Woxawaajje Aganira Baxxitinoti Soqqanshote Millimmo Heedhanno!

1. Maganu Mangiste xintantunku 100^ki diri woꞌmara gambisinote tenne yannara hiikku baxxino zamachi qixxaawino?

¹ Maganu Mangiste xintantunku 100^ki diri woꞌmara gambisinote tenne yannara, Yihowa kaffi kaffi assate baxxino zamacha qixxeessa maltinote! Woxawaajje aganira alamete deerrinni, Huluullitannonke Xaꞌmuwara Dawaro Afiꞌra Dandiineemmohu Hiikkiinniiti? yitannota haaro tiraakte tuqinseemmo. Tini tiraakte mannu xaꞌmuwansara dawaro Qullaawu Maxaafi giddonni hasiꞌranno gede kultanno, hattono jw.org kaaꞌlitannonsa gara xawissanno.

2. Woxawaajje aganira ‘Yihowara shooshshine shiqinshanni galatira’ karsama dandiineemmohu hiittoonniiti?

² Yihowa Shooshshine Galata: Halashshaano soqqanshonsa halashshidhanno gede kaaꞌlate, Woxawaajje aganira kaaꞌlaano suwisaano ikka hasidhannorira baxxitino qixxaawo assinoonni. Hakko aganira halashshaano 30 saate soqqante kaaꞌlaano suwisaano ikka dandiitanno. Woxawaajje aganira onte Arbe, onte Qidaamenna ontu Sambati noo daafira, saamminte woꞌma loossanno woy roso rossanno halashshaano kaaꞌlaano suwisaano ikka dandiitannoha ikkanno. Ayyanaamittetenni lophanni noohu Qullaawu Maxaafi rosaanchi woy halashshaancho ikka hasiꞌranno qaaqqi nooꞌneha ikkiro, cimeeyyete bisi qineessaanchira yannante kulle. Togoori halashshaano ikkite konni baxxino aganira ledonke soqqanturo lowo geeshsha jawaattanno! Batinye woꞌma yanna suwisaano dirunni soqqantanno saatensa wonshidhe Woxawaajje aganira fooliishshidhannoha ikkirono, konne baxxino zamacha woꞌmunni woꞌma beeqqitanno gede pirogiraamensa biddi assiꞌra dandiitannoha ikkanno. Maate Woxawaajje aganira Yihowa daga iso ‘shooshshite galattanno’ wote karsama dandiitanno gara xaanni hasaabburo woyyate.—Izi. 3:11; Law. 15:22.

3. Daannohu baxxino zamachi hiittooha ikkanno yine hexxineemmo?

³ Konni albaanni togoo zamacha fulle egenninoommoha ikkirono, kuni zamachi kayinni hambannikkiha ikkanno yine hexxineemmo. Woxawaajje aganira soqqanshote saate, halashshaanote kiironna kaaꞌlaano suwisaano kiiro albinni roore luphi yitakka? Yihowa dagasi 2014nnihu soqqanshote diri jeefora alamete deerrinni assitanno millimmo maassiꞌraranna Woxawaajje agani baxxinoha soqqanshote agana ikkara halchineemmo!—Mat. 24:14.