Soqqanshonke Isilanchimma Woyyeessiꞌra—Hasatto Noonsare Borreesse Amada
“Umikkinna rosiisatto rosi aana illachishi.” (1 Xim. 4:16) Hawaariya Phaawuloosi qullaawu ayyaani marraeennasi Ximootewosira uyinoti tini amaale, haaruuddeno ikkino keeshshinoommori, ayyaanaamittetenni lophinanni haꞌra hasiissannonketa leellishshannote. Tennera kaaꞌlannonkehu “Soqqanshonke Isilanchimma Woyyeessiꞌra” yaannohu haaru birxichi Maganu Mangiste Soqqanshonkera aante aantete fulanno. Mittu mittunku birxichira soqqanshote kaaꞌlitannonketi mitte ogimma fultanno; qoleno tenne ogimma lossiꞌra dandiineemmo gara kultanno assaawe shiqqanno. Mittu mittunku agani giddo, hakko aganira fultino ogimma aana roore illachisha hasiissannonke. Aganu goofanno wote, tenne ogimma aana illachishanke kaaꞌlitinonkehu hiittoonniitiro coyiꞌrate faro fantannonke kifile Soqqanshote Gambooshshira shiqqanno. Konni aganira hasatto noonsare borreesse amadate aana illachinsheemmo.
Hasiissannohu Mayiraati?: Uyinoonninke looso umo fushshate, sabbakano agurranna wolereno assa hasiissannonke. Hasatto noonsare wirro marre hasaawinsenna rosiinse, winxoommohu halaalu wixira waa hayikkisa hasiissannonke. (Mat. 28:19, 20; 1 Qor. 3:6-9) Tenne assate hakko manchinni galagale xaada, xiwinosi coye hasaawisanna alba hasaamboommo coyi aanaanni lende hasaawa hasiissannonke. Konni daafira hasatto noonsare anfummoro borreesse amada hasiissannonke.
Tenne Assa Dandiinanni Gara:
• Hasatto noonsare borreesse amadate kaaꞌlanno uduunne soqqanshote borsiꞌnera wodha deꞌinoonte. Qaagiishshu woraqatiꞌne beco bainokkihanna muli yanna mashalaqqe amadinoha ikkanno gede assidhe. Hasaawissine kaꞌinanni heedhinenni mashalaqqe borreesse.
• Hasaawissinoonni manchire borreessitine amadde. Suꞌmasinna teessosi, lawishshaho silkesi kiironna imeelesi borreessitine amadde. Hasaawissinoonni manchirenna maatesire kulannohu baxxino coyi no?
• Hasaabbinoonni coyibba borreessitine amadde. Hiitte xiqise nabbabbinoonni? Ammaꞌnosi daafira kulinoꞌneri no? Hiittee borro uyitinoonnisi? Hasaawissinoonni barranna yannano borreessitine amadde.
• Tenne dagginanni wote maa assitinara heddinoonniro borreessitine amadde. Tenne xaaddinanni wote mayi daafira hasaawate qaxadhitinoonni? Mamootira qaxadhitinoonni?
• Galagaltine martini kiiro qaagiishshu woraqatiꞌnera haarore leddine borreesse. Lowo mashalaqqe heedhuꞌnero xaqqantanno ikkinnina digoddaassanno.
Konni Aganira Togo Assate Woꞌnaalle:
• Hasatto noonsa manna borreessitine amaddinanni wote, borreessitinanni heedhinoonnire soqqanshote miiliꞌnera kulle.