Hendoonni Alaama Wonshate Kaaꞌlannoha Simirriitete Gambooshshe
1. Simirriitete gambooshshi maaho kaaꞌlannonke?
1 Mitte yannara Yesuusi 70 rosaanosi soqqansho hadhara albaanni insa ledo gambooshshe assiꞌrino. (Luq. 10:1-11) Isi hakko gambooshshiwa, insa callootansa ikkitinokkitanna marraꞌꞌannonsahu “midote loosi Mooticha” Yihowa ikkinota kule jawaachishinonsa. Qoleno looso danchu garinni loosa dandiitanno gede kaaꞌlannonsa biddishsha uyinonsa; hattono “lame lame” asse maddawinonsa. Xaa yannarano soqqansho fullammora albaanni assinanni gambooshshi, ninke jawaachishate, soqqanshote ikkadda ikkineemmo gedenna daraajjaꞌnoommore ikkineemmo gede kaaꞌlannonkeho.
2. Simirriitete gambooshshi yanna mageeshshita ikka hasiissanno?
2 Xaa geeshsha assiꞌnanni heeꞌnoommohu simirriitete gambooshshira, halashshaano maddawate, killile aatenna huuccatto assiꞌrate sayinsanni yanna, 10nni kayise 15 daqiiqi geeshshaati. Konni kawa konni gambooshshira taashshinoonni coyi no. Dotteessu aganinni jammarre simirriitete gambooshshe assiꞌnanni yanna 5 daqiiqinni kayise 7 daqiiqi geeshsha ikkitanno. Simirriitete gambooshshe wolu songote gambooshshi gedensaanni assidhinanni wote, halashshaano Qullaawa Borro roso dancha gede rosse kaꞌino daafira gambooshshu yanna roore haꞌransa hasiissanno. Simirriitete gambooshshi yanna haꞌransa, halashshaanote soqqanshote yannansa lexxitanno gede assitanno. Qoleno suwisaano woy halashshaano soqqansho simirriitete gambooshshira albaanni jammartinoha ikkiro, gambooshsheho yite soqqanshonsa taxxi assitannohu shiima daqiiqa calla ikkanno.
3. Simirriitete gambooshshe halashshaano dancha gede kaaꞌlanno garinni qineessa dandiinannihu hiittoonniiti?
3 Simirriitete gambooshshe halashshaano dancha gede kaaꞌlanno garinni qineessa hasiissanno. Batinye songuwa simirriitete gambooshshe mittowa assantenni halashshaanote mulannowa babbaxxino darga gaamo kalaqe assansa danchate. Tini, halashshaano simirriitete gambooshshiwanna soqqanshote killilensa haꞌra shota ikkitannonsa gede assitanno. Qoleno halashshaano rahe maddawatenna gaamote aliidi laꞌꞌaanno gaamonsa giddo noo halashshaano seekkite towaata shota ikkitannonsa gede assitanno. Cimeeyyete bisi qooxeessaho woyyannori maatiro lae wossana dandaanno. Harancho huuccatto assine gambooshshe jeefinsara albaanni, baalanti halashshaano hiikkonna aye ledo soqqantannoro afa hasiissannonsa.
4. Simirriitete gambooshshe wolu songote gambooshshiwiinni ajinshe laꞌꞌa hasiisannokkihu mayiraati?
4 Wolu Songote Gambooshshiwiinni Ajannokki Gambooshshe: Simirriitete gambooshshe assinannihu soqqansho fultannore kaaꞌlate ikkino daafira, songo daanno baali konne gambooshshe daa hoogara dandaanno. Ikkirono, kuni gambooshshi wolu songote gambooshshiwiinni ajinshe woy kaaꞌlannori nookkihu gede assine laꞌnanniha diꞌꞌikkino. Wolu songote gambooshshinte gede simirriitete gambooshshino, mimmitonke baxillehonna danchu loosira kakkayinseemmo gede Yihowa qixxeessinonke qixxaawooti. (Ibi. 10:24, 25) Konni daafira, gambooshshe marraꞌꞌannohu coyiꞌrannori Yihowa ayirrisannohanna macciishshaano kaaꞌlannoha ikkanno gede seekke qixxaawa hasiissannosi. Soqqansho fultanno halashshaano baalanti dandiitannoha ikkiro konne gambooshshe daate woꞌnaala hasiissannonsa.
Simirriitete gambooshshe kaaꞌlannori nookkihu gede assine woy wolu songote gambooshshiwiinni ajinshe laꞌꞌa dihasiissanno
5. (a) Soqqanshote aliidi laꞌꞌaanchi simirriitete gambooshshe qineessate assannori maati? (b) Meya rodoo simirriitete gambooshshe marraꞌꞌa hasiissannosehu hiittoonniiti?—“Mitte Rodoo Marraꞌꞌa Hasiissannose Wote” yaanno birxicho lai.
5 Simirriitete Gambooshshe Marraꞌꞌanno Rodii Qixxaawanno Gara: Songote gambooshshira kifile noosihura kifilesi dancha gede qixxaawanno gede yannantenni uyinannisi. Simirriitete gambooshshirano hatto assa hasiissanno. Simirriitete gambooshshe gaamotenni assiꞌnanniha ikkiro, gambooshshe marraꞌannori gaamote aliidi laꞌꞌaanooti woy kaaꞌlaanonsaati. Songo simirriitete gambooshshe mitto darga gamba yite assidhanno wote kayinni, soqqanshote aliidi laꞌꞌanchi gambooshshe marraꞌꞌannoha maddawanno. Mite soqqanshote aliidi laꞌꞌano, simirriitete gambooshshe marraꞌannorira baalaho pirogiraame fushshite uyitanno woy egensiishshu saleedira gantanno. Simirriitete gambooshshi baxisannoha ikkannohu marraꞌanno roduuwi dancha gede rosiisatenna maddawate dandoo noonsare ikkiturooti; konni daafira, soqqanshote aliidi laꞌꞌaanchi marraꞌannore maddawanno wote tenne wodancha hasiissannosi. Cimeessu, songote soqqamaanchi woy cuuaminohu ikkadu halashshaanchi hooganno wote, soqqanshote aliidi laꞌꞌanchi cuuantinoti ikkado rodoo marraꞌanno gede maddawa hasiissannosi.—“Mitte Rodoo Marraꞌꞌa Hasiissannose Wote” yaanno birxicho lai.
6. Simirriitete gambooshshe marraꞌꞌanno rodii seekke qixxaawasi danchate yineemmohu mayiraati?
6 Tiokiraasennihu Soqqanshote Rosi Mine woy Soqqanshote Gambooshshira kifile uyinanninke wote seekkine qixxaambeemmo. Ninke giddo uyinoonnisi kifile gambooshshe haꞌranni doogo qixxaaweemmona yee qixxaawikkinni keeshshannohu nookkiti egennantinote. Simirriitete gambooshshe marraꞌara maddambanni roduuwino halaafinatensa hakko garinni laꞌꞌa hasiissannonsa. Simirriitete gambooshshi yanna ajinshoonni daafira, gambooshshu jawaachishannoha ikkannonna yannate goofanno gede dancha gede qixxaawa roorenka hasiissanno. Dancha gede qixxaawate balanxe killileno qixxeessa hasiissanno.
7. Simirriitete gambooshshe marraꞌꞌanno rodii hasaawisa dandaanno naxibba giddo gama hiikkuriiti?—Saaxine lai.
7 Hasaambanni Naxibba: Hasaawaho doorranni birxichi killilete garinni babbaxxanno daafira, ammanaminohunna wodanaamu borojjichi simirriitete gambooshshira fushshaato diqixxeessino. “Simirriitete Gambooshshiwa Hasaawa Dandiinanni Naxibba” yitanno saaxine giddo mite mite assaawe qummi assinoonni. Roore wote konne gambooshshe marraꞌnannihu hasaawunniiti. Mito wote, dancha gede qixxaamboonnita loonse leellinshanni ikkito shiqisha woy jw.org. aaninni soqqanshote kaaꞌlitanno viidiyo leellisha dandiinanni. Simirriitete gambooshshe marraꞌꞌanno rodii qixxaawanno wote hakko barra soqqansho fultara daggano roduuwa kaaꞌlannorenna jawaachishannore hedanni qixxaawa hasiissannosi.
Simirriitete gambooshshe marraꞌꞌanno rodii qixxaawanno wote, hakko barra gambooshshe daggannore jawaachishannorenna, dancha gede loossanno gede kaaꞌlannonsare heda hasiissannosi
8. Simirriitete gambooshshe Qidaamenna Sambata marraꞌanno roduuwi gambooshshu yannara hiittee hajo kayisse hasaabburo roore woyyanno?
8 Lawishshaho, lowo halashshaano Qidaamete barra Agarooshshu Shaenna Baqqi Yiiyye! yinanni metseete eltanno. Qidaamete barra soqqansho fultanno halashshaano giddo rooru saammintete giddo wole barra fulate injaannonsakkireeti; hakko daafira Maatete Magansiꞌransa yannara qixxaabbinoha hasaawu bitima habbara dandiitanno. Konni daafira, gambooshshe marraꞌꞌanno rodii Maganu Mangiste Soqqanshonkera badhiidi qoolira noohu hasaawu bitimi giddonni mitto qaagiissiro dancha ikkanno. Wole doogo qolte, zeenaho macciishshinoonni coye, qooxeessaho ikkinore woy mitu ayyaani daafira kayinse hasaawinse metseete ela dandiinanni garanna metseetta ellihu gedensaanni galagalle marre hasaawisate hiitto assine coye injeessa dandiitannoro kayinse hasaawisate. Simirriitete gambooshshe daggino halashshaano giddo mitu hakko aganira ellanni metseetta ela jammartinoha ikkiro, marraꞌꞌanno rodii insa borro eltino garanna elte afidhinota dancha temokkiro kultanno gede xaꞌma dandaanno. Sambatu barra simirriitete gambooshshe marraꞌꞌanno rodiino hasiꞌrannoha ikkiro hakko aganira ellanni borro lainohunni aleenni kulli gede assa dandaanno. Xiinxallisate horoonsiꞌnanni borruwa yaano Dancha Duduwo, Maganu Yaannore Macciishshi yitanno birosherubbanna Qullaawu Maxaafi Roso yaanno maxaafa woꞌmanka wote ellanni daafira marraꞌꞌanno rodii kuri borro giddo mitto ellanni gara haranse xawisa dandaanno.
9. Songo Qidaamenna Sambata baxxino zamacha assidhanno wote hiitte hajo kayinse hasaawa dandiinanni?
9 Songo Qidaamenna Sambata baxxino zamacha assidhannoha ikkiro, simirriitete gambooshshe marraꞌꞌanno rodii koyishshu woraqati woy tiraaktete ledo muli barri borro ela dandiinanni garanna qaete annira hasatto noosiha ikkiro ma assa dandiinanniro kayise hasaawisa dandaanno. Qoleno togoo zamachira afiꞌnoonni temokkiro kayinse hasaawano dandiinanni.
10, 11. Simirriitete gambooshshi qinaado ikkanno gede halashshaano qixxaawa hasiissannonsahu mayiraati?
10 Halashshaano Qixxaabbanno Gara: Halashshaanono simirriitete gambooshshi qinaado ikkanno gede assa dandiitanno. Wole halashshaanora kultanno coyi heeꞌrannonsa gede soqqanshote balaxxe qixxaawa dandiitanno; tenne assitannohu maatete magansiꞌransa yannara ikkara dandaanno. Dancha gede qixxaawate Simirriitete gambooshshe haꞌnara albaanni ellanni metseettanna borro balanxe songotenni adhine qixxaawa hasiissanno; tini gambooshshu bayicho keeshshinikkinni soqqanshote killile haꞌrate kaaꞌlitanno.
11 Qoleno simirriitete gambooshshi hanafikkinni balanxe iillate qixxaawano hasiissannote. Songote gambooshshi Baalunkura yannantenni haꞌneemmoti egennantino. Ikkollana roorenka simirriitete gambooshshira barrisiꞌneemmoha ikkiro, tini hedo bebbeehantanno gede assitara dandiitanno. Hiittoonni? Marraꞌꞌanno rodii halashshaano maddawara albaanni hedannohu addi addi coyi no. Gambooshshe daggino halashshaano shiima ikkituro, baalanka loonsanna gattino killilera maddawara dandaanno. Mite halashshaano lekkatenni hadhe daafurte dagginoha ikkironna soqqanshote killile xeertidhannoha ikkiro, makeenu noonsa roduuwi ledo maddawara dandaanno. Qoleno killilete jaddo loosanno manni batiꞌrannoha ikkiro, meya roduuwi labballu roduuwi ledo woy mule mule soqqantanno gede assara dandaanno. Dhuku noonsakki halashshaano kayinni taalo doogora woy xeichunna gooddo nookki killilera maddawara dandaanno. Haaruudde halashshaano temokkiro afidhino roduuwi ledo maddawara dandaanno. Mite halashshaano barrisidhe daggannoha ikkiro kayinni marraꞌꞌanno rodii insara yee wona maddawino gara agure xaano haaro ikke biddi assa hasiissannosi. Mito wote barrisiꞌneemmo gede assanno coyi tuncu yaannonketi egennantinote. Barrisiꞌra roso ikkitinonkeha ikkiro kayinni, ninkeneeto togo yine xaꞌma danchate: “Barrisiꞌneemmohu simirriitete gambooshshe naada hoongeetinso balaxe qixxaawa hoongoommohuraati?”
12. Ledoꞌne soqqamannoha duuchanka wote doodhitinanniha ikkiro, hiikkuri coyibba qaaga hasiissannoꞌne?
12 Simirriitete gambooshshe dagganno halashshaano ledonsa soqqamannoha gambooshshu hanafara albaanni doodha dandiitanno woy gambooshshunniwa maddambanninsa. Kayinni duuchanka wote aye ledo fultinanniro doodhitine dagginanniha ikkironna muli jaallaꞌne ledo calla soqqantinanniha ikkiro, wole halashshaano ledo soqqamate ‘wodanaꞌne halashshitine fantinoonni’ yaa dandiinanni? (2 Qor. 6:11-13) Haaro halashshaano rosiisate dandoonsa woyyeessidhanno gede kaaꞌlate mito wote ledonsa soqqama dandiitinanni? (1 Qor. 10:24; 1 Xim. 4:13, 15) Sabbaka jammartinannihu hiikkootiro kullanniꞌne biddishshanna wole baalanka biddishsha seekkitine macciishshe. Gambooshshu goofi gedensaanni haaro ikkitine maddawantinoonte, bayichonkonni soqqanshote killile hadhe.
13. Baalunku halaafinatesi dancha gede wonshannoha ikkiro, simirriitete gambooshshi maaho kaaꞌlannonke?
13 Yesuusi qineesse soyinori 70 harunsaanosi sabbakku gedensaanni “hagiidhitanni higgino.” (Luq. 10:17) Soqqanshonsanni guma afidhanno gede assinohu, sabbakate hadhara albaanni Yesuusi ledo assidhino gambooshshe ikkinoti dihuluullissannote. Xaa yannara assinannihu simirriitete gambooshshino soqqanshonkenni guma afiꞌneemmo gede kaaꞌlannonke. Baalunku halaafinatesi dancha gede wonshannoha ikkiro, simirriitete gambooshshinke “daga baalantera naqaashe ikkanno” gede sabbankammora uyinoonninke halaafinate wonshate jawaantoommore, dancha gede loonseemmorenna daraajjaꞌnoommore ikkineemmo gede kaaꞌlannonke.—Mat. 24:14.