jw.org Yinanni Webisayitenke Soqqanshote Horoonsidhe

Webisayitenke danchu duduwi “uullate qacce geeshsha” iillanno gede assate kaaꞌlannonkeho dancha uduunnichooti. (Looso 1:8) Kayinni rooru manni jw.org yinanni webisayitenke kula hoongummoro uminsanni afa didandaanno. Kuni manni webisayitenke afannohu mittu halashshaanchi leellishinsahu gedensaanniiti.

Mittu songuwa towaatannohu aliidi laꞌꞌaanchi Qullaawa Maxaafa Xiinxalla Hasiissannohu Mayiraati? yinanni viidiyo silkesira dirrisiꞌre, faro afiꞌri kiiro mannaho leellishanno. Lawishshaho, minunni mine haꞌre sabbakanno wote togo yaanno: “Techo olliinke manni lowo geeshsha hasiissannote sase xaꞌmuwara dawaro afiꞌranno gara haranse leellishanni noommo: Alamete aana qarru batiꞌrinohu mayiraati? Maganu konne qarra hoolannohu hiittoonniiti? Hakka geeshsha qarra cincine heeꞌra dandiineemmohu hiittoonniiti? Tini harancho viidiyo kuri xaꞌmuwara dawaro afiꞌnanni gara kultanno.” Hakkiinnino viidiyo fane leellishanni qaete anni baxinotanna teꞌee laꞌꞌanno. Tini viidiyo baxissannota ikkitino daafira rooru manni viidiyo gooffa geeshsha ille aaninni hoolikkinni laꞌꞌanno. Hakkiinni aanche kuni songuwa towaatannohu aliidi laꞌꞌaanchi togo yaanno: “Xa macciishshittonte gede Qullaawa Maxaafa xiinxallinsannihe gede interneetete widoonni xaꞌmiꞌra dandaatto. Ani koye noommo daafira Qullaawa Maxaafa xiinxalla dandiinanni gara haranse leellisheemmohe.” Qaete anni maahoyye yiiro Dancha Duduwo yinanni biroshere horoonsiꞌre Qullaawa Maxaafa xiinxallinanni gara leellishanno. Qaete anni muddamannoha ikkiro, galagale maranno wote leellishannosi gede dinye amadanno. Fooliishshiꞌrara shaete minira eiro, mulesi ofollino manchira baadire kayise hasaawino widoonni qole wonaasi gede assanno. Kiꞌneno jw.org soqqanshote horoonsidhinanni heedhinoonni?