Kalaqamu Dano Iillituhu Gedensaanni Kaaꞌla Dandiinanni Gara

Xaa yannara kalaqamu dano albinni roore rosantinota ikkitino. Dano kalaqantanno woyite, kaaꞌlo hasiissannonsare qinaawino garinni kaaꞌla hasiissanno. Aliidi Bisi baalante sinu biirora, Dano Kalaqantanno Woyite Kaaꞌlanno Goli heeꞌranno gede assinohu iseraati.

Konni golira loossanno roduuwi dano kalaqantinota affuro, halashshaanote mayi kaaꞌlo hasiissannoro afate bayichonkonni songote cimeeyye ledo xaaddanno. Dano abbitino gawajjo qooxeessu halashshaano biddi assa dandiitannokkita ikkituro, sinu biiro kaaꞌlo hasiissannonsare kaaꞌlate looso massagganno gede dandoo noonsa roduuwa gaantanno. Kuri roduuwi, roduuwu uminsa fajjonni kaaꞌlitanno gede woy mito coye shaqqillunni uyitanno gede xaꞌmitara hattono hasiisannore hirte beekkara dandiitanno.

Konni garinni kaaꞌla lowo horo afidhino. Tini, mannu wolqa mulla gooffannokki gede, coyi gurchaawannokki gedenna womaashshunna uduunnichu afimalannokki gede kaaꞌlitanno; roduuwu uminsanni calla kaꞌe assitannoha ikkiro togoo qarri kalaqamara dandaanno.

Sinu biiro shoontino roduuwi dano kalaqantinowa mageeshshi woxinna kaaꞌlannohu mageeshshi manni hasiisannoro murtanno. Qoleno insa qooxeessu gashshaano ledo hasaabbara dandiitanno; kuri gashshaano kaaꞌlo hasiissannonsa roduuwinkera ranke iillineemmonsa gede kaaꞌlitannonke. Hakko daafira, umiꞌnenni kaꞌine woxe gamba assitinoonte, dano kalaqantinowa mitore sokkinoonte woy kulliꞌnekkinni hakko qooxeessa hadhinoonte.

Ikkirono dano kalaqantanno woyite kaaꞌla hasiꞌneemmo. (Ib 13:16) Ammanate roduuwanke banxeemmonsa! Insa kaaꞌlate ma assa dandiineemmo? Roorenkanni, kalaqamu danonni gawajjantino roduuwiranna insa kaaꞌlitanni noo roduuwi daafira huuccatto assa dandiineemmo. Qoleno alamete doyicho loosi widoonni woxe fushsha dandiineemmo. Sinu biiro, Aliidi Bisi aanno biddishshi garinni kuni woxi roore hasiisannohu hiikko qooxeessiraatiro seekkite affino. Mittu mittunku konni loosira kaaꞌlama hasiꞌnummoro, Qooxeessunnite Akeekunna Gimbaatu Kifile Forme (DC-50) wonsha dandiineemmo.

BIRAAZILETE GOBBA LOLAHU BAASA GAWAJJINO YITANNO VIIDIYO LAꞌINIHU GEDENSAANNI AANTE NOO XAꞌMORA DAWARO QOLATE WOꞌNAALLE:

Biraazilete 2020nni lolahu dano kalaqantu gedensaanni Yihowa Farciꞌraasine manna kaaꞌlate assitinori giddo dhagge ikkinoheri maati?