KIRISTAANU HEESHSHORA
“Phaawuloosi . . . Magano Galati Wodanisino Hagiidhi”
Roomaho heedhanno songo Phaawuloosi daanni noota macciishshitu gedensaanni, roduuwu gamba yite isinni xaadate 64 km geeshsha hadhino. Insa uminsa horo agurte baxille leellishansa Phaawuloosi jawaachishshinohu hiittoonniiti? “Phaawuloosi insa afe Magano galati; wodanisino hagiidhi.” (Soq 28:15) Phaawuloosi towaatanno songuwa jawaachishate egennaminoha ikkirono, hatti yanna usurame noota ikkitino daafira isirano jawaachishannohu hasiisannosite.—2Qo 13:10.
Xaa yannara woradu aliidi laꞌꞌaano roduuwa jawaachishate songotenni songo hadhanno. Baalunku Maganu mannira iillannonte gede, insarano daafuru, yaachishanno coyinna hexxo mudhitano gede assannori iillannonsa woyiti no. Aantanno yannara woradu aliidi laꞌꞌaanchinna minaamasi songoꞌnera soqqantanno woyite, insa kiꞌne, kiꞌneno insa yaano ‘mimmito jawaachishshinanni’ gede maa assa dandiitinanni?—Ro 1:11, 12.
Simirriitete gambooshshe haꞌne kaaꞌlama. Halashshaano towaanyote yannara woꞌma hoꞌro afiꞌrate dandiiture baala assitanno woyite woradu aliidi laꞌꞌaanchi hagiidhanno. (1Te 1:2, 3; 2:20) Isi towaatanno yannara kaaꞌlaancho suwisaancho ikkate woꞌnaalle. Isi ledo woy minaamasi ledo soqqamate woy Qullaawu Maxaafi rosaanoꞌne xiinxallisate borreessantinanni? Insa addi addi halashshaano ledo soqqama, hattono haaruuddu woy soqqanshote gari woꞌnaalshi noonsakki halashshaano ledo soqqama hagiirsiissannonsa.
Wosinimma adha. Galtanno bayicho qixxeessa woy sagalete koyisa dandiitinanni? Hatto assaꞌne woradu aliidi laꞌꞌaanchonna minaamasi baxxinannita leellishshanno. Insa duuchare qixxeessitinanni mitiiꞌmitinara dihasidhanno.—Lu 10:38-42.
Isi yaannore macciishshanna kulino biddishshanna amaale loosunni leellisha. Woradu aliidi laꞌꞌaanchi Yihowara soqqammeemmo gara woyyeessiꞌneemmohu hiittoonniitiro anfeemmo gede baxillunni kaaꞌlannonke. Mito woyite kaajjishe amaalankera dandaanno. (1Qo 5:1-5) Hatte amaalera hajajamme maahoyye yineemmo woyite hagiidhanno.—Ib 13:17.
Naaddinannita kulle. Insa kiꞌne kaaꞌlate assitannorinni horo afidhinoonnihu hiittoonniitiro woradu aliidi laꞌꞌaanchiranna minaamasira kullensa. Afuunni kultine woy sokka borreessitinenna kaarde uyitine tenne assa dandiitinanni.—Qo 3:15.