Kalaqamu Dano Gawajjitinonsare Kaaꞌla

Sai diro yaano 2020nni batinye kalaqamu dano kalaqantino; qoleno alamete doyichora Koroonu fayya (COVID-19) ubbino. Yihowa Farciꞌraasine togoo qarri gawajjinore kaaꞌlitinohu hiittoonniiti?

Saihu 2020hu soqqanshote diro,a Aliidi Bisiti Qineessaanote Komite 28 miliyoone doolaareb fushshine kalaqamu dano gawajjitinore kaaꞌlinanni gede fajjitino. Konni garinni 200 saꞌanno dano gawajjitinore kaaꞌla dandiinoonni; kalaqantino dano giddo gama, Koroonu fayyaati, addi addi hombobalatteeti, Afirikaho fulino lolahooti, Venizuweelaho ubbino hudeetinna Zimbaawete gobba gantino moolleeti. Fushshotenni afiꞌnoonni woxe sagalete, waaho, gallanni minira, uduunneho, hattono xagichoho baantoonni; qoleno, minenna addi addi uduunne fiinannire hirate, hattono minna gatamarate horoonsiꞌnoonni. Hanni irdaatu loosi giddo gama laꞌno.

Koroonu Dhibba. Koroonu fayya alame woꞌmate aana roduuwinkera manninatensanna hedonsa gawajjitino hattono miinju qarri amadannonsa gede assitino. Insa kaaꞌlate alamete doyichora 800 saꞌannota Irdaatu Komite qixxeessinoonni. Tini komite roduuwaho hasiisannori maatiro buuxxe, rakke Qineessaanote Komitera kultanno; konni garinni Qineessaanote Komite hiittoo kaaꞌlo hasiissannoro afa dandiitanno.

Sai diro Irdaatu Komite batinyu roduuwi sagale, waa, fayyimma agadhate kaaꞌlannorenna xagicho afiꞌranno gede kaaꞌlitino. Mitu qooxeessira, Irdaatu Komite songote cimeeyye ledo kaaꞌlante roduuwu gashshootu aanno irdaata afidhanno gede assitino.

Yihowa Farciꞌraasine ikkinokki manni irdaatu loosonke wodanchino. Lawishshaho, Zaambiyaho Naakonde awuraajji gashshaanchi Fiildi Simiwiinga yinanni manchi togo yiino: “Lowo geeshsha qarrame noo manna kaaꞌlo hasiissannonsa yannara kaaꞌlitinoonni daafira galanteemmoꞌne.”

Angoolaho Sagalete Anje Qarrissino. Koroonu fayyanni kainohunni Angoolaho sagalete anje qarrissino; sagale hidhinanni waagino giira kaxxino. Batinyu roduuwinkera sagale hidha lowo qarra ikkitinonsa.

Biraazilenniti sinu biiro Angoolaho heedhanno roduuwira sagale sokkannonsa gede xaꞌminoonni. Fushshinoonni woxe danchu garinni horoonsiꞌra dandiinanni gede, roduuwu sagale ma garinni hirre sonkiro woyyannoro seekkite xiinxallituhu gedensaanni, coccolo ikkikkinni mitteenni hirtino. Hakko daafira, mitte mittente sagale waagi hodhishshunku ledo mereerimunni 22 doolaare calla ikkino; mittu mittunku uduunnichi giddo noo sagale lawishshaho, ruuze, baaqeelunna sagalete zayite 20 kg ikkitanno. Xaa geeshsha 33,544 kaartoone ikkitanno sagale sonkoonni; tini sagale xaphoomunni 654 meetiriki toone ikkitanno. Tenne sagale hakko qooxeessira noo sagale ledo gamba assineenna 50,000 saꞌꞌanno manni afiꞌra dandiino.

Irdaata uyinoonninsa roduuwi mayitino? Alekisaandire yinannihu Angoolaho xeertiꞌre noo qooxeessira heeꞌranno rodii togo yiino: “Tini Yihowa baxannoetanna callaꞌya ikkoommokkita leellishshanno tajeeti yee hedeemmo. Yihowa dirijjite giddo waagu nooe!” Maariza yinanniti qaaqquulle callase lossidhanno rodoo togo yitino: “Yihowa raareꞌya macciishshino. Isonna dirijjitesi galaxxeemmansa!”

Zimbaawete Gobbara Moolle Ubbeenna Kaaꞌlinoonni Kaaꞌlo. Saihu 2020hu soqqanshote diri giddo, Zimbaawete gobba buutote moolle gantino; hakko daafira lowo miliyoone ikkanno manni baasa hudiꞌrino. Zimbaawete gobbara heedhannori batinye Yihowa Farciꞌraasinerano gari sagale dinonsa.

Roduuwanke kaaꞌlate onte Irdaatu Komite qixxeessinoonni. Lowo xibbe ikkitanno halashshaano sagale usuranna hogowa kaaꞌlitino; qoleno mitootu makeennansannic sagale massinanni gede assite kaaꞌlitino. Saihu 2020hu soqqanshote diri giddo, 22,700 saꞌꞌanno mannira sagale shiqishate 691,561 doolaare fushshinoonni!

Irdaata uyini woyite, mitu roduuwira mine noonsari tae noonsa. Sagale uyininsata roduuwu Yihowa guwisidhino. Mitootu isinni Maganu Mangiste faarso faarsitino.

Mittu qooxeessira lame gunnootu roduuwinke, mitte mangistennita ikkitinokki dirijjite (NGO) mannaho irdaata uyitanno gara hasaabbara qixxeessitino gambooshshe marino. Ikkollana, hasaawu sunu sununni poletiku widira hige soorrami; hakko daafira, kuri roduuwi irdaata adhate yee insa yitinore assa giwe agure haꞌri. Insa kae haꞌri woyite mannu qacifatinonsa; qoleno, “Sagale afiꞌneemmo yitinella ninkewa dagginoonte!” yiinonsa. Ikkirono, lame lamala gedensaanni, hatti dirijjite nafa irdaata uyitukkinni, roduuwinke marte lamente roduuwira irdaata uyitinonsa!

Irdaatu loosi Zimbaawete gobbarano mannu Yihowa daafira macciishshanno gede assino. Lawishshaho, hanni shiimu qachira heedhannote Piriska woꞌnaalsha laꞌno. Moolle ubbe qarra kalaqqinoha ikkirono, mannu uulla loosiꞌranno woggara nafa Piriska Roowenna Arbe ganyite soqqansho fultanno. Qooxeessisera heeꞌranno manni ise qacifatanni togo yaanno: “Sabbakeemma yitayi maatekki hudeteyi shaattaraati.” Piriska kayinni togo yite qoltanno: “Yihowa soqqamaanosi horonta tuge diegennino.” Hakkiinni mulenni Yihowa dirijjite irdaata uyitinose. Mitu qachise manni tenne lae dhagge assiꞌre Piriska togo yiino: “Maganu horo dituginohe; hakko daafira ninkeno isi daafira lende afa hasiꞌneemmo.” Xa qachisera heeꞌrannohu lamalu manni raadoonetenni sayinsanniha songote gambooshshe macciishshanno.

Goofimarchu roore gambise dayi kiiro, kalaqamu dano lexxitanni hadhannoti egennantinote. (Maatewoosi 24:3, 7) Shaqqillunni, donate.jw.org aana kulloonnite addi addi doogganni fushshitinanni fushshora lowo geeshsha galanteemmoꞌne. Fushshitinanni fushsho, qarramino mannira hasiisannonsare hasiisannonsa yannara aate kaaꞌlitanno.