Tenne Qaagooshshu Ayyaani Wogga Hagiirrunnita Asse!
1. Tenne Qaagooshshu ayyaani woggara hagiirrinke lexxanno gede assannohu mittu coyi maati?
1 Badheessu, Dotteessunna Onkoleessu agannara hagiirriꞌne lexxara hasidhinanni? Tennera kaaꞌlannoꞌneri giddo mitte albinni roore soqqamate; dandaamannoha ikkiro qole kaaꞌlaancho suwisaancho ikkate. Tini hagiirriꞌne lexxanno gede assitannohu hiittoonniiti?
2. Albinni roore soqqamanke hagiirrinke lexxanno gede assitannohu hiittoonniiti?
2 Hagiirriꞌne Lexxanno Gede Assidhe: Yihowa kalaqinonkehu iso magansiꞌnenna adhine ilammoommota ayyaanaamittete hasattonke wonshiꞌne hagiirre afiꞌneemmo gede asseeti. (Mat. 5:3) Qoleno wolootaho uyine hagiirre afiꞌneemmo gede asse kalaqinonke. (Looso 20:35) Soqqanshonke konni lamunku coyira yaano Yihowa magansiꞌratenna manna kaaꞌlate faro fantannonke. Albinni roore soqqama lowo hagiirre afiꞌnanni gede assitanno yee heda garaho. Qoleno roore sabbankummo kiiro soqqanshote roore fullankoommore ikkineemmo. Dandoonke lexxituro worboota ikkineemmo hattono waajja qeellanni haꞌneemmo. Farciꞌratenna Qullaawu Maxaafi xiinxallo jammarsiisate roore faro faꞌnantannonke. Kuni baalu soqqanshonkenni albinni roore hagiidhineemmo gede assannonke.
3. Badheessunna Dotteessu aganna kaaꞌlaancho suwisaancho ikkate maltinote yineemmohu mayiraati?
3 Badheessunna Dotteessu agannara 30 woy 50 saate doodha dandiineemmo daafira kaaꞌlaancho suwisaancho ikkate maltinote. Hakkiinni saeno, Qidaame Badheessa 22nni kayinse Sanyo Dotteessa 14nni Qaagooshshu ayyaana ayirrinsa geeshsha, manna Qaagooshshu ayyaanira koyinseemmohu hagiirsiisanno zamachi noonke. Hatte yannara batinyu roduuwi dandaami deerrinni lowo killile loosse gudate “qote qoteho kaaꞌlante” loossanno daafira, songuwate giddo hagiirru woꞌmanno.—Sof. 3:9.
4. Kaaꞌlaano suwisaano ikka hasiꞌnummoro ma assa hasiissannonke?
4 Xaanni Qixxaabbe: Kageeshsha jammartinoonnikkiha ikkiro, pirogiraameꞌne layiꞌratenna mitto woy lame agana soqqanshoꞌne halashshiꞌrate maa maa biddi assidhinanniro assaawate yanna gaaꞌme. Tennera marro marro higgine huuccatto assidhe. (Yaq. 1:5) Tenne hajo maateꞌneranna songoꞌnera noo roduuwira kulle. (Law. 15:22) Xiwanni qarrisannoꞌneha woy loosu batiꞌrinoꞌneha ikkiro nafa, kiꞌneno kaaꞌlaancho suwisaancho ikkine afiꞌnanni hagiirre afiꞌra dandiitinanni.
5. Tenne Qaagooshshu ayyaani woggara albinni roore soqqamanke maaho kaaꞌlitannonke?
5 Yihowa soqqamaanosi hagiirraamma ikkitara hasiꞌranno. (Far. 32:11) Tenne Qaagooshshu ayyaani woggara soqqanshonke halashshiꞌnummoro, hagiirrinke lexxanno gede assiꞌneemmo hattono iimi Anninke hagiidhanno gede assineemmo.—Law. 23:24; 27:11.