:6-9; 65:13, 14) Daanno wosini gambooshshe daye haꞌrihu gedensaanni maa qaagakka? Tennera ninke wosinimma haaꞌneemmonsa gari lowore assanno.