Rosunna Jiro Teense Heeꞌnanni Gede Assitanno?

Batinyu manni, lowo roso rossinorinna dureeyye albillitte teesse heedhanno yee hedanno. Kuni manni, yuniversite eꞌꞌe rosino manchi loosanno dirijjitera, maatesiranna dagoomaho roore kaaꞌlannoha ikkanno yee ammananno. Qoleno duuchu manni lowo roso rosa lowo damooza intanni looso afiꞌrate kaaꞌlitanno, hattono lowo woxe afidhinori hagiirru noo heeshsho heedhanno yee hedanno.

BATINYU MANNI DOODHANNORE

Hanni Chayinaho ilaminohu Zhani Cheni coyiꞌrinore hedi. Isi togo yiino: “Buximatenni fulate yuniversitete digire hasiissannoe yee ammanoommo; qoleno lowo damooza afiꞌreemmo loosi heeꞌriero, hagiirrunna harshammo noo heeshsho heeꞌreemmo yee hedoommo.”

Batinyu manni albillitte woyyaabbino heeshsho heeꞌrate yee, egennantino yuniversite eate quqquxamanno; mitootu togoo roso rosa hasidhannohu wole gobba hadhe ikkara dandaanno. Koroonu fayya dagge wole gobba haꞌra hooltu yanna geeshsha, lowo manni tennera giidhe galannoha ikkino. Mitte dirijjite 2012nni fushshitino rippoorte togo yitanno: “Wole gobba hadhe roso rossanni noo rosaano giddo xibbunni 52 anga ikkitannori Iisiyu gobbuwanni dagginoreeti.”

Duucha woyite annuwunna amuuwu, oosonsa wole gobba hadhe yuniversite eꞌanno gede assate lowore daafurtanno. Tayiwaanete gobbara ilaminohu Chiishiyangi alba ikke sainore qaage togo yiino: “Anninkenna amanke hakkeya dureeyyete yinannire diꞌꞌikkino; ikkirono, ninke shoolenta oosonsa kolleejete roso ronsammora Ameerika soyinonke.” Annisinna amasi oosonsa rosiisiꞌrate yee, wolu batinyu annuwinna amuuwinte gede lowo asali giddora eino.

TINI ABBITINO GUMI MAATI?

Kuri seenni giddo mitte hashshiishidhe loossanni daafurtinotinna yaaddinoti mite kompiyuterete albaanni ofolte no. — Lowo roso rosinohunna jirote hoode haꞌrinohu batinyu manni, halchinori ikka hoogeenna dadillino

Rosu heeshsho mito geeshsha woyyeessannoti egennantinote; ikkollana rosaano halchitinore woꞌma woyite diwonshanno. Lawishshaho, batinye rosaano lowo asali giddora eꞌe lowo diro daafurte rossuhu gedensaanni, hasidhino looso hoogganno. Singapoorete gobbahu Biizines Tayimis yinanni gaazeexira fultinoti mitte rippoorte, “Yuniversitete maassante fultannori giddo looso hooggannori kiiro roore lexxitanni no” yitanno. Tayiwaanete heeꞌrannohu doktireete noosihu Jiyenjiye togo yiino: “Batinyu manni higaawa hooge, rosino rosi ledo mittoreno xaadannokki loosira eanno.”

Rossino rosinni looso afidhannorino, heeshshonsa insa halchitute gedeeta ikkitinokkita huwattanno. Tayilaandete ilaminohu Niirani Ingilizete gobbara yuniversitete maassamihu gedensaanni, rosino rosinni looso afiꞌri. Isi togo yiino: “Halchoommonte gede, nooe digirenni lowo damooza iteemmo looso afiꞌrummo. Ikkollana konne lowo damooza adhate seeda saate ukkaaname loosa hasiissinoe. Gedensoonni, looseemmo dirijjite anenna wole batinye loosaasine loosunni fushshite huntunke. Beꞌe yinikki heeꞌnanni gede assannohu mittu loosino nookkita huwatoommo.”

Dureeyyenna qawaaxxote heeshsho heedhannore nafa, maatete qarri amadannonsa, dhiwantanno, hattono woxeho yaaddanno. Jaappaanete ilaminohu Kaasutoshi togo yiino: “Alba qawaaxxiꞌre heeꞌreemmoho. Ikkirono, wolootu hinaassannoenna waajjishiishshannoe daafira hagiirraamo diꞌꞌikkoommo.” Veetinaamete heedhannoti mitte mancho togo yitino: “Batinyu manni, yaaddo nookkiha heeꞌrate kaaꞌlannonsaha lawannonsa daafira, lowo woxe afiꞌrate helli-buufi yaanna laeemma. Noore coyiꞌniro kayi, roore anga togoo manni roore yaadanno, fayyimma hooganno, hattono quwa saꞌino yaaddo amaddannonsa.”

ROSUNNA JIRO CALLA IKKITANNOKKI KORKAATA

Hige mittu manchi umisirano maatesirano hasiisannore wonshiꞌrate, roso mito geeshsha rosanna woxu hasiisannositi egennantinote. Ikkollana, teense dancha heeshsho heeꞌrate hakkeeshshi calla diꞌꞌikkanno. Mayira? Hanni Qullaawa Borro mayitannoro laꞌno.

LOWIIDI DIRIMI ROSI WOꞌMA WOYITE DIKAAꞌLANNO

“Rakke doddannori woꞌma woyite diqolchitanno; . . . wodancha noonsari woꞌma woyite didurooꞌmitanno; egenno noonsarira woꞌma woyite diqinaannonsa; korkaatuno yannanna hendoonnikki coyi baalanka amadanno.”—ROSIISAANCHO 9:11, NW.

Mittu manchi lowo roso rosinoha ikkiro nafa, seekkino heeshsho heeꞌra hoogara dandaanno; mayira yiniro, isi wolqara aleenni ikkinohu duuchu coyi no. Dagoomu giddo miinjunna poletiku qarri heeꞌriro, woy mannu kuꞌu koꞌoye beebba giwannoha ikkiro, lowo roso rosino manchi nafa hedinore assa hoogara dandaanno.

JIRO GEEDA HOOGGARA DANDIITANNO

“Jirote yite atenee orbaassooti; hakko daafurinni gatate egennaamo ikki. Jiro iima hige buuwanno allamurchi gede, ati laꞌanna hedeweelcho qoola assidhe buubbe baꞌanno.”—LAWISHSHA 23:4, 5.

Woxu mito geya wodanaaꞌminanni gede assara dandaanno. Togoo wodanaaꞌma kayi geedonnita diꞌꞌikkitino. Noohe woxe baalanka hedeweelcho hoogattora dandaatto. Kalaqamu dano, lawishshaho baattote huxano, dubbu giiranna hombobalatte mitto mancho mulla anganni gatisseenna umo worannowa nafa hoogara dandaanno.

WOXU DUUCHA WOYITE ANGA QARRA HAAꞌRE DAANNO

“Dureessaho . . . jirosi goxano diuyitannosi.”—ROSIISAANCHO 5:12.

Hongi Kongete heeꞌrannohura Firankliinira togoo coyi tuncu yiinosi. Isi lowiidi dirimi roso rosinohonna lowo damooza afiꞌrannoho. Hakkiinni iso loosu sooreessa assinisi. Isi togo yiino: “Yaaddo ordu fayyimmaꞌya gawajja hanaffu. Lowo geeshsha yaadeemmo daafira goxichu didaannoe.” Gedensoonni isi loososi loosa dandaannokki deerra iilli. Isi hakkawarita qaage togo yiino: “Isi togo ikke mayira loosayi daafurayi noommo yee heda hanafummo; qoleno heeshshote yaa ise tenneetilla yee hedeemmoha ikkummo.”

“Jirote yite atenee orbaassooti.”—LAWISHSHA 23:4

Firankliini gede batinyu manni, heeshshonke giddo lowiidi dirimi roso rosatenninna jirote hoode haꞌratenni saino coyi noota wodanchino. Kuri giddo mitootu, heeshsho seekkitannoti dancha mancho ikkatenna woleho danchare assate yite heddanno daafira hattee doogo hadhanno. Tini albillitte teense heeꞌnanni gede assitanno? Aane noo birxichira tenne xaꞌmora dawaro afiꞌneemmo.