Qaagooshshu Ayyaanira Qixxaabbinanni Heedhinoonni?

Yesuusi jeefote ayirrisinohu Faasiku Ayyaani hambannikkiho. Isi mulenni reyanno daafira Faasiku Ayyaanira soqqamaasinesi ledo itatenna dirunni mitte hinge ayirrinsanniha haaro ayyaana yaano Mootichu Hurbaate xintate hedino. Hakko daafira isi bayicho qixxeessitanno gede Pheexiroosinna Yohaannisi soyino. (Lu 22:7-13; aaniidi qoolira noo misile lai.) Tini Badheessa 27nni ayirrinsannihu Qaagooshshu Ayyaanira qixxaawa hasiissannonketa qaagiissitannonke. Songuwa lallawo shiqishannoha, timanna woyine, hattono wolere kuri lawinore qixxeessitanno. Ikkina ninke mittu mittunku Qaagooshshu Ayyaanira qixxaawate maa assa dandiineemmo?

Wodanaꞌne qixxeessidhe. Qaagooshshu Ayyaanita Qullaawu Maxaafi niwaawe nabbabbe hattono hiince. Tenne leellishshanno pirogiraame Qullaawu Maxaafire Barru Barrunku Hasaawa yitanno buukileete aana afiꞌra dandiitinanni. Maganu Qaale Xiinxalli yitanno biroshere gafa 16te ledote xawishshi no. (Qoleno Dotteessa 2020 Kiristaanu Heeshshonna Soqqanshota Xiinxallote Maxaaficho lai.) Maatete miilla wodo hasiissannohu mayiraatiro maatete magansiꞌransa yannara hasaawate kaaꞌlitanno mashalaqqe afiꞌrate Agarooshshu Shae Borro Indekse woy Yihowa Farciꞌraasineta Xiinxallote Kaaꞌlitanno Borro laꞌꞌa dandiitanno.

Qaagooshshu Ayyaanira Manna Koyisse. Zamachunni manna koyisate dandiitinire baala asse. Ayeoo koyisa dandiitinanniro hedde; lawishshaho galagaltine martine hasaawissinanni manna, alba Qullaawa Maxaafa xiinxallitanni heedhe agurtinore, egentinoonni mannanna fiixaꞌne koyisa dandiitinanni. Songote cimeeyye ayyaanaamittetenni qiiddinore koyisa hasiissannonsa. Affinoonni manchi wolu qooxeessira heeꞌrannoha ikkiro, jw.org aana NINKE DAAFIRA yaannoha fantine, “Qaagooshshu Ayyaana” yaannohu hunda isi heeꞌranno qooxeessira Qaagooshshu Ayyaani gambooshshe assinanni bayichonna yanna afa dandiitinannita deꞌinoonte.

Qixxaawate wolere maa assa dandiineemmo?