Simirriitete Gaamonni Horo Afiꞌratto Gara
1. Xa simirriitete gaamonke widoonni afiꞌneemmoti, alba Maxaafu Xiinxallo gambooshshiwiinni afiꞌneemmo horo hiikkuriiti?
1 Songonnite Maxaafu Xiinxallora gamba yine afiꞌneemmori giddo mitu qalli assannoꞌne? Hakkawaro baalanti gaamo shiimmaaddatenna kuꞌu koꞌoye borsikki hasaawate roore injiitannote. Tini, mittu qarri nookkiha jaalla kalaqiꞌnanni gede assitino; togoo jaaloomi qole ammanatenni jawaanteemmo gede assannonke. (Law. 18:24) Maxaafu xiinxallohu aliidi laꞌꞌaanchi mitti mittinke heeꞌnoommo gara afe gilletenni jawaachishannonke faro afiꞌranno. (Law. 27:23; 1 Phe. 5:2, 3) Xaano ikkiro tenne baalanta horo simirriitete gaamonke widoonni afiꞌra dandiineemmo.
2. Ammanatenni jawaanteemmo gede kaaꞌlannonke jaaloomi simirriitete gaamonke mereero heeꞌranno gede ninke uminke balanxe maa assa dandiineemmo?
2 Balaxxe Ati Aani: Xaphoomunni laꞌniro, simirriitete gaamo bashshote maxaafu xiinxallo gaamo geeshshite. Roduuwinke ledo “mitteenni” kaaꞌlamme soqqamanke, kuꞌu kuꞌuyira lubbote jaala ikkineemmo gede assitannonke. (Fil. 1:27) Simirriitete gaamoꞌnera noori giddo meu ledo soqqamootto? Tennera albinni roore wodanakki ‘halashshite fana’ dandaatto? (2 Qor. 6:13) Qoleno gaamonke giddo noore saꞌne saꞌne Maatete Magansiꞌra pirogiraamenkera woyi sagalete koyisa dandiineemmo. Mite songora addi additi= simirriitete gaamo sinu biiro riqiwe maranno rodoo tara gaꞌnite wosinsitanno. Mitte gaamora taru iillanno wote, sinu biiro riqiwaanchi sagalete insawa mara dandaa hoogirono hatte gaamo roduuwi mitteenni sagaꞌlatenna mimmito jawaachishate gamba yitanno.
3. Simirriitete gaamonke giddo towaanyo afiꞌneemmoti mite mite faro hiitteeti?
3 Xa songo saammintete giddo lame higge calla gamba yitannoha ikkirono, halashshaanote albinni ajjino towaanyo hasiissannonsa yaa diꞌꞌikkino. Mitte mittente gaamora gaamote aliidi laꞌꞌaanchi shoomaminohu, mitto mittonka rodoo gilletenni jawaachisharanna soqqanshote qajeelsaraati. Ati nootto gaamohu aliidi laꞌꞌaanchi ledokki soqqamate xaa geeshsha qaxaro amadinokkiha ikkiro, ledokki soqqamanno gede xaꞌmiꞌri. Qoleno soqqanshote aliidi laꞌꞌaanchi aganu kiiro mitte Qidaamenna Sambata addi addi gaamo ledo soqqamanno. Boode simirriitete gaamo noo songo giddo soqqanshote aliidi laꞌꞌaanchi mitte mittenta gaamo dirunni lame hige towaatate pirogiraame biddi assa dandaanno. Pirogiraamekki biddi assidhe isi gaamoꞌne towaatanno wote soqqansho fulatto?
4. (a) Simirriitete gambooshshi daraajjaꞌꞌannohu hiittoonniiti? (b) Minenke simirriitete gambooshshira aate heda hasiissannonkehu mayiraati?
4 Mitte mittenti simirriitete gaamo Qidaamenna Sambata addi addinni gamba yaase roore wote horo uyitanno. Simirriitete gambooshshi haammata basera hakkeeshshi geeshsha babbaxxitinokki yannara heeꞌriro, simirriitete gambooshshinna killile noowa haꞌra halashshaanote qallaale ikkitara dandiitanno. Qoleno halashshaano ranke maddawa dandiinanni, halashshaanono keeshshitukki killile noowa haꞌra dandiitanno. Hakkiinni saeno, gaamote aliidi laꞌꞌaanchira gaamosira noore illachishe towaatate injaannosi. Ikkollana, lame woyi hakkuyi ale ikkitanno gaamo xaadisa woyyitanno gede assannori heeꞌrara dandaanno. Aganunnite umi Qidaame barra woyi Agarooshshu Shae Xiinxallo gedensaanni songo soqqanshote mitteenni gamba yitannoha ikkiro, mitte gaamo giddo noori mitteenni ofolla hasiissannonsa; qoleno gaamote aliidi laꞌꞌaano gambooshshe huuccattotenni gundara albaanni gaamonsara noore maddabbanno gede shiima daqiiqa aa hasiissanno.—“Mineꞌne Uyitine Affinanni?” yitanno saaxine lai.
5. Songonniti Maxaafu Xiinxallo xa nookkiha ikkirono, maa afiꞌneemmota dihuluullammeemmo?
5 Songonniti Maxaafu Xiinxallo xa nookkiha ikkirono, Yihowa fajjosi assate hasiisannonkere baalankare xaano aannilla noonke. (Ibi. 13:20, 21) Yihowa towaatanni noonke daafira hoongoommori dino. (Far. 23:1) Simirriitete gaamonke widoonni lowo atoote afiꞌneemmo. Ninke uminke balanxe aanne ‘lowoha wixiꞌneemmoha’ ikkiro, ‘lowoha mixxineemmo.’—2 Qor. 9:6.
[Qoola 6 noo saaxine]
Mineꞌne Uyitine Affinanni?
Mite songo gamba yaate baqete mini hoogino daafira Qidaamenna Sambata duucha gaamo mitteenni gamba yitanno gede assitanno. Simirriitete gambooshshi songo assitanno millimmo widira gaamamanno daafira, minenke togoo gambooshshira aa lowo mabteeti. Kiꞌne mineꞌne uyitine affinakka? Mininke tennera ikkanno gedeeha diꞌꞌikkino yitine agurtinoonte. Songote cimeeyye alba maxaafu xiinxallora bayicho doortu wote assaabbinori gedee coye, lawishshaho miniꞌne noo qacha heeshshi gotti assite assaabbanno. Mineꞌne aate heddinoonniha ikkiro, kiꞌne gaamohu aliidi laꞌꞌaanchira kulle.