Daggannoti Qaagooshshu Ayyaani Wogga Galatu Noonketa Leellishate Faro Fantannonke

1. Qaagooshshu Ayyaani maa assate faro fanannonke?

¹ Dotteessa 14nni ayirrinseemmohu Qaagooshshu Ayyaani Yihowa danchummasinni assinonkerira galatu noonketa leellishate dancha faro fanannonke. Luqaasi 17:11-18 aana noo xagge galatu noonketa leellishate assineemmore Yihowanna Yesuusi lowonta kaffi assite laꞌannota leellishshanno. Dhiigu xibbinni hurturi tonnu mannooti giddo wirri yee hige galatinohu mitto callaho. Wodote qixxaawo albillitte xibbu baalunkunni woꞌmunni woꞌma hurreemmo gede assiteenna, hegerera heeꞌrate hexxonke woꞌmitanno! Hakkawote, Yihowa uyinonkete tenne dhaggete eltora iso barru baala galaxxineemmoti dihuluullissannote. Ikkina Qaagooshshu Ayyaana ayirrinsanni woggara galata leellisha dandiineemmohu hiittoonniiti?

2. Wodote qixxaawo albinni roore kaffi assine laꞌꞌate maa assa hasiissannonke?

² Galatiꞌne Lexxanno Gede Assidhe: Mittu manchi galatate kakkaꞌꞌannohu assinoonnisire hedannoha ikkirooti. Wodote qixxaawora noonke galati lexxanno gede ninke kaaꞌlate, Qaagooshshu Ayyaani woggara nabbambannita Qullaawu Maxaafi niwaawe pirogiraame addi addi borrora, lawishshaho buunxoonnite Haaro Alame Tirora (Ingilizete Afoo) noohura guwuursha B12, Ammajje 1, 2011 Agarooshshu Shaera qoola 22-23; kalaanderetenna Qullaawu Maxaafire Barru Barrunku Hasaawa yinanni buukileetera worroonni. Tenne pirogiraame maate mitteenni gamba yitine horoonsidhe. Tenne assanke, wodote kakkalo albinni roore kaffi assine laꞌneemmo gede assitannonke. Tini qolte amanyootinke roore seyanno gede assitanno.—2 Qor. 5:14, 15; 1 Yoh. 4:11.

3. Qaagooshshu ayyaani woggara, galatu noonketa leellisha dandiineemmo doogga hiikkuriiti?

³ Galatu Nooꞌneta Leellishshe: Galata loosunni leellisha hasiissanno. (Qol. 3:15) Dhiigu dhibbinni huri manchi Yesuusa hase mare galatino. Qoleno isi maalaletenni hurino gara wolootaho dhagge assiꞌre kulinoti dihuluullissannote. (Luq. 6:45) Ninkeno wodote kakkalora noonke galati Qaagooshshu Ayyaani zamachi yannara manna diinaggaambe koyinseemmo gede diassannonke? Galatu noonketa leellinsheemmoti wole doogo Qaagooshshu Ayyaani woggara kaaꞌlaancho suwisaancho ikkate woy albinni roorsine soqqamate. Qoleno tenne qixxaawo wodaninkenni kaffi assine laꞌneemmoha ikkiro, Qaagooshshu Ayyaana ayirrinsanni hawarro daanno manna faasiinqe haaꞌneemmo; hattono xaꞌmonsara dawaro qolate insawa shinqeemmo.

4. Daannohu Qaagooshshu Ayyaani sae kaeenna gaabbineemmokki gede ma assa hasiissannonke?

⁴ Tayixe ayirrinseemmohu Qaagooshshu Ayyaani jeefonnihokka? (1 Qor. 11:26) Tennera anfoommori dino. Tini baxxitino yanna mitte higge dagge saꞌuro layinkimeeshsho afiꞌneemmokkita kayinni anfoommo. Ikkina tini yanna saꞌe baꞌannoꞌnekki gede seekkitine horoonsidhinanni? Afiinkenni fultannoti galatu qaallanna wodaninkenni hiincineemmo coyi, shaqqillunni wodote kakkalo qixxeessino Magano Yihowa hagiirsiisannoha ikko.—Far. 19:14.