Cuuamate Qixxaawootto?

1. Mittu manchi mine miꞌna hanafara albaanni balaxe maa assa hasiissannosi?

HANNI mine miꞌnate kaino mancho hedi. Isi hiittoo mine miꞌna hasiꞌrannoro afino. Ikkina, isi hakkawoyintenni haꞌre mine miꞌnate hasiisannore hidhe miꞌna hanafannoni? Dihanafanno. Korkaatuno mine mina hanafara albaanni balaxe assa hasiissannosiri no; yaano minu mageeshshi woxe gudannoro ofolle mala hasiissannosi. Mayira? Korkaatuno, mine miꞌne gudate ikkanno woxi noosironna teꞌee afa hasiꞌranno. Isi fushshanno woxe balaxe ofolle maliro minesi miꞌne guxxara dandaanno.

2. Luqaasi 14:27-30 kultanno garinni cuuamattora albaanni seekkite heda hasiissannoheri maati?

² Yihowara noohe baxillinna galati cuuamate daafira hedatto gede assinohe? Hatto ikkiro, mine miꞌnate kaino manchi gede atino ofolte mala hasiissannohe. Hatto yineemmohu mayiraati? Hanni Yesuusi Luqaasi 14:27-30 coyiꞌrinore laꞌno. (Qummeeshsha nabbawi.) Yesuusi isi rosaano ikkate maa assa hasiissannoro coyiꞌrino. Yesuusi harunsaano ikkate iillannonke qarra cincineemmore ikkanna uminke horo agura hasiissannonke. (Luq. 9:23-26; 12:51-53) Hakko daafira cuuamattora albaanni Kiristoosi rosaancho ikkittoro iillannohere seekkite hedi. Hatto assittoro cuuamitto gedensaanni Maganoho ammanante soqqantanni heeꞌrate roore qixxaawoottoha ikkatto.

3. Konni birxichira maa ronseemmo?

³ Cuuante Kiristoosi rosaancho ikkate yite assattori gaabbisannore ikkinoni? Diꞌꞌikkino! Cuuamakki xaa yannarano ikko albillittete lowo atoote afiꞌratto doogo fantannohe. Hanni xa cuuamate daafira lowo geeshsha hasiissannota mite xaꞌmuwa laꞌno. Kuri xaꞌmuwara qolatto dawaro “Cuuamate qixxaawoommo?” yite ateneeto xaꞌmatto xaꞌmora dawaro afiꞌrate kaaꞌlitannohe.

MEESSANEETO MAGANOHO SAYISE AATENNA CUUAMATE DAAFIRA MAA AFA HASIISSANNOHE?

4. (a) Meessaneeto Maganoho sayise aate yaa mayyaate? (b) Maatewoosi 16:24 kultanno garinni ‘umonke kaadate’ yaa mayyaate?

⁴ Meessaneeto sayise aate yaa mayyaate? Cuuamattora albaanni heeshshokki Maganoho sayisse aa hasiissannohe. Heeshshokki Maganoho sayisse aatto woyite huuccattotenni isira soqqantanni heeꞌra hasiꞌrattota kulatto. Qoleno, heeshshokki Maganoho sayisse aatto woyite ‘umokki kaadatto.’ (Maatewoosi 16:24 nabbawi.) Xa ati Yihowaha ikkootto; tini qolte kaajja qoossooti! (Rom. 14:8) Xaanni hanaffe umikki hagiirre agurte Maganoho soqqamate illachishattota kuloottosi. Heeshshokki sayisse aakki shotinse laꞌnannikkiho Maganoho eootto qaaleeti. Yihowa konne qaale eꞌnammora digiddeessannonke. Eꞌnummoro kayinni wonshinammora hasiꞌranno.—Far. 116:12, 14.

5. Meessaneeto sayise aa cuuamate ledo xaadooshshe afidhinohu hiittoonniiti?

⁵ Meessaneeto sayise aa cuuamate ledo xaadooshshe afidhinohu hiittoonniiti? Heeshshokki Yihowara sayisse aattota atenna iso agurranna wolu manni diafanno. Cuuamattohu kayinni mannu albaanni duucha woyite woradu woy qoqqowu gambooshshiwaati. Cuuamatto woyite heeshshokki Yihowara sayisse oottota wolootaho leellishatto.b Hakko daafira, cuuamakki wolootu Yihowa woꞌmu wodanikkinni, woꞌma lubbokkinni, woꞌma hedokkinninna woꞌma wolqakkinni baxattota, hattono hegerera isira soqqantanni heeꞌrate doodhoottota affanno gede assitanno.—Maq. 12:30.

6-7. Umi Pheexiroosi 3:18-22 kultanno garinni cuuama hasiissannohu lamu korkaati maati?

⁶ Cuuama addinta hasiissanno? Hanni, Umi Pheexiroosi 3:18-22 geeshsha noo hedo laꞌno. (Qummeeshsha nabbawi.) Markaawe Nohi ammana leellishshunte gede cuuamakkino heeshshokki Yihowara sayisse oottota leellishshanno. Ikkina cuuama addinta hasiissanno? Ee. Cuuama hasiissannohu mayiraatiro Pheexiroosi xawisino. Umihunni, cuuama ‘gatissannohe.’ Kayinni cuuama gatissannonkehu Yesuusira noonke ammana leellinsheemmoha, hattono ninkera yee reyinotanna reyotenni kae xa iima “Maganoho qiniiteenni” noota ammanneemmoha ikkiro callaati.

⁷ Layinkihunni cuuammummoro “keeraancho tiia” afiꞌneemmo. Qoleno, heeshshonke Maganoho sayinse uyine cuuammummoro isi ledo baxxino jaalooma kalaqiꞌneemmo. Cubbinkera maaro adhineemmonna wodote kakkalo ammanneemmo daafira Yihowa gatona yaannonke. Hakko daafira, isi albaanni keeraanchu tiiꞌꞌi heeꞌrannonke.

8. Heeshshokki Yihowara sayisse uyite cuuamatto gede assannohehu qaru coyi maati?

⁸ Heeshshokki Yihowara sayisse uyite cuuamatto gede assannohehu qaru coyi maati? Qullaawa Maxaafa seekkite xiinxallootto daafira Yihowanna akattasi hattono isi hedanno gara rosootto. Yihowa daafira rosoottori wodanikki hagiidhanno gedenna iso lubbora baxatto gede assinohe. Heeshshokki Yihowara sayisse uyite cuuamatto gede assannohehu qaru coyi isira noohe baxille ikka hasiissanno.

9. Maatewoosi 28:19, 20 kultanno garinni, Annu, Beettunna qullaawu ayyaani suꞌminni cuuamate yaa mayyaate?

⁹ Wolu cuuamatto gede assannohe coyi Qullaawu Maxaafinni rosootto halaale ammanate. Hanni Yesuusi manna rosaano asse yee hajaji woyite yiinore laꞌno. (Maatewoosi 28:19, 20 nabbawi.) Yesuusi hajajo garinni cuuantannori “Annu, Beettunna qullaawu ayyaani suꞌminni” cuuama hasiissannonsa. Hatto yaa mayyaate? Qullaawu Maxaafi Yihowa, Beettisi Yesuusinna qullaawu ayyaani daafira kulanno halaale woꞌmu wodaninni ammana hasiissannohe. Kuni halaali wolqaataamohonna loosoho kakkaꞌꞌatto gede assahera dandaannoho. (Ibi. 4:12) Hanni kuri giddo gama wirro laꞌno.

10-11. Annu daafira rosse ammanootto halaali hiikkonneeti?

¹⁰ Hanni, Annu daafira rosootto halaale qaagi: Suꞌmisi “Yihowaati,” isi “uulla woꞌmate aana Woꞌmunkura Aliidiho” Isi “callu halaalaancho Maganooti.” (Far. 83:18; Isa. 37:16 NW) Isi Kalaqaanchonkeeti; qoleno, “Gato Kaaliiqiwiinni dagganno.” (Far. 3:8; 36:9) Isi cubbunninna reyotenni gatisankera hattono albillitte hegere heeshsho aankera qixxeessino qixxaawo no. (Yoh. 17:3) Heeshshokki Maganoho sayisse aakkinna cuuamakki Yihowa Farciꞌraasincho ikkoottota leellishshanno. (Isa. 43:10-12) Alamete doyichora noote Yihowa magansidhanno maate miila ikkatto; insa Maganu suꞌminni woshshamansanna suꞌmasi wolootaho kula hagiirsiissannonsa.—Far. 86:12.

¹¹ Qullaawu Maxaafi Annu daafira kulanno halaale huwata lowo ayirrinyeeti! Konne muxxe ikkino halaale ammanittoro, tini heeshshokki Yihowara sayisse uyite cuuamatto gede kakkayissannohe.

12-13. Qullaawu Maxaafi Yesuusi daafira kulannohu rosoottohunna ammanootto halaali hiikkonneeti?

¹² Beettu daafira aane noo halaale rositto woyite mayi macciishshaminohe? Kalqete alame giddo Yihowanni aane lowo silxaane noosihu Yesuusaati. Isi umisi fajjonni heeshshosi ninkera wodo asse uyino. Wodo ammanneemmota loosunni leellinshummoro, cubbinkera maaro afiꞌneemmo, Maganu ledo lubbora jaaloommeemmo hattono hegere heeshsho afiꞌneemmo. (Yoh. 3:16) Yesuusi Kakkalaanote Biilonkeeti. Isi wodote kakkalonni horo afiꞌnammoranna Maganu ledo lubbora jaaloommammora kaaꞌlankera hasiꞌranno. (Ibi. 4:15; 7:24, 25) Yesuusi Maganu Mangiste Moote ikkino daafira, Yihowa suꞌmasi qullaawa assannohu, bunshe hunannohunna albillitte Gannate ikkitanno uullara hegere atoote abbannohu isi widoonniiti. (Mat. 6:9, 10; Aju. 11:15) Yesuusi lawishshankeeti. (1 Phe. 2:21) Isi heeshshosi woꞌmatenni Maganu fajjo asse dancha lawishsha ikkinonke.—Yoh. 4:34.

¹³ Qullaawu Maxaafi Yesuusi daafira kulannore ammanittoro, Maganunniha muxxe Beetto baxatto. Kuni baxilli atino Yesuusi gede heeshshokkinni Maganu fajjo assatto gede kakkayisannohe. Tini heeshshokki Maganoho sayisse uyite cuuamatto gede assitannohe.

14-15. Qullaawu ayyaani daafira rossottohunna ammanootto halaali hiikkonneeti?

¹⁴ Qullaawu ayyaani daafira aane noo halaale rositto woyite mayi macciishshaminohe? Qullaawu ayyaani Maganu wolqaati ikkannina bisu dinosi. Yihowa qullaawa ayyaanasi Qullaawa Maxaafa borreessiisate horoonsiꞌrino; qoleno ayyaanu Qullaawu Maxaafinni nabbamboommore huwanteemmonna loosu aana hosiinseemmo gede kaaꞌlannonke. (Yoh. 14:26; 2 Phe. 1:21) Yihowa ayyaanisinni “jawa wolqa” aannonke. (2 Qor. 4:7) Ayyaanu dancha duduwo duduwate wolqa ikkannonke; hattono iillannonke fonqolo gargadhate, hexxo mudhineemmo gede assannore cincine saꞌꞌatenna qarra qeelate kaaꞌlannonke. Qoleno, dancha akatta ikkitinota “ayyaanu laalo” laalleemmo gede kaaꞌlannonke. (Gal. 5:22) Maganu iso addaxxitannoriranna ayyaana afiꞌrate giddonsanni huuccidhannorira mararikkinni aannonsa.—Luq. 11:13.

¹⁵ Yihowa magansidhannori, isira soqqantanno gede kaaꞌlansara qullaawa ayyaana addaxxa dandiitannota afansa lowo geeshsha jawaachishshannonsa. Qullaawu ayyaani daafira rosootto halaale ammanittoro, tini heeshshokki Maganoho sayisse uyite cuuamatto gede kakkayissannohe.

16. Xaa geeshsha maa ronsoommo?

¹⁶ Heeshshokki Maganoho sayisse uyite cuuamate doodhakki lowo geeshsha hasiissannote. Aleenni ronsummonte gede iillannohe qarra cincatenna umikki horo agurate sumuu yaa hasiissannohe. Ikkollana, afiꞌratto atooti aguratto coyinni lowo geeshsha rooranno. Cuuama gatissannohe; hattono Maganu albaanni keeraanchu tiiꞌꞌi heeꞌrannohe gede assitannohe. Cuuamate doodhatto gede assannohehu qaru coyi Yihowara noohe baxille ikka hasiissanno. Qoleno, Annu, Beettunna qullaawu ayyaani daafira rosootto halaale woꞌmu wodanikkinni ammana hasiissannohe. Aleenni ronsummore hiincittohu gedensaanni, “Cuuamate qixxaawoommo?” yite ateneeto xaꞌmatto xaꞌmora mayite qolatto?

CUUAMATTORA ALBAANNI MAA ASSA HASIISSANNOHE?

17. Mittu manchi cuuamara albaanni assa hasiissannosiri maati?

¹⁷ Cuuamate qixxaawoommo yite hedattoha ikkiro, balaxxe Yihowa ledo dancha jaalooma kalaqiꞌrate lowore assoottoti dihuluullissannote.c Qullaawa Maxaafa ganyite xiinxallakkinni Yihowanna Yesuusi daafira lowore rosootto. Ammanakki lexxitino. (Ibi. 11:6) Qullaawu Maxaafi giddo nooha Yihowa eino qaale seekkite ammanootto; hattono Yesuusite wodote kakkalora noohe ammana cubbunninna reyotenni gatissannoheta ammanootto. Cubbikkira maaro eootto; hattono loosootto soꞌrora lowo geeshsha dadillootto; qoleno, Yihowa gatona yaannohe gede huucciꞌrootto. Albiha busha assootekki effidhe gibbe Maganu hagiidhanno garinni heeꞌra hanafootto. (Soq. 3:19) Ammanakki daafira wolootaho kulate quqquxamootto. Cuuamoottokki halashshaancho ikkite soqqamate ikkado ikkootto; hattono songote roduuwi ledo sabbaka hanafootto. (Mat. 24:14) Konne lowo geeshsha hasiisanno coye assootto daafira Yihowa hagiidhino.—Law. 27:11.

18. Cuuamattora albaanni assa hasiissannohehu wolu coyi maati?

¹⁸ Cuuamattora albaanni assa hasiissannohehu wolu coyino no. Aleenni ronsummonte gede heeshshokki Maganoho sayisse aa hasiissannohe. Huuccattotenni isiwa shiqqe heeshshokki woꞌmatenni fajjosi assa hasiꞌrattota kuli. (1 Phe. 4:2) Hakkiinni cuuama hasiꞌrattota cimeeyyete bisi qineessaanchira kuli. Isi cimeeyye hasaawissannohe gede assanno. Cimeeyyete ledo hasaawa waajjitooti. Kuri muxxe roduuwi bashshonni egentinohetanna baxxannoheta qaagi. Insa rosoottoha Qullaawu Maxaafiha xintu roso ate ledo wirro laꞌanno. Cimeeyye rosoottore huwatoottoronna teꞌee afa, hattono meessaneeto Maganoho sayisse aanna cuuama hasiissannota ikkitinota afoottota buuxa hasidhanno. Cuuamate ikkado ikkoottota buuxxuro aanannohu qoqqowu woy woradu gambooshshiwa cuuamatto gede kultannohe.

CUUAMITTO GEDENSAANNI MAA ASSA HASIISSANNOHE?

19-20. Cuuamittohu gedensaanni maa assa hasiissannohe? Hatto assa dandaattohu hiittoonniiti?

¹⁹ Cuuamitto gedensaanni maa assa hasiissannohe?d Heeshshokki Maganoho sayisse aa xano ikkitinotanna Yihowa tenne xano wonshattora hasiꞌrannota qaagi. Hakko daafira cuuamittohu gedensaanni eootto qaali garinni heeꞌra hasiissannohe. Hatto assa dandaattohu hiittoonniiti?

²⁰ Songokki roduuwiwa aana agurtooti. Xa cuuamootto Kiristaancho ikkootto daafira ‘roduuwu’ maamari miila ikkootto. (1 Phe. 2:17) Songokki roduuwi ayyaanaamittete maatekkiiti. Ganyite gambooshshe hadhe insa ledo noohe jaalooma kaajjishiꞌri. Qullaawa Maxaafa barru baala nabbabbe hiinci. (Far. 1:1, 2) Qullaawa Maxaafa nabbawittohu gedensaanni yanna gaaꞌmite nabbawoottore hiinci. Hatto assittoro nabbawootto qaali wodanakki loosoho kakkayisara dandaanno. ‘Jaatte huucciꞌri.’ (Mat. 26:41) Giddokkinni huucciꞌrootto huuccatto Yihowawa shiqatto gede assitannohe. ‘Balaxxe Maganu Gashshoote hasiꞌri.’ (Mat. 6:33) Heeshshokki giddo sabbakate looso balaxisiisattoha ikkiro, hatto assa dandaatto. Ganyite sabbakattoha ikkiro, ammanakki kaajjado ikkitanno hattono wolootu hegere heeshsho afidhanno gede kaaꞌlattora dandaatto.—1 Xim. 4:16.

21. Cuuamakki marichira doogo fantannohe?

²¹ Heeshshokki Yihowara sayisse uyite cuuamate doodhatto doorshi assattohu wolu baalunku coyinni roorinoho. Tennera umikki horo agura hasiissannoheti egennantinote. Ikkina agurattorinni afiꞌratto atooti rooranno? Ee rooranno! Tenne alamera iillannohehu baalunku qarri ‘shiimahonna saꞌꞌannoho.’ (2 Qor. 4:17) Cuuamakki xaa yannara hagiirru noo heeshsho heeꞌrattonna albillitte “halaalaancho heeshsho” heeꞌratto faro fantannohe. (1 Xim. 6:19) Hakko daafira “Cuuamate qixxaawoommo?” yitanno xaꞌmo huuccatto assidhe seekkite hedi ballo.