Soqqanshonke Isilanchimma Woyyeessiꞌra—Mannaho Assaambeemmota Leellisha

Hasiissannohu Mayiraati? Yesuusi uullate aana noo waro mittu mittunku manchi heeshsho gara seekke hedanno; hattono baxannonsa daafira mittu mittunku manchira gilletenni assaawannota leellishanno. Lawishshaho, mitto danqicha mancho hursi yannara, callichosi mannu nookkiwa masse hursinosi; tenne assinohu kuni manchi saalfataawinota afino daafira ikkara dandaanno. (Marq. 7:31-35) Isi rosaanositi wodanchate dandoo mageeshshitero afino; konni daafira wodancha dandiitanno geeshshire calla kulensa assaawannonsata leellishino. (Yoh. 16:12) Yesuusi iimira haꞌri gedensaanni nafa mannaho annu annu deerrinni assaawannota leellishanno. (2 Xim. 4:17) Yesuusi harunsaano ikkinoommo daafira ninkeno isi lawishsha harunsa hasiissannonke. (1 Phe. 2:21; 1 Yoh. 3:16, 18) Qoleno, soqqanshonkenni guma afiꞌra dandiineemmohu hasaawinseemmo manchira assaambeemmota leellinsheemmoha yaano noo gara, hasattosinna huluulle dhiwannosi coye wodanchate woꞌnaalleemmoha ikkirooti. Hasaawinseemmo manchi yineemmore macciishshara dandaannohu, qaesi marroommohu mitte sokka kulate woy borro aate calla ikkikkinni roorenkanni isira assaambeemmosita afirooti.