Heeshshoꞌya Maganoho Sayise Aanna Cuuama Hasiissannoe?

1. Konne maxaafa seekkite xiinxallitto gedensaanni mayite hedattoha ikkara dandaanno?

KONNE maxaafa xiinxallite, batinye Qullaawu Maxaafi halaale rosootto; lawishshaho, Maganu hegere heeshsho aankera qaale einota, reyino manni noo gara, hattono kaote hexxo daafira rosootto. (Rosiisaancho 9:5; Yohaannisi 5:28, 29; Yohaannisi Ajuuja 21:3, 4) Yihowa Farciꞌraasine gambooshshe haꞌra hanafoottohanna Magano halaalunni magansidhannori insa ikkitinota ammanoottoha ikkara dandaanno. (Yohaannisi 13:35) Qoleno, Yihowa ledo jaalooma kalaqiꞌroottohanna isira soqqamate murciꞌroottoha ikkara dandaanno. Konnira, ‘Maganoho soqqamate maa assa hasiissannoe?’ yite heddanni noottoha ikkara dandaanno.

2. Itiyophiyu manchi cuuama hasiꞌrinohu mayiraati?

² Biꞌre Yesuusi waro heeꞌrinohu mittu Itiyophiyu manchino tenne hedino. Yesuusi reyotenni kaihunni shiima yanna gedensaanni, rosaanchisi Filiphoosi konni manchira sabbakino. Filiphoosi, kuni manchi Yesuusi Mesihicha ikkinota buuxanno gede kaaꞌlino. Hakku Itiyophiyu manchi rosino rosi dhagge ikkinosi daafira, bayichonko togo yii: “Kuneeti kawiicho wayi no; cuuama hoolannoeri nooni?”—Soqqamaasinete Looso 8:26-36.

3. (a) Yesuusi rosaanosi mayyee hajajino? (b) Cuuama hasiissannohu ma garinniiti?

³ Qullaawu Maxaafi, Yihowara soqqama hasiꞌrittoro cuuama hasiissannoheta xawise kulanno. Yesuusi rosaanosira togo yiino: “Gosa baala . . . cuuꞌinanni rosaanoꞌya asse.” (Maatewoosi 28:19) Qoleno Yesuusi umisi cuuame lawishsha ikkino. Isi cuuami wote waa winxoonnisiha ikkikkinni wayi giddora gudisame eino. (Maatewoosi 3:16) Yannankerano mittu Kiristaanchi cuuamanno wote, wayi giddora gudisame ea woy lixa hasiissannosi.

4. Cuuamanke mannu maa afanno gede assitanno?

⁴ Cuuamakki, addinta Maganu jaala ikkanna isira soqqama hasiꞌrattota mannu afanno gede assitanno. (Faarso 40:7, 8) Konni daafira, ‘Cuuamate maa assa hasiissannoe?’ yite hedattoha ikkara dandaanno.

EGENNONNA AMMANA HASIISSANNOHE

5. (a) Cuuamattora albaanni umo hasiisannoheri maati? (b) Songote gambooshshi lowo geeshsha hasiisannohu mayiraati?

⁵ Cuuamattora albaanni, Yihowanna Yesuusa afa hasiissannohe. Qullaawa Maxaafa xiinxallite wonanni insa afa hanaffe nootto. (Yohaannisi 17:3 nabbawi.) Kayinni hakkeeshshi calla diꞌꞌikkanno. Qullaawu Maxaafi, Yihowa hedo ‘afate egenno woꞌmitannonke’ gede amaalannonke. (Qolasiyaasi Sokka 1:9) Yihowa Farciꞌraasine gambooshshi Yihowawa albinni roore shiqatto gede kaaꞌlannohe. Songote gambooshshe woꞌmanka wote haꞌra hasiissannohehu mittu korkaati konneeti.—Ibiraawoota 10:24, 25.

6. Cuuamattora albaanni Qullaawa Maxaafa mageeshshi geeshsha afa hasiissannohe?

⁶ Yihowa cuuamattora albaanni Qullaawu Maxaafi giddo noore baalankare afa hasiissannohe diyiino. Itiyophiyu manchono cuuamara albaanni woꞌmankare afa hasiissannohe diyiinosi. (Soqqamaasinete Looso 8:30, 31) Hegere geeshsha Yihoware rosanke diagurreemmo. (Rosiisaancho 3:11) Ikkirono cuuamattora albaanni, ajayi ajeenna Qullaawu Maxaafiha qara woy xinta ikkino roso afa hasiissannohe.—Ibiraawoota 5:12.

7. Qullaawa Maxaafa xiinxallakki kaaꞌlitinohehu hiittoonniiti?

⁷ Qullaawu Maxaafi togo yaanno: “Ammaꞌna nookkiha Magano hagiirsiinsara didandiinanni.” (Ibiraawoota 11:6) Konni daafira cuuamattora albaanni ammana hasiissannohe. Qullaawu Maxaafi, hunda Qorontoosi katamira heeꞌrannohu mitu manni Yesuusi rosaano rosiissannore macciishshihu gedensaanni, “ammane [cuuaminota]” kulannonke. (Soqqamaasinete Looso 18:8) Atino Qullaawa Maxaafa xiinxallakki, Maganu uyino hexxo hattono cubbunninna reyotenni gatissannonketi Yesuusi kakkalo afidhino wolqa ammanatto gede kaaꞌlitinohe.—Iyyaasu 23:14; Soqqamaasinete Looso 4:12; 2 Ximootewoosi 3:16, 17.

QULLAAWU MAXAAFI HALAALE MANNAHO KULI

8. Rosootto roso wolu mannira kulatto gede kakkayisannoheri maati?

⁸ Qullaawa Maxaafa xiinxallitanni haꞌritto kiironna heeshshokkira kaaꞌlannohe gara huwatitto kiiro, ammanakki jawaattanni hadhanno. Hakkiinni, rossanni noottore wolu mannira kula halchatto. (Ermiyaasi 20:9; 2 Qorontoosi 4:13) Ikkina ayeoora kula dandaatto?

9, 10. (a) Rosootto roso ayeoora kula hanafa dandaatto? (b) Songote ledo mitteenni sabbaka hasiꞌrittoro maa assa hasiissannohe?

⁹ Rosoottore miniꞌne mannira, jaallakkira, qachikki mannira, woy ledokki loosanno mannira kula dandaatto. Hatti danchate; kayinni woꞌmanka wote shaqqillunninna baxillunni kulinsa. Galte hossanni, songote ledo mitteenni sabbaka dandaatto. Hatto assate qixxaawoommo yite hedattoha ikkiro, Qullaawa Maxaafa xiinxallisanni noohe Farciꞌraasinchira songote ledo mitteenni sabbaka hasiꞌroottota kula dandaatto. Kulteenna isino qixxaawootto yee hedannoha ikkironna Qullaawu Maxaafi seeri garinni heedhanni noottoha ikkiro, lamunku lame songote cimeeyye ledo xaaddinanni gede assinanni.

¹⁰ Insa ledo xaaddinannihu maahooti? Hatti cimeeyye xinta ikkinoha Qullaawu Maxaafi roso huwatoottotanna ammanattota, heeshshokki giddo Qullaawu Maxaafi roso harunsattota, hattono addinta Yihowa Farciꞌraasincho ikka hasiꞌrattota buuxate hasaawissannohe. Cimeeyye songote giddo noore baalanka, ateno mitteenni, towaattannore ikkitino daafira insa ledo hasaawa waajjitooti. (Soqqamaasinete Looso 20:28; 1 Pheexiroosi 5:2, 3) Hatti cimeeyye hasaawissuhehu gedensaanni, songote ledo sabbaka hanafa dandaattoronna teꞌee kultannohe.

11. Songote ledo mitteenni sabbaka hanafattora albaanni heeshshokki biddi assiꞌra hasiissannohehu mayiraati?

¹¹ Miteekkite cimeeyye songote ledo mitteenni sabbaka hanafattora albaanni, heeshshokki giddo biddi assiꞌrattori gate noota kultahera dandiitanno. Heeshshokki giddo tenne coyibba biddi assiꞌra hasiissannohehu mayiraati? Mannaho Maganunnire kulleemmo wote, Yihowa riqimbe coyiꞌneemmo daafira isira ayirrinye abbanno garinni heeꞌra hasiissannonke.—1 Qorontoosi 6:9, 10; Galatiyu Sokka 5:19-21.

AAGINTAAWANNA HIGA

12. Mannu baalunku aagintaawa hasiissannonsahu mayiraati?

¹² Cuuamattora albaanni assa hasiissannohehu wolu coyino no. Soqqamaasinchu Pheexiroosi togo yiino: “Cubbiꞌne aguramannoꞌne gede aagintaabbine [woy, maaro eꞌine] Maganunniwa higge.” (Soqqamaasinete Looso 3:19) Aagintaawate yaa mayyaate? Loonsoommo soꞌro baalantera godowinta gaabbate yaate. Lawishshaho, fooranni heeꞌrino manchi aagintaawa woy maaro ea hasiissannosi. Heeshshokki woꞌmantenni gara ikkinore assate woꞌnaaltanni heeꞌroottoha ikkiro nafa, aagintaawa hasiissannohe; mayira yiniro, ninke baalunku soꞌneemmoreetinna Maganu maaro hasiissannonkereeti.—Roomu Sokka 3:23; 5:12.

13. ‘Higate’ yaa mayyaate?

¹³ Loosootto soꞌrora gaabba calla ikkitannoni? Diꞌꞌikkitanno. Pheexiroosi ‘higa’ hasiissannohetano coyiꞌrino. Hatto yaa albiha gara ikkinokki amanyoote aguranna gara ikkinore assate higa hasiissannohe yaate. Lawishshaho, hanni alba hadhe egennoottokki bayicho hadhanni noottohu gede assite hedi. Shiima geeshsha haꞌritto gedensaanni, raga soꞌroottota huwatitto. Hakkawote maa assatto? Agurte higge, gara ikkino raga higge haꞌrattoti egennantinote. Hatteente gede, Qullaawa Maxaafa xiinxallitto yannara, heeshshokki giddo biddi assiꞌra hasiissannohehu mitu rosichi noota huwatoottoha ikkara dandaanno. ‘Higate’ woy hasiisannore biddi assiꞌratenna gara ikkinore assa hanafate maahoyye yii.

HEESHSHOKKI MAGANOHO SAYISSE UYI

14. Heeshshokki Maganoho sayisse aattohu hiittoonniiti?

¹⁴ Cuuamattora albaanni assa hasiissannohehu wolu hasiisanno coyi heeshshokki Yihowara sayisse aate. Heeshshokki Yihowara sayisse aate yaa, xaate iso calla magansiꞌrattotanna heeshshokki giddo baalunku coyinni isi fajjo balaxisiisattota huuccattotenni kulte qaale eatto yaate.—Marro 6:15.

15, 16. Mittu manchi heeshshosi Maganoho sayise aanno gede kakkayisannosiri maati?

¹⁵ Yihowara calla soqqamate qaale ea, heeshshonke diro woꞌma mittu banxeemmo manchi ledo heeꞌrate qaale eate gedeeti. Hanni mittu beetti layiꞌrino beetto ledo egennamate ledose yanna sayisanni no yine hendo. Kuni beetti ise albinni roore egennanni haꞌranno wote, roore baxannose daafira ise adhate kaꞌꞌanno. Kuni shota coye ikka hoogirono, beettu ise baxanno daafira konne loosu qeecha duqqate maahoyye yaanno.

¹⁶ Yihowa affanni haꞌratto wote, iso roore baxatto daafira isira soqqamate dandaamihere baala assa hasiꞌratto. Tini, isira soqqamate huuccattotenni qaale eatto gede kakkayissannohe. Qullaawu Maxaafi Yesuusa harunsa hasiꞌrannohu baalunku ‘umisire agura’ hasiissannosita kulanno. (Maarqoosi 8:34) Hatto yaa mayyaate? Heeshshokki giddo Yihowa hajajo balaxisiisatto yaate. Umikki hasattonna mixonni Yihowa hasatto roortanno.—1 Pheexiroosi 4:2 nabbawi.

DANDAA HOOGEEMMO YITE WAAJJITOOTI

17. Mitu manni heeshshonsa Yihowara sayise aannokkihu mayiraati?

¹⁷ Mitu manni Yihowara soqqameemmo yee eoommo qaale wonsha hoogammora dandeemmo yee waajjanno daafira heeshshonsa isira sayise aa giwanno. Kuni manni Yihowa koffi assa dihasiꞌranno; woy heeshshonsa Yihowara sayise aa hoogiro, assanno coyira Yihowa dixaꞌmannoe yee hedanno.

18. Yihowa koffi assammora dandeemmo yite waajjattokki gede kaaꞌlannoheri maati?

¹⁸ Yihowara noohe baxilli iso koffi assammora dandeemmo yite waajjattokki gede kaaꞌlannohe. Iso baxatto daafira, eootto qaale wonshate dandaamihere baala assatto. (Rosiisaancho 5:4; Qolasiyaasi Sokka 1:10) Hakko daafira Yihowa fajjo wonsha wolqaꞌyara aleenniiti yite dihedatto. Soqqamaasinchu Yohaannisi togo yee borreessino: “Magano baxate yaa hajajosi agadhate; hajajosino kaajjado [woy, duha] diꞌꞌikkitino.”—1 Yohaannisi 5:3.

19. Heeshshokki Yihowara sayisse aa waajja hasiissannohekkihu mayiraati?

¹⁹ Heeshshokki Yihowara sayisse aate guuta mancho ikka dihasiissannohe. Yihowa horontanni dandiineemmokkire asse diyaannonke. (Faarso 103:14) Isi gara ikkinore assatto gede kaaꞌlannohe. (Isayaasi 41:10) Woꞌmu wodanikkinni Yihowa addaxxi; isi qole “hodhaanchokki suwashsho assannohe.”—Lawishsha 3:5, 6, NW.

AMMANAKKI FAAJJETE FARCIꞌRA

20. Heeshshokki Maganoho sayisse uyitto gedensaanni, aantete maa assatto?

²⁰ Heeshshokki Yihowara sayisse aate qixxaawoottoha lawannohe? Heeshshokki isira sayisse uyitto gedensaanni, hakkiinni aaninore assate qixxaawoottoha ikkatto. Aantete cuuama hasiissannohe yaate.

21, 22. Ammanakki faajjete ‘farciꞌra’ dandaattohu hiittoonniiti?

²¹ Heeshshokki Yihowara sayisse oottotanna cuuama hasiꞌroottota songoꞌnehu cimeeyyete bisi qineessaanchira kuli. Hakkiinni isi qara qara Qullaawu Maxaafi roso boode cimeeyye ledo galagalte hasaawatto gede assanno. Hatti cimeeyye cuuamate qixxaawoottota sumuu yituro, aane noohu Yihowa Farciꞌraasinehu woradu woy qoqqowu gambooshshiwa cuuama dandaattota kultannohe. Hakko gambooshshiwa, cuuamate yaa mayyaatero xawissanno lallawo shiqinshanni. Hattee lallawo shiqishanno rodii jeefote, cuuamate qixxaabbinore lame harancho xaꞌmo xaꞌmanno. Hattee xaꞌmuwara dawaro qolatto wote, ammanakki faajjete ‘farcidhanni’ nootto yaate.—Roomu Sokka 10:10.

²² Hakkunni gedensaanni cuuamatto. Cuuamatto wote wayi giddora gudisante eatto. Cuuamakki, laꞌꞌanno manni ateneeto Yihowara sayisse oottotanna xaate Yihowa Farciꞌraasincho ikkoottota huwatanno gede assitanno.

CUUAMAKKI MAA LEELLISHSHANNO?

23. “Annu, Beettunna Qullaawu Ayyaani suꞌminni” cuuamate yaa mayyaate?

²³ Yesuusi rosaanosi “Annu, Beettunna Qullaawu Ayyaani suꞌminni” cuuantannota coyiꞌrino. (Maatewoosi 28:19 nabbawi.) Hatto yaa mayyaate? Yihowa roorre, Yesuusi Maganu hedo woꞌmitanno gede uyinoonnisi qeechi maatironna Maganu fajjosi wonshate qullaawa ayyaanasi horoonsiꞌranno gara huwatootto yaate.—Faarso 83:18; Maatewoosi 28:18; Galatiyu Sokka 5:22, 23; 2 Pheexiroosi 1:21.

24, 25. (a) Mittu manchi cuuamasi maa leellishshanno? (b) Jeefote fooliishshora maa ronseemmo?

²⁴ Cuuama lowo tiro afidhino. Wayi giddora lixatto wote, hatti albi heeshshokkira reyoottota woy hattee heeshsho aguroottota leellishshanno. Wayi giddonni fulatto wote, Maganu fajjo assitanni heeꞌrate haaro heeshsho hanafootto yaate. Hatti xaate Yihowara soqqamattota leellishshanno. Heeshshokki sayisse oottohu mannaho, dirijjitete, woy loosoho ikkinokkita qaagi. Ateneeto sayisse oottohu Yihowaraati.

²⁵ Heeshshokki Yihowara sayisse aakki isi ledo muli jaaloomi heeꞌrannohe gede kaaꞌlitannohe. (Faarso 25:14) Hatto yaa kayinni mittu manchi cuuamino daafira calla gato afiꞌranno yaa diꞌꞌikkitino. Soqqamaasinchu Phaawuloosi togo yee borreessino: “Waajjatenninna huxiꞌratenni gatoꞌne woꞌma ikkitanno gede assidhe.” (Filiphisiyusi Sokka 2:12) Cuuama hanafotella. Ikkina Yihowawa gamba yite heeꞌra dandaattohu hiittoonniiti? Konni maxaafiti jeefote fooliishsho tenne xaꞌmora dawaro qoltanno.