Albillitte Teense Heeꞌneemmo Gede Kaaꞌlannonkeri Maati?

Saꞌu birxichuwara laꞌnummonte gede, mannu teese heeꞌrate kaayyo, rosonna jiro addaxxanni hattono dancha manna ikkate sharramanni keeshshino. Ikkollana togoore addaxxa, anfoonnikki bayicho haꞌnanni heeꞌne soꞌrisiisanno kaarta laꞌꞌate gedeeti. Hatto yaa kayi albillitte teense heeꞌnanni gede kaaꞌlannohu addaxxinanni biddishshi dino yaate? Deeꞌni!

TAALLE NOOKKI BUICHONNI AFIꞌNANNI BIDDISHSHA

Duucha woyite mitte dilgora kaꞌneemmo woyite, dirono egennono ninke rooranno manna amaaꞌlineemmo. Hatteente gede, dirono hayyono ninke koꞌo hune rooranno Maganiwiinni albillittete heeshshonkera ikkanno biddishsha afiꞌra dandiineemmo. Isi aanno amaale, mitu 3,500 diri albaanni borreessama hanafinohu mittu maxaafi giddo yaano Qullaawu Maxaafi giddo afiꞌra dandiineemmo.

Qullaawu Maxaafi kulannore addaxxineemmohu mayiraati? Korkaatuno konni Maxaafi Anni kalqete giddo taalle nookki hayyicha ikkinohuraati. Iso “Hegerera Heeꞌrannohu” hattono “hegere hegerera ati Maganoho” yinoonni. (Daanieeli 7:9; Faarso 90:2) Isi ‘gorduwa kalaqinoho’; qoleno “baatto seekke kalaqinohunna xintinohu isooti.” (Isayaasi 45:18) Isi suꞌmisi Yihowa ikkinota coyiꞌrino.—Fulo 6:3, lekkaalliidi qaagiishsha.

Qullaawu Maxaafi mannu baalunku Kalaqaanchi qixxeessino maxaafa ikkino daafira, mittu budi woy sirchi wole rooranno diyaanno. Kulanno amaale woꞌmanka woyite kaaꞌlitannote; qoleno baalante gobbara heeꞌranno manna kaaꞌlitino. Qullaawu Maxaafi geeshsha batinyu afiinni tirroonnihunna lowo mannira iillinohu wolu maxaafi dino.a Hakko daafira aye gobbara noo manchino nabbawanna amaalesi adha dandaanno. Tini baala taje Qullaawu Maxaafi umisi yaannori halaale ikkinota leellishshanno:

“Halaalinta Maganu manna [dimallaadanno] . . . Aye gosano ikkiro Maganu waajjannosihanna dancha loosannoha baxanno.”—SOQQAMAASINETE LOOSO 10:34, 35.

Oosonsa baxannonna kaaꞌlanno anninna ama gede, Maganu Yihowano Qaalisi Qullaawu Maxaafi widoonni baxillunni kaaꞌlannonke Annaati. (2 Ximootewoosi 3:16) Kalaqinonkehunna hagiirraamma ikkineemmo gede assannonkeri maatiro afinohu iso ikkino daafira, Qaalisi kulannonkere addaxxineemmo.

QULLAAWA MAXAAFA ADDAXXA DANDIINEEMMO

Qullaawu Maxaafi mitu 2,000 diri albaanni masaalinoti alamete ikkitonna mannu akati xa woꞌmanna laꞌnanni heeꞌnoommo daafira, Qullaawu Maxaafi albillittete yanna daafira kulannoreno addaxxa dandiineemmo.

ALAMETE IKKITO

“Gosa gosate aana, gashshootu gashshootu aana ola kayisanno. Addi addi darga baatto huxidhanno; woꞌmankawa hudenna dhibbu daanno.”—LUQAASI 21:10, 11.

MANNU AKATA

“Goofimarchu barra qarrissanno yanna daggannota afi. Mannu umosi baxannoha, woxe baxannoha, naaxxaleessa, boonaleessa, xonamaancho, iltinonsarira hajajamannokkiha, galata afiꞌrinokkiha, qullaawa heeshsho afiꞌrinokkiha, baxillu nookkiha, araara giwannoha, hemaancho, umosi qeeꞌlinokkiha, mararro afiꞌrinokkiha, danchumma giwannoha, yiinowa hosannokkiha, muddamaasincho, booꞌnatenni ufuufaminoha, Maganunni roorse qiniitesi baxannoha ikkanno.”—2 XIMOOTEWOOSI 3:1-4.

Qullaawu Maxaafi yannankera ikkanni noore mitturino gatikki lowo dirira albaanni kula dandiinohu hiittoonniiti? Hongi Kongete ilaminohu Loyingi yinanni manchi yiinorira atino sumuu yaattoti dihuluullissannote; isi togo yiino: “Qullaawu Maxaafi giddo noo masaalo borreessinoonnihu lowo diri albaanniiti. Tenne baala masaalo woꞌmitara albaanni mitturino gatikki balaxe coyiꞌra dandaannohu mittu manchino dino. Qullaawu Maxaafi, egennotenni manna koꞌo hune Roorannohu qixxeessino maxaafa ikkinota huwata dandiinanni.”

Qullaawu Maxaafi masaalo giddo lowo xibbe ikkitannoti woꞌmitino.b Tini, Qullaawu Maxaafi addinta Maganu Qaale ikkinota leellishshanno. Yihowa togo yiino: “Ani callu Maganoho; . . . ane gedeeha wole dianfanni. Ikkanno coye baala balaxe kuloommo; ikkara nooreno alba asse coyiꞌroommo.” (Isayaasi 46:9, 10) Hakko daafira, Qullaawu Maxaafi albillittete yanna daafira kulannore addaxxa dandaatto.

XAARANO IKKO HEGERERA KAAꞌLANNOHE BIDDISHSHA

Qullaawa Borro giddo noo amaale garinni heeꞌrattoha ikkiro, lowore kaaꞌlitannohe. Hanni mito lawishsha laꞌno.

WOXEHONNA LOOSOHO QUWA SAꞌꞌA HOOGA

“Lamente anganni loonsanni haafamantenni wodanu fooliishsho ledo, mitte anganni loonsoonnihu shiimu rooranno.”—ROSIISAANCHO 4:6.

MAATETE HEESHSHO

“Mittu mittunku galtesi umisi gede asse baxo. Galteno minaannase ayirrisso.”—EFESOONI SOKKA 5:33.

MANNU LEDO SUMUU YEE HEEꞌRA

“Ateno bunshete giddora eessannohena, fooggaltooti; hanqonna giirama aguri.”—FAARSO 37:8.

Qullaawu Maxaafi yaannore assattoha ikkiro, xa dancha heeshsho heeꞌratto; albillitteno hagiirru woꞌmino heeshsho ragiꞌratto. Qullaawu Maxaafi, Maganu albillitte dhagge ikkitanno heeshsho heeꞌnammora hexxo uyinonketa kulanno; hakka woyite afiꞌneemmo atooti giddo gamu:

KEERENNA HOBBAATE

“Atootenna keere afidhe hagiidhitanno.”—FAARSO 37:11.

BAALUNKU MINENNA SAGALE AFIꞌRANNO

“Manniꞌya, mine miꞌne heeꞌranno; woyineno kaasiꞌre laalose itanno.”—ISAYAASI 65:21.

DHIBBU WOY REYO DIHEEDHANNO

“Reyo woy dadillu woy wiꞌla woy shetto kunni kaꞌa diheedhanno.”—YOHAANNISI AJUUJA 21:4.

Albillitte togoo heeshsho heeꞌrate maa assa hasiissannohe? Tenne afate, aane noo birxicho nabbawi.

a Qullaawa Maxaafa tiratenna tuqisate loosi daafira ledde afate, www.jw.org aana LAYIBIRERE > ADDI ADDI VIIDIYO > QULLAAWA MAXAAFA yaannohu hunda lai.

b Ledde afate, Yihowa Farciꞌraasine qixxeessitinoha Qullaawu Maxaafi Maganu Qaaleetinso Mannunniho? (Amaaru Afoo) yaanno maxaafa fooliishsho 9 lai. Konne maxaafa www.jw.org aana afiꞌra dandaatto. LAYIBIRERE > MAXAAFFANNA BIROSHERUBBA yaannohu hunda lai.