Maganuwiinni Dayinoha Dancha Duduwo!
Yitanno Biroshere Horoonsiꞌnanni Gara Manna Galagalle Marre Hasaawinseemmonna Qullaawa Maxaafa Xiinxallinseemmo Gede Ninke Kaaꞌlate Qixxeessinoonnita Haaro Biroshere
1. “Wodanakki Agadhi!”yaannohu awuraajju gambooshshira fultinoti manna galagalle hasaawisatenna xiinxallo jammarsiisate kaaꞌlitannoti haaro biroshere hiittenneeti?
1 “Wodanakki Agadhi!” yinannihu Awuraajju Gambooshshira manna galagalle marre hasaawisatenna Qullaawa Maxaafa xiinxallisate kaaꞌlitannonketa haaro biroshere afiꞌnoommohura lowo geeshsha hagiidhinoommo. Maganu Ninke Ma Assinammora Hasiꞌranno? yitanno biroshere gede Maganuwiinni Dayinoha Dancha Duduwo! yitanno biroshere harammadda roso amaddino; xaate Maganu Ninke Ma Assinammora Hasiꞌranno? yitanno biroshere bayicho tenne biroshere horoonsiꞌneemmo. Tini minunni mine haꞌne soqqammanni wote hirbu aana heeꞌne Qullaawu Maxaafi xiinxallo jammarsiisate kaaꞌlitanno. Maganu Ninke Ma Assinammora Hasiꞌranno? yitanno biroshere Kiristaanu agadha hasiissannonsa seera xawissanno; ikkollana togoo rosi haaro Qullaawu Maxaafi rosaanora adhate kabbaadansara dandaanno; tini haaro biroshere illachishshannohu kayinni Qullaawu Maxaafi giddo noohu danchu duduwi aanaati.—Looso 15:35.
2. Dancha Duduwo yinanni biroshere qixxeessinoonnihu mayiraati?
2 Tenne biroshere qixxeessinoonnihu mayiraati? Alamete qooxeessira noo roduuwinke, mannu halaale qallaalunni huwatanno gede kaaꞌlannohunna Qullaawa Maxaafa rosiisate horoonsiꞌneemmohu qaru uduunnichinkewa yaano, Qullaawu Maxaafi Roso yinanni maxaafiwa saꞌnara albaanni xiinxallinanni borro afiꞌrate xaꞌmitanni keeshshitino. Maxaafa lae waajjanno manni roore wote biroshere horoonsiꞌne Qullaawa Maxaafa xiinxallinsanninsata digiwanno. Qoleno, tini biroshere qallaale ikkitino daafira batinyu afiinni tirroonni.
3. Tini biroshere wole borruwankenni baxxitannohu mayinniiti?
3 Qixxeessinoonni Gara: Batinye borronke qixxeessinannihu mannu kaaꞌlannonsahu hoogiro nafa nabbawe halaale huwatanno gede assineeti. Tini borro kayinni wole borronni baxxitinote. Tenne borro qixxeessinoonnihu Qullaawa Maxaafa xiinxallannohura biddishshu gede ikkite kaaꞌlitanno gedeeti; qoleno xiinxallisannohu hasiisanno. Konni daafira, tenne biroshere mannaho elleemmo wote mitte woy lame gufo ledonsa hasaambe kaꞌne ela danchate. Guffa harammadda ikkitinohura hirbu aana heeꞌnenni woy daddalu basera nafa hasaawa dandiinanni. Umi rosi xiinxallo jammarsiisate dancha ikkirono, birosherete giddonni hasiꞌnummo roso doorre xiinxallo jammarsiisa dandiineemmo.
4. Tini biroshere Qullaawa Maxaafa horoonsiꞌne rosiinseemmo gede kaaꞌlitannonkehu hiittoonniiti?
4 Batinye borronke giddo qoolaho hundaho noo xaꞌmuwara dawaro heedhannohu guffate giddooti. Tenne borro giddo noo xaꞌmuwara roore basera dawaro qollannihu kayinni Qullaawu Maxaafi giddonniiti. Rooru manni borronkenni rosantenni Qullaawu Maxaafinni rosiinsansara hasiꞌranno. Konni daafira, tenne biroshere giddo qummi assinoonnita roore xiqisubba fooliishshonna kiiro ikkinnina assaawe diborreessinoonni. Qummi assinoonni xiqisubba Qullaawa Maxaafa fanne nabbawa hasiissanno. Togo assa, xiinxallitanno mannooti, rossanni noori Maganuwiinni dayinoha ikkinota huwattanno gede kaaꞌlitannonsa.—Isa. 54:13.
5. Xiinxallisannohu ayewoteno xiinxallisara albaanni seekke qixxaawa hasiissannosihu mayiraati?
5 Tini biroshere baalanta xiqisubba dixawissanno. Mayira? Tenne biroshere qixxeessinoonnihu xiinxallannohu xaꞌmo xaꞌmanno gede jawaachishannonna xiinxallisanno rodii rosiisate dandoosi horoonsiꞌranno gede kaaꞌlanno garinniiti. Konni daafira, ayewoteno xiinxallinsara albaanni balanxe seekkine qixxaawa hasiissanno. Ikkollana, kiꞌne lowore coyidhinannikki gede qorophe. Xiqisubba xawisa baxisannonkeha ikkirono, xiinxallanno manchi xiqise yitannore mageeshsha buuxinoro kulanno gede assa roore woyyitanno. Hayyotenni xaꞌmo horoonsiꞌne xiinxallannohu mitte mittenti xiqise yitannore wodanchanno gede kaaꞌla dandiineemmo.—Looso 17:2.
6. Tenne biroshere (a) Maganu noota huluullamannonna Qullaawa Maxaafa ammanannokki manni heeꞌranno qooxeessira soqqamate, (b) minunni mine haꞌne soqqamate, (c) xaaddote Qullaawu Maxaafi xiinxallo jammarsiisate, (d) manna galagalle marre hasaawisate horoonsiꞌra dandiineemmohu hiittoonniiti?
6 Qullaawa Maxaafa xiinxallisate horoonsiꞌneemmote wole borruwanke gede, aganu giddo wole borro ellanniha ikkirono tenne biroshere ayewoteno ela dandiineemmo. Tini biroshere, batinye halashshaanora hirbu aana heedhenni xaaddote Qullaawa Maxaafa xiinxallisate injiitannonsa yine hendeemmo. Qoleno, awuraajju gambooshshira ronsummonte gede, tenne borro hasatto afiꞌrino manna galagalle marre hasaawisate horoonsiꞌnummoro, “manna galagalle marre hasaawisa lowonta baxissannonke gede assitanno!”—Qoola 7-9 geeshsha noo saaxinna laꞌe.
7. Dancha Duduwo yinanni biroshere horoonsiꞌne Qullaawa Maxaafa xiinxallisa dandiineemmohu hiittoonniiti?
7 Tenne Birosherenni Xiinxallinseemmo Gara: Duꞌminse borreessinoonni xaꞌmo nabbabbine hasaawa jammara dandiitinanni. Hakkiinnino, gufo nabbabbine kaꞌiniro haawiissine borreessinoonni xiqise woy xiqisubba nabbabbe. Hayyotenni xaꞌmo xaꞌmitine minu anni xiqise yitannore huwatanno gede kaaꞌle. Aantino gufora saꞌinara albaanni xiinxallissinannihu hasaabbinoonnire wodanchinoronna teꞌee afate duꞌminse borreessinoonni xaꞌmo xaꞌme. Umi qara hasaawinseemmo wote duꞌminse borreessinoonnita mitte xaꞌmo calla hasaawa baqe ikkitara dandiitanno. Sunu sununni gedensaanni mitto roso gudinse hasaawa dandiineemmo.
8. Xiqisubba fanneemmo woy nabbambeemmo wote mayyaa hasiissannonke? Mayira?
8 Tenne biroshere giddo “nabbawi” yaanno qaali noo xiqisubba, duꞌminse borreessinoonni xaꞌmora xaaddote dawaro qoltannote. Xiqise fantinanni wote, “Phaawuloosi togo yee borreessino,” woy “Hanni Ermiyaasi mayyee masaalinoro lai” yitinoonte. Hatto yitinanniha ikkiro, xiinxallannohura mannu coyiꞌrinore nabbabbinanni heedhinoonniha lawasira dandaanno. Konni daafira xiqise nabbambeemmo wote, “Maganu Qaali togo yaanno,” woy “Qullaawu Maxaafi giddo mayine masaalloonniro lai” yaa woyyitanno.
9. Xiinxallinseemmo wote baalanta xiqisubba nabbawa hasiissannonke?
9 Baalanta xiqise nabbawa hasiissannonkenso, “nabbawi” yinoonni xiqisubba calla nabbambeemmo? Baalanta woy gama xiqisubba nabbambanni gede assannori heeꞌranno woti no. Mitte mittenta xiqise qummi assinoonnihu hendeeti. Mitte mittenti hasaambannire afidhinote. Mito wote kayinni, xiinxallannohu muddamannoha, hakkeeshshi geeshsha hasiꞌrannokkiha woy gari geeshsha nabbawa dandaannokkiha ikkiro, “nabbawi” yitanno xiqisubba calla nabbawa dandiitinanni.
10. Xiinxallanno manna Qullaawu Maxaafi Roso yinanni maxaafiwa sayisa dandiineemmohu mamooteeti?
10 Qullaawu Maxaafi Roso Yinanni Maxaafiwa Saꞌneemmohu Mamooteeti? Haammata hinge xiinxallinse xiinxallo biso assiꞌranno gede assinummo gedensaanni, Qullaawu Maxaafi Roso yinanni maxaafiwa saꞌꞌa woy Dancha Duduwo yinanni biroshere guda geeshsha xiinxallisa dandiineemmo. Tennera halashshaano seekkite assaabbe uminsa wossana dandiitanno. Qullaawu Maxaafi Roso yinanni maxaafiwa saꞌneemmo wote, umi fooliishshonni jammara hasiissannonke? Tennera fushshinoonni higge dino. Mittu manchi wolu manchinni baxxanno. Ikkollana, Qullaawa Maxaafa xiinxallannohu rooru manni albaanni haranchunni rosinore, galagale Qullaawu Maxaafi Roso yinanni maxaafinni halaꞌladunni rosannoha ikkiro roore huwatanno.
11. Tenne haaro biroshere seekkine horoonsiꞌra hasiissannonkehu mayiraati?
11 Alamete aana danchu duduwi ajanni haꞌrino yannara, ninke ayee duduwinni roore hagiirsiisanno duduwo duduwate, yaanno Maganu Mangiste gashshitanni nootanna tini Mangiste muli barra xalalle woꞌmitinota haaro alame abbitannota kulate kaajja mabte afiꞌnoommo! (Mat. 24:14; 2 Phe. 3:13) Konne hagiirsiisanno duduwo macciishshannohu batinyu manni tenne qullaawu ayyaaninni borreessantino assaawe ledo sumuu yaannota dihuluullammeemmo: “Dancha duduwo haare daanno, salaame duduwanno, danchuri daannota duduwanno, gato duduwanno, hattono Tsiyooni, ‘Maganikki nugusa ikkino’ yaanno manchi lekka ilaallate aana hiittoo biifadooti!” (Isa. 52:7) Baalunku tenne haaro biroshere killilenke giddo heeꞌrannohura ayyaanaamittetenni goorino mannira Maganuwiinni dayinoha dancha duduwo kulate horoonsiꞌno!
[Qoola 7 noo saaxine]
Maganu Noota Huluullamannonna Qullaawa Maxaafa Ammanannokki Manni Noo Qooxeessira:
● Mitu mitu qooxeessira mannu “Magano” woy “Qullaawa Maxaafa” yinanna macciishshiro hasaawa dihasiꞌranno. Togoo qooxeessira umo manna coyishiinsheemmo wote hakko qooxeessira mannu afa hasiꞌrannore, lawishshaho danchu gashshooti hasiisannohu mayiraatiro, maate danchu garinni amaxxate kaaꞌlannore, woy albillitte ikkannore kayinse hasaawisa woyyitannoha ikkara dandaanno. Haammata hinge hasaambe Maganu no yineemmo gede assinonkerenna Qullaawu Maxaafi ammannanniha ikkinohu mayiraatiro xawinsummohu gedensaanni, Dancha Duduwo yinanni biroshere ela dandiineemmo.
[Qoola 8 noo saaxine]
Minunni Mine Haꞌne Soqqammeemmo Wote:
● “Maganu albillittete mannu oosora assate hedinore afa dandiinanni gara mannu ledo hasaambanni heeꞌnoommo. Maganu qarru giddonni fushshannonke yanna dagga ikka yite hedde egennootto? [Dawaro qola geeshsha agari.] Tini biroshere tenne xaꞌmora dawaro Qullaawu Maxaafi giddo hiikko nooro afatto gede kaaꞌlitannohe. [Biroshere uyittosi gedensaanni, roso 1 umi gufonna Ermiyaasi 29:11 nabbawi.] Xa hasaambummo garinni, Maganu albillitte dancha heeshsho heeꞌnammora hasiꞌrannoha lawannohe? [Dawaro qola geeshsha agari.] Tenne biroshere adha hasiꞌrittoro eemmohe. Tenne xaandeemmo wote, ‘Maganu mannu ooso qarru giddonni fushshannohu hiittoonniiti?’ yitanno xaꞌmora Qullaawu Maxaafi giddonni dawaro afiꞌrate layinki gufo hasaambeemmo.” Coyishiishootto manchi muddamannokkiha ikkiro, hakkawotenni layinki gufonna hakko qummi assinoonnita sasenta xiqise nabbabbine hasaawa dandiitinanni. Hakkiinnino galagalte marte hasaawisatto wote hakko rosita layinki xaꞌmo hasaawate qaxaro amadi.
● “Lowo manni huuccatto assiꞌra baxanno; qarru iillinsaro isinni roore huucciꞌranno. Ati huuccatto assiꞌratto? [Dawaro qola geeshsha agari.] Maganu mannu baalunku huuccatto macciishshannoha lawannohe? [Dawaro qola geeshsha agari.] Tini biroshere tenne xaꞌmora Qullaawu Maxaafi qolanno dawaro afate kaaꞌlitannote. [Biroshere uyittosi gedensaanni, roso 12, umi gufonna “nabbawi” yinoonni xiqisubba nabbawi.] Maganu huuccattonke macciishshannota afa hagiirsiissannote. Ikkollana, huuccattotenni roore horo afiꞌra dandiineemmo gede balanxe Magano seekkine afa hasiissannonke. [Roso 2 fante cinaano birxichuwa leellishisi.] Tenne biroshere adha hasiꞌrattoha ikkiro eemmohe; tenne xaandeemmo wote kuriuu lowo geeshsha hasiissanno xaꞌmuwara Qullaawu Maxaafi giddonni dawaro laꞌꞌa dandiineemmo.”
● “Tenne alame ikkito manna yaachishshanno daafira mannu ledo isere hasaambanni heeꞌnoommo. Tini alame woyyaabbannoha lawannohe? [Dawaro qola geeshsha agari.] Batinyu manni Qullaawu Maxaafi giddo nooha hexxo aannoha dancha duduwo macciishshanno wote lowo geeshsha xagge assiꞌranno. Tini borro Qullaawu Maxaafi giddonni dawaro afiꞌnannita mite mite xaꞌmo afidhino.” Biroshere uyitesi kaꞌe badhiidi qoolinni isi roore afa hasiꞌranno xaꞌmo doodhanno gede assi. Hakkiinnino doodhino xaꞌmo xawinsoonni roso fante xiinxallinanni gara leellishisi. Galagalte marte hakko rosi giddo noota aantino xaꞌmo hasaawate qaxaro amadi.
[Qoola 9 noo saaxine]
Xaaddote Xiinxallo Jammarsiisate Woꞌnaalle:
● “Techo kawa hige dawoommohu, Qullaawa Maxaafa xiinxallate qixxeessinoonnita haaro qixxaawo kullammoheraati. Tonaa onte roso afidhinoti tini biroshere lowo geeshsha hasiissanno xaꞌmuwara Qullaawu Maxaafi giddonni dawaro afiꞌrate kaaꞌlitanno. [Birosherenniha albiidinna badhiidi qoola leellishisi.] Qullaawu Maxaafi yaannore huwatate woꞌnaalte egennootto? [Dawaro qola geeshsha agari.] Hanni tenne biroshere giddo noo rosi mageeshshi geeshsha qallaaletero lai. [Sayikki rosi giddo sayikki xaꞌmo hunda noota umi gufonna Ajuuja 21:4, 5 nabbabbine hasaabbe. Injaannoha ikkiro aantino gufonna hundase noota “nabbawi” yinoonni xiqisubba nabbabbine hasaabbe.] Tenne biroshere adha hasiꞌrittoro eemmohe. Hanni Qullaawa Maxaafa ninke ledo ajayi ajeenna mitte higge xiinxallite lai. Hasaawu coommihero ledde xiinxallitanni haꞌra dandaatto. Tenne xaandeemmo wote umi roso hasaambeemmo. Kuni rosi mitto qoolaatilla.”
[Qoola 9 noo saaxine]
Manna Galagalle Marre Hasaawinseemmo Wote:
● Hasatto noonsa manna galagalle marre hasaawinseemmo wote, togo yaa dandiineemmo: “Tenne xaandummonku dikeereholla? Batinye hasiissanno xaꞌmora Qullaawu Maxaafi qolanno dawaro afate kaaꞌlitanno biroshere abboommohe. [Biroshere uyitesi kaꞌe, badhiidi qoola laꞌꞌanno gede kuli.] Ati roorenka hiitte xaꞌmora dawaro afiꞌra hasiꞌratto? [Dawaro qola geeshsha agari. Hakkiinnino isi doodhino xaꞌmo xawinsoonni rosi noowa fani.] Hanni tini biroshere tenne xaꞌmora Qullaawu Maxaafi giddonni dawaro afiꞌrate kaaꞌlitannonke gara laꞌno.” Mitte woy lame gufonna “nabbawi” yinoonni xiqisubba horoonsidhe xiinxallinanni gara leellishisi. Konni garinni Qullaawu Maxaafi xiinxallo jammarsiisitto yaate! Hasaawisootto manchira biroshere uyitesi kaꞌe wole wote xaadde hasaawate qaxaro amadi. Hakkoye roso xiinxallitine guddinihu gedensaanni rosaanchu wole roso doodheenna hasaawa woy umi rosinni jammara dandiitinanni.