Manna Banxeemmota Leellisha Dandiineemmo Gara

Ninke baalunku umi manchi Addaami sircho ikkinoommo daafira, mitte maateeti. Mitte maate miilla mimmito baxxannonna ayirrissanno yine hendanniha ikkirono, xaa yannara togoo baxilli bashile diyiino. Baxannonke Maganinke hasiꞌrannoti tenne diꞌꞌikkitino.

QULLAAWA BORRO BAXILLU DAAFIRA MAYITANNO?

“Manna umiꞌne gede assitine baxxe.”—LEEWAAWOOTA 19:18.

“Baarigaaraꞌne baxxe.”—MAATEWOOSI 5:44.

MANNA BAXATE YAA MAYYAATE?

Maganu Qaalisi giddo 1 Qorontoosi 13:4-7 aana baxillu daafira mayinoro wodanchi:

“Baxillu cincanno; baxillu elanno.”

Hanni tenne hedi: Wolootu cincite saꞌannoheha, shaqqille leellishshannoheha, hattono soꞌro loosittoro hanqitannohekkiha ikkiro mayi macciishshamannohe?

“Baxillu dihinaasanno.”

Hanni tenne hedi: Wolootu quwa saꞌe huluullantannoheha woy dhiibbifattannoheha ikkiro mayi macciishshamannohe?

“Baxillu umisire diroorsiꞌranno.”

Hanni tenne hedi: Wolootu yaattore macciishshitannohanna insa hedo calla maahoyye yite adhatto gede xixxiibbannohekkiha ikkiro dibaxisannohe?

“Baxillu koma dikiiranno.”

Hanni tenne hedi: Maganu loossino cubbira maaro eꞌannore maaranno. Isi “cubbonke marro marro hige dikulanno; hanqino gedeennino diheeꞌranno.” (Faarso 103:9) Koffi assinoommo manchi maarannonke woyite hagiidhineemmo. Hakko daafira ninkeno wolootu koffi assitannonke woyite maara hasiissannonke.—Faarso 86:5.

Baxillu “bunshete coyira dihagiidhanno.”

Hanni tenne hedi: Qarru iillannonke woyite wolootu iillinonke qarrinni hagiidhitannota dibanxeemmo. Hakko daafira, wolootaho qarru iillannonsa woyite wole agurina miiccinonkere ikkituro nafa dihagiidhineemmo.

Maganu atoote afiꞌrate, manna baalanka konni garinni baxa hasiissannonke. Tenne assa dandiineemmoti mitte doogo, kaaꞌlo hasiissannonsare kaaꞌlate.