Hegerera Hagiidhitanni Heeꞌra Dandaatto! Yitanno Borro Soqqanshote Horoonsidhe

Mannaho Qullaawa Maxaafa xiinxallinseemmota haaro birosherenna haaro maxaafa afiꞌnoommo daafira lowo geeshsha tashshi yiinonke! Yihowa lowo manna rosaano assate assineemmore maassiꞌrannonke gede huuccatto assineemmo. (Mt 28:18-20; 1Qo 3:6-9) Tenne haaro borro ma garinni horoonsiꞌra dandiineemmo?

Hegerera Hagiidhitanni Heeꞌra Dandaatto! yitanno borro horoonsiꞌne xiinxallinseemmohu alba ronsoommo garinni ikkikkinni baxxino garinniiti; hakko daafira mannaho Qullaawa Maxaafa xiinxallisate qixxaawatto woyitenna xiinxallisatto woyite aane noo biddishsha harunsi.a

• Gufo nabbabbine, xaꞌmuwa hasaabbe

• “Nabbawi” yinoonni qummeeshshuwa nabbabbe; hattono rosaanchu qummeeshshu hedo huwatanno gede kaaꞌle

• Viidiyo laꞌinihu gedensaanni, qixxeessinoonni xaꞌmuwa horoonsidhine hasaabbe

• Mitto roso mitte higgine xiinxallissine gudate woꞌnaalle

Soqqantinanni woyite hasaawissinanni manchi hasatto afate biroshere elle. (“Manna Umo Hasaawinseemmo Woyite Hegerera Hagiidhitanni Heeꞌra Dandaatto! Yitanno Biroshere Ela Dandiineemmo Gara” yitanno saaxine lai.) Biroshere xiinxallissine guddinihu gedensaanni, rosaanchu lede xiinxalla hasiꞌriro maxaafa eltine, 4^ki rosinni hanaffe. Mitto mancho Maa Ronseemmo? yaanno maxaafanna Maganu Baxilli Giddo Heedhe yaanno maxaafa xiinxallissinanni heedhinoonniha ikkiro, xiinxallo Hegerera Hagiidhitanni Heeꞌra Dandaatto! yaanno maxaafira qoltine meekki rosinni hanaffinanniro doorre.

QULLAAWU MAXAAFI XIINXALLORA HAWALLE KEERE DAYITTO YITANNO VIIDIYO LAꞌINIHU GEDENSAANNI, AANTE NOO XAꞌMUWARA DAWARO QOLATE WOꞌNAALLE:

• Qullaawu Maxaafi rosaano haaru maxaafinni maa maa rossanno?

• Tenne viidiyo haaro rosaanora leellisha hasiissannonkehu mayiraati?

• Rosaanchu hiittee hiittee mixo fushshiꞌre wonshiꞌranno gede ganyine jawaachisha hasiissannonke?—“Mittu Mittunku Gafita Qara Hedonna Mixo” yitanno sanxarazhe lai.