Metseetete Dambanyootaꞌne Qullaawu Maxaafi Xiinxallo Jammarsiisse
1. Yihowa dirijjite lowo dirinni jammarte halashshaano metseetete dambanyoota kalaqidhanno gede jawaachishshanni keeshshitinohu mayiraati?
1 Batinyu manni umonni ninke ledo Qullaawa Maxaafa xiinxalla hasiꞌrannokkiha ikkirono, metseettanke nabbawa baxanno. Konni daafira, Yihowa dirijjite lowo dirinni jammarte halashshaano metseetete dambanyoota kalaqidhanno gede kultanni keeshshitino. Mannootu metseettanke ganyite nabbabbu kiiro, Maganu Qaalira halchonsa lexxitanni hadhanno. (1 Phe. 2:2) Kuri mannooti barrunni mitto barra nabbabbino coyi wodanansa kakkayiseenna, Qullaawa Maxaafa xiinxallate maahoyye yitara dandiitanno.
2. Metseetete dambanyootinke hasatto lossate ma assa dandiineemmo?
2 Halaalu Wixira ‘Waa Hayikkisse’: Metseetete dambanyiꞌnera borro massitine calla higantenni, hasaawa kayissine isi ledo aante kalaqiꞌrate woꞌnaalle. Hatto assaꞌne dambanyiꞌne heeshsho gara, hasattosinna ammanino coyibba huwatate kaaꞌlitannoꞌne; tini qolte wodanchatenni hasaawissinannisi gede assitannoꞌne. (Law. 16:23) Hadhinanni kiiro qixxaabbine hadhe. Dandaamannoha ikkiro, metseetete giddonni mitte assaawenna hatte assaawera worroonni xiqise kayissine haranchunni hasaawisse; konni garinni wodanisi giddo noohura halaalu wixira waa hayikkissinanni. (1 Qor. 3:6) Dambanyiꞌnewa martinoonniha mitto mittonka barra, eltinoonni borro, hattono hasaabbinoonni coyi umonna horoonsidhinoonni xiqisubba borreessitine amadde.
3. Metseetete dambanyootinkewa galagalle mara hasiissannonkehu meekkitaati?
3 Meekki Meekkita Mara Hasiissannonke? Dambanyootinkera haarote fultino metseetta massate aganunni mitte hinge haꞌra hasiissannonketi egennantinote. Ikkollana, heeshshonke gari assi deerrinni hattono manchu hasatto laꞌne aganu giddo haammata hinge marate doodhinammora dandiineemmo. Lawishshaho, metseete massinummohunni mitte woy lame lamala gedensaanni, galagalle marre togo yinammora dandiineemmo: “Tenne abbummohe metseete giddonni mitte assaawe leellishammohera yee techo kawaage dawoommo.” Hatto assanke hakkoye birxicho nabbawate kakkaꞌꞌanno gede assitannosi. Balaxe nabbawe kainoha ikkiro kayinni, hakko birxichi ledo xaado afidhino xaꞌmo xaꞌmine haranchunni hasaawisa dandiineemmo. Woy dambanyinke borronke nabbawa baxannoha ikkiro, hakko aganira ellanni heeꞌnoommo tiraakte, biroshere woy maxaafa massinammosira dandiineemmo.
4. Metseetete dambanyootinke Qullaawu Maxaafi xiinxallo hasidhannotanna teꞌee afate, saꞌne saꞌne ma assa dandiineemmo?
4 Qaete anni xiinxallisie yaaꞌne geeshsha agartinoonte. Kiꞌne umiꞌne hakka qoltine xixxiibbe. Qullaawu Maxaafi xiinxallo dihasiꞌreemmo yiinoha ikkiro nafa, saꞌine saꞌine “Qullaawu Maxaafi Xaꞌmonna Dawaro” yaannoha Agarooshshu Shaera fulanno birxicho leellishshine hasaawa hasiꞌrannotanna teꞌee buuxa dandiitinanni. Miteekkitine minira eꞌinikki xullote xiinxallo jammarsiisa dandiitinanniha ikkanno. Xiinxallo jammarate maahoyye yaa giwiro kayinni, hasattosi lexxitanno gede metseetta massaꞌne agurtinoonte.