Soqqanshonke Isilanchimma Woyyeessiꞌra—Metseetete Dambanyoota Kalaqira

Hasiissannohu Mayiraati?: Lowo manni ninke ledo Qullaawa Maxaafa xiinxalla hasiꞌrannokkiha ikkirono, borronke kayinni nabbawa baxanno. Ninke ledo xiinxalla giwannohu miteekke ammaꞌnonsa soorriꞌra hasiꞌrannokkihura woy xiinxallate yanna diheedhannonke yee hedannohura ikkara dandaanno. Ikkirono, metseettanke ganyite nabbawansa, Maganu Qaalira quqquxantannore ikkitanno gede assitansara dandiitanno. (1 Phe. 2:2) Metseettankera fulino birxichi wodanansa kakkayisara woy heeshshonsa gari soorramara dandaanno. Agurrummokkinni marre haransine hasaawisanke, albinni roore ninke ledo hasaawa baxissannonsa gede, hattono hasattonsanna yaachishannonsa coyi maatiro afate kaaꞌlitannonke. Tini, galte hosse Qullaawu Maxaafi xiinxallo hanaffanno gede assitara dandiitanno.