Kiꞌneno Kaaꞌlaano Suwisaano Ikkitine Affinakka?

1. Qaagooshshu ayyaani wogga albinni roore soqqamate danchate yineemmohu mayiraati?

¹ Qaagooshshu ayyaani wogga albinni roore soqqamate dancha yannaati. Tini yanna Yihowa bayiru baxillisinni Beettosi kakkalo asse uyinonketa seekkine assaambeemmote. (Yoh. 3:16) Togo assanke galatu woꞌmannonke gede assitannohura mannaho Yihowarenna Isi mannu oosora assinore kulate lowo hasatto heedhannonke. (Isa. 12:4, 5; Luq. 6:45) Qoleno hatte yannara, egenninoommo mannino ikko killilenkera heeꞌranno manni qaagooshshu ayyaanira ninke ledo gamba yaanno gede koyinseemmohu baxxino zamachi heeꞌrannonke. Hakkiinnino, qaagooshshu ayyaanira dayino manni hasatto lexxitanno gede kaaꞌlate sharrammeemmo. Badheessu, Dotteessu woyi Onkoleessu aganira kaaꞌlaano suwisaano ikkitine albinni roore soqqama dandiitinakka?

2. Badheessu agani kaaꞌlaancho suwisaancho ikkate roore injaannohu mayiraati?

² Badheessu Agana Baxxinoha Asse: Badheessu agani kaaꞌlaancho suwisaancho ikkate roore injaanno gede assannohu baxxino coyi no. Hakko aganira kaaꞌlaano suwisaano ikkitannori 30 woyi 50 saate soqqamate doodha dandiitanno. Woradu aliidi laꞌꞌaanchi songo hakko aganira towaatannoha ikkiro, kaaꞌlaano suwisaano woꞌma yanna suwisaanonna baxxitino suwisaano ledo heeꞌranno gambooshshe gudisse beeqqa dandiitanno. Badheessa 17, 2005⁠nni (Badheessa 26, 2013) Maakisanyote barra ayirrinsannihura qaagooshshu ayyaanira manna koyinseemmo zamachi saꞌu dirranni roore yanna keeshshannoho; konne zamacha jammarreemmohu Badheessa 1⁠niiti. Qoleno Badheessu aganira onte qidaamenna ontu sambati no. Konni daafira, kiꞌneno konne agana baxxinoha assate albinni roorsitine soqqama dandiitinannironna teꞌee seekkitine assaabbinanni gede amaalleemmoꞌne.

3. Albinni roore soqqamate iqqide fushshiꞌra dandiineemmohu hiittoonniiti?

³ Iqqide Xaanni Fushshidhe: Tini yanna suwisaancho ikkate maa maa biddi assiꞌra hasiissannoꞌnero assaabbinanni yannaati. Maate mitteenni buusama lowo geeshsha kaaꞌlitanno; konni daafira Maatete Magansiꞌraꞌne yannara maatete deerrinni mixo fushshiꞌratenna pirogiraame biddi assiꞌrate hasaabbe. (Law. 15:22) Kaaꞌlaancho suwisaancho ikka dandaa hoogginiro hexxo mudhitinoonte. Soqqansho fultinanni wote seeda yanna soqqamate pirogiraameꞌne biddi assiꞌra dandiitinakka? Saammintete giddo bashshoonku fultinanni barra agurranna wole barra leddine soqqansho fula dandiitinakka?

4. Badheessu, Dotteessunna Onkoleessu aganira albinni roore soqqamankenni mayi atoote afiꞌneemmo?

⁴ Badheessu, Dotteessunna Onkoleessu aganira albinni roore Yihowara soqqamankenna wolootaho aanke lowo hagiirre afiꞌneemmo gede assitannonke. (Yoh. 4:34; Looso 20:35) Uminke xiqime kakkalo assate sharramanke roorenkanni Yihowa hagiirsiissanno.—Law. 27:11.