Teese Heeꞌra Halchannokkihu Dino
Albillitte hiittoo heeshsho heeꞌra hasiꞌratto? Rooru manni halchannonte gede, atino umikkirano ikko maatekkira hagiirru woꞌminota, hattono ordu fayyimma, keerunna qawaaxxo noo heeshsho halchattoti egennantinote.
Ikkollana, batinyu manni albillitte halchanno gedee heeshsho heeꞌrannota huluullamanno. Mayira yiniro, alamete aana Koroonu fayyanna woluno togoori hedeweelcho daye mannu heeshsho umo lekkicho soorrino, buxima naqino, hattono lowo manna shiino. Hakko daafira, batinyu manni albillitte teense heeꞌneemmo yee dihedanno.
Mannu tenne huluullo giddo heeꞌre, albillitte teese heeꞌrate kaaꞌlannonsare afiꞌrate baasa sharramanni no. Mitu manni heeshshonke seekkitannoti kaayyote yee ammananno. Batinyu manni qole rosunna jiro hasiꞌrinore afiꞌrate kaaꞌlitannonsaha lawannonsa daafira kuri seekke harunsanno. Wolootu kayinni, teense heeꞌrate kaaꞌlannohu qaru coyi dancha mancho ikka callate yite heddanno.
Kuri coyibba giddo halchattota dancha heeshsho heeꞌrate kaaꞌlannohehu nooha lawannohe? Tenne afate, hanni aante noo xaꞌmuwa hiinci:
Isi addinta heeshsho seekkannori maati?
Teese heeꞌrate kaaꞌlannohu qaru coyi rosohonna jirote?
Dancha mancho ikka albillitte teense heeꞌnanni gede assitanno?
Teese heeꞌrate kaaꞌlannoha addaxxinanni biddishsha afiꞌra dandiineemmohu hiikkiinniiti?
Tini Agarooshshu Shae ittime kuri xaꞌmuwara dawaro afiꞌrate kaaꞌlitannohe.